Moisés henäng do panyyg n'aa hahỹỹh
2
Ti noo gó m', Isaraéw buuj seeh, Levi panaa, tagat'ëë däk ta ỹỹm pan'aa. Levi panaa na-ããj hẽ ta ỹỹm pan'aa. 2 Eta däg mäh ta ỹỹm, enyy däg mä ta t'aah. Aj'yy m'. Taheg'ããs mäh, anäm ti ta t'aah. Ti hyb n'aa m' tawén ejën däk Esito buuj mahä̃nh, tamawoob hẽ kamarab. 3 Tanahaja wäd bä tejën doo, tado däk arook jewii yb papiro häd näng do s'ëëb. Jari hadoo doo me tanetäg däk ta hood tamé tadatu hyb n'aa. Ti m' tadasuun jëë kän ta gó ta t'aah, teréd tu mä tamé tamii Niro häd näng doo nabyy me, jewii mahang, j'ooj tabadoo bä. 4 Da wë hã karapee ä̃nh bagëët, dawëë naa tabahag'ããs hyb n'aa.5 Ti m' Paraóh toog maruus awëënh tamé tabehop hyb n'aa. Tabehop nuu jé ta karom ỹỹj rababok ta takëën hã.a Tehob nuu jé m', tahapäh mä arook. Ti m' tamejũũ ta karom seeh tado nyyh hyb n'aa. 6 Arook tagas'ëës bä, tahapäh mäh karapee t'aah. Aoot mäh karapee. Tahapäh bä m', tat'yyd mehĩĩn mäh. Ti m' taky hadoo:
—Heber buuj seeh t'aah né hẽ hahỹỹh —näng mäh.
7 Ti m' karapee t'aah ä̃nh kajaa rabab'ëëh bä, ti m' Paraóh toog hã tabeaanh:
—Makarẽn Heber buuj ỹỹnh ỹ naëënh tanabii hyb n'aa? —näng mäh.
8 —Eej, taw'ããts hẽ, ahõm nä —näng mäh Paraóh toog.
—Mamahũũm hahỹỹh karapee t'aah. Manabi tah ỹỹ pan'aa da. Ỹ anoo da mahag'ããs do säm —näng mäh.
Ti m' karapee ỹỹn bado däk karapee, tamahũũm, tanabii, tawä kän. 10 Ti m' ta hãd ee däg is bä m', tamahũũm kän Paraóh toog wë. Paraóh toog t'aah hado däk tii bä. Ti m' Paraóh toog ky hadoo:
—Ỹ ado nyyh tamé hatu do paah.
Ti hyb n'aa ta häd n'oo däg mäh Moisésb.
Midijãn häj n'aa hẽnh Moisés kejën hõm do panyyg n'aa hahỹỹh
11 Ti m' ta see pé noo gó, Moisés wah'ëë däg bä kä, tabanyyh Esito wahë n'aa panang bä naa, ta wakããn tabaheg'ããs hyb n'aa. Moisés hapäh mä tak'ëp ramejũũ ta wakããn ramoo bok. Taheg'ããs bä m' tahapäh nyy da Esito buuj seeh tahewyyh ta wakããn seeh, Heber buuj. 12 Ti m' tabagëëd bä, tabeg'ããs ranahapäh bä. Tahapäh bä m' dooh heg'ããs péh ta hã, tanaboh jät mäh Esito buuj, ti m' k'ããts gó m' tadakä jëng. 13 Ti m' jati péh tabanyyh bä p'aa hẽnh, tahapäh mä pawóp hẽ ajyy Heber buuj kä rakamet'yy doo. Ti m' ta da hadoo doo rejãã doo hã Moisés eaanh:
—Hëd n'aa a wakããn seeh, Heber buuj marahejãã? —näng mäh.
14 Ti m' aj'yy ky gadoo:
—Jaa õm a hã péh? Jaa g'eh anoo ãã wahë n'aa, baad hadoo doo baad nado do rod n'aa mabahadoo hyb n'aa? ỹ makarẽn manaboh jät Esito buuj manaboh jät doo da? —näng mäh.
Ti m' Moisés h'yy gah'ood jëng. Eỹỹm wät. Ti m' ta h'yyb gó m' taky hadoo:
—Raky n'aa napëë däk mo haja ỹỹ hã —näng mäh.
15 Ti m' Paraóh ky n'aa napäh bä Moisés mo haj'aa ky n'aa hã, tamejũũ mä Moisés radajëëb paawä. Ti m' Moisés kejën hõm mäh Midijãn häj n'aa hẽnh, t'ĩĩ hẽnh tabagä hyb n'aa.
Midijãn bä takajaa bä kä, ahyyh sooh mä naëng majat bä [naëng rabaheg'oop bä]. 16 Ti awät mä tii bä Midijãn häj n'aa bä sa rod n'aa P'op Hagä Do wë. 7 mä ta toog. Ti m' naëng majat bä ta toog rakajaa, naëng mä ragób paawä, rahoog paawä ta hood gó sa yb masããh raneëëk hyb n'aa paawä. 17 Ti m' ajyy b'éé hagã n'aa sa masããh sii rakajaa naëng majat bä, ti m' rahabëë hõm ỹỹj, paa ajyy rakarẽn ragóp sa masããh raneëëk hyb n'aa. Ti m' Moisés as'ëëg gëët, ỹỹj tamo n'aa jesuu hyb n'aa. Ti m' sa masããh taneëëg kän.
18 Ti m' sa yb tób hẽnh rakajaa bä kä, sa yb Jet-Ro häd näng doo ky hadoo sa hã:
—Nyy d’ bë bad'oo nayyw bë wén jëk? —näng mäh.
19 Ti m' raky hadoo:
—Aj'yy Esito buuj ãã tamo n'aa jesuu ajyy b'éé hagã n'aa mahä̃nh. Tii bä naëng tabagóp, ër masããh taneëëg kän —näk mäh ta toog sa kyyh.
20 Ti m' sa yb ky hadoo:
—Ny tawät? Hëd n'aa naëng majat bä bë eréd gëët aj'yy? Bë ahõm, bë ats'yyt ër pa tabawa hyb n'aa —näng mäh.
21 Ti m' Moisés gadoo aj'yy tób hẽnh rats'yyt doo. Aj'yy pa m' tabagëë däk. Ti m' ta jawén aj'yy tahaëëj däk ta hã ta toog Siporah häd näng doo, ta ỹỹm tabahadoo däk hyb n'aa. 22 Ti m' eta däg mäh Siporah, enyy däk mä ta t'aah. Ti m' Moisés ky hadoo:
—Ta s'eeh hẽnh naa né paawä ỹỹ, ran'oo däk babä hëj ỹ n'aa nadoo doo bä ỹ baym —näng mäh.
Ti hyb n'aa m' ta häd noo däk mä ta t'aah Ger-Sõmc.
23 Tii kä m', hajõõ ta baab jawén paa bä m', Esito bä wahë n'aa dajëb kän. Ti hadoo né hẽ dooh tahëëj nä bä Isaraéw buuj hã ramejũũ doo, sa hã rarahejãã doo. Tak'ëp mä rabahoop Esito buuj sa moo gó. Ti m' P'op Hagä Doo hã raky n'aa etsẽẽ tamasa hyb n'aa sa hã. 24 Ti m' P'op Hagä Doo maa napäh mäh sa kyyh tak'ëp rahoop doo hã. Tahyb n'aa esee na-ããj hẽ Abraãm hã, Isaki hã, Jakó hã taky n'aa enooh do paah. 25 P'op Hagä Doo hapäh mä nesaa doo Isaraéw buuj rahoop doo. Tat'yyd mehĩĩn mäh sa hã. Takarẽn mä tamasa sa hã.