Moisés P'op Hagä Doo naëënh do panyyg n'aa hahỹỹh
3
Ti nuu jé m' Moisés bahag'ããs ta mayb masããh, Jet-Ro, Midijãn häj n'aa bä sa rod n'aa P'op Hagä Do wë, masããh. Ti m' ta mayb masããh tamahũũm bä takajatsëk mäh tabanawäng doo papỹỹj hahyng hẽnh. Ti m' takajaa waëë Horeb häd näng doo bä, P'op Hagä Doo waëë bä. 2 Ta tii bä Jaweha ããs kasee ta hã tëëg hõõ gó b'aah tũũ nu däg is doo kadoo doo gó naa. B'aah kado né paawä, dooh m' taooj jëë bä Moisés hapäh. 3 Ti m' ta h'yyb gó Moisés ky hadoo:—Meuj n'aa näng tii. Ỹ d’ ahõm t'ĩĩ hẽnh ỹ baheg'ããs h'ëëd hyb n'aa b'aah tanaooj jëng —näng mä ta h'yyb gó.
4 P'eets hẽ Moisés bana kän ta wë Jaweh bahapäh bä, b'aah kadoo doo gó mahang naa tanaëënh Moisés:
—Moisés! Moisés! —näng mäh.
—H'ëëd? Bä agëët ỹỹh —näng mä Moisés.
5 Ti m' P'op Hagä Do ky hadoo ta hã:
—P'eets hẽ ana wäd manäh da —näng mäh. —Makabo näh a tsyym suun, majó gëët do k'ããts ma ỹỹ hadoo do hyb n'aa, tsyt hẽ takasëëw däk tii wë ỹỹ —näng mäh.
6 Ti m' taky hadoo ẽnh:
—Ỹ né hẽ P'op Hagä Doo a yb h'yy kaha'eeh doo. Ỹ né hẽ P'op Hagä Doo Abraãm h'yy kaha'eeh doo. Ỹ né hẽ P'op Hagä Doo Isaki h'yy kaha'eeh doo. Ỹ né hẽ P'op Hagä Doo Jakóh h'yy kaha'eeh doo —näng mäh.
Ti m' ta ti tamaa napäh bä, Moisés ty jasu wät mä ta maméts, eỹỹm wät do hyb n'aa P'op Hagä Doo wë tahegãã bä.
7 Ti m' Jaweh ky hadoo ẽnh ta hã:
—Ỹ hapäh né hẽ tak'ëp nesaa doo karapee haa rahoop doo Esito häj n'aa bä. Ỹ maa napëë wät tak'ëp hadoo do sa kyyh tak'ëp sa hã mejũũ doo, sa hã rejãã do hyb n'aa. Ỹ hapäh né hẽ, ỹ t'yyd mehĩĩn rahoop do hyb n'aa. 8 Ti hyb n'aa hỹ pong jé naa ỹ bahyng ỹ bed'ëëp hyb n'aa Esito buuj sa moo gó naa, ỹ man'yyh hyb n'aa Esito häj n'aa bä naa, ỹ mahũũm hyb n'aa hëëj banäm doo hẽnh, hëëj baéh doo hẽnh, sahõnh hẽ ji karẽn doo tabanäng bäb. Kanaãh buuj, Hiit buuj, Amor buuj, Peris buuj, Hiw buuj, Jebus buuj, sa häj n'aa hẽnh ỹ da mahũũm. Sa häj n'aa ỹ da hanoo sa hã. 9 ỹ maa napäh né hẽ Isaraéw buuj tak'ëp hadoo do sa kyyh. Ỹ hapäh nyy da tak'ëp Esito buuj ramejũũ, rarahejãã sa hã. 10 Ti hyb n'aa kä, ahõm Paraóhc wë, Isaraéw buuj, karapee haa, mamanyyh hyb n'aa Esito häj n'aa bä naa —näng mä P'op Hagä Do kyyh Moisés hã.
11 Ti m' Moisés ky hadoo P'op Hagä Doo hã:
—Dooh its ỹỹh. Ti hyb n'aa dooh ỹ haja bä Paraóh wë ỹ ahõm bä. Dooh ỹ hajaa bä ỹ manyyh Isaraéw buuj Esito häj n'aa bä naa —näng mäh Moisés kyyh.
12 Ti m' P'op Hagä Do ky hadoo ta hã:
—A sii da ỹ bawät! Esito häj n'aa bä naa karapee haa mamanyyh jawén paa bä kä ỹ bë j'aa etsë da hahỹỹ waëë hã. Ta tii hã mabahapäh da, ỹ né hẽ tii õm mejũũ doo —näng mä P'op Hagä Doo.
13 Ti m' Moisés ky hadoo:
—Isaraéw buuj wë ỹ ahõm bä paawä, sa hã ỹ ky hado bä, “P'op Hagä Doo ër wahë makũũh rah'yy kaha'eeh doo ỹ tamejũũ”, ỹ noo bä sa hã, tii hã ỹ reaaj bä, “nyy d’ ta häd” ranoo bä, nyy da da kyh ỹỹ sa hã tii bä? —näng mäh Moisés kyyh P'op Hagä Do hã.
14 Ti m' P'op Hagä Do ky hadoo:
—Ỹ né hẽ Hawäd Hed'yyt Doo. Hahỹỹ da a kyyh sa hã: “Hawäd Hed'yyt Doo ỹ tamejũũ bë wë” —näng mä P'op Hagä Do kyyh Moisés hã.
15 Ahõm nä P'op Hagä Do kyyh:
—Hahỹỹ da da na-ããj a kyyh Isaraéw buuj sa hã: “Jawehd, P'op Hagä Doo ër wahë makũũh rah'yy kaha'eeh doo, P'op Hagä Doo Abraãm h'yy kaha'eeh doo, P'op Hagä Doo Isaki h'yy kaha'eeh doo, P'op Hagä Doo Jakóh h'yy kaha'eeh doo ti né hẽ ỹ tamejũũ bë wë”, da noo da —näng mä P'op Hagä Doo. —Jaweh hät ỹỹ had'yyt hẽ. Tii né hẽ hät ỹỹ hỹ jawén sahõnh hẽ bë panaa rahyb n'aa esee doo. 16 Ahõm kä Esito hẽnh. Matsyyd sahõnh hẽ Isaraéw buuj sa wahëh hedoo doo séd hã rakata däk hyb n'aa. Séd hã rakata däg bä kä hahỹỹ da da a kyyh sa hã: “Jaweh, P'op Hagä Doo bë wahë makũũh h'yy kaha'eeh doo, Abraãm, Isaki, Jakóh daheeh rah'yy kaha'eeh doo, kasee wät hã ỹỹ, hã ỹ taky hadoo: 'ỹ hyb n'aa matakëë bëëh. Ỹ hapäh nyy da rabad'oo bë hã Esito häj n'aa bä. 17 ỹ ky n'aa enooh bë hã hahỹỹh: bë da ỹ manyyh Esito häj n'aa bä naa, bë rarahejãã bä naa. Bë da ỹ mahũũm sahõnh hẽ ji karẽn doo tabanäng hẽnh, Kanaãh buuj, Hiit buuj, Amor buuj, Peris buuj, Hiw buuj, Jebus buuj, sa häj n'aa hẽnh’” da noo da —näng mä P'op Hagä Do kyyh Moisés hã.
18 Ahõm nä P'op Hagä Do kyyh ta hã:
—Isaraéw buuj sa wahë n'aa hedoo doo ragadoo da sa hã maher'oot doo. Tii bä mabahõm sa sii Paraóh wë. Hahỹỹ da da bë kyyh ta hã: “Jaweh, P'op Hagä Doo Heber buuj rah'yy kaha'eeh doo kasee wät ãã hã. Man'oo ãã hã, ãã bahõm hyb n'aa tabanawäng hẽnh, tamawoob hẽ ta ä̃h ji bahew'ëët do pénh, t'ĩĩ hẽnh Jaweh hã, P'op Hagä Doo ãã h'yy kaha'eeh do hã ãã ma ejuu hyb n'aa”, da noo da. 19 Ti hadoo né hẽ, ỹ hapäh, dooh da Paraóh an'oo bä bë ahõm bä, tak'ëp mo haj'aa ỹỹ ta hã tanadoo bä paawä. 20 Ti hyb n'aa da hejoj ỹỹ me ỹ rejãã da Esito buuj hajõng hadoo pé meuj n'aa näng doo me sa hã ỹ moo wät doo. Ti jawén bë ahõm tan'oo bä. 21 Esito buuj bë rahyb n'aa jew'yyk da ỹ an'oo bä da. Ti hyb n'aa dooh bë wë badoh péh Esito häj n'aa bë beréd hõm bä. 22 Taw'ããts hẽ sahõnh hẽ ỹỹj, Isaraéw buuj, rabahõm Esito buuj sa tób hẽnh, sa pa haj'eenh doo ta tii bä ỹỹnh haj'eenh doo hã, ỹỹj wób tób danäh pa haj'eenh doo hã na-ããj rabetsẽẽ hyb n'aa. Taw'ããts hẽ da rabetsẽẽ sa hã k'ããts tëg hawak do s'ëëb, k'ããts tëg gabarëëh do s'ëëb, sa saroor na-ããj hẽ, sa taah hã rapadedëëk hyb n'aa. Tii d’ bë bad'oo do hyb n'aa bë ado hõm Esito buuj sa ma paah —näng mä Jaweh kyyh Moisés hã.