Tametëë n'aa P'op Hagä Doo anoo Moisés hã panyyg n'aa hahỹỹh
4
Ti m' Moisés ky hadoo Jaweh hã:—Nyy da ỹ bad'oo ỹ raky nadahé bä, ỹ ramaa nanewë bä? Nyy d’ ỹ bad'oo, “dooh a hã Jaweh kas'ee bä” hã ỹ ranoo bä? —näng mä Moisés P'op Hagä Doo hã.
2 Ti m' Jaweh ky hadoo ta hã:
—H'ëëd tii a moo gó hadäk doo? —näng mäh.
—Tatu ỹỹ —näng mä Moisés.
3 Ti m' Jaweh mejũũ ta hã:
—Madawäts jäd tũũ! —näng mäh.
Ti m' ta tatu Moisés dawäts jäd tũũ. Aw'yy gó takawareem jäd tũũ. Ti m' Moisés waj'aa wät ta mahä̃nh. 4 Ti m' Jaweh ky hadoo ta hã:
—Mado däk ta dõm hã! —näng mäh.
Ti m' Moisés ado däk mä ta dõm hã. Tado däk sii hẽ m' p'aa hẽnh takawareem däk, ta tatu hado däk p'aa hẽnh.
5 Ti m' Jaweh ky hadoo:
—ỹỹh, Jaweh, P'op Hagä Doo bë wahë makũũh h'yy kaha'eeh doo, Abraãm, Isaki, Jakóh daheeh rah'yy kaha'eeh doo, a hã kas'ee wät rabahapäh hyb n'aa ta tii heen n'aa —näng mä Jaweh kyyh.
6 Ti m' Jaweh ky hadoo ẽnh:
—Madakä a mooh a saroor j'ooj hadäk do yt hẽ —näng mäh.
Ti m' ta moo tadakëë ta saroor yt hã. Ta moo tabado nyyh bä, saraa hado däk ta moo hã. Hawag däk, wese däk ta moo hã.
7 —P'aa hẽnh madakä a mooh a saroor j'ooj hadäk do yt hã —näng mäh Jaweh.
Ti m' p'aa hẽnh ta moo tadakëë ta saroor yt hã. Tado nyyh bä, paa hado däk. Ahub däk mä tii bä.
8 Ti m' Jaweh ky hadoo:
—Õm raky nadahé bä, rahyb n'aa manatakä bä pooj jé meuj n'aa näng do heen n'aa hã, raky daheeh da ta seeh heen n'aa rabahapäh bä. 9 Raky nadahé nä bä paawä, a kyyh raganado nä bä, magób naëng tamii Niro häd näng do uuh, mahoog tũũ. Tũũ takajäg bä majyyw hado däk da —näng mä Jaweh.
10 Ti m' Moisés ky hadoo Jaweh hã:
—Tak'ëp Hyb N'aa Jawyk Doo, dooh noo gó baad herot do ỹ do bä. Si ỹ maher'oot do pooj jé dooh baad herot do ỹ do bä, da hẽ na-ããj hẽ. Dooh baad ỹ haja bä ỹ her'ood bä. Ỹ nag'aad hejoonh —näng mä Moisés kyyh.
11 Ti m' Jaweh ky gadoo:
—Jaa tii aj'yy hã hanoo ta nag'aad? Jaa anoo ta wób nabuuj gaseto? Jaa anoo ta wób ky tamah doo? Jaa ji hã hanoo ji matym ji bahapäh hyb n'aa? Jaa hanoo ta wób raty temah hyb n'aa? ỹ nado tii, Jaweh nado? 12 Ahõm kä! õm ỹ ky masa da. Ỹ metëëh da maher'oot do pan'aa —näng mäh Jaweh kyyh.
13 Ti m' Moisés ky hadoo:
—Dooh Tak'ëp Hyb N'aa Jawyk Doo, mamejõ aj'yy seeh —näng mäh.
14 Ti m' Jaweh kawaj'ããn kän Moisés wë. Ti m' taky hadoo ta hã:
—äkä, a hỹỹj ẽnh? A hỹỹj Arãw, Levi panaa, baad herot do ti tii. Ti awäd däk a hã takataa hyb n'aa. H'yy gadajang da õm tahapäh bä. 15 Ta hã da mabaher'oot, mametëëk taher'oot do pan'aa. A rod n'aa da tii. Bë ỹ ky masa da. Bë ỹ metëëh nyy da bë bad'oo do pan'aa. 16 A rod n'aa da tii. Arãw hã mabaher'oot a kyyh kyh ỹỹ tabahadoo do hadoo da. P'op Hagä Doo hadoo doo da õm ta hã. Arãw kä a rod n'aa sa wë da. 17 Mamahũũm a tatu ta me meuj n'aa näng doo mamoo wät hyb n'aa —näng mäh Jaweh kyyh Moisés hã.
Esito hẽnh Moisés babaaj hõm do panyyg n'aa hahỹỹh
18 Ti m' Moisés ajëë kän ta mayb wë, Jet-Ro wë, ti m' taky hadoo ta hã:
—Ỹ karẽn paawä, man'oo bä, ỹ abaaj hõm wakãn ỹỹ sa wë ỹ baheg'ããs baad rabok bä —näng mäh ta kyyh.
—Abaaj hõm. Baad ahõm kä —näng mä Jet-Ro kyyh.
19 Ti m' Moisés beréd däk pooj jé Midijãn häj n'aa Jaweh ky hadoo ta hã:
—Ahõm kä Esito hẽnh. Sahõnh hẽ õm no n'aa masoo do paa dejëb kän hỹỹ kä —näng mäh.
20 Ti m' Moisés masaa kän ta ỹỹm, ta taah ragatsëk t'oonh hyb n'aa sa masããh jumeto jó. Ti m' ratsyym kasog kän Esito hẽnh hah'ũũm doo. Ta moo gó tatón ta tatu P'op Hagä Do mejũũ doo tatón hyb n'aa. 21 Ti m' Jaweh ky hadoo ta hã. Taky n'aa jebaaj kän mäh:
—Esito häj n'aa bä makajaa bä da, ahõm da Paraóh wë. Mamoo wäd da ta matym gó hejoj ỹỹ gó sahõnh hẽ meuj n'aa näng doo ỹ anoo do a hã mamoo wät do pan'aa. Ta tii Paraóh hapäh né paawä nabuj kah'ũũm da ỹ an'oo bä. H'yy ganah'ood da ỹ an'oo bä. Ti hyb n'aa dooh da tan'oo bä Isaraéw buuj ranä bä ta häj n'aa bä naa. 22 Hahỹỹ da da mabaher'ood tii bä ta hã: “Hahỹỹ d’ mäh Jaweh kyyh a hã: 'Tah ỹỹ wah'ëëh hadoo do hadoo Isaraéw buuj. 23 ỹ mejõ né paawä õm tah ỹ tabahõm man'oo bä ỹ taj'aa etsë hyb n'aa, dooh meréd bä tahõm bä. Ti hyb n'aa ỹ daj'ëëb da a t'aah wah'ëëh hadoo doo’. Tii d’ né da a kyyh kyh ỹ n'aa Paraóh hã —näng mä Jaweh Moisés hã.
24 Ti m' ramahõm me, raba'ỹỹh bä kä, ta hãa Jaweh kasee. Tadaj'ëëp paawä m'. 25 Ti m' Siporah bado däk pä hehãm doo, tahõg hõm mä ta t'aah masuuj noo byyh. Ti m' tadadäg däk ta tsyymb hã. Ti m' taky hadoo ta hã:
—Patuk ỹỹ õm, majyyw ta heen n'aa —näng mäh.
26 Ti hyb n'aa m', ta ti tamoo wät do hyb n'aa m', Jaweh eréd hõmc. (“Patuk ỹỹ õm majyyw ta heen n'aa” Moisés ỹỹm wén näng, ta t'aah masuuj noo byyh kehõg hõm do hyb n'aa m').
27 Ta ti pooj jé m' hahỹỹ da Jaweh ky hadoo paah Moisés hỹỹj hã, Arãw hã:
—Ahõm kä tabanawäng hẽnh Moisés mamamuun hyb n'aa —näng mäh.
Ti m' Arãw bahõm kän. Tamamuun mä Moisés P'op Hagä Doo waëë bä. Tamamuun bä kä tatsanetsup wät mä Moisés ta pa, kedëng do heen n'aa. 28 Ti m' Moisés maher'oot kän ta hã sahõnh hẽ Jaweh kyyh ta hã taher'oot do pan'aa tamejũũ doo. Tamaher'oot kän na-ããj hẽ meuj n'aa näng do ky n'aa ta hã Jaweh banoo tamoo wät hyb n'aa.
29 Ti m' Moisés Arãw daheeh ranaëënh, ratsyyd kän mä sahõnh hẽ Isaraéw buuj sa wahëh hedoo doo séd hã rakata däk hyb n'aa. 30 Ti m' Arãw maher'oot kän sa hã sahõnh hẽ Moisés hã Jaweh maher'oot doo. Ti m' sa matym gó tamoo wäd kän meuj n'aa näng do heen n'aa. 31 Sa wahë n'aa hedoo doo raky dahé kän mäh. Raky n'aa napäh bä, Jaweh hyb n'aa matakëë doo kä sa hã, tahapëë wät tak'ëp nesaa doo rahoop doo, ti m' rabehyy bëëh sa taron nu paa me, tũũ sa maboor behyy bëëh P'op Hagä Doo raj'aa etsë hyb n'aa.