Pooj jé Paraóh sii Moisés her'oot do panyyg n'aa hahỹỹh
5
Isaraéw buuj sa wahë n'aa sii Moisés raher'oot do jawén paa bä m', Moisés Arãw daheeh rabahõm kän Paraóh wë kä. Ti m' raky hadoo ta hã:—Hahỹỹ da Jaweh, P'op Hagä Doo Isaraéw buuj rah'yy kaha'eeh do kyyh a hã: “Man'oo karapee haa rabahõm tabanawäng hẽnh, t'ĩĩ hẽnh séd hã rabawëh ỹ raweh'ëëh do heen n'aa”, näng mä Jaweh kyyh a hã —näk mä Moisés sa kyyh Paraóh hã.
2 Ti m' Paraóh ky hadoo:
—Jaa ta tii Jaweh ỹ ky dahé bä, Isaraéw buuj rabahõm ỹ an'oo bä hyb n'aa? Dooh ta tii Jaweh ỹ hapëë bä. Dooh ỹ an'oo bä Isaraéw buuj rabahõm hyb n'aa —näng mä Paraóh kyyh.
3 Ti m' Moisés raky hadoo:
—P'op Hagä Doo, ãã Heber buuj hag'ããs doo kasee ãã hã. Ti hyb n'aa man'oo ãã hã ãã bahõm hyb n'aa tabanawäng hẽnh, tamawoob hẽ ta ä̃h ji bahew'ëët do pénh, t'ĩĩ hẽnh Jaweh hã, P'op Hagä Doo ãã h'yy kaha'eeh doo hã ãã ma ejuu hyb n'aa. Tii d’ ãã moo nahado bä ãã da dejëp ji nahëë näng doo me, kaneb'ooh doo me P'op Hagä Doo an'oo bä —näk mä Moisés sa kyyh.
4 Ti m' Esito sa wahë n'aa ky hadoo sa hã:
—Moisés, Arãw daheeh, h'ëëd n'aa bë hewaat Isaraéw buuj ramoo bok doo hã? Nayyw hẽ, bë ahõm nä bë moo bok hẽnh! —näng mäh.
5 Ti m' Paraóh ky hadoo ẽnh:
—Bë hegãã, hajõõ däk Isaraéw buuj, ti bë hewaat ramoo bok doo hã —näng mä Paraóh kyyh.
6 Ti noo gó né hẽ Paraóh ky hadoo ajyy tak'ëp Isaraéw buuj mejũũ doo hã, moo bok doo hagã n'aa hã na-ããj hẽ. Hahỹỹ d’ mä tamejũũ:
7 —Bë an'oo manä wäd sa hã tsäng s'ëëb makuj n'aa jawii. Sa daaj hẽ rabataa hỹỹ kä ta makuj n'aa jawii. 8 Ti hadoo né paawä bë mejũũ sa hã paa pénh ratema tsäng s'ëëb. Dooh bë an'oo bä ta yd jé ratamaa bä. Moo nehõj däg hahỹỹ Isaraéw buuj, ti hyb n'aa, “man'oo ãã bahõm P'op Hagä Doo ãã h'yy kaha'eeh doo hã a ma ejuu hyb n'aa” rawén ky kah'ũũm. 9 Tak'ëp tabahä̃nh däk bë mejũũ ramoo bok, ta tii hã raty kanewaat hyb n'aa, daap menyyh do ky n'aa ramaa nanewëë hyb n'aa —näng mä Paraóh kyyh Isaraéw buuj sa hã mejũũ doo hã.
10 Ti m' ajyy tak'ëp Isaraéw buuj mejũũ doo, moo bok do hagã n'aa na-ããj hẽ rabahõm kän Isaraéw buuj sa wë, ti m' raky hadoo sa hã:
—Hahỹỹ da Paraóh kyyh bë hã: “Dooh takan'oo wäd bä kä bë hã tsäng s'ëëb makuj n'aa jewii. 11 Bë daaj hẽ bë ahõm hỹỹ kä bë esoos ta makuj n'aa. Ti hadoo né paawä, paa pénh bë tama tsäng s'ëëb, näng Paraóh kyyh bë hã —näk mä sa kyyh.
12 Ti m' Isaraéw buuj rabahõm kän jé pad'yyt hẽ, jewii hedoo doo hesoos doo. 13 Tak'ëp mä Isaraéw buuj moo bok doo hagã n'aa ky kah'ũũm mä Isaraéw buuj hã. Hahỹỹ d’ mä sa kyyh:
—Bë hajaa tsäng s'ëëb kamejũũ do pénh, jewii bë hã ranoo noo gó pénh né hẽ —ramejũũ mäh.
14 Ti m' rahewyh kän mä Isaraéw buuj wób, moo b'ook doo sa hagã n'aa, Paraóh karapee rasëëw hõm doo sa wakããn ramejũũ hyb n'aa. Ti m' raky hadoo sa hã:
—H'ëëd hyb n'aa tsém hẽ, naga hẽ na-ããj hẽ bë nahajaa tsäng s'ëëb bë hã kamejũũ do pénh, pooj jé bë moo heb'ooh doo da né hẽ? —näk mä sa kyyh.
15 Ti m' moo bok do sa hagã n'aa, Isaraéw buuj sa wób hedoo doo, rabahõm kän Esito häj n'aa wahë n'aa wë. Ti m' tak'ëp rabetsẽẽ ta hã. Hahỹỹ d’ mä sa kyyh:
—Hëd n'aa tii da mabad'oo ãã hã, a wë moo b'ook doo? 16 Dooh kanoo pé ãã hã jewii tsäng s'ëëb makuj n'aa. Ti hadoo né hahỹỹ da ramejũũ ãã: “Tsäng s'ëëb bë temaa!”, näk sa kyyh ãã hã. Daap hẽ ãã rabahewyyh. Ãã h'yyb haj'aa hẽ nado takanaja bä ãã hã ramejũũ doo. A karapee h'yyb haj'aa hẽ né tii —näk mä sa kyyh Paraóh hã.
17 Ti m' Paraóh ky hadoo:
—Moo nehõj né bëëh! Bë moo nehõj né hẽ! Ti hyb n'aa, “man'oo ãã bahõm Jaweh hã a ma ejuu hyb n'aa” bë wén ky kah'ũũm. 18 Séd up, nayyw bë ahõm bë moo bok doo hẽnh. Dooh da kanoo péh bë hã jewii. Ti hadoo né paawä, paa pénh da bë temaa da tsäng s'ëëb! —näng mä Paraóh kyyh sa hã.
19 H'yy katón bong moo bok do sa hagã n'aa hã Paraóh kyyh hyb n'aa. Hahỹỹ d’ mä ta kyyh: “Ta ä̃h had'yyt hẽ paa pénh da bë tama tsäng s'ëëb”, näng ta kyyh. 20 Raban'yyh bä tób Paraóh sii raber'oot do jawén paa bä, ramamuun Moisés Arãw daheeh sa hyb n'aa gad'aa doo. 21 Ti m' raky hadoo Moisés sa hã:
—ãã karẽn paawä P'op Hagä Doo heg'ããs bë moo hed'oo doo wë, bë taky n'aa etyy baad nadoo doo hã! Bë hyb n'aa hẽ né hẽ ãã wë Paraóh, Paraóh karapee hyb n'aa jewyk doo na-ããj né hẽ tak'ëp rakawaj'ããn bok. Bë daaj né hẽ bë ban'oo däk hadoo sa moo gó kuman, tamé ãã radaj'ëëp hyb n'aa —näk mä moo bok doo sa hagã n'aa Moisés sa hã.
P'op Hagä Doo ky n'aa eno kän ted'ëëp do ky n'aa Isaraéw buuj sa hã
22 Ti m' Moisés bahõm kän Jaweh sii taber'oot hyb n'aa p'aa hẽnh. Hahỹỹ da ta kyyh ta hã: