6
Ti m' Jaweh ky hadoo Moisés hã:—Hỹ jawén mabahapäh da Paraóh hã ỹ bad'oo doo. Hejoj ỹỹ hyb n'aa Isaraéw buuj rabahõm tan'oo bä da. Tak'ëp hadoo do hejoj ỹỹ hyb n'aa tamejũũ da Isaraéw buuj raberéd hõm hyb n'aa ta häj n'aa —näng mä Jaweh kyyh.
P'aa hẽnh P'op Hagä Doo naëënh Moisés Isaraéw buuj tado nyyh hyb n'aa Esito häj n'aa bä naa panyyg n'aa hahỹỹh
2 Ti m' P'op Hagä Do ky hadoo Moisés hã:
—Ỹ né hẽ Jaweh. 3 Abraãm hã, Isaki hã, Jakó hã ỹ kas'ee wät paa hät ỹỹ “El Sadaj”a me. Dooh paa ỹ metä nä bä sa hã hät ỹỹ Jaweh, ỹ kamamaj'aa doob. 4 Sa hã ỹ ky n'aa eno däk paa Kanaãh häj n'aa, ti ỹ raky n'aa gadoo ỹ ky n'aa enooh doo sa hã. Ỹ ky n'aa eno däk sa häj n'aa pan'aa ta s'eeh hẽnh naa buuj rabadoo noo gó tii bä rabaj'eenh bä. 5 ỹ maa napëë wät sa kyyh tak'ëp rahoop doo hã tak'ëp Esito buuj ramejũũ, rarahejãã do haj'aa. Ỹ hyb n'aa esee wät na-ããj hẽ ỹ ky n'aa enooh do paah. 6 Ti hyb n'aa hahỹỹ da ỹ karẽn mabaher'oot Isaraéw buuj hã kyh ỹỹ: “ỹ né hẽ Jaweh. Bë da ỹ ed'ëëp Esito buuj sa moo gó naa, bë hã mejũũ do sa moo gó naa. Tak'ëp hedoo do hejoj ỹỹ me da mo haj'aa ỹỹ da sa hã nesaa doo sa säm baj. Bë da ỹ gabaanh sa moo gó naa. 7 Bë da ỹ gadoo karapee haa bë bahado däk hyb n'aa. Ỹ né da P'op Hagä Doo bë h'yy kaha'eeh doo. Tii bä da ỹỹh, Jaweh, P'op Hagä Doo bë hag'ããs doo, bë bahapäh da. Ỹ né hẽ Esito sa moo gó naa bë ted'ëëp doo bë hapäh da. Bë hã tak'ëp mejũũ do sa moo gó naa bë hed'ëëp doo. 8 Bë da ỹ mahũũm hëëj hẽnh kyh ỹỹ kanah'ỹỹt doo me ỹ ky n'aa enooh do paah Abraãm hã, Isaki hã, Jakóh hãc. Bë hã da ỹ banoo bë häj n'aa pan'aa. Ỹ né hẽ Jaweh”, näng da a kyyh kyh ỹỹ hã —näng mäh Jaweh Moisés hã.
9 Ti m' Moisés maher'ood kän mä sahõnh hẽ Jaweh kyyh Isaraéw buuj sa hã. Dooh m' rakarẽn ramaa newë bä, dooh m' rakarẽn raky dahé bä rah'yyb nahedo wät do hyb n'aa, tak'ëp Esito buuj sa hã ramejũũ, rarahejãã do hyb n'aa.
10 Ti m' Jaweh ky hadoo Moisés hã:
11 —Ahõm kä Paraóh wë. Mamaher'ood Paraóh, Esito häj n'aa sa wahë n'aa, Isaraéw buuj rabahõm hyb n'aa tan'oo bä —näng mä Jaweh.
12 Ti m' Moisés ky gadoo:
—Kyh ỹỹ Isaraéw buuj ramaa nanewë bä, nyy da g'eh Paraóh maa newëë da ỹỹh, baad ner'oot doo? —näng mä Moisés kyyh.
13 Ti m' Jaweh mejũũ Moisés Arãw daheeh ramaher'oot hyb n'aa Isaraéw buuj Paraóh na-ããj hẽ. Tamejũũ ta kyy gó Isaraéw buuj Mosisés Arãw daheeh, ramanyyh hyb n'aa Esito häj n'aa bä naa.
Sa wahëh, sa panaa panyyg n'aa hahỹỹh
14 Hahỹỹ Isaraéw buuj du na doo:
Rubẽnh, Jakóh t'aah wah'ëëh hadoo do taah: Hanok, Paru, Eserõn, Karami. Sa häd gó né hẽ tabahõm Rubẽnh panaa.
15 Simijãw taah: Jamuéw, Jamin, Ohad, Jakĩn, Sohah, Sauur. Kanaãh buuj mä Sauur ỹỹn. Sa häd gó né hẽ tabahõm Simijãw panaa.
16 Lewi taah sa häd kerii däk doo hã hahỹỹh: Geresõn, Kohat, Merarih. Levi awäd wät 137 ta baab n'aa.
17 Geresõn taah kä hahỹỹh: Libini, Simej daheeh. Sa häd gó tabahõm sa panaa.
18 Kohat taah kä hahỹỹh: Amrãm, Isar, Eberõn, Usiew. Kohat bawäd wät 133 ta baab n'aa.
19 Merarih taah kä hahỹỹh: Mawi, Musi daheeh.
Ti né hẽ Levi panaa ta ta taah häd gó hahõm doo. Tii da né hẽ sa häd kerii däk doo hã.
20 Amrãm gat'ëë däk ta yb ä̃nh Jokebéd häd näng doo. Sa taah: Moisés Arãw daheeh. Amrãm bawäd däk 137 ta baab n'aa.
21 Isar taah kä: Korah, Nepég, Sikiri.
22 Usiew taah kä: Misaéw, Ew-Sapãn, Sitiri.
23 Arãw gat'ëë däk paa Eriseba, Aminadab toog, Nasõn ä̃nh. Hahỹỹ da Arãw taah Eriseba sii: Nadab, Abihu, Ereasar, Itamah.
24 Korah taah kä hahỹỹh: Asir, Ew-Kanah, Abijasap. Sa häd gó tabahõm Korah panaa.
25 Ereasar, Arãw t'aah gat'ëë däk paah Putijew häd näng do toog seeh. Pinejas mäh Ereasar sa t'aah.
Jããm hẽ Levi panaa, ta taah, ta ta taah sa häd gó hah'ũũm doo, sa panaa du na doo.
26 Moisés Arãw rahäd etsén doo, ta ti sa hã né kä Jaweh ky hadoo do paah: “Bë manyyh Esito häj n'aa bä naa sahõnh hẽ 12 hadoo doo Isaraéw taah sa panaa.” 27 Ti né hẽ tii Paraóh maher'oot doo ta häj n'aa bä naa Isaraéw buuj ramanyyh do ky n'aa hã. Ti né hẽ tii.
28-29 Hahỹỹ da Jaweh kyyh Esito bä Moisés hã tamaher'oot bä:
—Ỹ né hẽ Jaweh. Mamaher'ood Paraóh hã, Esito häj n'aa wahën n'aa hã, sahõnh hẽ kyh ỹỹ a hã ỹ maher'oot doo —näng mä ta kyyh.
30 Ti m' Moisés ky hadoo Jaweh hã:
—Baad ner'oot do ỹỹh. Ti hyb n'aa nyy da g'eh Paraóh maa newëë kyh ỹ hã? —näng mä Moisés.