7
Ti m' Jaweh ky hadoo:—Paraóh hã P'op Hagä Doo hadoo doo da õm ỹ an'oo wät. A hỹỹj, Arãw, a rod n'aa hadoo tabahadoo däk ỹ an'oo bä. 2 Mamaher'ood Arãw hã sahõnh hẽ a hã ỹ mejũũ doo. Arãw kä tamaher'oot da Paraóh, Paraóh anoo hyb n'aa, ta häj n'aa Isaraéw buuj raberéd hõm hyb n'aa. 3 Ti hadoo né da nabuj kah'ũũm da Paraóh ỹ an'oo bä. H'yy ganah'ood da ỹ an'oo bä. Hajõng meuj n'aa näng do heen n'aa ỹ da moo wät né paawä Esito häj n'aa bä, 4 dooh õm taky dahé bä da. Tii bä da Esito buuj rahoop da mo haj'aa ỹỹ hejoj ỹỹ me ỹ moo wät doo. Tak'ëp da ỹ rejãã Esito buuj. Tii bä da sahõnh hẽ 12 hadoo doo Isaraéw taah panaa ỹ manä kän da Esito häj n'aa bä naa. 5 Mo haj'aa ỹỹ Esito buuj rahoop bä kä, sa häj n'aa bä naa Isaraéw buuj ỹ manyyh bä kä, tii bä kä, ỹ né hẽ Jaweh, Hawät Had'yyt Doo, Esito buuj rahapäh da —näng mäh Jaweh kyyh Moisés hã.
6 Ti m' Moisés Arãw daheeh rabad'oo kän Jaweh mejũũ doo da né hẽ. 7 80 ãn Moisés bado däk Paraóh ramaher'oot bä kä. 83 ãn Arãw ti noo gó.
Arãw tatu kawareem däk do panyyg n'aa hahỹỹh
8 Ti m' Jaweh ky hado Moisés Arãw sa hã:
9 —Bë hã Paraóh ky hadoo bä kä, “bë moo booh meuj n'aa näng doo ta heed n'aa ỹ ky daheeh hyb n'aa”, tanoo bä, tii, õm Moisés, mamaher'ood Arãw hã. Hahỹỹ da da a kyyh ta hã, “mado däk a tatu, madawäts jäd tũũ Paraóh matym gó” da noo da. Tii bä da kawareem däg da. Aw'yy hado däk da —näng mäh Jaweh kyyh Moisés sa hã.
10 Ti m' Moisés rabahõm kän Paraóh wë. Jaweh mejũũ doo da né hẽ sa hã, tii da né hẽ rabad'oo. Ta tatu Arãw dawäts jät tũũ Paraóh matym gó, Paraóh karapee hyb n'aa jewyk doo sa matym gó. Aw'yy hado jät mäh. 11 Ti m' Paraóh mejũũ ranaëënh ajyy tak'ëp h'yy ganäng doo, sa sëw n'aa hedoo doo sii hẽ. Arãw moo wät doo da né hẽ ramoo bong ẽnh sa hejoj ta wób ranahapäh doo mé. 12 Sa ta tu sahõnh hẽ radewäts kän mä tũũ, aw'yy hado padëëk. Ti d’ hadoo né paawä, Arãw tatu aw'yy hado däk doo awëë pëë sahõnh hẽ sa tatu aw'yy hedo padëëk do paah. 13 Ta tii tahapäh né paawä, dooh Paraóh h'yy gah'ood bä. Ti hyb n'aa m' dooh takarẽn bä taky dahé bä Moisés, Jaweh her'oot doo hadoo né kä.
Naëng majyyw hado däk do panyyg n'aa hahỹỹh
14 Ti jawén paa bä m' Jaweh ky hadoo Moisés hã:
—Nabuj kahũũm Paraóh. H'yy ganah'oot. Dooh takarẽn tan'oo bä Isaraéw buuj rahõm bä. 15 Hỹỹ kä, bäp paa, tabawëënh bä, ahõm Paraóh wë. Magada Niro nabyy me t'ĩĩ hẽnh mamamuun hyb n'aa. Mamahũũm a moo gó a tatu aw'yy hado däk do paah. 16 Ti maky hadoo ta hã hahỹỹ da: “Jaweh, P'op Hagä Doo Heber buuj hag'ããs doo ỹ tamejũũ õm ỹ maher'oot hyb n'aa ta kyyh. Hahỹỹ da paa ta kyyh a hã: ‘Man'oo karapee haa rabahõm ỹ raj'aa etsë hyb n'aa tabanawäng hẽnh’, näng paa ta kyyh a hã. Ti hadoo né hẽ, dooh maky dahé nä bä. 17 Hahỹỹ da hỹỹ kä Jaweh kyyh a hã: ‘Hỹỹ kä da mabahapäh jaa ti ỹỹh, Jaweh’, näng a hã. Hahỹỹ da da mabahapäh: tatu móh ỹỹ gó hadäk doo me da ỹ mewyyh da tamii Niro, tii bä da majyyw hado däk da naëng. 18 Tah'ỹỹb Niro me habong doo dejëp da. Buu banes'aa da tamii. Dooh da Esito buuj rahajaa bä da reëg bä Niro me ragóp doo naëng”, näng da a kyyh Paraóh hã —näng mä Jaweh kyyh Moisés hã, Paraóh tamaher'oot do pan'aa.
19 Ti m' Jaweh ky hadoo ẽnh Moisés hã:
—Mamaher'ood Arãw p'op ta tatu tagadahäng hyb n'aa sahõnh hẽ tamii, kapỹỹj, karaj'aa hedoo do Esito häj n'aa bä hanäng do pong jé. Majyyw hado däk da tii bä sahõnh hẽ naëng. Jé pad'yyt hẽ da majyyw däg da. Manajuu gó hasooh doo, ta hood b'aah s'ëëb gó hasooh do na-ããj hẽ, sahõnh hẽ majyyw hado däk da —näng mäh Jaweh kyyh.
20 Ti m' Jaweh mejũũ doo da né hẽ sa hã, Moisés Arãw daheeh rabad'oo. Ti m' p'op Arãwa tagadahëë kän ta tatu Paraóh matym gó, Paraóh karapee hyb n'aa jewyk doo sa matym gó. Tamewyh kän mä tamii Niro, ti m' majyyw hado däk sahõnh hẽ naëng. 21 Tah'ỹỹb Niro me habong doo dejëp. Dooh m' Esito buuj rahaja bä reëg bä Niro me ragóp doo tak'ëp buu banes'aa do hyb n'aa. Jé pad'yyt hẽ Esito häj n'aa bä majyyw genä kän!
22 Ti m' ajyy tak'ëp h'yy gónäng doo, sa sëw n'aa hedoo doo sii hẽ tii d’ né rabad'oo sa hejoj kejën doo me. H'yy ganah'oot makyys hẽ Paraóh, ti hyb n'aa dooh takarẽn bä taky dahé bä Moisés. Jaweh her'oot doo da né kä. 23 Paraóh as'oob kän mäh, ta tób hẽnh mä tabahõm. Dooh tahyb n'aa p'eed bä tahapäh doo hã. 24 Ti m' ranahajaa do hyb n'aa reëg bä Niro me ragóp doo, Esito buuj ragagots kän naëng hood Niro nabyy me rabaw'yyt hyb n'aa ty ganäm doo.
25 Tabëëj hõm kän mä ta ä̃h 7 hadoo doo Niro tamii Jaweh rejãã do jawén paa bä.