Maj'ee P'op Hagä Doo mo haj'aa Esito buuj tarejãã hyb n'aa panyyg n'aa hahỹỹh
8
Ti m' Jaweh ky hado kän Moisés hã:—Ahõm kä Paraóh tób hẽnh. Hahỹỹ da da a kyyh ta hã: “Hahỹỹ da Jaweh kyyh a hã, 'man'oo karapee haa rabahõm hã ỹ raj'aa etsë hyb n'aa. 2 Manan'oo bä rahõm bä, ỹ rejãã da sahõnh hẽ a häj n'aa maj'ee me. 3 Séd dó da tamé, Niro me, maj'ee. Es'oob b'ëëh da, ajëë pëë da a tób gó, a gawakõ magaỹỹh doo gó. A tyng majaỹỹh do jó sii hẽ tabanäng maj'ee. Ajëë pëë da a karapee hyb n'aa jewyk doo sa tób gó, sahõnh hẽ a karapee wób tób gó na-ããj hẽ. A waa pãw ragesëëm doo gó, ta hood a waa pãw ragej'õõs doo gó da rabatooj däk da. 4 A hã da, a karapee hã, a karapee hyb n'aa jewyk doo hã da ragetsëk’, näng Jaweh kyyh a hã. Tii da né da a kyyh kyh ỹỹ n'aa Paraóh hã” —näng mä Jaweh Moisés hã.
5 Ti m' Jaweh ky hadoo kän Moisés hã. Hahỹỹ da ta kyyh:
—Mamaher'ood Arãw p'op ta tatu tagadahäng hyb n'aa sahõnh hẽ tamii, kapỹỹj, karaj'aa hedoo do pong jé maj'ee rabenyyh hyb n'aa Esito häj n'aa bä —näng mä ta kyyh.
6 Tii ta tatu Arãw gadahëë kän sahõnh hẽ naëng pong jé Esito häj n'aa bä mapadëëk doo. Ti m' pong hẽnh maj'ee rabes'oob kän. Séd dó tii bä maj'ee Esito häj n'aa bä. Jé pad'yyt hẽ m' rababoo däg kän. 7 Ti m' ajyy tak'ëp h'yy gónäng doo, sa sëëw n'aa hedoo doo sii hẽ tii d’ né rabed'oo ẽnh sa hejoj kejën doo me. Es'oop na-ããj hẽ maj'ee ran'oo bä.
8 Ti m' Paraóh mejũũ ranaëënh Moisés Arãw daheeh. Ti m' taky hadoo mä sa hã:
—Bë ky n'aa ets'ẽẽ Jaweh hã tado hõm hyb n'aa maj'ee mahä̃nh ỹỹh, karapee haa mahä̃nh na-ããj hẽ. Tii bä da ỹ ban'oo kän bë karapee rabahõm hyb n'aa sa masããh wób ranabooh hyb n'aa Jaweh matym n'aa —näng mä Paraóh kyyh.
9 —Taw'ããts hẽ —näng mä Moisés. —Maky dëë, ny noo gó makarẽn õm, a karapee hyb n'aa jewyk doo, a karapee wób ỹ ky n'aa etsẽẽ maj'ee kadó hõm hyb n'aa a mahä̃nh, bë tób mahä̃nh, jããm mad'aak hyb n'aa tamé, Niro me —näng mä Moisés Paraóh hã.
10 —Eej, jati da —näng mä Paraóh.
Ti m' Moisés ky gadoo:
—Maky däng doo da né ỹ bad'oo, dooh tanyy bä Jaweh hadoo péh, P'op Hagä Doo ãã hag'ããs doo, mabahapäh hyb n'aa. 11 Ah'ũũm da kä maj'ee a mahä̃nh, a karapee hyb n'aa jewyk do sa mahä̃nh, a karapee wób sa mahä̃nh. An'yyh da bë tób bä naa. Jããm né hẽ Niro me madaag bong —näng mä Moisés kyyh Paraóh hã.
12 Ti m' Moisés Arãw daheeh raban'yyh Paraóh tób bä naa. Ti m' tak'ëp Moisés ky n'aa etsẽẽ Jaweh hã tado hõm hyb n'aa maj'ee Paraóh wë tamejũũ do paah. 13 Ti m' Jaweh bad'oo Moisés ky n'aa etsẽẽ doo. Maj'ee dejëp sa tób yt hã, sa wahoo gó, joom banäng bä na-ããj hẽ. 14 Ti m' Esito buuj rabata bëëh maj'ee dejëp doo. Tak'ëp Esito häj n'aa bä maj'ee dejëp doo babuu ganyyh. 15 Paraóh bahapäh bä kä dooh boo maj'ee, ta daaj hẽ, tah'yyb gó taky hadoo, “dooh ỹ ky dahé bä da”, näng. Takarẽn do hyb n'aa né hẽ tanabuuj kah'ũũm. Ti m' dooh taky dahé bä Moisés Arãw daheeh, Jaweh her'ood doo d’ né kä.
Gyyj P'op Hagä Doo mo haj'aa Esito buuj tarejãã hyb n'aa panyyg n'aa hahỹỹh
16 Ti m' Jaweh ky hadoo Moisés hã:
—Mamaher'ood Arãw ta tatu p'op tagadahäng hyb n'aa, tũũ k'ããts ooj tamewyyh hyb n'aa. Tii bä da sahõnh hẽ Esito häj n'aa bä k'ããts ooj gyyj hado däk da —näng mä Jaweh kyyh Moisés hã.
17 Ti m' Jaweh mejũũ doo da né hẽ rabed'oo. P'op ta tatu Arãw gadahäng bä, tũũ tabewyyh bä m' k'ããts ooj, gyyj kejäg kän mä ajyy hã, ỹỹnh hã, sa masããh hã na-ããj hẽ. Esito häj n'aa haw'ããts hẽ k'ããts ooj gyyj hedo hõm mäh. 18 Ti m' ajyy tak'ëp h'yy ganäng doo, sa sëëw n'aa hedoo doo sii hẽ ramety wät rahaja bä gyyj rapehuunh sa hejoj kejën doo me. Dooh m' rahaja bä. Ajyy hã, ỹỹnh hã, sa masããh hã na-ããj hẽ gyyj kejäk.
19 Ti m' ajyy tak'ëp h'yy ganäng doo, sa sëëw n'aa hedoo doo na-ããj hẽ, raky hadoo Paraóh hã. Hahỹỹ d’ mä sa kyyh:
—P'op Hagä Doo mo haj'aa né ti hỹỹh! —näk mäh.
Ti hadoo né hẽ Paraóh ky kah'ũũm. H'yy ganah'ood. Dooh m' Paraóh ky dahé bä, Jaweh her'oot doo da né kä.
Bung P'op Hagä Doo mo haj'aa Esito buuj tarejãã hyb n'aa panyyg n'aa hahỹỹh
20 Ti m' Jaweh ky hadoo Moisés hã:
—Ahõm jat'iip bäp paah, Paraóh hã makataa hyb n'aa Niro hẽnh tabawëënh bä kä. Hahỹỹ da da a kyyh ta hã: “Hahỹỹ Jaweh kyyh a hã: ‘Man'oo karapee haa rabahõm ỹ raj'aa etsë hyb n'aa. 21 Manan'oo bä rahõm bä, ỹ mejũũ da bung kanekan doo a hã, a karapee hyb n'aa jewyk do hã, a karapee wób hã rababii hyb n'aa. Bë tób gó sii hẽ da rabejëng. Séd dó da bung sahõnh hẽ Esito buuj sa tób gó. Tũũ sii hẽ da tabanäng kanekan doo. 22 Ta tii bawät bä, ta seeh hadoo da ỹ an'oo bä Gosẽnh bä, karapee haa rababong doo bä. Dooh da bung tii bä. Ỹ né hẽ, Jaweh, babä häj n'aa bä bog'ããs doo mabahapäh da ta ti hã. 23 Dooh da karapee haa rahob bä a karapee rahoop doo. Ta ti meuj n'aa näng do heen n'aa, jati da tii’”, näng da a kyyh kyh ỹỹ Paraóh hã —näng mä Jaweh Moisés hã.
24 Ti m' Jaweh her'oot doo hadoo né kä. Tak'ëp kanekan do hyb n'aa wanakud hadoo mä bung Paraóh tób gó hajëë pëë doo, Paraóh karapee hyb n'aa jewyk do sa tób gó na-ããj hẽ. P'eets hẽ paawä bung ragawats'iik sahõnh hẽ Esito häj n'aa.
25 Ti m' Paraóh mejũũ ranaëënh Moisés Arãw daheeh. Ti m' taky hadoo mä sa hã:
—Bë ahõm, P'op Hagä Doo hã bë h'yy kaha'eeh doo hã bë nebooh bë masããh wób ta matym n'aa. Babä häj ỹ n'aa bä tii, tii d’ bë bad'oo —näng mäh.
26 Ti m' Moisés ky gadoo Paraóh:
—Dooh. Dooh taw'ããts hẽ tado bä tii. Tak'ëp Esito buuj raty n'aa ges'yyk Jaweh hã, P'op Hagä Doo ãã tahag'ããs doo hã ãã ma ejuu doo. Sa hã tak'ëp baad nadoo doo ãã ma ejuu bä paawä, ãã da radej'ëëp, pä me ãã rabakut. 27 ãã d’ ah'ũũm tabanawäng hẽnh tamawoob hẽ ta ä̃h ji bahew'ëët do pénh, Jaweh hã, P'op Hagä Doo ãã h'yy kaha'eeh doo hã ãã ma ejuu hyb n'aa, ãã tamejũũ doo da né hẽ —näng mä Moisés Paraóh hã.
28 Ti m' Paraóh ky hadoo:
—Ỹ anoo da bë ahõm Jaweh hã, P'op Hagä Doo bë h'yy kaha'eeh doo hã bë ma ejuu hyb n'aa. Tii d’ ỹ an'oo né paawä, dooh ỹ karẽn bä dawëë bë ahõm bä. Ỹ bë ky n'aa ets'ẽẽ hỹỹ kä —näng mäh.
29 Ti m' Moisés ky hadoo:
—A tób bä naa ỹ banyyh jawén paa bä, nayyw hẽ da ỹ ky n'aa etsẽẽ da Jaweh hã. Jati da bung rabedo bong a mahä̃nh, a karapee hyb n'aa jewyk do mahä̃nh, a karapee wób mahä̃nh. Ti hadoo né paawä, baad mahyb n'aa matakä mawanadii hyb n'aa p'aa hẽnh, Isaraéw buuj ranahõm doo manan'oo bä Jaweh hã rama ejuu hyb n'aa —näng mä Moisés kyyh Paraóh hã.
30 Ti m' Moisés banyyh Paraóh tób bä naa. Jaweh hã taky n'aa etsẽẽ tii bä. 31 Ti m' Moisés etsẽẽ doo Jaweh ky daheeh: bung rabedo bong Paraóh mahä̃nh, ta karapee hyb n'aa jewyk do mahä̃nh, ta karapee wób mahä̃nh. Dooh mad'aak péh. 32 Tii hadoo né paawä, ti noo gó na-ããj hẽ ta daaj hẽ ta h'yyb gó Paraóh ky hadoo: “dooh ỹ an'oo bä rahõm bä”, näng mäh. Dooh m' tan'oo bä ẽnh Isaraéw buuj rahõm bä.