Esito buuj sa masããh wób dejëp P'op Hagä Doo mo haj'aa panyyg n'aa hahỹỹh
9
Ti m' Jaweh ky hadoo Moisés hã:—Ahõm Paraóh wë. Hahỹỹ da da a kyyh ta hã: “Hahỹỹ Jaweh kyyh, P'op Hagä Doo Heber buuj hagã n'aa kyyh a hã: ‘Man'oo karapee haa rahõm ỹ raj'aa etsë hyb n'aa. 2 Manan'oo bä rahõm bä, õm nabuj kahũũm nä bä, Isaraéw buuj manan'oo mak'yys hẽ rahõm bä, 3 tii bä tak'ëp nesaa doo adäng da a masããh hã badawan doo gó habong doo hã, ỹ an'oo bä. Bë masããh cavalo, jumeto, kameer, booj yb, b'éé, kabara, sa hã da tabadäng. 4 Dooh da Isaraéw buuj sa masããh rahob da Esito buuj sa masããh rahoop doo, ỹ an'oo bä. Dooh Isaraéw buuj sa masããh dejëp péh’”, näng da a kyyh kyh ỹỹ Paraóh hã —näng mä Jaweh Moisés hã.
5 Ti m' Jaweh ky n'aa eno däk:
—Jati da ỹ moo wät da ta tii sa häj n'aa bä —näng mäh ta kyyh.
6 Ti m' jati péh Jaweh mo wäd wät ta ky däng doo. Sahõnh hẽ Esito buuj sa masããh dejëpa. Ti hadoo né paawä, dooh Isaraéw buuj masããh dejëp péh. 7 Ti m' Paraóh mejũũ ajyy rabaheg'ããs tehub tado bä. Ti m', dooh ẽnh Isaraéw buuj masããh dejëp péh rahapäh. Ta tii taky n'aa napäh né paawä, dooh tah'yy kawareem bä. Dooh tan'oo bä Isaraéw buuj rahõm bä.
Toos me P'op Hagä Doo rejãã Esito buuj panyyg n'aa hahỹỹh
8 Ti m' Jaweh tamaher'oot Moisés Arãw daheeh. Hahỹỹ da ta kyyh sa hã:
—Bë at'oo däk tëëg ooj gabapõõm do uuh. Ti bä kä õm, Moisés maparar'aah p'op Paraóh matym gó. 9 Tii bä kä tapar'aah gabapõõm doo jé pad'yyt hẽ kä tagenä kän da Esito häj n'aa bä. Tahaj'aa genyyh da Esito buuj sa hã kä sa masããh sa hã kä toos Esito häj n'aa haw'ããts hẽ —näng mä Jaweh kyyh Moisés sa hã.
10 Ti m' rabat'oo däg kän tëëg ooj gabapõõm do uuh, ti m' p'eets hẽ rababë däk Paraóh pa. Ti m' Moisés pararaang kän p'op. Ti m' toos genyyh doo ganebuuh ajyy hã, ỹỹnh hã, sa masããh hã. 11 Ajyy tak'ëp h'yy ganäng doo, Esito bä sa sëëw n'aa hedoo doo na-ããj hẽ dooh m' rahaja bä Moisés wë rana bä Moisés mo haj'aa hã rakametyy hyb n'aa hajõõ ken'yyh do hyb n'aa toos sa hã. Ti hadoo sahõnh hẽ Esito buuj sa hã. 12 Ti m' h'yy ganah'ood magyys hẽ nä Paraóh Jaweh an'oo bä. Dooh m' Paraóh ky dahé bä Moisés Arãw her'oot doo, Moisés hã Jaweh tamaher'oot doo da né kä.
Pä naëng s'ëëb dahẽẽm doo hadoo doo me Esito buuj P'op Hagä Doo rejãã do panyyg n'aa hahỹỹh
13 Ti m' Jaweh ky hadoo Moisés hã:
—Ahõm jat'iip bäp paa Paraóh hã makataa hyb n'aa. Hahỹỹ da da a kyyh ta hã: “Hahỹỹh Jaweh, P'op Hagä Doo Heber buuj hagã n'aa kyyh a hã: ‘Man'oo karapee haa rabahõm ỹ raj'aa etsë hyb n'aa. 14 Maky nadahé nä bä, tak'ëp nesaa doo me da hỹỹ kä ỹ rejãã õm, a karapee hyb n'aa jewyk doo, a karapee wób na-ããj hẽ, dooh ta seeh ỹ hadoo péh sahõnh hẽ badäk hahỹỹ bä, mabahapäh hyb n'aa. 15 ỹ karẽn bä paawä p'ooj däk õm, sahõnh hẽ a karapee na-ããj hẽ dejëp, tak'ëp nesaa doo mo haja ỹỹ me bë hã. 16 õm ỹ wén nadaj'ëëb näh, hejoj ỹỹ ỹ metëëh hyb n'aa né hẽ a hã, hät ỹỹ ky n'aa etsä däk hyb n'aa na-ããj hẽ badäk hahỹỹh haw'ããts hẽ. 17 H'yy kasab'ee gó mabawät nä. Dooh man'oo bä karapé haa rahõm bä. 18 Ti hyb n'aa da jat'iip, da hẽ né hẽ kä, ỹ mejũũ da bah'ood tak'ëp hana doo. Naëng adoos do s'ëëb pä hado däk doo kajäk da. Esito radu doo noo gó naa dooh nooh gó rahepäh péh ta tii da tak'ëp kejäk doo Esito häj n'aa bä. 19 Ti hyb n'aa mamejũũ a masããh, a karapee masããh, sahõnh hẽ badawan doo gó hanäng do na-ããj hẽ ramenaa ta tób n'aa yt hẽ ramejë pëë hyb n'aa. Õm ỹ wén maher'oot ta tii hã, naëng hadoos doo pä hadoo däk doo kajäk da sahõnh hẽ ajyy, ỹỹnh sa jó, sahõnh hẽ bë masããh sa jó badawan doo gó habok doo, ta tób yt hẽ kamananaa doo. Dejëp da ta mahỹỹj’”, näng da a kyyh kyh ỹỹ Paraóh hã —näng mä Jaweh kyyh Moisés hã.
20 Ti m' Paraóh karapee hyb n'aa jewyk do wób, Jaweh her'ood wät doo ky dah'eeh doo, ta kyyh weh'ëëh doo, rahyb n'aa baw'aat sa karom, sa masããh tób n'aa yt ramanaa hyb n'aa. 21 Ta wób, Jaweh kyyh ky nap'eet doo, reréd bëëh sa karom, sa masããh na-ããj hẽ badawan doo gó.
22 Ti m' Jaweh ky hadoo Moisés hã:
—Magadahëë p'op a mooh wë hã naëng hadoos doo pä hado däk doo sahõnh hẽ Esito häj n'aa bä kajäk hyb n'aa, ajyy jó, ỹỹnh jó, sa masããh jó, sahõnh hẽ sa joom jó takajäk hyb n'aa —näng mä ta kyyh Moisés hã.
23 Ti m' ta tatu wë nemuun Moisés gadahäng bä kä, Jaweh mejũũ darung naëng hadoos doo pä hado däk doo. Mananaaw kejäk tũũ. Tii da né kä m' naëng hadoos doo pä hado däk doo kejäk Esito häj n'aa bä Jaweh mo haj'aa. 24 Tak'ëp mä takejäk tũũ naëng pä hado däk doo. Awyp had'yyt däg kä m'. Esito radu doo noo gó naa dooh nooh gó ti hedoo péh bah'ood rahepäh péh Esito häj n'aa bä. 25 Jé pad'yyt hẽ Esito häj n'aa bä naëng hadoos doo pä hado däk doo kejäk sahõnh hẽ badawan doo gó hanäng doo, ajyy sa jó, sa masããh sa jó na-ããj hẽ. Tarejãã sahõnh hẽ sa joom hã, sahõnh hẽ b'aah hã na-ããj hẽ. 26 Jããm hẽ Gosẽnh bä, Isaraéw buuj rababok bä, dooh tado its bä naëng pä hado däk doo.
27 Ti m' Paraóh mejũũ ranaëënh Moisés Arãw daheeh, ti m' taky hadoo sa hã:
—Hỹỹ kä ỹ esõõts hõm né hẽ, baad nadoo doo ỹ moo wäd wät —näng mäh. —Jaweh né tii baad hadoo doo. Ỹ né tii, karapee haa tii baad nadoo doo —näng mäh. 28 —Jããm hẽ dó darung doo, naëng hadoos doo pä hado däk doo ãã wë kajäk doo. Ti hyb n'aa bë ky n'aa ets'ẽẽ Jaweh hã. Ỹ anoo da bë bahõm hyb n'aa. Dooh bë ỹ hewad wäd bä —näng mä Paraóh kyyh Moisés sa hã.
29 Ti m' Moisés ky gadoo Paraóh, ti m' taky hadoo:
—Panang bä naa ỹ banyyh bä kä ỹ gadahäng da moh ỹỹ Jaweh hã ỹ ky n'aa etsẽẽ hyb n'aa. Tii bä da gawatsik da darung doo, naëng pä hadoo doo abahũm da, Jaweh tii ta danäh badäk hahỹỹh hã mabahapäh hyb n'aa. 30 A kyy gó ỹ ky n'aa ets'ẽẽ né paawä, dooh õm, a karapee hyb n'aa jewyk doo rawehëë nä bä Jaweh, dooh bë jeỹỹm nä bä ỹ hapäh —näng mä Moisés kyyh Paraóh hã.
31 (Karejã däk sa joom lĩno häd näng doo sewada häd näng doo daheeh. Sewada häd näng doo ag nyy wät, lĩno häd näng doo etsooh naëng hadoos doo pä hado däk doo kejäk noo gó. 32 Sa joom triig häd näng doo, sentejo häd näng do daheeh, ta jawén taganyyh, ti hyb n'aa dooh takarejã bä.)
33 Ti m' Moisés banyyh Paraóh sii her'oot do paah. Panang bä naa tabanyyh. Ti m' tagadahäng ta mooh Jaweh hã taky n'aa etsẽẽ hyb n'aa. Nayyw hẽ m' darung doo badoo wät, naëng hadoos doo pä hado däk doo, naëng hadoos do na-ããj hẽ abahũm kän. 34 Habahũm doo Paraóh bahapäh bä m', p'aa hẽnh mä baad nadoo doo tamoo wäd kän. Nabuuj kah'ũũm mä Paraóh ta karapee hyb n'aa jewyk do daheeh. Dooh rakarẽn bä raky dahé bä rahapäh doo hã. 35 Nabuuj kah'ũũm né hẽ Paraóh. Dooh m' tan'oo bä Isaraéw buuj rahõm bä, Moisés her'oot do paah hadoo Jaweh kyyh.