Sabakar P'op Hagä Doo mo haj'aa Esito buuj tarejãã hyb n'aa panyyg n'aa hahỹỹh
10
Ti m' Jaweh ky hadoo Moisés hã:—Ahõm nä Paraóh wë. Nabuj kahũũm däk ỹ anoo ta karapee sa hã na-ããj hẽ, hahỹỹh meuj n'aa näng do heen n'aa, mo haja ỹỹ, ỹ moo wät hyb n'aa sa hã, 2 bë taah, bë ta ta taah bë maher'oot hyb n'aa nyy da tak'ëp ỹ rejãã Esito buuj, nyy da meuj n'aa näng do heen n'aa mo haja ỹỹ ỹ moo wäd wät sa hã, ỹ né hẽ Jaweh, Hawät Had'yyt Doo, bë bahapäh hyb n'aa kä —näng mä Jaweh kyyh Moisés hã.
3 Ti m' Moisés Arãw daheeh rabahõm kän Paraóh wë. Hahỹỹ d’ mä sa kyy ta hã:
—Hahỹỹ da Jaweh kyyh, P'op Hagä Doo Heber buuj hagã n'aa kyyh a hã: “H'ëëd hawób nä da ta ä̃h mamesoo nä a h'yyb matym ỹỹ gó makadaduu do pooj jé? Man'oo karapé haa rabahõm hyb n'aa hã ỹ raj'aa etsë hyb n'aa. 4 Manan'oo bä rahõm bä, jat'iip da ỹ manaa sabakar a häj n'aa bä. 5 Tak'ëp hajõng do hyb n'aa da doo ji hapëë wäd bä tũũ. Rawa jëng da kanahën had'oos doo mad'aak do paah naëng hadoos doo pä hado däk do jawén paa bä. Sahõnh hẽ joom g'aad, b'aah g'aad badawan doo gó, joom banäng bä hawäng doo rawa jëng da. 6 Tak'ëp da rakanekan, gabad'ẽẽ däk da sahõnh hẽ a tób, a karapee hyb n'aa jew'yyk do sa tób, sahõnh hẽ Esito buuj sa tób na-ããj hẽ. Dooh noo gó ta ti hedoo péh a yb, a wahë makũũh rahapäh péh Esito häj n'aa bä rakajaa noo gó naa”, näng Jaweh kyyh a hã —näk mä Moisés sa kyyh.
Ti m' Moisés rabahõm kän.
7 Ti m' Paraóh karapee hyb n'aa jewyk doo raky hadoo Paraóh hã:
—Nyy hẽ g'eh ta ä̃ nä ër tarej'ãs nä hỹ aj'yy hã? Man'oo Isaraéw buuj rabahõm Jaweh, P'op Hagä Doo sa hagã n'aa raj'aa etsë hyb n'aa. Dooh tagah'ood nä bä a hã? Karejã däk sahõnh hẽ Esito häj n'aa —näk mä sa kyyh Paraóh hã.
8 Ti m' ramanaa mä kä Moisés Arãw daheeh Paraóh wë. Ti m' Paraóh ky hadoo sa hã:
—Taw'ããts hẽ, bë ahõm Jaweh, P'op Hagä Doo bë hag'ããs doo bë j'aa etsëë —näng mäh. —Pooj jé dó bë maher'ood hã ỹỹ ny hadoo doo hah'ũũm doo? —näng mäh.
9 Ti m' Moisés ky hadoo:
—ãã sii da hah'ũũm wahëh hedoo doo, papuuj hedoo doo, ãã taah, ãã toog, ãã masããh b'éé, kabara, booj yb. Sahõnh hẽ rawén hõm, Jaweh ãã ma ejuu, ãã ma ejäm do hyb n'aa —näng mäh.
10 Ti m' Paraóh ky hadoo:
—Ỹ h'yy ganäng bë hã [dooh bë karẽn bä bë abaaj nä bä p'aa hẽnh]. Bë sii Jaweh awät né paawä, dooh ỹ an'oo bä bë taah, bë ä̃j bë mahũũm bä! 11 Dooh né ỹ an'oo bä ta tii. Bëëh ajyy, na mahũũm bëëh. Ti né tii bë etsẽẽ do paa hã ỹỹ —näng mä Paraóh kyyh.
Ti m' tahabëë n'yyh Moisés Arãw daheeh.
12 Ti m' Jaweh ky hadoo Moisés hã:
—Magadahëë a mooh Esito häj n'aa pong jé hajõng sabakar rabana hyb n'aa Esito häj n'aa hẽnh, sahõnh hẽ sa joom mad'aak doo naëng hadoos doo pä hado däk doo jawén paa bä rabawa hyb n'aa —näng mä ta kyyh Moisés hã.
13 Ti m' p'op Moisés gadahäng ta tatu Esito pong jé. Ti m' tabahëm doo papỹỹj hana hẽnh tabana Jaweh an'oo bä. Adëb bä, atsëm na-ããj hẽ tabahëm. Jati péh, tabawag hõm bä kä, jé pad'yyt hẽ sabakar baboo kän mäh! Tabahëm doo manaa mäh. 14 Hajõng né hẽ sabakar jé pad'yyt hẽ Esito häj n'aa bä rababoo däk. Dooh noo gó rahapäh péh tak'ëp hajõng doo sabakar. Dooh da ta jawén ti hawób hadoo péh Esito häj n'aa bä. 15 Jé pad'yyt hẽ rakanekan tũũ. Atsãm mä tũũ hajõng do hyb n'aa. Sahõnh hẽ naëng hadoos doo pä hado däk do babahũm jawén paa bä mad'aak doo rawa jëng mäh. Sahõnh hẽ joom banäng bä b'aah g'aad, joom g'aad rabawa. Joom ag sii hẽ repóh. Dooh mad'aak péh bag'aad sahõnh Esito häj n'aa bä. Hehót sahõnh hẽ b'aah, sahõnh hẽ sa joom.
16 Ti m' nayyw hẽ Paraóh mejũũ ranaëënh Moisés Arãw daheeh. Rakajaa bä kä taky hadoo:
—Baad nado doo ỹ moo wäd wät Jaweh wë, P'op Hagä Doo bë hagã n'aa wë. Bë wë na-ããj hẽ ỹ moo wäd wät baad nado doo. 17 Bë hyb n'aa mabaan sét nuum wät baad nado doo mo haj'aa ỹỹ. Bë ky n'aa ets'ẽẽ Jaweh hã, P'op Hagä Doo bë hagã n'aa hã, hahỹỹh tak'ëp nesaa doo ji dajëp hanoo dooa tado hõm hyb n'aa mahä̃nh ỹỹ —näng mä Paraóh kyyh.
18 Ti m' Moisés rabahõm kän Paraóh mahä̃nh, ti m' Moisés ky n'aa etsẽẽ Jaweh hã. 19 Ti m' papỹỹj hahyng hẽnh naa bah'ood ty gahëm Jaweh an'oo bä. Tak'ëp bah'ood bana. Sabakar tahëm hõm mä akajaar Hahiin doo häd näng doo me. Dooh mad'aak péh sabakar Esito häj n'aa bä. 20 Ti hadoo né paawä nabuj kah'ũũm nä Paraóh Jaweh an'oo bä. Ti hyb n'aa doo Isaraéw buuj rahõm tan'oo bä ẽnh.
Tak'ëp badagyp doo me P'op Hagä Doo rejãã Esito buuj panyyg n'aa hahỹỹh
21 Ti m' Jaweh ky hadoo Moisés hã:
—Magadahëë a mooh wë nemuun badagyp doo ganyyh hyb n'aa Esito häj n'aa bä. Tak'ëp né da tagadagyp —näng mä Jaweh Moisés hã.
22 Ti m' ta mooh Moisés gadahäng wë nemuun. Ti m' tak'ëp badagyb däk sahõnh hẽ Esito häj n'aa bä. Tamawoob hẽ ta ä̃h badagyp mäh. 23 Dooh m' sa da hadoo doo rahapëë bä. Dooh na-ããj rahaja bä rabanä bä sa tób bä naa. Tamawoob hẽ ta ä̃h nuuj jé tii. Isaraéw buuj rabaj'eenh bä bawak!
24 Ti m' Paraóh mejũũ ranaëënh Moisés, ti m' ta hã taky hadoo:
—Bë ahõm, bë j'aa etsëë Jaweh. Bë ỹỹm, bë taah bë rahadaa ỹ an'oo bä kä. Jããm hẽ bë eréd bëëh babä bë masããh —näng mäh.
25 Ti m' Moisés ky gadoo:
—Dooh. Man'oo ãã masããh ãã mahũũm Jaweh, P'op Hagä Doo ãã h'yy kaha'eeh doo matym n'aa a banoo hyb n'aa ta wób, ta hã ãã ma ejuu hyb n'aa na-ããj hẽ ta wób. 26 Sahõnh hẽ ãã masããh ãã mahũũm da. Dooh ãã erét péh. Ãã masããh wób da ãã ma ejuu da Jaweh, P'op Hagä Doo ãã h'yy kaha'eeh doo ãã j'aa etsë do heen n'aa. Ta tii bä ãã kanaja nä bä, dooh ãã hapëë bä ny hadoo péh ãã ma ejuu do pan'aa —näng mä Moisés kyyh Paraóh hã.
27 Tii d’ né hẽ tabaher'oot paawä, ky kah'ũũm ẽnh p'aa hẽnh Paraóh Jaweh an'oo bä. Dooh m' rahõm bä tan'oo bä ẽnh. 28 Ti m' kawaj'ããn gó Paraóh ky hadoo Moisés hã:
—Danä mahä̃nh ỹỹh! Baad mamatakä p'aa hẽnh matym ỹỹ gó manana wät hyb n'aa! Matym ỹỹ gó mana bä kä p'aa hẽnh õm da dajëp! —näng mä Paraóh kyyh Moisés hã.
29 —Eej —näng mä Moisés. —Maky däng doo da né hẽ. Dooh ỹ ana wäd bä a matym gó —näng mä Moisés.