Sahõnh hẽ Esito buuj sa taah wah'ëëh hedoo doo dejëp do pan'aa Moisés her'oot doo Paraóh hã ky n'aa
11
Ti m' Jaweh ky hadoo Moisés hã:—Sét wät nesaa doo ỹ anoo da Paraóh hã, sahõnh hẽ Esito buuj sa hã. Ti jawén kä Paraóh anoo da bë bahõm kän. Bë da tah'eed n'yyh, bë sahõnh hẽ. 2 Mamaher'ood hỹỹ kä Isaraéw buuj ajyy, ỹỹj na-ããj hẽ rabahõm hyb n'aa Esito buuj sa tób hẽnh, sa pa haj'eenh doo rabetsẽẽ hyb n'aa sa hã k'ããts tëg hawak do s'ëëb, k'ããts tëg gabarëëh do s'ëëb —näng mä Jaweh kyyh Moisés hã.
3 Esito buuj rahyb n'aa jew'yyk Isaraéw buuj Jaweh an'oo bä. Tak'ëp Paraóh karapee hyb n'aa jewyk doo, Esito buuj wób na-ããj hẽ raweh'ëëh mä Moisés.
4 Ti m' Moisés ky hadoo Paraóh hã:
—Hahỹỹ da Jaweh kyyh: “Atsëm up ỹ d’ tabës Esito häj n'aa bä. 5 Sahõnh hẽ sa taah wah'ëëh hedoo doo dejëp da Esito häj n'aa bä. Paraóh, Esito häj n'aa sa wahëh hedoo do t'aah wah'ëëh hadoo doo dajëp da. Ỹỹnh ky n'aa netsäs doo, Esito buuj sa karom triig ag hewõõs do t'aah wah'ëëh hadoo doo na-ããj da dajëp. Sa wahëh t'aah bä naa tadu däk, sahõnh hã takejäk dejëp doo. Sa masããh taah ajyy pooj jé henäng doo dejëp da na-ããj hẽ. 6 Tak'ëp da bë ba'oot bë häj n'aa bä. Dooh noo gó ta ti hedoo péh tak'ëp rabaoot. Dooh na-ããj hẽ hahỹ hadoo tak'ëp rabaoot péh hỹ jawén kä. 7 Ti hadoo né paawä bë hã, badatih däg da Isaraéw buuj sa hã. Dooh haëëj wäd péh awaar hadoo péh ti noo gó ji hã, sa masããh sa hã. Tii bä da, dooh tii da Isaraéw buuj hã ỹ bad'oo Esito buuj sa hã ỹ bad'oo doo da mabahapëë kän”, näng Jaweh kyyh a hã —näng paa Moisés kyyh Paraóh hã.
8 Ti m' Moisés ky hado kän:
—B'ëëh hahỹỹh sahõnh hẽ a karapee hyb n'aa jewyk doo rabana da wë ỹỹ. Wë ỹỹ da rabehyy bëëh tũũ. Ti hahỹỹ da da sa kyyh hã ỹỹ: “Ahõm sahõnh hẽ a karapee sii hẽ”, näk da. Ti jawén da ỹ d’ ahõm —näng mä Moisés Paraóh hã.
—Dooh da Paraóh bë taky dahé bä. Ti tawén hadoo hajõng meuj n'aa näng doo ỹ moo wät hyb n'aa Esito häj n'aa bä —näng mäh.
10 Sahõnh hẽ ta tii meuj n'aa näng doo Moisés Arãw daheeh ramoo boo bok Paraóh matym gó. Ti hadoo né hẽ nabuj kah'ũũm Paraóh Jaweh an'oo bä. Ti hyb n'aa dooh Paraóh an'oo bä Isaraéw buuj rahõm bä ta häj n'aa bä naa.