Paskowaa du n'aa doo panyyg n'aa hahỹỹh
12
Ti m' Jaweh tamaher'oot mä Moisés Arãw daheeh Esito häj n'aa bä. Hahỹỹ d’ mä ta kyyh:2 —Taw'ããts hẽ hahỹỹh kamarab bë yt n'yyh doo ta baab heen n'aa da hỹ jawén sahõnh hẽ bë hã. Tii b’ naa bë du doo da bë etsén doo. 3 Bë maher'ood sahõnh hẽ Isaraéw buuj sa hã, hahỹỹ kamarab yt hã, ji mooh sahõnh hẽ tabadoo däg bä ta ä̃h, sahõnh hẽ ajyy tób danäh rasëëw hõm hyb n'aa b'éé t'aah sa tób yt hã haj'eenh do sa tä. 4 Powób its rado bä tób seeh yt hã haj'eenh doo, ranahaja bä b'éé t'aah rawëë bä sét nuu me, tii bä taw'ããts hẽ sa pa haj'eenh doo sa sii rabawëh. Taw'ããts hẽ rets'ëë hõm tii bä tób yt haj'eenh do pénh, rahew'ëëh do pénh na-ããj hẽ. 5 Hahỹỹ da bë kyyh sa hã: “Sét däg ta baab n'aa hadoo doo bë adoo b'éé t'aah. Aj'yy da bë asëm. Hanäm doo bë asëm. Taw'ããts hẽ dooh nesaa péh ta hã. Bë asëëw da bë hyb n'aa gadoo doo, b'éé t'aah tado bä kabara t'aah tado bä. 6 Baad da bë bahag'ããs ta pan'aa ta ä̃h 14 tabahado däk bä kä hahỹỹh kamarab yt hã. Ta ä̃h 14 tabahado däk bä kä, papỹỹj badëë hyng bä kä, bë sahõnh hẽ bë nebooh”, näk da bë kyyh sa hã. 7 Taw'ããts hẽ ta majyyw uuh rep'ees da tii bä tób b'éé t'aah rayt wëh doo tób noo tu n'aa hã. 8 Ti noo gó né hẽ, atsëm, ỹ karẽn rejä ta dab, rabawëh hyb n'aa. Bag'aad datsäng doo, pãw makuj n'aa tamah doo me kesëëm doo ta gõõj. 9 Bë awëë manäh ta p'ëëh. Bë ewoob manäh da. Sahõnh hẽ bë bejëë tëë ta si n'aa hẽ. 10 Bë an'oo manäh ta uuh mad'aak hyb n'aa jati péh tä n'aa. Tamad'aag bä jat'iip hadoo, taw'ããts hẽ bë ajuu mad'aak doo. 11 Bë bawëh bä hahỹỹ da da bë bad'oo: bë gahõm doo saroor n'aa bë ejë padäg, bë tsyym suun, bë tatu sii hẽ bë moo gó tapadäg däk. Hyb n'aa baw'aat gó bë bawëh. Bë tab'ëës Paskowa ỹỹh, Jaweh bë hyb n'aa jew'yyk do heen n'aa —näng mä Jaweh kyyh.
12 Ti m' ahõm nä ta kyyh:
—Ti noo gó né hẽ, atsëm, ỹ tabës da Esito häj n'aa bä. Ỹ dej'ëëp da sahõnh hẽ sa taah wah'ëëh hedoo doo, sa masããh taah pooj jé henäng doo na-ããj hẽ. Tak'ëp da ỹ rejãã sahõnh hẽ Esito buuj rah'yy kaha'eeh doo. Ỹ né hẽ Jaweh. 13 Bë tób heen n'aa ta ti majyyw ta noo bä bë ep'ees doo. Majyyw ỹ bahapäh bä kä, ỹ tab'ëës da bë tób, ti hyb n'aa dooh bë hã tadëë bä nesaa doo Esito buuj ỹ rejãã bä kä. Dooh bë taah radejëb bä —näng mä Jaweh kyyh.
14 Ti m' ahõm nä ta kyyh:
—Taw'ããts hẽ bë hyb n'aa es'ee had'yyt hẽ kä ta ti ta ä̃h. Taw'ããts hẽ hỹ jawén bëëh, bë panaa na-ããj hẽ bë tab'ëës hed'yyt hẽ, ỹ bë hyb n'aa esee, ỹ bë hyb n'aa jew'yyk hyb n'aa. 15 Setsi ta ä̃h noo gó jããm hẽ bë bawa pãw ta makuj n'aa tamah doo me kesëëm doo. Taw'ããts hẽ ta ti setsi ta ä̃h hadoo doo du doo noo gó bë dawäts hõm sahõnh hẽ pãw makuj n'aa bë tób yt hã hanäng do paah. Baad bë tayy. Jé pãw makuj n'aa näng doo hawa doo ta ti setsi ta ä̃h noo gó, bë ah'eed hõm Isaraéw buuj mahãng tanawäd wät hyb n'aa, ta taah daheeh ragawatsig hõm hyb n'aa. 16 Taw'ããts hẽ ta ti setsi ta ä̃h du doo noo gó, setsi ta ä̃h tabahadoo bä kä na-ããj hẽ bë kata däg séd hã ỹ bë hyb n'aa esee hyb n'aa. Bë moo boo manäh da ti noo gó. Jããm hẽ bë waa bë moo bok —näng mäh Jaweh kyyh.
17 —Taw'ããts hẽ bë tab'ëës Pãw Makuj N'aa Tamah Doo heen n'aa, ti noo gó né hẽ bë panaa ỹ manyyh do hyb n'aa Esito häj n'aa hẽnh naa. Taw'ããts hẽ sét ta baab ken'yyh bë tab'ëës hed'yyt hẽ hỹ jawén, bë panaa na-ããj hẽ. 18 Taw'ããts hẽ bë du doo bë awa doo pãw makuj n'aa tamah doo ta ä̃h 14 tug bä. Bë beréd hõm da 21 ta ä̃h tabahado däk bä kä, tug bä. Pooj jé nu ganyyh kamarab ta baab heen n'aa hã tii. 19 Taw'ããts dooh kaw'yyt péh bë tób bä pãw makuj n'aa ta ti setsi ta ä̃h noo gó. Bë ah'eed hõm Isaraéw buuj mahãng tanawäd wät hyb n'aa ta ti noo gó pãw makuj n'aa näng doo hawa doo, Isaraéw panaa tado bä, Isaraéw buuj nado doo tado bä bë sii hawät do paah. Ragawatsig hõm da sa taah daheeh . 20 Ti hyb n'aa, bë awa manäh pãw makuj n'aa näng doo ti noo gó. Jããm hẽ pãw makuj n'aa tamah doo bë awa da bë baj'eenh bä —näng mä Jaweh kyyh Moisés sa hã.
21 Ti m' Moisés ats'yyt sahõnh hẽ Isaraéw buuj sa wahëh hedoo doo, ti m' taky hadoo sa hã:
—Nayyw hẽ! Bë ahõm, bë asëëw b'éé t'aah bë tób yt hã haj'eenh do sa tä. Ti b’ bë nehooh Paskowa b'éé n'aa. 22 Bë gek'ãã jawii isopoh häd näng doo majyyw nahëëh pan'aa ji mep'ees doo. Tii bä da bë datu majyyw hood gó, bë ep'eets da tób nooh tu n'aa hã. Bë anäh manäh tób gó naa tabawag hõm bä. 23 Esito häj n'aa Jaweh tabës bä, Esito buuj tadej'ëëp hyb n'aa, tahapäh da majyyw bë tób noo bä, tii bä tatab'ëës da bë tób. Dooh da tan'oo bä dajëb manaa doo tajëë suun bë taah wah'ëëh hedoo doo nadajëp hyb n'aa. 24 Taw'ããts hẽ bëëh, bë panaa na-ããj hẽ, bë ky daheeh hed'yyt hẽ ta tii kamejũũ doo. Taw'ããts hẽ da bë teb'ëës da sét ta baab ken'yyh. 25 Bë ajëë pëë bä da hëëj bë hã Jaweh anoo doo bë hã taky n'aa enooh doo da, taw'ããts hẽ bë tab'ëës hed'yyt hẽ Paskowa. 26 Bë taah reaanh bä, “h'ëëd tahanäng péh ta tii ër tab'ëës doo?”, ranoo bä kä, 27 tii bä hahỹỹ da da bë maher'oot bë taah: “ër nabooh hahỹỹh Paskowa b'éé n'aa, ër tab'ëës hahỹỹh, Jaweh ër hyb n'aa jew'yyk hyb n'aa, Isaraéw buuj sa tób Jaweh tabës do hyb n'aa Esito häj n'aa bä Esito buuj tadej'ëëp noo gó”, näk da bë kyyh sa hã —näng mä Moisés sa hã.
Ti m' Isaraéw buuj ranu woow häng Jaweh raj'aa etsë hyb n'aa. 28 Ti m' ramoo boo kän sahõnh hẽ Moisés Arãw sa hã Jaweh mejũũ doo da né hẽ.
Sa taah wah'ëëh hedoo doo dejëp do panyyg n'aa hahỹỹh
29 Ti m' atsëm ub, sahõnh hẽ Esito buuj sa taah wah'ëëh hedoo doo Jaweh dej'ëëp. Paraóh, Esito bä wahë n'aa t'aah wah'ëëh hadoo doo sii hẽ, radewäts bëëh do sa taah wah'ëëh hedoo doo sii hẽ, sa masããh taah pooj jé henäng doo sii hẽ dejëp kän mäh. 30 Ti m' Paraóh, ta karapee hyb n'aa jewyk doo, ta karapee wób na-ããj hẽ raty gawëëj däk atsëm. Sahõnh hẽ Esito buuj sa tób yt hã ti anäng dejëp doo. Ti hyb n'aa tak'ëp raba'oot ranu haẽnh ód haj'aa Esito häj n'aa bä.
Isaraéw buuj raban'yyh Esito häj n'aa bä naa panyyg n'aa hahỹỹh
31 Ti m' ta tii atsëm né hẽ Paraóh mejũũ ranaëënh Moisés Arãw daheeh. Ti m' taky hadoo sa hã:
—Séd! Bëëh, Isaraéw buuj na-ããj hẽ bë ahõm karapee haa mahä̃nh! Bë ahõm, bë j'aa etsëë Jaweh bë etsẽẽ doo da. 32 Bë ataa hõm bë masããh b'éé, kabara, booj yb, bë ahõm kä bë her'ood wät doo da. Ỹ bë ky n'aa edëë! —näng mä Paraóh kyyh sa hã.
33 Ti m' tak'ëp Esito buuj etsẽẽ mä Isaraéw buuj rahyb n'aa baw'aat hyb n'aa sa häj n'aa raberéd hõm hyb n'aa. “ãã sahõnh hẽ ãã da dejëp nayyw hẽ bë nahõm bä”, näk mä sa kyyh. 34 Ti m' Isaraéw buuj rabado däk pãw pan'aa kaj'õõj däk doo, kamanekuuj nä doo, ji aj'õõs do hood gó hasooh doo, ti m' rahabën däk ta hood pããn me sa jó rabesët hyb n'aa. 35 Moisés tamaher'ood wät doo da né hẽ Isaraéw buuj rabad'oo. Retsẽẽ mä Esito buuj hã k'ããts tëg hawak do s'ëëb, k'ããts tëg gabarëëh do s'ëëb, sa saroor na-ããj hẽ. 36 Esito buuj rahyb n'aa jew'yyk Isaraéw buuj Jaweh an'oo bä. Ranoo né hẽ sa hã retsẽẽ doo. Tii d’ rabad'oo do hyb n'aa radó hõm Esito buuj sa ma paah.
37 Ti m' Isaraéw buuj ratsyym kasog kän panang Rameses häd näng doo bä naa. Panang Sukot häd näng doo hẽnh mä rabahõm kän. 600 miw mä ajyy tsyym me hahõm doo. Dooh taketsén bä ỹỹj, karapé sa sii hah'ũũm doo. 38 Hajõk Isaraéw buuj nado doo, ah'ũũm mä sa sii. Hajõng sa masããh b'éé, kabara, booj yb, jumeto, ramahũũm sa sii. 39 Pãw pan'aa Esito häj n'aa bä naa ramanyyh doo resëëw kän mä pãw makuj n'aa tamah doo. Ta wén makuj tamah, Esito buuj ramejũũ do hyb n'aa nayyw hẽ sa häj n'aa raberéd hõm hyb n'aa. Ti hyb n'aa dooh rahaja bä ramahõm me waa n'aa resëëw bä.
40 430 ãn Isaraéw buuj rabaj'eenh paa Esito häj n'aa bä rakajaa noo gó naa paa né hẽ. 41 Ta tii 430 ãn tabahëëj hõm bä kä, tagadëëg ub hadoo doo ta ä̃h kajaa noo gó, ti noo gó né hẽ sahõnh hẽ Jaweh karapee sa panaa panaa hẽ han'yy doo kä Esito häj n'aa bä naa. 42 Ti noo gó né hẽ, atsëm, Jaweh bahag'ããs sa hã Esito häj n'aa bä tamanyyh hyb n'aa. Ti hyb n'aa taw'ããts hẽ ta ti heen n'aa noo gó sahõnh hẽ Isaraéw buuj ratab'ëës, rabahewak, Jaweh raweh'ëëh do heen n'aa. Taw'ããts hẽ sét ta baab ken'yyh rataheb'ëës ta heen n'aa, sa panaa na-ããj hẽ.
Paskowa ky n'aa jaw'yyk doo hahỹỹh
43 Ti m' Jaweh tamaher'oot Moisés Arãw daheeh. Hahỹỹ da ta kyyh sa hã:
—Hahỹỹh da Paskowa ji taheb'ëës doo ky n'aa jaw'yyk doo: Taw'ããts hẽ dooh Isaraéw buuj nado doo awëë bä Paskowa tä n'aa. 44 Bë karom bë etsẽẽ hõm doo rahajaa rawëë bä sa masuuj noo byyh takehõk do jawén paa bä. 45 Ta s'ee hẽnh naa pawóp its ta baab bë mahang habóng doo, ta wób bë wë moo bok doo na-ããj hẽ, dooh tahajaa rawëë bä —näng mäh.
46 —Tób yt hã bë bawëh Paskowa tä n'aa. Bë manäh manäh da tób w'oo hã ta dab. Bë getëh manäh ta k'yy. 47 Taw'ããts hẽ sahõnh hẽ da Isaraéw buuj ratab'ëës Paskowa tä n'aa —näng mäh.
48 —Paskowa Isaraéw buuj nado doo bë mahang hawät doo karẽn bä tatabëj bä, ỹỹh, Jaweh, tahyb n'aa jew'yyk hyb n'aa, taw'ããts hẽ pooj jé dó sahõnh hẽ ajyy ta tób yt hã haj'eenh doo ramasuuj noo byyh ehõg hõm. Tii bä kä tahajaa däg kän tatabëëj bä bë sii, Isaraéw buuj hadoo do hado däk do hyb n'aa. Aj'yy ta masuuj noo byyh kanehõk doo, dooh bë an'oo bä tawëë ta tä n'aa. 49 Sét né hẽ Paskowa bë taheb'ëës do ky n'aa jaw'yyk doo. Isaraéw buuj raky daheeh da, ta wób, bë mahang habong doo raky daheeh da na-ããj hẽ —näng mä Jaweh kyyh Moisés sa hã.