Sa t'aah wah'ëëh hedoo doo P'op Hagä Doo hã kan'oo däk do panyyg n'aa, Pãw Makuj N'aa Tamah Doo ratab'ëës do ky n'aa daheeh hahỹỹh
13
Ti m' Jaweh ky hadoo Moisés hã:2 —Taw'ããts hẽ bë asëëw tsyt hẽ wë ỹỹ sahõnh hẽ bë taah wah'ëëh hedoo doo, ma ỹỹ rabadoo do hyb n'aa, bë masããh taah pooj jé henäng doo na-ããj hẽ —näng mä Jaweh Moisés hã.
3 Ti m' Moisés ky hadoo Isaraéw buuj sa hã. Hahỹỹ d’ mä ta kyyh:
—Bë hyb n'aa esee, bë tab'ëës hed'yyt hẽ hahỹỹ ta ä̃h, Esito häj n'aa bä naa, bë ramejũũ doo bä naa bë banyyh noo gó, tak'ëp hadoo do ta hejój me bë Jaweh manyyh do hyb n'aa. Bë awa manäh pãw makuj n'aa näng doo. 4 Bë anä kä naga hẽ, ta kamarab Abib häd näng doo du doo noo gó kä. 5 Kanaãh buuj, Hiit buuj, Amor buuj, Hiw buuj, Jebus buuj, sa häj n'aa bä bë kajaa bä, hëëj ta ky kanah'ỹỹt doo me bë wahë makũũh hã Jaweh ky n'aa enooh do paah bä bë kajaa bä, sahõnh hẽ ji karẽn doo tabanäng bä bë kajaa bä kä, tii bä bë tab'ëës da pãw makuj n'aa tamah doo heen n'aa hahỹỹ kamarab yt hã. 6 Hahỹỹ da da bë tayy: setsi ta ä̃h noo gó jããm hẽ tahajaa bë awa pãw makuj n'aa tamah doo. Setsi tabadoo däg bä kä ta ä̃ kä, bë kata däg da Jaweh bë hyb n'aa esee hyb n'aa. 7 Setsi ta ä̃h noo gó jããm hẽ bë awa pãw makuj n'aa tamah doo me kesëëm doo. Taw'ããts hẽ dooh né hẽ kaw'yyt péh ti noo gó ta makuj n'aa, makuj n'aa näng doo me kesëëm doo bë häj n'aa bä. 8 Ti noo gó hahỹỹ da da mamaher'ood a taah sa hã: “Hahỹỹh ỹ wén d'oo, hyp ỹ n'aa Jaweh bad'oo do hyb n'aa Esito häj n'aa bä naa ỹ tamanyyh noo gó”, näng da —näng mä Moisés Isaraéw buuj sa hã.
9 Ti m' ahõm nä Moisés sa hã tamaher'oot doo:
—Ji manabaan do heen n'aa ji moo hã, ji maboor hã hadäk do hadoo da ti ta tii bë tab'ëës doo. Taw'ããts hẽ Jaweh ky n'aa jew'yyk doo bë hã tan'oo däk doo bë hyb n'aa esee hed'yyt hẽ bë tab'ëës doo an'oo bä, taky n'aa bë her'oot hyb n'aa na-ããj hẽ. Ta tii d’ ta wén hadoo, tak'ëp ta hejój gó bë Jaweh manyyh do hyb n'aa Esito häj n'aa bä naa. 10 Taw'ããts hẽ bë tab'ëës, bë tayy hed'yyt hẽ Pãw Makuj N'aa Tamah doo kamarab ta heen n'aa Jaweh ky däng do yt hã. Kamarab Abib häd näng do yt hẽ né hẽ —näng.
11 Ti m' Moisés ky hadoo ẽnh:
—Kanaãh buuj sa häj n'aa bä bë Jaweh manaa do jawén paa bä, sa häj n'aa bë hã tabanoo do jawén paa bä bë wahë makũũh hã baad taky n'aa enooh doo da, 12 tii bä da taw'ããts hẽ Jaweh hã bë banoo sahõnh hẽ bë taah wah'ëëh hedoo doo. Sahõnh hẽ bë masããh taah ajyy pooj jé henäng doo Jaweh ma. 13 Taw'ããts hẽ jumeto t'aah pooj jé henäng doo bë wareem däk, b'éé t'aah da ta jawén buuj. Bë kanarẽn bä bë wareem bä, taw'ããts hẽ bë nu tsaduus hõm. Taw'ããts hẽ sahõnh hẽ bë taah ajyy wah'ëëh hedoo doo mabaj hado däk b'éé t'aah. 14 Ta jawén da, bë taah reaanh bä bë hã, “H'ëëd tahanäng péh tii?”, ranoo bä, tii bä hahỹỹ da da bë kyyh sa hã: “Tak'ëp hadoo do ta hejój me Jaweh ãã tamanyyh Esito häj n'aa bä naa, hëëj ãã ramejũũ doo bä naa. 15 Paraóh ky kah'ũũm bä, ãã bahõm doo tananoo noo gó, Jaweh dej'ëëp sahõnh hẽ Esito buuj sa taah wah'ëëh hedoo doo, sa masããh pooj jé henäng do na-ããj hẽ. Ti hyb n'aa ỹ nabooh, ỹ ma ejuu Jaweh hã sahõnh hẽ masãh ỹỹ sa taah pooj jé henäng doo. Ti hyb n'aa na-ããj hẽ ỹ mabaanh tah ỹỹ aj'yy wah'ëëh hadoo doo. Ta säm ỹ anoo ta jawén buuj”, näk da bë kyyh. 16 Ta heen n'aa hadoo ji moo hã, ji maboor hã hadäk do hadoo da ti ta tii ër tab'ëës doo, tak'ëp hadoo do ta hejój me Esito bä naa ër Jaweh manyyh do paah ji hyb n'aa esee hyb n'aa —näng mäh.
Akajaar rabatsëk do panyyg n'aa hahỹỹh
17 Isaraéw buuj rabahõm Paraóh an'oo bä kä, dooh P'op Hagä Doo mahũũm mäh ta tyw n'aa me Piris häj n'aa kajatsëk doo me, p'eets hẽ né paawä tii. Tii d’ tawén hadoo, hahỹỹ d’ mä P'op Hagä Do kyyh ta h'yyb gó:
—Sa wë rakamajẽ bä, rat'yyd kamehĩĩn da rabanyyh doo hã. Tii bä Esito hẽnh rababaaj hõm da p'aa hẽnh —näng mä ta h'yyb gó.
18 Ti hyb n'aa rakawõõt P'op Hagä Doo an'oo bä, ta tyw n'aa tabanawäng doo kajetsëk doo me, akajaar Hahiin Doo häd näng do nemũũn. Raban'yyh bä, sa kumaan yt hẽ m' rabanyyha.
19 Raban'yyh bä Moisés mahũũm mä sa sii Jusé makũũh k'yy paah. Tii d’ ta wén d'oo tadajëp do pooj jé Jusé mejũũ do hyb n'aa P'op Hagä Doo hã raky kejäk ta k'yy ramahũũm hyb n'aa raban'yyh bä kä. Hahỹỹ da paa Jusé kyyh: “Bë P'op Hagä Doo masa, bë tamo n'aa jesuu da. Tii bä da ỹ karẽn bë mahũũm ky ỹỹ”, näng paa Jusé kyyh.
20 Ti m' panang Sukot häd näng doo raberéd hõm jawén paa bä m', rabaym dó panang Etãm häd näng doo bä, tabanawäng doo nabyy me. 21 Adëb bä wë puh p'op nu däk doo gó Jaweh bahõm sa pooj jé, ta tyw n'aa tametëëh hyb n'aa. Atsëm tëëg hõõ gó tabahõm sa pong jé, rabahapäh hyb n'aa. Ti hyb n'aa rabahajaa adëb bä rabahõm bä, atsëm na-ããj hẽ. 22 Sa pooj jé wë puh bahõm hed'yyt hẽ adëb bä, tëëg hõõh atsëm hed'yyt hẽ.