14
Ti m' Jaweh ky hadoo Moisés hã:2 —Mamaher'ood Isaraéw buuj hã paah me rakawõõt panang Pi Hahirot nedaa bä rabayyw j'eenh hyb n'aa. Ta karawaa me panang Mig-Dor häd näng doo, ta karawaa s'eeh hẽnh akajaar. Taw'ããts hẽ rabaym dó ta hõõ bä akajaar nabyy me, panang Baar Sipõn nu masee me. 3 Tii d’ bë bad'oo do hyb n'aa, hahỹỹ da da Paraóh hyb n'aa newëë da: “Isaraéw buuj kanapëë booh, daap rababoo däk, h'yyb manepëë booh. Nadaa rakad'oo péh banawäng doo baéh do hyb n'aa”, näng da ta h'yyb gó. 4 Paraóh h'yy ganah'ood, nabuj kah'ũũm da ỹ an'oo bä. Ti hyb n'aa bë jawén tabahõm da bë no n'aa. Hät ỹ ky n'aa etsä däk ỹ an'oo bä da Paraóh, Paraóh warahén n'aa hã ỹ bad'oo do hyb n'aa. Ỹ né hẽ Jaweh Esito buuj rahapäh da —näng mäh Jaweh kyyh Moisés hã.
Ti m' Jaweh mejũũ doo da Isaraéw buuj rabad'oo.
5 Ti m' rapanäk bä kä Esito bä wahë n'aa hã Isaraéw buuj rakejën h'ũũm do ky n'aa, ta seeh hado däk mä ta h'yyb, ta karapee hyb n'aa jewyk do sa h'yyb na-ããj hẽ Isaraéw buuj sa hã. Ti m' rakaner'oot bä kä raky hadoo:
—Hëd n'aa pa tii da ër banoo Isaraéw buuj rabah'ũũm? Dooh ër wë moo boo bong péh —näk mä sa kyyh.
6 Ti m' Paraóh mejũũ ta hood cavalo takyyk doo rabenäm hyb n'aa, ti m' ta warahén n'aa tamahũũm ta sii. 7 Tamahũũm ta sii 600 sa hood cavalo takyyk doo tasëëw däk doo. Sahõnh hẽ Esito häj n'aa bä sa hood cavalo takyyk doo rakaneb'ooh do hood n'aa tamahũũm na-ããj hẽ. Sahõnh hẽ sa hood gó rabahõm warahén, warahén wahë n'aa daheeh. 8 Paraóh, Esito bä wahë n'aa no n'aa masoo Isaraéw buuj neỹỹm doo me han'yyh do paah, nabuj kahũũm däk do hyb n'aa Jaweh an'oo bä. 9 Esito sa warahén n'aa cavalo jó hah'ũũm doo, sa hood gó kavalo takyyk doo gó hah'ũũm doo, tsyym me hah'ũũm doo rano n'aa masoo paawä Isaraéw buuj. Ti m' rakataa sa hã akajaar nabyy me Isaraéw buuj rabayyw j'eenh doo bä kä, Pi Hahirot nedaa bä m', panang Baar Sipõn nu masee me.
10 Ti m' dawëë naa rabahapäh bä kä sa wë Paraóh rabana, tak'ëp mä rabeỹỹm bok. Jaweh hã raky n'aa etsẽẽ mä tamo n'aa jesuu hyb n'aa. 11 Ti m' raky hadoo Moisés hã:
—Dooh apäh a h'yyb dejëp doo sa kamag n'aa ji dakä jëng hyb n'aa Esito bä, ãã mawén manaa banawäng hẽnh ãã dejëp hyb n'aa? Mahegãã ãã hã mabad'oo doo Esito hẽnh naa ãã mamanyyh do hyb n'aa! 12 Hahỹỹ da paa ãã kyyh a hã Esito häj n'aa bä ãã babok nä bä: “ãã mah'yyb tatuk manäh. Namanäh. Taw'ããts hẽ Esito buuj wë ãã moo bok né hẽ”, näk paa ããh. Taw'ããts hẽ Esito buuj wë ãã moo bok do paawä, tabanawäng hẽnh ãã dajëp do mahä̃nh —näk mä sa kyyh Moisés hã.
13 Ti m' Moisés ky hadoo sa hã:
—Bë eỹỹm manä da. Bë h'yy gejë hõm manäh. Bë hapäh da nyy da bë Jaweh ed'ëëp naga hẽ. Bok ta tii Esito buuj bë hapäh doo, dooh da bë hapëë wäd bä hỹ jawén. 14 Jaweh da tii nebooh bë hyb n'aa. Bëë kä, bë hegãã'p da bag hẽnh —näng mä Moisés Isaraéw buuj sa hã.
15 Ti m' Jaweh ky hadoo Moisés hã:
—Hëd n'aa manaëënh hed'yyt hẽ hã ỹỹ bë ỹ masa hyb n'aa? Mamaher'ood Isaraéw buuj ratsyym kasok hyb n'aa! 16 P'op magadahëë a tatu akajaar pong jó, naëng ketyn hõm hyb n'aa, bawoonh doo gó Isaraéw buuj rabatsëg hõm hyb n'aa tamyyj däk hã. 17 Nabuj keh'ũũm da Esito buuj ỹ an'oo bä, bë jawén rabatsëk paawä hyb n'aa. Ky n'aa etsä däg da hät ỹỹ Paraóh hã, Paraóh warahén n'aa hã, sa hood cavalo takyyk doo hã, ta warahén kavalo jó hah'ũũm do hã ỹ bad'oo doo hyb n'aa. 18 ỹ né hẽ Jaweh Esito buuj rahapäh da Paraóh hã, ta hood cavalo takyyk doo hã, ta warahén cavalo jó hah'ũũm doo hã hejoj ỹỹ kametä däk jawén paa bä —näng mä Jaweh kyyh.
19 Ti m' P'op Hagä Do ããs, Isaraéw warahén n'aa sa pooj jé hahõm do paah, duu hẽnh däk tabahõm kän. Wë puh sa pooj jé hahõm do paah, ti na-ããj hẽ sa jawén tabadäg däk. 20 Esito buuj warahén n'aa, Isaraéw buuj sa hoo gad'oo bä tabadäg däk. Atsëm badagyp wë puh hadoo doo an'oo bä Esito buuj sa hã. Isaraéw buuj sa hã bawak tan'oo bä. Ti hyb n'aa atsëm dooh rakata bä.
21 Ti m' Moisés gadahëë däk mä ta mooh akajaar pong jé. Ti m' atsëm bah'ood papỹỹj hana hẽnh hana doo tapasaats hõm mä akajaar Jaweh an'oo bä. Ketyn hõm mä naëng. Bawooj däk mäh. 22 Ti m' Isaraéw buuj rabatsëg hõm bawooj däk doo me. Ta hadë hadoo mä naëng sa karawaa me séd demuun.
23 Ti m' sa jawén Egito buuj rabatsëg paawä. Sahõnh hẽ Paraóh masããh cavalo, sahõnh ta hood, sahõnh hẽ ta warahén cavalo jó hah'ũũm doo rabatsëg hõm paawä sa jawén. 24 Tapaj'ëë bä kä m', wë puh gó naa, tëëg hõõ gó naa na-ããj hẽ Jaweh bahegãã wät Esito buuj warahén n'aa sa wë. Ti m' rah'yyb manepëë bong tan'oo bä. 25 Sa hood cavalo takyyk do kameso däk tan'oo bä. Ti hyb n'aa m' dooh baad rahaja bä rahõm bä. Ti m' Esito buuj raky hadoo:
—Hamäh! ër abaaj hõm sa mahä̃nh! Jaweh ti moo hedoo ër hã sa hyb n'aa ër no n'aa —näk mä sa kyyh.
26 Ti m' Jaweh ky hadoo Moisés hã:
—Magadahëë a mooh akajaar pong jé, bawoonh doo gabaaj jëng hyb n'aa p'aa hẽnh, Esito buuj, sa cavalo hood, sa warahén cavalo jó hah'ũũm doo jó naëng kajäk hyb n'aa —näng mäh Jaweh.
27 Ti m' Moisés gadahëë däk mä ta mooh akajaar pong jó. Ti m' tabawag hõm bä kä, tamii paa hado däk mäh. Esito buuj waj'aa hõm paawä naëng mahä̃nh. Naëng kajäk sa jó Jaweh an'oo bä. 28 Naëng agyb jëng sa hood cavalo takyyk doo, sa warahén cavalo jó hah'ũũm doo sa hã. Sahõnh hẽ Paraóh warahén n'aa Isaraéw buuj jawén hatsëk doo agyyp jëk. Pehä̃s mäh. Dooh hedëp péh.
29 Isaraéw buuj rabatsëg hõm akajaar bawooj däk doo me. Ta hadë hadoo mä sa karawaa me séd demuun rabatsëk bä. 30 Ti noo gó né hẽ Isaraéw buuj Jaweh bed'ëëp Esito buuj sa moo gó naa. Ta nabyy me Isaraéw buuj rabahapäh Esito buuj sa s'ëëb paa dejëp doo. 31 Tak'ëp hedoo doo ta hejoj Jaweh metëëh doo Esito buuj sa hã Isaraéw buuj rabahapäh bä, rajeỹỹm kän mä, rawehëë kän mä Jaweh. Ta hã rah'yy kaé däng kän. Moisés, Jaweh karom hã, rah'yyb éh na-ããj hẽ.