P'op Hagä Doo hã Moisés rama ejäm do hahỹỹh
15
Ti m' Moisés Isaraéw buuj daheeh rama ejäm Jaweh. Hahỹỹ d’ mä sa kyyh rejäm doo:Jaweh ỹ ma ejäm,
tak'ëp taj'aa ketsë do hyb n'aa.
Cavalo, sahõnh hẽ sa jó hah'ũũm doo na-ããj hẽ
tadewäts bëënh tamé.
2 Mejoj ỹ n'aa Jaweh. Ta ky n'aa ỹ ejäm.
ỹ ted'ëëb wät.
Ti né hẽ P'op Hagä Doo ỹ h'yy kaha'eeh doo.
ỹ j'aa etsë da ta hã.
Ti né hẽ P'op Hagä Doo ee h'yy kaha'eeh doo.
ỹ hyb n'aa jew'yyk da.
3 Warahén hadoo Jaweh.
Jaweh ta häd.
4 Ta me tadewäts bëënh
Paraóh hood, ta warahén sii hẽ.
T'õp akajaar Hahiin häd näng doo me rapehãs
Paraóh warahén n'aa sa wahëh hedoo doo karejan doo.
5 T'õp hadoo do hagyyb jëk sa hã.
Pä hadoo radesug jëk.
6 A moo hub Jaweh,
tak'ëp tabahejoonh.
A moo hub Jaweh,
gawatsig hõm ãã majĩĩ.
7 Tak'ëp hadoo doo a hejój me
madewäts bëëh tũũ a wë h'yy kawareem do paah.
Dooh mameso wäd bä a kawaj'ããn tëëg hõõ hadoo doo.
A kawaj'ããn gawatsig hõm ãã majĩĩ, jawii tëëg hõõh me gawatsig hõm doo da.
8 P'op naëng satug nyyh
akajaar hã mapahuunh bä kä.
P'op, ta hadë hado häng naëng.
Abaa däk t'õp madäk do naëng.
9 Hahỹỹ da ãã majĩĩ sa kyyh sa hã hẽ rakasab'ee bä:
“ỹ no n'aa masoo da Isaraéw buuj. Ỹ kataa da sa hã.
ỹ ets'ëë hõm da sa ma paah.
ỹ karẽn doo da ỹ bad'oo da sa hã.
Kuman ỹỹ, mariij oow ỹ ado däk da,
ỹ gawats'iik da Isaraéw buuj”, näk sa kyyh.
10 Tii bä mapahuuj wät, bah'ood gó tabana,
tii bä sa jó akajaar agyyb jëng.
Maadaka hewëëh doo gó,
radesug jëk korããj jawyyg n'aa hadoo.
11 Dooh õm hadoo péh rah'yy kaha'eeh do sa mahang!
Dooh a da hadoo péh!
Tsyt hẽ, nesaa do mahä̃nh mabawät. Kabaj'aa õm sa bahä̃nh!
õm rajeỹỹm, a hã raj'aa etsë sa bahä̃nh.
õm tii pehuunh doo!
12 Magadahëë bä a moo ahub,
ãã majĩĩ naëng wamé jëng.
13 Makamahä̃n doo hed'yyt doo me mah'yyb mahũũm a karapee medëëb wät doo. Dooh mah'yy kah'ỹỹd bä sa hã.
A hejój me mamahũũm a karapee
mahawät hẽnh, baad had'oo up doo bä.
14 Tak'ëp hadoo doo mamoo wäd wät doo badäk hahỹỹ hã habóng doo raky n'aa napäh bä,
rakajajãn da tak'ëp rajeỹỹm do hyb n'aa.
Tak'ëp rahyb n'aa tón da Piris buuj.
15 Tak'ëp da rajeỹỹm bong Edõm buuj sa wahë n'aa.
Kajajãn da Moab buuj sa nu gabóg hedoo doo ỹỹm haj'aa.
H'yy gabedo bong da Kanaãh häj n'aa buuj.
16 Nayyw hẽ ỹỹm, kajajãn doo na-ããj hẽ kajäk da sa hã.
A hejoj hyb n'aa, bag hẽnh da rababë däk pä hadoo,
a karapee mabedëëp wät doo
ratabëëj hõm bä kä.
17 A karapee mamanaa da hëëj maky n'aa enooh doo hẽnh.
A waëë hã, a panang pan'aa masëëw hõm doo bä, tsyt hẽ a wë kasëëw däk doo matama doo bä õm rayt j'aa etsë doo bäa man'oo rabaj'eenh hyb n'aa Tak'ëp Hyb N'aa Jawyk Doo.
18 Jaweh bog'ããs da hed'yyt hẽ.
Dooh da tahëëj bä tabag'ããs doo —näk mä Moisés sa kyyh rejäm doo.
19 Bawooj däk doo me Isaraéw buuj rabatsëg hõm akajaar. Ti m' sahõnh hẽ Paraóh masããh cavalo, sahõnh hẽ ta hood, sahõnh hẽ ta warahén cavalo jó h'ũũm doo rabatsëg hõm bä paawä sa jawén, sa jó naëng kajäk Jaweh an'oo bä paah. 20 Ti m' Mirijãm, P'op Hagä Doo ky n'aa ród, Arãw ä̃nh, bado däk taty gedyyg n'aa ỹỹj tah'yyb mahũũm hyb n'aa. Sahõnh hẽ ỹỹj rabasog däk taty gedyyg n'aa sa h'ëëd, ti m' rabasããm, ranu gat'ëë däk mäh. Ti m' Mirijãm ejäm kän. 21 Hahỹỹ d’ mä Mirijãm kyyh tejäm doo:
Taw'ããts hẽ Jaweh bë ma ejäm,
tak'ëp taj'aa ketsë do hyb n'aa.
Cavalo, sahõnh hẽ sa jó hah'ũũm doo na-ããj hẽ
tadawäts hõm tamé —näng mäh ta kyyh.
Naëng datsäng doo panyyg n'aa hahỹỹh
22 Tii bä kä m' akajaar Hahiin Doo häd näng doo bä naa Moisés mahũũm mä Isaraéw buuj. Tabanawäng doo bä kä Suur häd näng doo bä rababoo däk bä, tamawoob hẽ ta ä̃h nuuj jé dooh m' rawyyd bä naëng. 23 Marah häd näng doo bä rakajaa bä kä, dooh rahaja bä reëg bä ta tii bä majat do naëng. Datsäng mäh. (Ti hyb n'aa né hẽ ta tii bä Marah ta hädb). 24 Ti m' Moisés wë rah'yy kawareem. Hahỹỹ d’ mä sa kyyh: “H'ëëd g'eh a eëëk péh?”, näk mäh.
25 Ti m' tak'ëp mä Moisés ky n'aa estẽẽ Jaweh hã. Ti m' Jaweh metëëh ta hã b'aah. Tamé tadawäts tu. Tii bä kä ty ganyyw däk mä naëng.
Marah bä Isaraéw buuj Jaweh metyy. Ta tii bä tabanoo sa hã ta mejũũ doo, ta ky n'aa jaw'yyk doo. 26 Hahỹỹ d’ mä Jaweh kyyh sa hã:
—Baad bë hyb n'aa matakä bä ỹỹh Jaweh, P'op Hagä Doo bë hagã n'aa, her'oot doo hã, ỹ gen'aak doo bë moo boo bä, ỹ mejũũ doo hã bë hyb n'aa matakä bä, sahõnh hẽ ỹ kyh n'aa jaw'yyk doo bë ky dahé bä, tii bä da dooh ỹ mejõ bä bë wë nahëëh Esito buuj wë ỹ mejũũ do paah. Ỹ né hẽ Jaweh bë nahëëh hadó hõm doo —näng mäh Jaweh kyyh.
27 Ti m' rakaja kän Erĩm häd näng doo bä. 12 naëng mena doo k'ããts gó hana doo ta tii bä. 70 joom jëë wakããn péh hajenh doo. Ta tii bä rabayyw j'eenh dó.