Sa waa “mana” häd näng doo P'op Hagä Doo anoo sa hã ky n'aa hahỹỹh
16
Ti m' sahõnh hẽ Isaraéw buuj ratsyym kasog kän Erĩm häd näng doo bä naa. Ti m' pawóp däk ta kamarab n'aa yt hã Esito häj n'aa bä naa rabanyy do jawén paa bä, 15 ta ä̃h tabadoo bä kä, rakajaa mä banawäng doo bä Sĩn häd näng doo bä. Ta karawaa me Erĩm häd näng doo, ta karawaa s'eeh hẽnh Sĩnaih, ta hoo gad'oo bä banawäng doo Sĩn häd näng doo. 2 Ti m' banawäng doo bä sahõnh hẽ Isaraéw buuj radu doo Moisés hã, Arãw hã na-ããj hẽ raher'oot baad nado doo sa hã. 3 Hahỹỹ d’ mä sa kyyh sa hã:—Taw'ããts hẽ paawä Esito häj n'aa bä ãã dejëp Jaweh mo haj'aa hã. Ta tii bä sahõnh hẽ tabanäng ãã waa, ãã tä. Ãã wóg enäh had'yyt hẽ tii bä. Ãã mamanaa wawẽẽ hẽ banawäng hẽnh, sahõnh hẽ Isaraéw buuj madej'ëëp hyb n'aa sah mahỹỹj —näk mä sa kyyh.
4 Ti m' Jaweh ky hadoo Moisés hã:
—Ỹ anoo da wë hã naa pãw bë waa. Taw'ããts hẽ bäp paa ken'yyh da Isaraéw buuj rabahõm rabataa hyb n'aa rabawa do pénh ta ti noo gó. Ta tii hã ỹ metyy da Isaraéw buuj ỹ bahapäh hyb n'aa ỹ mejũũ doo raky dahé bä. 5 Taw'ããts hẽ nu kawar'ee hã rataa doo pawóp adëë bä waa n'aa. Nu kawar'ee hã waa n'aa, saab waa n'aa. Ti hado had'yyt hẽ —näng mä Jaweh kyyh.
6 Ti hyb n'aa m' Moisés Arãw daheeh ramaher'oot kän Isaraéw buuj. Hahỹỹ d’ mä sa kyyh:
—Bada, papỹỹj badëë hyng bä kä, Jaweh né tii Esito häj n'aa bä naa bë man'yyh doo bë hapäh da. 7 Jati bäp paah bë hapäh da Jaweh bag tak'ëp gabarëëh doo. Ta ti bë wén hapäh da, baad nadoo doo bë kyyh ta hã tamaa napäh do hyb n'aa. Jaa g'eh ỹỹh Arãw daheeh bë hã péh? H'ëëd hyb n'aa ãã hã baad nadoo doo me bë her'oot? —näk mä Moisés sa kyyh.
8 Ti m' ahõm nä Moisés kyyh:
—Papỹỹj badëë hyng bä bë tä tanoo bä kä, bäp paah bë waa bë karẽn do pénh bä hã tabanoo bä kä, tii bä Jaweh né hẽ tii wawẽẽ hẽ bë manaa doo bë bahapäh da. Tamaa napäh né hẽ baad nadoo doo bë kyyh ta hã. Jaa g'eh ããh bë hã péh? ãã hã nado ti bë kyyh baad nadoo doo bë r'ood. Jaweh hã ti bë kyyh! —näng mä Moisés kyyh.
9 Ti m' Moisés maher'oot Arãw:
—Hahỹỹ da mamaher'ood sahõnh hẽ Isaraéw buuj: “B'ëëp danä Jaweh matym gó, bë kyyh baad nadoo doo tamaa napäh hyb n'aa”, noo da õm —näng mä Moisés Arãw hã.
10 Ti m' Isaraéw buuj Arãw maher'oot bä kä, ti noo gó né hẽ rahegãã däk tabanawäng hẽnh. Ti m', wë puh gó, sa pooj jé hahõm doo gó, Jaweh bag tak'ëp gabarëëh doo kas'ee kän.
11 Ti m' Jaweh ky hadoo Moisés hã:
12 —Ỹ maa napäh Isaraéw buuj sa kyyh baad nadoo doo. Hahỹỹ da mamher'ood sa hã: “Papỹỹj badëë hyng bä kä bë awëh da bë tä, bäp paah bë h'yyb karẽn do pénh bë awa da pãw. Ỹỹh Jaweh, bë hagã n'aa bë hapäh da tii bä”, näng da a kyyh —näng mä Jaweh Moisés hã.
13 Ti m' ti noo gó né hẽ, papỹỹj badëë hyng bä kä rabana hajõng do taw'ëëd kodor häd näng doo. Rabehyy bëëh tũũ jé pad'yyt hẽ Isaraéw buuj rabaj'eenh bä. Bäp paah sagõõ tëg nabëëh hadoo mä tũũ rabaj'eenh do w'oo hã. 14 Sagõõ tëg nabëëh badoo wäd bä kä, hawak doo, gatsabag is doo kasee tũũ tabanawäng bä. 15 Ti m' Isaraéw buuj rabahapäh bä, rakaner'oot bä, sa da hadoo doo reaanh, “h'ëëd tii?”, näk mäh. Dooh m' rahapëë bä hëëd tii, rawén eaanh.
Ti m' Moisés ky hadoo sa hã:
—Bë waa bë hã Jaweh anoo do tii. 16 Hahỹỹ da Jaweh mejũũ ta ti ky n'aa hã: “Taw'ããts hẽ bë sahõnh hẽ bë ataa bë awa do pénh. Bë ata sét hẽ õmera, sét waa ta netyy n'aa gó däk. Ti pénh ken'yyh sahõnh hẽ bë tób yt haj'een doo waa”, näng Jaweh kyyh bë hã —näng mä Moisés kyyh.
17 Ti m' kamejũ däk doo da sa hã Isaraéw buuj rabad'oo. Hajõng mä ta wób ataa, kanahën d'oos hẽ ta wób ataa. 18 Ti m' ta tyy n'aa õmer häd näng doo me rabetyy bä dooh mad'aak péh hajõng do hataa do sa hã. Kanahën d'oos hẽ hataa doo, dooh badóh péh sa hã ẽnh. Rawa do pénh rataa.
19 Ti m' Moisés ky hadoo sa hã:
—Bë enyyw hõm manäh mad'aak doo jati péh waa n'aa —näng mäh.
20 Tii d’ tamejũũ né paawä nabuj kah'ũũm mä ta wób. Dooh m' rap'eed bä Moisés mejũũ doo hã. Ti m' renyyw hõm mä mad'aak doo jati péh rawa pé paawä. Ti m' jati péh et'ëë däk mäh. Buu banes'aa däk. Ti hyb n'aa m' kawajããn mä Moisés sa wë.
21 Ti m' bäp paah ken'yyh rataa rawa do pénh. Tabajuu däg bä kä, adẽẽ jät. 22 Ti m' nu kawaree hã, tabahä̃nh rabataa. Pawóp hẽ t tyy n'aa õmer häd näng doo mä rataa sa tób yt haj'eenh doo sét waa. Ti m' sa wahëh hedoo doo rabana Moisés wë tabahä̃nh Isaraéw buuj rataa rapanäk hyb n'aa. 23 Ti m' Moisés ky hadoo sa hã:
—Taw'ããts hẽ tii. Hahỹỹ da Jaweh mejũũ: “Jati ji kameh'aak do ä̃ kä. Taw'ããts hẽ tsyt hẽ takasëëw hõm ti Saab. Bë tab'ëës, ỹỹh, Jaweh bë weh'ëëh hyb n'aa. Ti hyb n'aa nu kawar'ee hã bë esëëm ta uuh, bë ew'uup ta uuh. Bë karẽn doo da bë bad'oo. Bë enyyw hõm mad'aak doo. Jati, Saab waa n'aa tii”, näng Jaweh mejũũ doo —näng mä Moisés sa wahëh hedoo do sa hã.
24 Ti hyb n'aa kä, ti noo gó, nu kawar'ee hã, mad'aak doo renyyw hõm jati péh waa n'aa Moisés mejũũ doo da né hẽ. Dooh tabuu banes'aa bä. Dooh tet'ëë bä.
25 —Bë awaa naga hẽ bë enyyw hõm doo —näng mä Moisés. —Naga hẽ Saab, ji kameh'aak do heen n'aa. Ji tab'ëës Jaweh ji weh'ëëh hyb n'aa —näng mäh. —Naga hẽ, Saab hã, dooh bë awyyd bä ji awa do pan'aa. 26 Ta ä̃h wób hã bë ata hed'yyt hẽ. Ji kamaheh'aak doo hã, dooh kaw'yyt péh —näng mä Moisés sa hã.
27 Tii d’ né paawä Moisés kyyh sa hã, nabuj kah'ũũm mä ta wób. Rabahõm mä Saab rabataa hyb n'aa paawä. Ti m' dooh raw'yyt péh. 28 Ti m' Jaweh ky hadoo Moisés hã:
—Nyyh ta ä̃h bë nabuj kah'ũũm nä, ỹ mejũũ doo, bë ỹ maher'oot doo bë ky nadaheeh nä? 29 Bë hyb n'aa matakä! ỹỹh, Jaweh, ỹ anoo bë hã Saab ji kameh'aak do heen n'aa. Ti hyb n'aa nu kawar'ee hã ỹ anoo bë hã pawóp ä̃h waa n'aa. Saab hã, bë sahõnh hẽ bë awëë bë tób hẽnh. Dooh bë ahõm bä bë waa bë besoos hyb n'aa —näng mä Jaweh kyyh.
30 Ti hyb n'aa kä, Saab hã Isaraéw buuj rakamehaag kän.
31 Ti m' sa waa Isaraéw buuj ramaneëënh manab. Gatsebag is mäh. Hewag is mäh. Hegëëh doo mabaa bëë me kamekuunh do bedoo. 32 Ti m' Moisés ky hadoo:
—Hahỹỹ tii Jaweh mejũũ doo: “Bë enyyw soh mana sét hẽ ji ta tyy n'aa õmer, bë panaa, bë panaa panaa rabahapäh hyb n'aa pãw sa hã ỹ anoo doo banawäng hẽnh, Esito häj n'aa bä bë ỹ manyyh noo gó”, näng mä Jaweh mejũũ doo —näng mä Moisés kyyh.
33 Ti m' Moisés ky hadoo Arãw hã:
—Menyyw soh ta hood gó sét hẽ õmer mana. Tii bä madasooh Jaweh matym gó, takenyyw däk hyb n'aa bë panaa rabahapäh hyb n'aa ta jawén —näng mäh.
34 Ti m' Moisés hã Jaweh mejũũ doo da né hẽ Arãw bad'oo. Ta hood gó, Jaweh ky n'aa enooh do sa hã rahyb n'aa esee do hood n'aa góc, mana tadasooh takenyyw däk hyb n'aa. 35 40 ta baab noo gó Isaraéw buuj rawa mana häd näng doo. Rawa rakajaa bä kä Kanaãh häj n'aa bä, joom banäng bä. [Kanaãh häj n'aa hẽnh rabatsëk bä, dooh rawaa wäd bä mana].
36 (Ji moo sahõnh hẽ ta tyy n'aa õmer häd näng doo tahajaa sét hẽ ji ta tyy n'aa epah häd näng doo.d)