Pä gó naa naëng ganyyh P'op Hagä Do an'oo do panyyg n'aa hahỹỹh
17
Ti m' Isaraéw buuj ratsyym kasog kän banawäng doo Sĩn häd näng doo bä naa. Keh'ỹỹt mä rahõm bä, Jaweh mejũũ doo da né hẽ. Repidĩm häd näng doo bä rabayyw j'eenh dó. Dooh ta tii bä naëng reëëk péh. 2 Ti m' rabahõm mä Moisés wë, raky n'aa her'oot mä baad nado m' sa hã:—Man'oo naëng ãã eëëk hyb n'aa! —näk mäh.
Ti m' Moisés ky gadoo:
—Hëd n'aa hã ỹỹ bë ky kes'ëëm? Hëd n'aa Jaweh bë metyy? —näng mäh.
3 Tii d’ né paawä m' Moisés baher'oot, ti raky kesëëm kän Moisés hã. Hahỹỹ d’ mä sa kyyh:
—Hëd n'aa Esito häj n'aa bä naa ãã mamanyyh? ããh, tah haa, ãã masãã dejëp man'oo bä ho kaaj haj'aa —näk mä sa kyyh.
4 Ti m' tak'ëp Moisés Jaweh hã taky n'aa etsẽẽ. Hahỹỹ da ta kyyh:
—Nyy d’ ỹ bad'oo sa hã? P'eets hẽ paawä ỹ radaj'ëëp pä me rakut doo —näng mä Moisés kyyh.
5 Ti m' Jaweh ky gadoo Moisés:
—Matsyyd Isaraéw buuj sa wahëh hedoo do wób, mado däk tatu Niro me mamewyyh doo, hajõk do sa pooj jé bë ahõm. 6 ỹ agëët da a pooj jé pä yb jó, Horeb häd näng do jó. Mahewyh pä yb, tii bä da taganyyh naëng ta gó naa rabeëëk hyb n'aa —näng mä Jaweh kyyh.
Ti m' tii d’ né hẽ Moisés bad'oo Isaraéw buuj sa wahëh hedoo do sa matym gó. 7 Ti m' ta tii bä ta häd noo mä Masaha Jaweh rametyy hyb n'aa. Hahỹỹ d’ mä sa kyyh rametyy bä, “Jaweh awät g'eh ãã mahang? Dooh apäh?”, näk sa kyyh. Ta häd seeh Moisés maneëënh ta tii bä Meribahb, Isaraéw buuj raky kes'ëëm do hyb n'aa.
Amarék buuj sii rakaneb'ooh do panyyg n'aa hahỹỹh
8 Ti m' Repidĩm bä Amarék buuj rabana Isaraéw buuj wë rakaneb'ooh hyb n'aa. 9 Ti m' Moisés maher'oot mä Josuéh. Hahỹỹ d’ mä ta kyyh:
—Masëëw ër wób ajyy Amarék buuj sii kaneb'ooh do pan'aa. Jati ỹ agëët da waëë jó. P'op Hagä Do tatu móh ỹỹ gó ỹ atón —näng mä Moisés Josuéh hã.
10 Ti m' Josuéh rabahõm rakaneb'ooh hyb n'aa Amarék buuj sii, Moisés mejũũ doo da né hẽ. Ti noo gó né hẽ Moisés, Arãw, Hur daheeh rabasëëk waëë jó. 11 Ti m' p'op Moisés ta moo tagadahäng bä Isaraéw buuj hejooj padëëk Amarék buuj sa hã. Ta moo teréd hyy bä, Amarék buuj hejooj padëëk Isaraéw buuj sa hã. 12 Ti m' Moisés moo wooj däk bä kä, Arãw Hur daheeh radahäng pä ta jó Moisés basooh hyb n'aa. Ti m' p'op ramoo masooh Moisés. Hub hẽnh ta seeh bagëët, s'ỹỹ hẽnh ta seeh bagëët. P'op mä ramasoo Moisés mooh sét adëë bä. Papỹỹj badëë hyng bä kä, raberéd hyng ta mooh. 13 Ti hyb n'aa kä mariij oow me Josuéh ragawatsiig kän Amarék buuj sa warahén n'aa.
14 Ti m' Jaweh ky hadoo Moisés hã:
—Merii hahỹỹh ỹ ky däng doo maa kahé bäh kapõõs doo hã, ji hyb n'aa esee hed'yyt hẽ hyb n'aa. Tii bä mamaher'ood Josuéh hahỹỹh kyh ỹỹ ỹ ky däng doo: “ỹ gawats'iik da Amarék buuj. Dooh rahyb n'aa esee wäd bä badäk hahỹỹh hã sa ky n'aa ỹ an'oo bä” —näng mä Jaweh Moisés hã.
15 Ti m' Moisés tamaa sëëk P'op Hagä Doo hã tama ejuu do tyng. Ti m' ta tyng ta häd n'oo däk mä “Jaweh Nisi”c. 16 Ti m' taky hadoo:
—Jaweh bog'ããs doo bä tyng n'aa wë ramoo n'aa gadahäng ta wë rakamaj'ĩĩ hyb n'aa. Ti hyb n'aa Jaweh kamaj'ĩĩ da hed'yyt hẽ Amarék buuj sa wë, sa panaa wë da na-ããj hẽd —näng mäh.