Moisés ta mayb bahehëën do panyyg n'aa hahỹỹh
18
Ti m' Jet-Ro, Midiãn buuj sa ród n'aa P'op Hagä Do wë, Moisés mayb, ky n'aa napäh mä sahõnh hẽ P'op Hagä Doo moo wäd wät doo Moisés hyb n'aa, Isaraéw buuj, P'op Hagä Do karapee, sa hyb n'aa na-ããj hẽ. Taky n'aa napäh mä na-ããj hẽ nyy da Isaraéw buuj Jaweh manyyh Esito häj n'aa bä naa.2-3 P'ooj ub, [Esito häj n'aa hẽnh Moisés hahõm noo gó, t'ĩĩ hẽnh takajaa do pooj jé] Moisés mejũũ ta ỹỹm ta taah ta mayb wë. Siporah mä Moisés ỹỹm häd. Ti m' Jet-Ro gadoo paa ta tób hẽnh Moisés ỹỹm, Moisés taah daheeh. “Ta seeh hẽnh naa né paawä ỹỹ, ranoo däk babä hëj ỹ n'aa nadoo doo bä ỹ baym”, näng paa Moisés kyyh ta t'aah wah'ëëh hadoo do tabenäng bä, ti hyb n'aa ta häd n'oo däk paa Ger-Sõma. 4 Ta t'aah seeh ta häd n'oo däk mä Erieseb. Hahỹỹ da paa Moisés kyyh ta t'aah benäng bä, “P'op Hagä Doo, ee h'yy kaha'eeh doo, ỹ tamasaa kän. Ỹ tamo n'aa jesuu ỹ Praóh nadaj'ëëp hyb n'aa”.
5 Ti m' Moisés mayb, Moisés ỹỹm, Moisés taah daheeh rabahõm tabanawäng hẽnh, Moisés rabaj'een hẽnh. P'op Hagä Do waëë nedaa bä Moisés rabaj'eenh dó ti noo gó. 6 Ti m' ta pooj jé Jet-Ro mejõ däk rapanäk Moisés ramaher'oot hyb n'aa. Hahỹỹ da m' ta kyyh panäk doo:
—Ana mä da a wë a ỹỹm a taah daheeh —näng paa panäk do sa kyyh.
7 Ti m' Moisés bahõm kän ta mayb tamamuun hyb n'aa. Tamamuun bä, tanu woow häng. Ti m' ta mayb tapa tatsanetsup wät mä kedëng do heen n'aa. Ti m' rakedëë kän, ti m' tób sa masããh byy s'ëëb yt hẽ rabajëë p'ëë. 8 Ti m' sahõnh hẽ Moisés tamaher'ood kän ta mayb Isaraéw buuj sa hyb n'aa Jaweh Paraóh hã, Esito buuj sa hã na-ããj hẽ tamoo wäd wät doo. Tamaher'oot na-ããj hẽ baad nadoo doo ramana me, ta tyw n'aa me, sa hã kejäk doo. Tamaher'oot na-ããj hẽ nyy da Isaraéw buuj Jaweh bed'ëëp ta ti hedoo do mahä̃nh.
9 Ti m' tak'ëp mä Jet-Ro tsebee kän tamaa napäh bä sahõnh hẽ baad hadoo doo Isaraéw buuj sa hyb n'aa Jaweh bad'oo doo, Esito buuj sa moo gó rabedëp bä kä. 10 Ti m' taky hadoo:
—Jaweh ỹ j'aa etsë! õm tedëëb wät Esito buuj sa moo gó naa, Paraóh moo gó naa na-ããj hẽ. Isaraéw buuj Jaweh edëëb wät Esito buuj sa moo gó naa. 11 Sahõnh hẽ rah'yy kaha'eeh do sa bahä̃nh Jaweh, ỹ hapëë däk hỹỹ kä, tii d’ tabad'oo do hyb n'aa h'yy kasab'ee gó Isaraéw buuj rarejãã doo hã —näng mä Moisés mayb kyyh.
12 Ti m' Jet-Ro, Moisés mayb, manaa ta mas'ããh seeh, P'op Hagä Doo hã rama ejuu hyb n'aa. Tamanaa mä na-ããj hẽ ta masããh wób, radej'ëëp hyb n'aa P'op Hagä Doo taweh'ëëh hyb n'aa. Ti m' Arãw, sahõnh hẽ Isaraéw buuj sa wahëh hedoo do sii, rabana Moisés mayb sii rabawa rabawëh hyb n'aa P'op Hagä Do matym gó.
13 Ti m' jati péh Moisés asooh mä ta tyng jó Isaraéw buuj mahang ky n'aa katep'aa doo ky n'aa tamaa newëë hyb n'aa, taher'oot hyb n'aa sa hã ny hadoo doo baad up, ny hadoo doo hes'oos doo. Ti m' adë bä hed'yyt hẽ rabab'ëëh ta pa, ky n'aa katep'aa do ky n'aa Moisés maa newëë hyb n'aa sa ky n'aa kä. 14 Ti m' ta mayb hapäh bä sahõnh hẽ hajõk do sa hyb n'aa Moisés moo wät doo, taky hadoo ta hã:
—H'ëëd hyb n'aa tii da mabad'oo sa hã? Hëd n'aa jããm hẽ õm tii mamaa newëë ky n'aa katep'aa doo ky n'aa? Ti nuuj jé hajõk doo ab'ëëp. Õm ragada adëë bä hed'yyt hẽ —näng mä ta mayb kyyh.
15 Ti m' Moisés ky gadoo:
—Hahỹỹ d’ ỹ wén d'oo, wë ỹ rabana do hyb n'aa P'op Hagä Doo karẽn do sa hã ramaa napäh hyb n'aa. 16 Tanyy bä sa mahang ky n'aa katep'aa doo, wë ỹỹ ramanaa ta ky n'aa ỹ baher'oot hyb n'aa ny hadoo doo baad up, ỹ maher'oot hyb n'aa na-ããj hẽ sa hã P'op Hagä Doo ky n'aa jaw'yyk doo, ji tamejũũ do na-ããj hẽ —näng mä Moisés ta mayb hã.
17 Ti m' Moisés mayb ky hadoo:
—Dooh taw'ããts hẽ tado, tii da mad'oo doo. 18 õm, hajõk do a wë hana do na-ããj hẽ, h'yyb nabë padäg da. Dooh tahaja bä a daaj hẽ mamoo wäd bä hahỹỹh. Tabahä̃nh däk ti a hã. 19 Mamaa newë kyh ỹỹ. Õm ỹ maher'oot, õm P'op Hagä Doo ky n'aa edëng da tii bä mamoo wät doo hã. Hahỹỹ da mabad'oo: õm tii hajõk do sa ród n'aa P'op Hagä Doo wë. Maher'ood ta hã sa mahang ky n'aa katep'aa do ky n'aa. 20 Mamet'ëëg sa hã P'op Hagä Doo ky n'aa jaw'yyk doo, ji tamejũũ do na-ããj hẽ. Mametäh sa hã nyy da ji bawät baad up. Mametäh sa hã na-ããj hẽ n'yy d’ rabad'oo do pan'aa ji ky daheeh do ta hã. Ti né tii õm moo wät doo. 21 Hỹỹ kä, ky n'aa katep'aa do ky n'aa hã, nyy d’ ji bad'oo? Masëëw sa mahang ajyy hajaa doo, P'op Hagä Doo jeỹỹm doo, weh'ëëh doo, sa hã rah'yyb éh doo, masa do dinheer n'aa ganadoo doo. Tii bä miw hedoo do ken'yyh sa nu gabóg man'oo bä ta ti sa wób. 100 hadoo do ken'yyh sa nu gabóg sa wób, 50 hedoo do ken'yyh sa nu gabóg sa wób, ji moo sahõnh hẽ hedoo do ken'yyh sa nu gabóg sa seeh. 22 Taw'ããts hẽ ti né hẽ her'oot do pan'aa hed'yyt hẽ sa hã baad hadoo doo, baad nadoo doo raky n'aa katepa bä. Ky n'aa katep'aa doo hejoonh doo, taw'ããts hẽ a wë ramanaa tii. Nahejoonh doo sa daaj hẽ rabaher'oot sa hã. Tii da õm ramasa do hyb n'aa dooh tabahä̃nh tahejooj bä a hã. 23 Tii da madoo bä, tii da né hẽ P'op Hagä Doo mejõ bä, mahajaa né hẽ ta tii mamoo wäd bä. Dooh tabahä̃nh tado wäd bä a hã. H'yyb näm doo gó bë wë hana doo rababaaj hõm da tii bä —näng mä Moisés mayb kyyh ta hã.
24 Ti m' Moisés maa napäh bä m', taky daheeh mäh sahõnh hẽ ta mayb maher'ood wät doo. Sahõnh hẽ tamoo wäd kän taher'oot doo da né hẽ. 25 Tasëëw hõm mä ajyy hajaa doo sahõnh hẽ Isaraéw buuj sa mahang. Tii bä miw hedoo do ken'yyh sa nu gabóg tan'oo bä tasëë hõm do wób. 100 hadoo do ken'yyh sa nu gabóg ta wób, 50 hedoo do ken'yyh sa nu gabóg ta wób, ji moo sahõnh hẽ hedoo do ken'yyh sa nu gabóg sa seeh. 26 Hajõk doo mahang hanäng doo ky n'aa katep'aa doo ramaa newëë hed'yyt hẽ. Raher'oot mä sa hã ny hadoo doo baad up. Ky n'aa katep'aa doo hejoonh doo, ramanaa had'yyt hẽ Moisés wë. Nahejoonh doo hã, sa daaj hẽ rabaher'oot.
27 Ti m' ta mayb hã Moisés kedëë hõm. Ti m' Jet-Ro babaaj hõm kän mä ta häj n'aa hẽnh.