Waëë Sĩnaih häd näng doo bä P'op Hagä Doo kasee sa hã ky n'aa hahỹỹh
19
1-2 Ti m' Repidĩm häd näng doo bä naa Isaraéw buuj ratsyym kasog kän. Ti m' tamawoob hadoo do ta kamarab n'aa du doo bä kä, Esito häj n'aa bä naa raban'yyh do jawén paa bä kä, ti noo gó né hẽ, rakajaa mä waëë Sĩnaih häd näng doo w'oo hã tabanawäng bä. Ti m' rabayyw j'eenh dó waëë nedaa bä.3 Ti m' Moisés asëëk waëë hã, P'op Hagä Doo sii taber'oot hyb n'aa. Ti m' Jaweh tanaëënh waëë jó naa. Ti m' taky hadoo ta hã:
—Hahỹỹ da da mamaher'ood Jakóh panaa, Isaraéw buuja: 4 “Bë daaj hẽ bë bahapäh nyy da ỹ bad'oo paa Esito buuj sa hã. Bë hapäh na-ããj hẽ nyy da bë ỹ manaa wawẽẽ hẽ, wë ỹỹ. Wawii ta taah ta gëg jó tamahũũm do hadoo bë ỹ manaa. 5 Hỹỹ kä, baad ỹ bë ky dahé bä, ër kaner'ood bong doo bë ky dahé bä, sahõnh hẽ bë moo boo bä, tii bä da karapee haa, tak'ëp ỹ kamahä̃n doo, bë badoo däk da sahõnh hẽ badäk hahỹỹ bä habóng doo sa mahang. Ma ỹỹ né paawä sahõnh hẽ badäk hahỹỹ bä habong doo, 6 bëë kä, karapee haa, tsyt hẽ, nesaa do mahä̃nh wë ỹ kasëëw däk doo bë bahadoo da. Sahõnh hẽ badäk hahỹỹ bä habóng doo sa ky n'aa ród wë ỹỹ, sahõnh hẽ bëëh”, tii d’ né da mamaher'ood kyh ỹỹ Isaraéw buuj sa hã —näng mä Jaweh kyyh Moisés hã.
7 Ti m' Moisés bahyy kän waëë jó naa. Ti m' tats'yyt ta wë sahõnh hẽ Isaraéw buuj sa wahëh hedoo doo. Ti m' tamaher'ood kän sa hã sahõnh hẽ Jaweh mejũũ taher'oot do pan'aa. 8 Ti m' séd gó raky gadoo:
—Sahõnh hẽ Jaweh her'ood wät doo, ãã ky daheeh da —näk mä sa kyyh.
Ti m' Moisés ahõm kän Jaweh tapanäk hyb n'aa sa kyyh.
9 Ti m' Jaweh ky hadoo Moisés hã:
—Ỹ kasee da a hã wë puh mahang, wanakud hadoo doo gó, Isaraéw buuj ramaa napäh hyb n'aa a sii ỹ ber'oot bä, a hã rah'yyb éh hed'yyt hyb n'aa —näng mä Jaweh kyyh.
Ti m' Jaweh hã Moisés baher'oot Isaraéw buuj sa kyyh.
10 Ti m' Jaweh ky hadoo Moisés hã:
—Ahyy Isaraéw buuj sa wë. Man'oo bada né da, jati na-ããj hẽ, sa hã hẽ baad rakon'yyh tsyt hẽ, nesaa do mahä̃nh. Mamejõ sa saroor rahetsyyd hõm. 11 Mamejõ jati hawät doo hã rakenyyw däk hyb n'aa, ta ti noo gó ỹ bahyng do hyb n'aa waëë jó, sahõnh hẽ rabahapäh bä. 12 Mamoo wäd ta baa besuu n'aa waëë w'oo hã, ranatabës hyb n'aa waëë hẽnh. Ti maher'ood sa hã hahỹỹ da: “Baad bë hyb n'aa matakä waëë hã bë nasëëk hyb n'aa. Bë moo dëë manäh ta hã. Dajëp né da waëë hã moo däng doo. 13 Ji akut pä me tadajëp hyb n'aa. Pä me tanado bä, resĩĩn da tadajëp hyb n'aa. Aj'yy, ỹỹnh, bë masããh tado bä, waëë hã moo däng doo, dooh ỹ an'oo bä tedëëb wäd bä”, noo da sa hã kyh ỹỹ. Jããm hẽ ta heen n'aa, b'éé sããn me, bäp peej tamaa ena bä, tahajaa rakatahã bä waëë hẽnh —näng mä Jaweh kyyh.
14 Ti m' Moisés bahyng do jawén paa bä Isaraéw buuj sa wë, sa hã hẽ baad rakon'yyh tsyt hẽ, nesaa do mahä̃nh, tan'oo bä, Jaweh rahyb n'aa jew'yyk hyb n'aa. Ti m' sa saroor rahetsyyd kän. 15 Ti m' Moisés ky hadoo sa hã:
—Taw'ããts hẽ jati, jati hawät hã, bë kenyyw bë hã hẽ, bë gada hyb n'aa jati hawät doo hã, Jaweh ky däng doo. Bë aä̃ manäh bë ỹỹm sii ti noo gó —näng mäh.
16 Ti m' pawóp hẽ tabadoo däk bä kä ta ä̃h kä, darung mä, awyp. Tak'ëp hadoo doo wanakud waëë jó tabahyy kän. Tak'ëp b'éé s'ããn ji gamehỹỹh doo maa ena. Sahõnh hẽ Isaraéw buuj rakajajãn bong ỹỹm haj'aa. 17 Ti m' Moisés mahũũm mä Isaraéw buuj waëë hẽnh. Sa pooj jé Moisés bawät. Waëë nedaa bä, rabayyw b'ëëh. 18 Atsyg däg waëë hã, Sĩnaih häd näng do hã, ta jó Jaweh hahyng do hyb n'aa. P'op mä atsyg basëëk, tëëg hõõ tsyg näng do hadoo. Tak'ëp waëë katajuus häng. 19 Ti m' gamehỹỹh doo, b'éé s'ããn, ky ka'eeh mä. Ky sëëk mäh. Ti m' Moisés ber'oot. Ti m' P'op Hagä Doo ky gadoo darung doo gó.
20 Ti m' Jaweh ahyy kän waëë Sĩnaih häd näng do jó. Ti m' tanaëëj kän Moisés ta wë, waëë nu gad'oo hẽnh kä. Asëëg kän mä Moisés p'op. 21 Ti m' Jaweh ky hadoo ta hã:
—Ahyyh. Mamaher'ood Isaraéw buuj ta baa besuu n'aa ranatab'ëës hyb n'aa, rabaheg'ããs hyb n'aa paawä Jaweh. Tii d’ radoo bä, hajõk da dejëp —näng mäh. 22 —Wë ỹỹ hena do sii hẽ, sa ky n'aa ród, mamaher'ood da sa hã baad rakon'yyh hyb n'aa nesaa do mahä̃nh. Tii d’ ranadoo bä, ỹỹh, Jaweh, ỹ rajãã da sa hã —näng mä Jaweh kyyh.
23 Ti m' Moisés ky hadoo Jaweh hã:
—Õm né tii ãã maher'oot doo, ta baa besuu n'aa ỹ moo wät hyb n'aa waëë w'oo hã, tsyt hẽ a wë takasëëw däk hyb n'aa. Ti hyb n'aa dooh Isaraéw buuj rahaja bä ras'ëëg bä waëë hã, Sĩnaih häd näng doo hã —näng mä Moisés kyyh Jaweh hã.
24 Ti m' Jaweh ky gadoo Moisés, ti m' taky hadoo:
—Ahyyh Arãw mamasäk hyb n'aa a sii. Dooh ratabëëj bä man'oo bä ta baa besuu n'aa hã hajõk doo. Man'oo manäh na-ããj hẽ ratabëëj bä sa ky n'aa ród wë ỹỹ, rabasëëk hyb n'aa paawä. Wë ỹỹ ras'ëëg bä, ỹ gawats'iik da —näng mä Jaweh.
25 Ti m' Moisés bahyng bä kä, tamaher'oot mä sa hã Jaweh kyyh.