P'op Hagä Do ky n'aa jaw'yyk do hahỹỹh
20
Ti m' P'op Hagä Do ky hadoo. Hahỹỹ da ta kyyh:2 —Ỹ né hẽ Jaweh, P'op Hagä Doo bë hagã n'aa, Esito bä naa bë manyyh doo, tak'ëp bë ramejũũ doo bä naa bë manyyh doo.
3 —Jããm hẽ hã ỹỹ mah'yy ka'eeh da. Ta wób rah'yy kaha'eeh doo hã mah'yy kaé manä da.
4 —Mamoo wäd manä a kabarii wë hã hanäng do heen n'aa, badäk hahỹỹ hã hanäng do heen n'aa, tamé hanäng do heen n'aa. 5 Ahy hëë manäh a tarón nu paa me ta pooj jé. Mawehëëh manäh. Ỹỹh, Jaweh, P'op Hagä Doo a hagã n'aa, dooh ỹ an'oo bä ỹ nahadoo doo rawehëë bä, sa bahä̃nh do hyb n'aa ỹỹh. Hã ỹỹ ty n'aa ges'yyk do taah, ta ta taah, sa ta ta taah taah na-ããj hã ỹ anoo da nesaa doo ta säm, nesaa doo sa wahëh makũũh ramoo boo bok do hyb n'aa. 6 Tii d’ nado ỹ bad'oo hã ỹ kamahä̃n doo, ỹ mejũũ doo ky daheeh doo. Sa panaa wë, miw hadoo do wë, sa jawén hana doo, dooh ỹ h'yy kahỹỹd bä. Ỹ da kamahä̃n had'yyt hẽ.
7 —Daap mesog manäh hät ỹỹ, Jaweh, P'op Hagä Doo a hagã n'aa häd. Ỹ rejãã né da daap hadoo do hyb n'aa hät ỹỹ hã ky däng doo.
8 —Matabëëj had'yyt hẽ Saab, ji kameh'ããk do heen n'aa. Tsyt hẽ wë ỹỹ masëëw. 9 Mamoo wät do pan'aa kä ta ä̃h, ji ma poo oow seeh péh. Ti noo gó mamoo wäd sahõnh hẽ mamoo wät do pan'aa. 10 Setsi tabadoo do ta ä̃h, ji kameh'ããk do heen n'aa, bë tab'ëës Jaweh, P'op Hagä Doo bë hagã n'aa, bë weh'ëëh hyb n'aa. Moo wäd manä ti noo gó. Õm, a taah, a toog, a karom ajyy, a karom ỹỹnh, a masããh, Isaraéw buuj nadoo doo bë mahang hawät doo, bë sahõnh hẽ, bë moo boo manäh ti noo gó. 11 Ji ma poo oow seeh pé ta ä̃h noo gó, wë, badäk hahỹỹh, sahõnh hẽ ta hã habong doo, akajaar, sahõnh hẽ tamé habong doo, P'op Hagä Doo pahuuj wät paah. Setsi kä m' ta ä̃h kä, P'op Hagä Doo kamehããg kän tapahuunh do hyb n'aa. Ti hyb n'aa kä m' P'op Hagä Doo ky n'aa edëë kän baad hadoo doo me, setsi tabado däk do ta ä̃h. Tsyt hẽ tabasëëw däk tii, ta wób ä̃h mahä̃nh.
12 —Mawehëë a yb, mawehëë a ỹỹn. Tii bä õm wäd dawëët hëëj hã, Jaweh, P'op Hagä Doo a hagã n'aa, bë hã hanoo doo an'oo bä.
13 —Mah'yy gaẽẽnh bä, manabóh manäh a da hadoo doo.
14 —Aä̃ manä ta seeh ỹỹm sii.
15 —Etsëëg manäh.
16 —Daap maky n'aa tapa manäh a da hadoo doo.
17 —H'yyb däg manäh a da hadoo do tób hã. H'yyb däg manäh a dahadoo do ỹỹm hã. H'yyb däg manäh ta karóm hã, ta masããh hã, ta ma seeh hã na-ããj hẽ —näng mä Jaweh kyyh.
18 Ti m' darung doo, ji gamehỹỹh doo b'éé s'ããn me maa ena doo Isaraéw buuj ramaa napäh bä, hawyp doo, atsyg waëë hã hanäng doo na-ããj hẽ rabahapäh bä, rakajaj'ããn bong, eỹỹm bok. Dawë hã rababë däk. 19 Ti m' raky hadoo Moisés hã:
—Taw'ããts hẽ õm ti her'oot ãã hã, tii bä ãã ky daheeh da. P'op Hagä Doo tado bä ti her'oot, ãã da dejëp tahyb n'aa péh —näk mä hajõk do sa kyyh.
20 Ti m' Moisés ky hadoo sa hã:
—Bë eỹỹm manäh. P'op Hagä Doo ewäd hyng, bë tametyy hyb n'aa, ta hã bë eỹỹm doo, bë h'yyb gó tabawät hyb n'aa, tamejũũ doo bë nes'õõs hyb n'aa —näng mä Moisés kyyh hajõk do sa hã.
21 Ti m' dawë hã Isaraéw buuj rabayyw bëëh. Ti nuuj jé p'eets hẽ Moisés bahõm wë puh tak'ëp hatsãm doo hẽnh, P'op Hagä Doo ber'oot hẽnh.
22 Ti m' Jaweh ky hadoo Moisés hã. Hahỹỹ d’ ta kyyh:
—Hahỹỹ da da mamaher'ood kyh ỹỹ Isaraéw buuj hã: “Bë daaj hẽ bë hapëë däk hỹ pong jé naa bë sii ỹ her'ood wät doo. 23 Ti hyb n'aa, bë moo boo manäh kabarii k'ããts tëg hawak do s'ëëb, k'ããts tëg gabarëëh do s'ëëb sa hã bë h'yy kaha'ee hyb n'aa. Jããm hẽ hã ỹỹ bë h'yy ka'eeh” —näng mäh Jaweh kyyh.
24 Ti m' ahõm nä Jaweh kyyh sa hã. Hahỹỹ d’ mä tamejũũ:
—Tsäng up mamoo wäd hã ỹ mama ejuu do tyng. Ta tii jó bë ma ejuu hã ỹỹ bë masããh wób b'éé, kabara, booj yb. Ta tii jó bë baheju bë masããh seeh séd bë h'yyb hedo däk doo hã ỹỹh, Jaweh hã, metëë n'aaa. Sét panang ken'yyh ỹ asëm doo bä, ta tii bä ỹ bë weh'ëëh hyb n'aa, tii bä ỹ bahyng da bë wë, bë ỹ ky n'aa edëng hyb n'aa. 25 Pä me matamaa bä ma ỹỹ a masããh tyng, taw'ããts hẽ ta si n'aa hẽ madahëëh pä. Maganebäh manäh pä, mahenyyw manäh ta nahëë me. Ta nahëë me mabenyyw bä pä, taw'ããts nado wät hã ỹỹ. 26 Mamoo wäd manäh ji asëëk do tyn n'aa ji basëëk bä mama ejuu bä, kamanetëëh hyb n'aa nu meby n'aa näng doo. A hã hanäng doo ji nahapäh hyb n'aa a yt naa —näng mä Jaweh kyyh.