Sa karom sa uuh tado bä ky n'aa jaw'yyk doo hahỹỹh
21
Ti m' Jaweh ky hadoo ẽnh Moisés hã:2 —Hahỹỹ ky n'aa jaw'yyk doo maher'ood Isaraéw buuj sa hã: “Heber buuj aj'yy mets'ẽẽ hõm bä, mepaag hõm doo a karom tabahadoo hyb n'aa, taw'ããts hẽ ji ma poo oow seeh pé ta baab a sii tamoo wät tii bä. Ji ma poo oow seeh pé ta baab bahëëj jëng bä kä, dooh a karom tado wäd bä tii bä. Meréd hõm tabahõm hyb n'aa. Dooh tep'aak péh a hã tabahõm hyb n'aa. 3 Ta mab hẽ tado bä mabets'ẽẽ hõm noo gó, ta mab hẽ né hẽ tabahõm a mahä̃nh. Ta ỹỹm nyy bä mabets'ẽẽ hõm noo gó, ta sii né hẽ man'oo ta ỹỹm bahõm. 4 Ta kariw n'aa ỹỹm haëëj g'ëëd bä, ta sii tamoo wät noo gó, ta taah nyy däg bä, ajyy tado bä ỹỹnh tado bä, tii bä ta kariw n'aa ma né tii ta karom ỹỹm, ta karom taah. Jããm hẽ ti hahõm kän ta karom paah. Dooh tep'aak péh ta kariw n'aa paa hã.
5 Hỹỹ kä, hahỹỹ da ta karom ky hado bä: ‘kariw ỹ n'aa, ä̃m ỹỹ, tah haa ỹ kamahä̃n’, tanoo bä. ‘Dooh ỹ karẽn bä ỹ ahõm bä sa mahä̃nh’, taky hado bä, 6 tii bä taw'ããts hẽ ta kariw n'aa mahũũm sa wahëh wëa, baad hadoo do ród n'aa hedoo doo wë. Tii bä kä taw'ããts hẽ tamahũũm ta tób hẽnh. Tób noo tu n'aa hã ta karom nabuuj tadadäk tagaoom hyb n'aa, ta karom had'yyt hẽ tabado däk do heen n'aa” —näng mäh.
7 Hỹỹ kä, bë seeh toog tesëëm hõm bä ta seeh karom tabahadoo hyb n'aa, ta seeh hadoo ta ti hedoo do ky n'aa jaw'yyk. Karom aj'yy ky n'aa jaw'yyk do nado. 8 Ta ỹỹm pan'aab maruus ta kariw n'aa ets'ẽẽ hõm bä, ta kariw hyb n'aa ganado bä, taw'ããts hẽ p'aa hẽnh ta yb bets'ẽẽ hõm tan'oo bä tii bä. Ta hã taky däng doo tamoo nawät do hyb n'aa, dooh tahaja bä ta wób hã tesëëm hõm bä. 9 Ta t'aah ỹỹm pan'aa maruus ta kariw n'aa tado bä paawä, taw'ããts hẽ ta toog hado däk tan'oo bä. 10 Hỹỹ kä, maruus hã tagat'ëë däk do jawén paa bä, ta seeh hã tagat'ëë nä bä, dooh tahaja bä ta yd jé tanoo bä pooj jé tagat'ëë däk do tä. Dooh na-ããj hẽ tahaja bä ta yd jé tanoo bä pooj jé tagat'ëë däk do saroor. Taw'ããts hẽ dooh teréd bä pooj jé tagat'ëë däk do sii tabeỹỹh doo. 11 Ta ti tamawoob hẽ hadoo doo tanan'oo bä, tamoo nawäd bä ta hã, tii bä taw'ããts hẽ baad tabahõm tamahä̃nh tan'oo bä. Dooh tagabaaj bä ta wë maruus säm ta yb hã tanoo do paah —näng mä Jaweh kyyh.
Jaweh ky n'aa jaw'yyk doo dajëp do ky n'aa hã
12 Ti m' Jaweh ky hadoo ẽnh:
—Jé ta da hadoo doo nabooh péh, ta da hadoo doo dajëb bä kä, mo haj'aa kadoo doo dajëp né hẽ tii tanemuun bë an'oo bä. 13 Tamo haj'aa jawén nado doo tanabooh doo, P'op Hagä Do karẽn do hyb n'aa tii da ta hã tawén dajëp, taw'ããts hẽ tii bä ta ti moo hedoo doo kejën hõm ỹ basëëw däk doo bä tabawäd däk hyb n'aa. 14 Hỹỹ kä ta da hadoo do wë takawajããn do hyb n'aa, ta no n'aa né hẽ tado bä tanabóh jat doo, hã ỹ rama ejuu do tyng hẽnh takejën hõm bä né paawä ta ti moo hedoo doo, bë manyyh ta tii bä naa tadajëp hyb n'aa bë moo gó —näng mäh.
15 —Ta yb hewyyh doo, ta ỹỹn hewyyh doo, bë daj'ëëb né hẽ nayyw hẽ ta ti moo hedoo doo.
16 —Jé ta da hadoo doo maso hõm péh tabesëëm hõm hyb n'aa, bë daj'ëëp na-ããj hẽ tii. Tesëëm hõm bä, tanesëëm hõm nä bä, bë aw'yyt bä ta ti moo hedoo doo bë daj'ëëp.
17 —Taw'ããts hẽ bë daj'ëëp jé ta yb, ta ỹỹn ky n'aa wasee doo, sa hã ky n'aa rejãã doo.
18-19 —Pawóp hẽ ajyy rakepug bä, ta seeh ta seeh epug bä, pä me tatsejä̃g bä, ta seeh nadajëb bä, dooh ta säm baj ji an'oo bä tii bä mo haj'aa näng doo hã. Tii d’ tahado né paawä, ta rog hyb n'aa ta seeh asoh hõm bä, tii bä ta jawén tahaja bä ta tatu hã ta tób w'oo hã tawäd bä, tii bä ta hã rog näng doo ep'aak da ta hã tanahajaa tamoo nawät do hyb n'aa. Baad tabahag'ããs da na-ããj hẽ tabahas'oo däg bä kä.
20 —Ta karom, aj'yy tado bä, ỹỹnh tado bä, b'aah bód me sa kariw n'aa hewyh bä, ta karom dajëb bä, tii bä ta säm ji abaanh né hẽ sa kariw n'aa hã. 21 Pawóp hẽ ta ä̃h jawén paa bä ta karom bahas'oo däg bä, dooh ji abaaj bä ta säm ta kariw n'aa hã, ta karom tado hyb n'aa.
22 —Ajyy rakepuk noo gó, ỹỹnh hetaah doo hã sa seeh tapóh bä, nayyw hẽ ajãn enyy däg bäc ti hyb n'aa, dooh né paawä tak'ëp tarejã bä, tii bä ta ti aj'yy mo haj'aa näng doo ep'aak da ỹỹnh patug mejũũ do pénh, sa wahë n'aa hedoo doo ran'oo bä do pénh. 23 Hỹỹ kä, tak'ëp tarejã bä tatapooh do haj'aa, tii bä bë anoo né hẽ ta säm baj. Tahadäng doo dajëb bä, dajëp né da tii tanemuun. 24 Ta matym seeh tarejã bä, ta ti mo haj'aa näng do matym seeh na-ããj ji rejãã. Ta tëg seeh tagatë hõm bä, ta ti mo haj'aa näng do tëg seeh na-ããj hẽ ji rejãã. Ta mooh tarejã bä, ta ti moo hedoo do mooh na-ããj hẽ ji rejãã. Ta tsyym seeh tarejã bä, ta ti moo hedoo do tsyym seeh na-ããj hẽ ji rejãã. 25 Taheju bä tan'oo bä, tii d’ né ji bad'oo ta hã. Ta róg nyy bä, róg né ta säm. Tatsajä̃g bä, bë tsajä̃g ta säm.
26 —Ta karom aj'yy matym hã, ta karom ỹỹnh matym hã, ta kariw n'aa ty gatsajä̃g bä, ta karom matym tarejã bä, tii bä dooh ta kariw n'aa haja wäd bä tamejõ bä ta wë tamoo wät hyb n'aa. Dooh ta ma tado wäd bä. Taw'ããts hẽ baad tabahõm tan'oo bä tamahä̃nh ta matym säm. 27 Ta karom aj'yy tëg hã, ta karom ỹỹnh tëg hã, ta kariw n'aa mo haj'aa adëë bä, ta karom tëg kawóg nä bä, tii bä dooh ta kariw n'aa haja wäd bä tamejõ bä ta wë tamoo wät hyb n'aa. Dooh ta ma tado wäd bä. Taw'ããts hẽ baad tabahõm tan'oo bä ta mahä̃nh ta tëg säm.
28 —Hỹỹ kä, aj'yy, ỹỹnh ta s'ããn me booj yb ejoh bä, tadajëëb bä, tii bä bë daj'ëëb né hẽ ta ti booj yb. Pä me bë makut tadajëp hyb n'aa. Dooh bë awëë bä ta ti hadoo do dab. Mas'ããh näng do hã dooh ji säm baaj. 29 Hỹỹ kä, kawajããn do tado bä booj yb, ta danäh hã ramaher'ood wät né paawä, dooh ta danäh hadëë hëë bä, tii bä aj'yy ỹỹnh ta mas'ããh dajëëb bä, tii bä kä pä me ji makut ta mas'ããh tadajëp hyb n'aa. Ta danäh na-ããj hẽ ji daj'ëëp tii bä. 30 Ti hadoo né hẽ paawä, booj yb danäh rat'yyd mehĩĩn bä, ran'oo bä ta hã ta säm tabanoo tanadajëp hyb n'aa, tii bä ta hã retsẽẽ do pénh né hẽ tabanoo ta säm. 31 Sét ky n'aa né tii ky n'aa jaw'yyk doo. Karapee tado bä booj yb daj'ëëp doo, tii da né hẽ ji bad'oo. 32 Ta seeh karom, aj'yy tado bä, ỹỹnh tado bä, booj yb ejóh bä, tii bä booj yb danäh ep'aak da 30 moeed k'ããts tëg hawak doo karom danäh hã. Booj yb ta karom daj'ëëp doo, ji daj'ëëp. Pä me ji makut tadajëp hyb n'aa.
33 —T'õp gagooj däk doo ji ty kasëëts bä, t'õp hadoo do ji gagoos bä ji ty ganatsëë däg bä, tii bä ta seeh mas'ããh booj yb, jumeto tado bä t'õp hadoo doo gó tadëë hyy bä, 34 gagoos do tä däk. Ti hadoo, ta mas'ããh paah ta mabaj.
35 —Bë mas'ããh booj yb ta seeh mas'ããh dajëë bä, tii bä taw'ããts hẽ rabesëëm hõm tii. Ta danäh sa hã ta säm raganebäh hõm. Ti hadoo ẽnh dajëp do paah. Ta bäh seeh ta seeh tä, ta bäh ta seeh tä. 36 Hỹỹ kä, kawajããn né hẽ ta mas'ããh rahep'ëëh né paawä, ta danäh nahadëë hëë bä, tii bä taw'ããts hẽ ta da hadoo do hã tabanoo ta mas'ããh seeh dajëp do jawén buuj. Ta mas'ããh daj'ëëp doo ta tä däk —näng Jaweh kyyh.