Ji ma ky n'aa jaw'yyk do hahỹỹh
22
Ti m' ahõm nä Jaweh kyyh ta ky n'aa jaw'yyk do hã:—Booj yb bë seeh etsëëg bä, tanaboh bä, tesëëm hõm bä, tii bä ji mooh seeh booj yb tab'aanh da tesëëg hõm do säm ỹ mejũũ. B'éé tado bä tetsëëg hõm doo, tii bä ji meheet péh b'éé tab'aanh tesëëg hõm do säm, ỹ mejũũ.
2 —Hets'ëëk doo rawyyd bä tób tanoo eëë bä kä tabajëë suun hyb n'aa, ranaboh bä, tii bä dooh ji abaj bä ta majyyw säm, atsëm tado bä tii. 3 Adëë bä tado bä, ta majyyw säm ji ab'aanh né hẽ hets'ëëk do naboh jat doo.
—Jé ta seeh ma hets'ëëk doo tetsëëg bä, tanoo né da tetsëëg hõm do mabaj, ỹ mejũũ. Tanahaja bä tepaag bä tamabaj, tii bä ji esëëm hõm tii, ta seeh karom tabahadoo hyb n'aa, ta säm me takep'aak hyb n'aa tetsëëg hõm doo.
4 —Ta seeh mas'ããh, booj yb tado bä, jumeto tado bä, b'éé tado bä na-ããj hẽ, hets'ëëk do wë ji awyyd bä, ta seeh mas'ããh edëp nä bä, tii bä pawóp nuu me ỹ mejũũ tabanoo ta mabaj.
5 —Ta masããh bë seeh mahũũm bä ta joom uwa hedoo do banäng bä, joom seeh banäng bä na-ããj hẽ, jawii rabawa hyb n'aa joom mahang, tii bä, tamanatakëë do hyb n'aa ta da hadoo do joom banäng doo hẽnh ta masããh rabë däg bä, tii bä masããh danä anoo da nu enyym do ta joom ag ta da hadoo do hã. Ta masããh rejãã do säm tii. Ti né ỹ mejũũ.
6 —Bë seeh gataa bä, tii bä jawii hã takado hõm bä, ta da hadoo do joom hanäng hẽnh takado däg bä, ta joom ag ta natuu hã kata däk doo taooj jëë bä, ta joom hawäng doo taooj jëë bä, ta joom banäng doo sahõnh hẽ taooj jëë bä na-ããj hẽ, tii bä gatang doo ep'aak ta säm, ỹ mejũũ.
7 —Tëg hawak do s'ëëb, ta ma seeh bë seeh anoo bä ta da hadoo do hã tabenäm hyb n'aa, tii bä rë tanyy ta ti hetsëëg hõm doo, tii bä kä, hets'ëëk doo rawyyd bä, tabahä̃nh, pawóp nuu me tabanoo ta mabaj. 8 Hets'ëëk doo ranawyyd bä, tii bä taw'ããts hẽ tób danäh bahõm sa wahëh hedoo do wë, baad hadoo do ky däng do wë, rabaheg'ããs hyb n'aa ti tanado bä ta seeh ma hado hõm doo. Tii né hẽ ỹ mejũũ bë bad'oo. 9 Ta seeh ma ta seeh ado hõm bä, ta mas'ããh booj yb hedoo do tadó hõm bä, ta mas'ããh jumeto tado hõm bä, ta mas'ããh b'éé tado hõm bä, ta saroor tado hõm bä, ta ma seeh nepä wät doo na-ããj hẽ, tii bä, “hät ỹ né hẽ ta tii” ta seeh her'ood bä, “masãh ỹ né hẽ” ta seeh anoo bä, tii bä taw'ããts hẽ rabahõm sa wahë n'aa hedoo do wëa, taky däng hyb n'aa ny hadoo doo baad her'oot doo, ny hadoo doo hets'ëëk doo. Nanäng hado hõm doo kä, tab'aanh pawóp nuu me ta jó ta danäh hã.
10 —Ta mas'ããh seeh bë seeh an'oo bä ta da hadoo do hã tabahag'ããs hyb n'aa, jumeto tado bä, booj yb tado bä, b'éé tado bä, ta mas'ããh seeh tado bä, tii bä hag'ããs do moo gó tadajëb bä, ta tsyym gatëh bä, ranahapäh bä retsëëg hõm bä, 11 tii d’ tahado bä, ỹ mejũũ, hag'ããs doo ky däng hät ỹỹ gó, Jaweh häd gó, dooh tamo haj'aa do tado bä. Taw'ããts hẽ mas'ããh danäh gadoo né tii ta kyyh. Dooh takepaak tii bä. 12 Hỹỹ kä, ta hagã n'aa h'yyb haj'aa hẽ retsëëg hõm bä, tii bä hag'ããs doo ep'aak ta danäh hã. 13 Tabanas'aa ekóg wäd bä ta da hadoo do mas'ããh tahag'ããs doo, tii bä taw'ããts hẽ tamanaa tabanas'aa tä uuh paa mad'aak doo ji bahapäh hyb n'aa. Tii d’ tado bä, tabanas'aa ekóg wäd bä, dooh takepaak tii bä.
14 —Bë seeh ets'ẽẽ bä ta da hadoo do mas'ããh ramoo bok hyb n'aa, ta moo gó tadajëb bä, tamo haj'aa kadoo bä ta mas'ããh hã ta danäh nahapäh bä, tii bä tep'aak né hẽ ta danäh hã. 15 —Ta mo haj'aa kadoo bä ta danäh bahapäh bä, tadajëb bä ta danäh bahapäh bä, dooh takepaag tii bä. Ta danäh ta säm gahëën do hyb n'aa ta seeh hã tabanoo bä, dooh kanoo péh ta säm ta mas'ãã dajëb bä, ta mo haj'aa kadoo bä. Kep'aak do hyb n'aa. Ta tii b’ naa né hẽ ta säm bana —näng mä Jaweh kyyh.
Ky n'aa jaw'yyk do wób
16 Ti m' Jaweh ky hadoo ẽnh:
—Bë seeh maruus ta seeh ỹỹm pan'aa nado doo tah'yyb metsä bä, ta sii tabaỹỹh hyb n'aa, tii bä tep'aak né da maruus yb hã ji ỹỹm pan'aa ji ep'aak doo. Tagatëë né tii bä. Tii da né hẽ ỹ mejũũ. 17 Maruus yb kanarẽn bä, tanahaëëj bä, ti hadoo né hẽ ta ti hedoo péh aj'yy ep'aak hed'yyt hẽ, maruus ji ỹỹm pan'aa rehepak doo.
18 —Bë naboh jat da ỹỹnh mehëm doo.
19 —Bë daj'ëëb né da sa mas'ããh sii hah'ëët péh.
20 —Bë gawats'iik né da rah'yy kaha'eeh doo hã, Jaweh nadoo doo hã, ma ejuu doo.
21 —Marejã manäh Isaraéw buuj nadoo doo, ta s'eeh hẽnh naa hana doo. Tak'ëp bë mejõ manäh ta hã. Ta ti ỹ wén mejũũ, ta s'eeh hẽnh naa do hyb n'aa bëëh Esito häj n'aa bä bë babok noo gó.
22 —Bë wad'ii manäh, bë rejã manäh patug tamaa bok doo, yb temah do na-ããj hẽ. 23 Bë wad'ii bä, bë rejã bä, hã ỹỹ raky n'aa etsẽẽ bä kä ỹ masa hyb n'aa, ỹ maa napäh né da sa kyyh. Ỹ moo n'aa jesuu da. 24 ỹ kawajããn da bë wë ta ti hyb n'aa. Kaneb'ooh doo me bë dejëp ỹ an'oo bä. Tii bä bë ỹỹm kä tii patug temaa bok doo, bë taah tii kä yb temaa bok doo.
25 —Karapee haa mahang kas'uut doo seeh dinheer a wë tets'ẽẽ bä, madoo manäh dinheer me moo heb'ook doo rabahed'oo doo da. Mamejõ manäh tabahä̃nh tan'oo bä a hã, a dinheer tabab'aanh noo gó. 26 A da hadoo do saroor hebaan doo, j'ooj hadäk doo, magado bä, ta kũũt tep'aak né hẽ taky däng doo metëë n'aa, tii bä taw'ããts hẽ manoo p'aa hẽnh papỹỹj badëë hyng bä kä. 27 Jããm né ti ta jatsë. Manabaj bä, h'ëëd me ta jatsë tabaỹỹh hyb n'aa, takahat'ëëh hyb n'aa? Hã ỹ taky n'aa etsẽẽ bä ta hã manab'aanh do hyb n'aa, ỹ maa napäh né da ta kyyh. T'yyd mehĩĩn do ỹỹh.
28 —Maky n'aa rejã manäh P'op Hagä Doo. Maky n'aa rejã manäh bë wahëh hedoo doo.
29 —Mabaa es'ĩĩ manäh a joom s'ëëb uuh, hã ỹ kan'oo däk do pan'aa.
—Tsyt hẽ masëëw wë ỹỹ a t'aah wah'ëëh hedoo doo. 30 Man'oo hã ỹỹ a masããh booj yb, b'éé, sa taah pooj jé henäng doo. Namawëëd dó ta ỹỹn pa a masããh t'aah pooj jé henäng doo. Tii bä, 8 tabado däk bä kä ta ä̃h, manoo hã ỹỹ.
31 —Karapee haa, tsyt hẽ wë ỹỹ kasëëw däk do né ti bëëh. Ti hyb n'aa bë awëë manäh bë tä tabanas'aa nabóh jät doo. Bë anoo ta tii, awaar sa tä —näng mä Jaweh kyyh.