Baad hadoo doo ky n'aa hã ji her'oot doo ky n'aa hahỹỹh
23
Ti m' ahõm nä Jaweh kyyh:—Daap mamenäh manä ta seeh ky n'aa hã. Maky masaa manäh nesaa doo moo wät doo hã, õm tatsyyd bä daap hẽ ta seeh maky n'aa tapaa hyb n'aa sa wahëh matym gó, baad hadoo doo, baad nadoo doo ród n'aa sa matym gó.
2 —Õm ranaëëj bä sa wahëh matym gó, ky n'aa katep'aa do ky n'aa hã mamaher'oot hyb n'aa mahapäh doo, baad hadoo doo maher'ood. Kan'oo manäh hajõk doo kar'ẽẽn doo õm tah'yyb mahũũm. Kan'oo manäh õm sa h'yyb hata baad nadoo doo hã. 3 Kasuud is doo raky n'aa tapaa bä sa wahëh matym gó, maky masaa manäh daap hẽ. Kasuud is doo ji t'yyd mehĩĩn do hyb n'aa nadoa.
4 —Mawyyd bä a majĩĩ mas'ããh kanepëë wät doo, booj yb tado bä, jumeto tado bä, mamahũũm da ta danäh wë. 5 Mahapëë bä a majĩĩ mas'ããh jumeto hadëë jat do tũũ, tak'ëp jawyk do tabasëët do haj'aa, mahegãã jad up manä da. Mamasaa da ta danäh, p'op ta mas'ããh tamasäg häng hyb n'aa.
6 —Kas'uut doo hã na-ããj hẽ man'oo sa hã sa wahëh wë ramahũũm hyb n'aa sa ky n'aa rabaher'oot hyb n'aa. Bë gatsëë manäh rakas'uut do hyb n'aa. 7 Daap hẽ maky n'aa tapa manäh ta seeh. Baad konä da daap ky n'aa tapaa do mahä̃nh. Maky n'aa ety manäh dajëb hã mo haj'aa kanadoo doo, baad hadoo doo. Daap hẽ ta da hadoo doo dajëb hã ky n'aa etyy doo ỹ rajãã da.
8 —Magado manäh ran'oo bä a hã dinheer, sa hã maky masa hyb n'aa sa wahëh hedoo do wë. Baad hadoo do hapäh doo h'yyb tejën tan'oo bä ta ti dinheer. Jé mo haj'aa kanadoo do hã taky n'aa kety däk dineer an'oo bä.
9 —Marejã manäh, tak'ëp mamejõ manäh, ta s'eeh hẽnh naa bë mahang habok doo. Bë mepëë wät nyy da ta tii. Ta s'eeh hẽnh naa paa bëëh Esito häj n'aa bä —näng mä Jaweh kyyh.
Kameh'ããk do noo gó ky n'aa jaw'yyk doo hahỹỹh
10 Ti m' Jaweh ky hadoo ẽnh:
—Taw'ããts hẽ ji ma poo oow seeh péh ta baab ken'yy bë bejoom bë joom, bë ataa bë joom s'ëëb. 11 Tii bä, setsi ta baab tabadoo doo hã dooh bë ejoom ti noo gó. Ta daaj hẽ hawäng doo ta tii bä ti noo gó, kas'uut do sa waa. Mad'aak doo, tababo n'aa sa waa. Tii da na-ããj hẽ mabad'oo a joom uwa banäng doo bä, a joom olibo häd näng doo banäng doo bä. [Ti ta baab bahëëj jëng bä kä tahajaa bë ejoom bä paa bä.]
12 —Ji ma poo oow seeh péh ta ä̃h mamoo wät. Setsi tabadoo däg bä kä ta ä̃ kä mamoo wäd manäh, a masããh booj yb, jumeto na-ããj hẽ rakameh'ããk hyb n'aa; a karom, ta s'eeh hẽnh buuj a sii moo bok do rakameh'ããk hyb n'aa na-ããj hẽ.
13 —Taw'ããts hẽ baad bë hyb n'aa matakä, baad up sahõnh hẽ bë ky daheeh hyb n'aa kyh ỹỹ bë hã. Bë ky n'aa ets'ẽẽ manäh ta wób rah'yy kaha'eeh do sa hã. Bë ky dëë manäh sa hã. Sa häd sii hẽ bë esok manäh —näng mä Jaweh kyyh.
Tamawoob hẽ hadoo doo ji taheb'ëës do ky n'aa hahỹỹh
14 Ti m' ahõm nä Jaweh kyyh:
—Taw'ããts hẽ sét ta baab noo gó tamawoob nuu me bë moo bok ỹ bë hyb n'aa esee do jäm n'aa.
15 —Taw'ããts hẽ pooj jé bë tab'ëës Pãw Makuj N'aa Tamah Doo heen n'aa. Setsi ta ä̃h noo gó bë awaa pãw makuj n'aa tamah doo bë ỹ mejũũ do paa da. Taw'ããts hẽ bë tab'ëës kamarab ỹ ky däng doo hã da. Kamarab Abib häd näng do yt hẽ né hẽ, ti noo gó né hẽ bë banyyh do hyb n'aa Esito häj n'aa hẽnh naa.
—Dooh bag hẽnh hana péh wë ỹỹ. Taw'ããts hẽ bë manaa bë anoo péh.
16 —Taw'ããts hẽ ti jawén bë tab'ëës trig ag bë ataa doo heen n'aa. Ti noo gó bë anoo tsyt hẽ hã ỹỹ, pooj jé ganyyh do ta ag. Tagadëëg up, sahõnh hẽ hedoo do bë joom bë ataa doo bahëëj jëng bä, bë tab'ëës ta heen n'aa.
17 —Tamawoob nuu me né da ỹ karẽn sahõnh hẽ ajyy rakataa wë ỹỹ, Jaweh, Tak'ëp Hyb N'aa Jawyk Doo wë. Sét ta baab ken'yyh da tii —näng mäh.
18 —A masããh seeh manaboh bä ỹ maweh'ëëh hyb n'aa, ta majyyw wë ỹỹ mamanaa bä, mamanaa manäh ta sii pãw makuj n'aa näng doo mahang wät doo. Menyyw hõm manäh a mas'ããh syyj jati péh kan'oo däk hyb n'aa. [Majuu nayyw hẽ] —näng mäh.
19 —Jããm pooj jé a joom ag, baad hadoo doo, kasëëw däk doo, mamanaa tóp ỹỹ hẽnh, Jaweh, P'op Hagä Doo a hagã n'aa tób hẽnh.
—Bë ew'oop manäh kabara t'aah dab ta ỹỹn bii gamyyj me —näng mä Jaweh kyyh.
Sa pooj jé ta ããs bahõm P'op Hagä Doo ky n'aa enooh do panyyg n'aa hahỹỹh
20 Ti m' Jaweh ky hadoo ẽnh:
—Mahyb n'aa matakä —näng mäh. —Ỹ mejũũ da a pooj jé ããs bë tamo n'aa jesuu hyb n'aa ta tyw n'aa me bë ahõm bä, bë tamahũũm hyb n'aa panang hẽnh ỹ enyyw däk doo bä. 21 Mahyb n'aa matakä ta hã. Maky dahé sahõnh hẽ taher'oot doo. H'yy kawapëën manäh kamaj'ĩĩ doo me ta hã. Dooh tamabaan da ta hã bë h'yy kawapëën bä, kyh ỹ gabuuj tabawät do hyb n'aa. 22 Taher'oot doo baad maky dahé bä, sahõnh hẽ ỹ her'oot doo mamoo wäd bä, a majĩĩ majĩĩ da ỹỹh; a wë h'yy kawareem do wë ỹ h'yy kawareem da. 23 A pooj jé da ããs ỹỹ bawät da. Õm da tamahũũm Amor buuj, Hiit buuj, Peris buuj, Kanaãh buuj, Hiw buuj, Jebus buuj, sa häj n'aa hẽnh. Ỹ gawats'iik da ta tii babuj n'aa. 24 Ahyy hëë manäh a tarón nu paa me ta ti babuuj rah'yy kaha'eeh do sa pooj jé. Mawehëë manäh! Madoo manäh rabehed'oo doo da. Magawatsiig sa kabarii, rah'yy kaha'eeh do heen n'aa. Maganebäh pä yb p'op radahäng doo rah'yy kaha'eeh doo raweh'ëëh do heen n'aa. 25 Bë weh'ëëh ỹỹh, Jaweh, P'op Hagä Doo bë hagã n'aa. Tii bä da baad ỹ ky n'aa edëng da bë waa, bë naëng. Ỹ ado hõm da tii bä nahëëh bë mahang naa. 26 Dooh tii bä bë häj n'aa bä ỹỹj hetaah doo ta t'aah adëë hyy bä. Dooh tii bä bë mahang ỹỹnh netaah péh. Bë wäd dawëët da ỹ an'oo bä —näng mäh.
27 —Makajaa do pooj jé sa häj n'aa hẽnh, ỹ anoo da tak'ëp hã ỹ rajeỹỹm doo, rakajajãn doo na-ããj hẽ kajäk hyb n'aa sa hã. H'yyb manepëë boo da ỹ an'oo bä sahõnh hẽ ta tii bä häj n'aa buuj makahataa doo. Õm rabahapäh bä kä, waj'aa bong ỹ an'oo bä. 28 Tak'ëp Hiiw buuj, Kanaãh buuj, Hit buuj rabeỹỹm ỹ an'oo bä da, rawaj'aa nyyh hyb n'aa ta ti häj n'aa bä naa bë pooj jé. 29 Séd noo gó nado da, sét ta baab noo gó nado da ỹ ah'eed nyyh, takanarejã däk mahä̃nh sa joom banäng bä bë hyb n'aa, tabahä̃nh rakana'oot hyb n'aa na-ããj hẽ tababo n'aa sa joom rejãã doo. 30 Kaja hẽ denaa hẽ da ỹ ah'eed nyyh da bë pooj jé. Tii d’ ỹ wén d'oo bë kanekan däk bä kä, bë bahajaa hyb n'aa sahõnh hẽ häj n'aa bë hã ỹ ky n'aa enooh doo bë bog'ããs. 31 Hahỹ da ỹ anoo a häj n'aa baa besuu n'aa: Ta karawaa me tadu doo akajaar Hahiin Doo häd näng doo bä naa. Ta karawaa see me tamiih Eupara häd näng doo ta baa besuu n'aa. Papỹỹj hana hẽnh tadu doo banawäng doo Sĩnaĩh häd näng doo bä naa. Akajaar papỹỹj hahyng hẽnh mabëëh doo, Mediterãn häd näng doo ta baa besuu n'aa seeh. Õm da hejoonh ỹ an'oo bä ta tii bä häj n'aa bä habong doo sa mahä̃nh. Mahabëë nyyh da makajaa do hyb n'aa sa panang bä. 32 Maky n'aa gedag manäh da baad sa sii bë kaner'oot doo heen n'aa hã. Magado manäh rah'yy kaha'eeh doo. 33 Man'oo manäh bë mahang, bë häj n'aa bä rabaj'een hyb n'aa. Bë mahang magado bä, nesaa doo mamoo wät wë ỹỹ ran'oo bä kä da. Rah'yy kaha'eeh doo hã bë wehëë bä, karejã däk hadoo tii bä bë h'yyb, bë da gawatsik tii bä.