P'op Hagä Do ky n'aa jaw'yyk doo Isaraéw buuj gadoo do panyyg n'aa hahỹỹh
24
Ti m' Jaweh ky hadoo Moisés hã:—Asëëk wawẽẽ hẽ wë ỹỹ, õm, Arãw, Nadab, Abihu daheeh. Bë sii bë masäg 70 ub da Isaraéw buuj sa wahë n'aa wób. Tii bä dawë péj bë babok nä bä, taw'ããts hẽ rabehyy bëëh sa taron nuu paa me, tũũ sa maboor hyy jat ỹ raj'aa etsë hyb n'aa. 2 Jããm hẽ õm tii p'eets hẽ wë ỹ hana doo. Dawë hã da ta wób rabaym. Dooh ỹ an'oo bä hajõk doo a sii rabasëëk waëë hã —näng mä Jaweh kyyh.
3 Ti m' Moisés bahõm kän Isaraéw buuj wë, sahõnh hẽ Jaweh kyyh, Jaweh ky n'aa jaw'yyk doo na-ããj hẽ sa hã tamaher'oot hyb n'aa. Ti m' séd gó m' raky gadoo:
—Sahõnh hẽ Jaweh her'ood wät doo, ãã ky daheeh da —näk mä sa kyyh.
4 Ti m' Moisés erii wät sahõnh hẽ Jaweh kyyh. Ti m' jat'iip bäp paah tatamaa sëëk P'op Hagä Doo hã rama ejuu do tyng waëë nedaa bä. Ti m' tadahäng p'op 12 pä yb. Sét ken'yyh 12 hadoo doo Isaraéw buuj sa wahë makũũh panaa hyb n'aa. 5 Ti m' tasëëw hõm sa mahang pahëëw wób, ti m' tamejũũ Jaweh hã rama ejuu. Tamejũũ mä na-ããj hẽ booj yb wób ranebooh séd hã Isaraéw buuj rabawëh hyb n'aa, séd rah'yyb hedo däk doo Jaweh hã metëë n'aa. Ti m' tii d’ né rabad'oo. 6 Ti m' Moisés bado däk ranebooh do majyyw uuh ta hood gó tagedu hõm hyb n'aa. Ta uuh seeh taseem rama ejuu do tyng jó. 7 Ti m' tabado däk terii wät do paah Jaweh kyyh Isaraéw buuj hã tabanoo doo rakaner'ood bong noo gó. Ti m' taner'ood wät sahõnh hẽ ramaa napäh hyb n'aa. Ti m' sahõnh hẽ Isaraéw buuj raky hadoo:
—Sahõnh hẽ Jaweh her'ood wät doo, ãã ky daheeh da. Tamejũũ doo da né hẽ ãã bad'oo da —näk mä sa kyyh.
8 Ti m' Moisés bado däk majyyw [ta hood gó tenyyw hõm doo], ti m' Isaraéw buuj sa jó teseew hõm. Ti m' taky hadoo:
—Jaweh kaner'ood wät doo bë sii metëë n'aa hahỹỹ majyyw. Ta kyyh bë gado däk, bë kyyh Jaweh gado däk na-ããj hẽ hahỹỹ majyyw metëëh. [Kaner'oot doo, dooh da takahỹỹd wäd bä hỹ jawén. Sahõnh hẽ ta kyyh ỹ ner'ood wät doo ji tamaher'oot doo, tii da né hẽ ji bawät hỹỹ kä] —näng mäh.
9 Ti m' Moisés, Arãw, Nadab, Abihu daheeh rabas'ëëg kän waëë hã. 70 hedoo doo Isaraéw buuj sa wahë n'aa wób na-ããj hẽ rabas'ëëg kän sa sii. 10 Ti m' P'op Hagä Doo, Isaraéw buuj rah'yy kaha'eeh doo rabahapäh. Pä jabaruut do hadoo Sapiro häd näng doo tak'ëp hanäm doo, ta tsyym yt hã. Wë tak'ëp jabaruut doo banäm do hadoo ta tii. 11 P'op Hagä Doo ta tii Isaraéw buuj sa wahë n'aa rabahapëë né paawä, dooh P'op Hagä Doo mo haj'aa kadoo bä sa hã. Ta matym gó rabawa rabeëëk [ti m' rabahyy kän].
Ta maab hẽ Moisés asëëk ẽnh waëë jó Josuéh daheeh panyyg n'aa hahỹỹh
12 Ti m' Jaweh ky hadoo Moisés hã:
—B'ëëp wë ỹỹ waëë nu gad'oo hẽnh. Ta tii bä mabaym dó ỹ banoo hyb n'aa a hã pawóp hẽ pä gatsabak doo sa hã ỹ erii wät doo ky n'aa jaw'yyk doo ỹ mejũũ do na-ããj hẽ, Isaraéw buuj mamaa metëëk hyb n'aa —näng mä Jaweh.
13 Ti m' Moisés, ta hata Josuéh daheeh ratsyym kasog kän P'op Hagä Do waëë hã rabasëëk hyb n'aa. 14 Ratsyym kasog bä sa wahë n'aa hedoo doo hã Moisés ky hadoo:
—Bë gadaa babä ãã matëëh bä kä. Ti agëët bë mahang Arãw Hur daheeh. Tanyy bä hajõk do mahang raky n'aa katepaa doo, sa hã bë eaaj nyy da bë bad'oo —näng mä Moisés kyyh.
15 Ti m' waëë hã Moisés rabasëëk bä kä, wanakud bahyy kän waëë jó. Nepä wäd waëë tan'oo bä. 16 Jaweh bag tak'ëp gabarëëh doo tabahyy kän waëë Sĩnaih häd näng doo jó. Ji ma poo oow seeh péh ta ä̃h nuu jé wanakud awät waëë jó. Setsi ta ä̃h tabadoo däk bä kä wanakud gó naa Moisés Jaweh naëënh. 17 Tëëg hõõ kadoo do hadoo mä Jaweh bag tak'ëp gabarëëh doo waëë nu gad'oo hẽnh hahyng doo Isaraéw buuj sa hã. 18 Ti m' Moisés bajëë suun wanakud gó waëë nu gad'oo hẽnh tabasëëk hyb n'aa. Ta tii bä tabaym 40 m' adëë bä, 40 m' atsëm.