P'op Hagä Do matym n'aa Isaraéw buuj ranoo do pan'aa ky n'aa hahỹỹh
25
Wëë jó Moisés bawät bä, Jaweh ky hadoo ta hã:2 —Mamaher'ood Isaraéw buuj matym ỹ n'aa rabenäm hyb n'aa. Magado h'yyb noo doo me hã ỹỹ rakarẽn doo ranoo doo. 3 Hahỹỹ da magadoo sa moo gó naa: k'ããts tëg gabarëëh do s'ëëb, k'ããts tëg hawak do s'ëëb, k'ããts tëg hahiin do s'ëëb; 4 pããn jabaruut péh, hãd hahiin péh, ta seeh tak'ëp hahiin doo; pããn lĩno häd näng do s'ëëb tak'ëp baad hadoo doo; kabara wii; 5 b'éé ajyy byyh hahiin doo me rahewyk doo; wajats byyh s'ëëb; b'aah akasija häd näng doo s'ëëb. 6 Magadoo na-ããj hẽ ta syyj olibo häd näng do s'ëëb ta bag waa; bag'aad buu benyym doo ta syyj ji hawuuk do makuj n'aa, jewii yb buu benyym do seeh péh insiẽẽn häd näng doo ji ejuu do hyb n'aa. 7 Taw'ããts hẽ ranoo na-ããj hẽ pä tak'ëp hanäm doo onis häd näng doo, pä wób tak'ëp gabarëëh do sii hẽ. Ji dadäk da ta tii sa ród n'aa wë ỹỹ wahë n'aa hub hã hadäk doo hã, ta hood hã ta h'yyb gó tasëët doo hã na-ããj hẽ—näng mä Jaweh kyyh.
8 Ti m' taky hadoo ẽnh:
—Maher'ood sa hã tsyt hẽ wë ỹỹ kasëëw däk doo ratamaa däk hyb n'aa, sa mahang ỹ bawät hyb n'aa. 9 Mamoo wäd ta tii, sahõnh hẽ ta gó hanäng do na-ããj hẽ a hã ỹ metëëh do hadoo da, mahapäh doo hadoo né hẽ da —näng mäh.
Ta hood Jaweh ky n'aa enooh do sa hã rahyb n'aa esee do hood n'aa ky n'aa hahỹỹh
10 Ti m' Jaweh ky hadoo ẽnh:
—Mamaher'ood ramoo bok hyb n'aa ta hood b'aah akasija häd näng do s'ëëb. Hahỹỹ da da rabad'oo man'oo bä: 110 cm ta madawëët doo, 70 cm ta gagod, 70 cm tanu däk. 11 Ta gó, ta jó na-ããj hẽ k'ããts tëg gabarëëh do kamanekuunh do s'ëëb bë an'oo bä. Tii bä, ta hã madadäg ta baa hetso n'aa k'ããts tëg gabarëëh doo s'ëëb me. 12 Bë moo bok ji meheet péh gararem doo k'ããts tëg gabarëëh do s'ëëb. Tii bä ta hood tsyym hã bë padadëëk. Ta karawaa me pawóp hẽ, ta karawaa see me pawóp hẽ. 13 Tii bä bë moo bok pawóp hẽ tyng b'aah akasija häd näng do s'ëëb. K'ããts tëg gabarëëh do s'ëëb ta hã bë an'oo bä. 14 Bë gadas'ũũn gararem doo gó ta hood hã padëëk doo. Ta karawaa me ta seeh, takarawaa see me ta seeh. Ji hatook do pan'aa ti ta tyng. 15 Namadëëg ti ta hã. 16 Tii bä kä madasuun ta hood gó pawóp hadoo do pä gatsabak doo sa hã ky n'aa ỹỹ jaw'yyk doo kerii däk doo a hã ỹ anoo do pan'aa —näng mä Jaweh kyyh.
17 Ti m' ahõm nä ta kyyh:
—Mamoo wäd ta ty gatsë 110 cm ta madawëët doo, 70 cm ta gagod. K'ããts tëg gabarëëh do kamanekuunh do s'ëëb me mamoo wät da tiia. 18 Pawóp hẽ kabaj'aa doo këg enäh do heen n'aa kerubĩm ramaneëënh doo mamoo wäd ta ty gatsë uuh ta jó. Sét né hẽ ta pan'aa bë moo bok ta ty gatsë hã ta tii kabaj'aa do heen n'aa. 19 Ta ty gatsë pooh s'eeh hẽnh kerubĩm ramaneëënh doo seeh, ta pooh seeh hẽnh ta seeh. Sét s'ëëb né tii man'oo bä kerubĩm ta ty gatsë na-ããj hẽ. 20 Mamoo wät da p'op kerubĩm këg ragadabëëh, p'op naa sa këg me rajasuu hyb n'aa ta ty gatsë. Taw'ããts hẽ ty keg'ããs da kerubĩm ramaneëënh do heen n'aa. 21 Tii bä kä madasuun ta hood gó pä gatsabak doo ta hã ky n'aa ỹỹ jaw'yyk doo kerii däk doo a hã ỹ anoo do pan'aa. Tii kä madasoo ta ty gatsë ta hood jó. 22 Ta tii bä, ta ty gatsë pong jé, kerubĩm këg ganahaang gó ỹ kasee da a hã õm ỹ maher'oot hyb n'aa sahõnh hẽ ỹ kyh n'aa jaw'yyk doo Isaraéw buuj hã manoo do pan'aa —näng mä Jaweh kyyh.
Pãw tyng n'aa ky n'aa hahỹỹh
23 —Taw'ããts hẽ mamoo wäd ta tyng n'aa b'aah akasija häd näng do s'ëëb. 90 cm ta madawëët doo, 50 cm ta gagod, 66 cm ta nu däk. 24 Ta hã k'ããts tëg gabarëëh do kamanekuunh do s'ëëb. Ta hã mamoo wäd ta baa hetso n'aa k'ããts tëg gabarëëh do s'ëëb. 25 Ta jó, ta nabyy me, mamoo wäd ta hadë ji moo sét pénh tanu däk. Ta tii hã mamoo wäd na-ããj hẽ tabaa hetso n'aa k'ããts tëg gabarëëh do s'ëëb. 26 Tii bä mamoo wäd ji meheet péh gararem doo k'ããts tëg gabarëëh do s'ëëb. Ta tyng n'aa sasu me mapadadëëk, ta tsyym gabëëh bä. 27 Taw'ããts hẽ ta hadë yd jé kanahën d'oos hẽ bë padadëëk gararem doo ta tyng ji hatook do pan'aa tii gó ji das'ũũd jëng hyb n'aa. 28 Tii bä bë moo bok ta tyng b'aah akasija häd näng do s'ëëb. K'ããts tëg gabarëëh do s'ëëb ta hã bë an'oo bä. Ta tii me ji matook ta tyng n'aa. 29 K'ããts tëg gabarëëh do kamanekuunh do s'ëëb me bë moo bok ta tyng jó hatoonh do pan'aa, ta hood hedoo doo, ta nahëëh. Bë moo bok na-ããj hẽ ji eëëk do hood aéh doo, kop sii hẽ, uwa bëëh, hã ỹỹ kan'oo däk do hood. 30 Ta tyng n'aa jó madasoo hed'yyt hẽ, matym ỹỹ gó kametëëh doo, pãw hã ỹỹ kan'oo däk doo —näng mä Jaweh kyyh.
Ta bag tyng ky n'aa hahỹỹh
31 Ti m' Jaweh ky hadoo ẽnh:
—Mamoo wäd ta bag tyng k'ããts tëg gabarëëh do kamanekuunh do s'ëëb me. Ta nahëë me ji tsajä̃g däk do s'ëëb. Sét né ta pan'aa me bë moo bok ta patuuh, ta tëëg, ta bag jatoonh doo, ta ts'ooh heen n'aa. 32 Ta tëëg hã gabëëh ji ma poo oow seeh péh ta mooh man'oo bä. Tamawoob hẽ hub hẽnh, tamawoob hẽ s'ỹỹ me. [Séd pej ranu padëëk man'oo bä.] 33 Ta mooh uuh me né hẽ bë moo bok tamawoob hẽ b'aah amen-doa ts'ooh heen n'aa sét ta mooh hã ken'yyh. 34 Ta tëëg hã, ta uuh me né hẽ, bë moo bok ji meheet péh amen-doa ts'ooh heen n'aa. 35 Sahõnh hẽ ta mooh gabëëh yd jé bë moo bok ta tii. [Sét hẽ ta tëëg nu gad'oo bä.] 36 Sét s'ëëb né hẽ bë moo bok ta ts'ooh, ta mooh, ta tëëg hã. Bë moo boo manäh tsyt hẽ ta jawén ta hã bë dadäk hyb n'aa. Sét s'ëëb me né hẽ, k'ããts tëg gabarëëh do kamanekuunh do s'ëëb me, bë tsajä̃g hëë sahõnh hẽ.
37 —Tii bä mamoo wäd setsi ta bag. Ta tëëg nu gad'oo bä, ta moo nu gad'oo bä tabahõm man'oo bä, ta pooj jé ta bag däk hyb n'aa. 38 K'ããts tëg gabarëëh do s'ëëb me bë moo bok ta ty ehõõ n'aa nahëëh, ta nahëëh hood na-ããj hẽ. 39 35 kiil da ta pan'aa k'ããts tëg gabarëëh do kamanekuunh do s'ëëb bë moo bok ta bag tyng, ta nahëëh hedoo doo na-ããj hẽ. 40 Mamoo wäd ta tii, hahỹỹ waëë hã a hã ỹ metëëh doo hadoo da, mahapäh doo hadoo né hẽ da —näng mä Jaweh kyyh Moisés hã.