Isaraéw buuj hã P'op Hagä Doo kahesé do tób n'aa ky n'aa hahỹỹh
26
Ti m' Jaweh ky hadoo ẽnh:—Matamaa däk da bë hã ỹ kahesé do tób n'aa. Ji moo sahõnh hẽ pããn lĩno häd näng do sëëb tak'ëp baad hadoo doo kepëk doo ta pan'aa. Ta mahang kaseb'aat doo jabaruut péh, hãd hahiin péh, ta seeh tak'ëp hahiin doo. Ta hã tak'ëp hajaa doo ges'yyb da kerubĩm heen n'aa ta hatsó n'aa. 2 Séd gahejéj had'yyt hẽ bë an'oo bä ji moo sahõnh hẽ hedoo do pããn. 12 meet 60 cm ta jó ta madawëët doo. Sét meet 80 cm ta jó ta gagod. 3 Ji moo seeh ken'yyh da bë ata däk sét ta pan'aa. 4-5 Bë moo boo däg tii bä, ta ty getëë bä, 50 ji sekooh do tyw n'aa ta seeh hã, ta seeh hã na-ããj hẽ. Ta seeh nemuun hed'yyt hẽ ta tyw n'aa bë an'oo bä takatëë bä. Pããn jabaruut doo me bë moo booh ta tii ji sekooh do tyw n'aa. 6 Tii bä mamoo wäd k'ããts tëg gabarëëh do s'ëëb me 50 kasekooh do tsadäb n'aa. Ta tii me séd hã ji bata däk pããn.
7 —Mamoo wäd 11 kabara wii s'ëëb ta jasuu n'aa pan'aa. 8 Séd gahejéj had'yyt hẽ man'oo bä ta ti 11 hadoo doo. 13 meet 50 cm ta jó ta madawëët doo. Sét meet 80 cm ta jó ta gagod. 9 Bë gatëë 5 ta see me, 6 ta see me. Tabës doo tób ty gadäk hẽnh bë matëh däk. 10 Bë moo boo däg tii bä, ta ty getëë bä, 50 ji sekooh do tyw n'aa ta seeh hã, ta seeh hã na-ããj hẽ. 11 Tii bä mamoo wäd k'ããts tëg hahiin do s'ëëb me 50 kasekooh do tsadäb n'aa. Ta tii me séd hã ji bata däk ta jasuu n'aa. 12 Ta bód tũũ noo hyy jat tób duu hẽnh. 13 Pããn lĩno s'ëëb gabahä̃nh péj ta jasuu n'aa, ti hyb n'aa tũũ ta noo jat. 14 Mamoo wäd ta ti jó madasooh do pan'aa b'éé ajyy byyh hahiin doo me rahewyk doo. Mamaag sëëg do jó kä ta tób n'aa mamoo wäd kän wajats byyh s'ëëb —näng mä Jaweh kyyh.
15 —Mamoo wäd mamaag sëëg do tyng b'aah akasija häd näng do s'ëëb bë hã ỹ kahesé do tób n'aa pan'aa. Pawóp hẽ b'aah ta tu n'aa hadoo doo p'op nu däk doo sét hã man'oo bä, baa gadabo n'aa näng man'oo bä. 16 Séd gahejéj had'yyt hẽ man'oo bä. Ji meheet péh meet, sét ta bód ta jó ta nu däk. 66 cm ta gagod. 17 Ta tyng hã mamoo wäd pawóp hẽ ta tu n'aa tyw n'aa sét hã ken'yyh. Ti da né mabad'oo sahõnh hã. 18-21 20 man'oo bä ta ti hedoo doo ta karawaa me hahõm doo, 20 ta karawaa see me hahõm doo. Tii bä mamoo wäd ta tyng n'aa hedoo do tsyym k'ããts tëg hawak do s'ëëb me. Ta hã mamoo wät ta tyw n'aa ta gó tadu këë hyb n'aa ta tu n'aa tyw n'aa. Pawóp hẽ ta tsyym sét tyng ken'yyh man'oo bä, séd pa ta tyng bahõm hyb n'aa, sét ta seeh pa, ta seeh ta seeh pa, ta seeh ta seeh pa. Ti hado hed'yyt hẽ. 22 Tób duu hẽnh, papỹỹj hahyng hẽnh, mamoo wäd ji mapoo oow seeh péh ta ti hedoo do tyng. 23-24 Ta tii bä, ta sasu hẽnh, hub hẽnh, s'ỹỹ me na-ããj hẽ, mamoo wäd nä ta tyng seeh ta sasu me hahõm do kanatëë, ta mesoo n'aa. Ta sasu hẽnh hahäng doo hã madadäk. Ta nu gad'oo bä magatëë séd hã gararem doo me. 25 8 däg duu hẽnh habëëh doo ta tyng n'aa hedoo doo ta ti an'oo bä. 16 ta styym. Pawóp ta tsyym sét tyng hã.
26-27 —Mamoo wäd ji mooh seeh ta tyng hejoj n'aa ta karawaa me habong doo, b'aah akasija häd näng do s'ëëb me. Ji moo séd me ken'yyh da man'oo bä. Ti hawób da ta karawaa see me, ti hawób né hẽ ta karawaa s'eeh hẽnh. Ti hawób né hẽ tób duu hẽnh hahõm doo. 28 Dawëët mamoo wäd ta baa bä hagëë doo ta karawaa me hahõm doo, sahõnh hẽ ta madawëët doo me tabahajaa hyb n'aa. 29 Ta tyng hã, ta karawaa me habong doo hã na-ããj hẽ k'ããts tëg gabarëëh doo man'oo bä. Ta tyng hã madadäg gararem doo tii gó ji mooh seeh hedoo doo ta hejoj n'aa ji das'ũũd jëng hyb n'aa.
30 —Mamoo wäd ta tii, hahỹỹ waëë hã a hã ỹ metä wät do hadoo da, mahapäh doo hadoo né hẽ da —näng mä Jaweh kyyh Moisés hã.
31 —Mamoo wäd t'õp ta noo gatsë. Hahỹỹ da ta pan'aa man'oo bä: kaseb'aat doo jabaruut doo, hãd hahiin doo, ta seeh tak'ëp hahiin doo, pããn lĩno häd näng do s'ëëb tak'ëp baad hadoo doo kepëk doo na-ããj hẽ. Ta hã tak'ëp hajaa doo ges'yyb da kerubĩm heen n'aa ta hatsó n'aa. 32 Ji meheet péh ta tu n'aa b'aah akasija häd näng doo s'ëëb t'õp ta noo gatsë tyng. K'ããts tëg gabarëëh do s'ëëb ta hã. K'ããts tëg hawak do s'ëëb da ta tu n'aa tsyym. Kaneké k'ããts tëg gabarëëh do s'ëëb ta tu n'aa hã t'õp ta noo gatsë kagaah do tyw n'aa man'oo bä. Ti hã madadäg t'õp gadäk do noo gatsë. 33-34 50 kasekooh do tsadäb n'aa gabëëh doo yt hẽ tabadäk t'õp gadäk do noo gatsë. Ta noo gatsë nu masee me t'õp gadäk doo gó madahäng ta hood ỹ ky n'aa enooh do bë hyb n'aa esee do hood n'aa. Tii kä madasoo ta ty gatsë ta hood jó. Ta noo gatsë besuu da ta kawakõ tsyt hẽ wë ỹỹ kasëëw däk doo, ta kawakõ seeh tsyt hẽ wë ỹỹ kasëëw däk do heh'äät doo. 35 Tii bä t'õp gadäk doo noo gatsë ji bajëng do pooj jé, hub hẽnh madahäng pãw tyng n'aa. S'ỹỹ hadäk hẽnh madahäng ta bag tyng.
36 —Mamoo wäd tób noo gatsë. Hahỹỹ da ta pan'aa man'oo bä: kaseb'aat doo jabaruut doo, hãd hahiin doo, ta seeh tak'ëp hahiin doo, pããn lĩno häd näng do s'ëëb tak'ëp baad hadoo doo kepëk doo na-ããj hẽ. Baad hepëk doo mo haj'aa da. 37 Tii bä mamoo wäd ji moo seeh ta tu n'aa b'aah akasija häd näng do s'ëëb, ta noo gatsë tyng. K'ããts tëg gabarëëh do man'oo bä ta hã. Taw'ããts hẽ bë adẽẽ däk ji moo seeh ta tu n'aa tsyym pan'aa k'ããts tëg hahiin do s'ëëb. Mamoo wäd kaneké k'ããts tëg gabarëëh do s'ëëb ta tu n'aa hã, ta noo gatsë ta hã ji dadäk hyb n'aa —näng mä Jaweh kyyh.