—Mamoo wäd hã ỹỹ bë ma ejuu do tyng b'aah akasija häd näng do s'ëëb me. Hahỹỹ da da rabad'oo man'oo bä: Sét meet 25cm ta jó tanu däk, pawóp hẽ meet 25cm ta jó ta madawëët doo, pawóp hẽ meet 25cm ta jó ta gagod. 2 Poo gasõõm doo man'oo bä ta sasu me p'op pej tatabës hyb n'aa. Sét né ta pan'aa me bë moo bok ma ejuu do tyng, poo gasõõm doo na-ããj hẽ. Ta gó, ta jó na-ããj hẽ k'ããts tëg hahiin do s'ëëb bë an'oo bä. 3 K'ããts tëg hahiin do s'ëëb me mamoo wäd sahõnh hẽ hã ỹ bë ma ejuu do tyng nahëëh: tëëg ooj hood, ta sëh ta ooj nahëëh, ji eseem do hood, ji ajuu do ji wareem do nahëëh, ta ooj haju doo hood. 4 Tii bä mamoo wäd tëëg hõõ tyng n'aa k'ããts tëg hahiin do s'ëëb me. Kaguun man'oo bä. Ta sasu me mamoo wäd gararem doo ji ma ejuu do tyng ji hatook do pan'aa. 5 Ji ma ejuu do tyng baa bä madadäg tëëg hõõ tyng, ta tii bä hanäng do tyng yd jé. 6 Tii bä bë moo bok pawóp hẽ ta tyng, ma ejuu do tyng ji hatook do pan'aa, b'aah akasija häd näng do s'ëëb. K'ããts tëg hahiin do s'ëëb bë an'oo bä ta hã. 7 Bë gadas'ũũd gararem doo gó ji hatook do pan'aa. Ta karawaa me ta seeh, ta karawaa see me ta seeh. 8 Gabaho da man'oo bä hã ỹỹ bë ma ejuu do tyng, b'aah s'ëëb me. Mamoo wäd ta tii, hahỹỹ waëë hã a hã kametä wät do hadoo da, mahapäh doo hadoo né hẽ da —näng mä Jaweh kyyh Moisés hã.

—Mamoo wäd ta hadë, bë hã ỹ kahesé do tób n'aa wahoo hadë n'aa. 45 meet ta madawëët doo ta karawaa me man'oo bä ta kahadë. Pããn lĩno häd näng do s'ëëb tak'ëp baad hadoo doo kepëk doo ta pan'aa. 10 20 ta tu n'aa ta hadë tyng man'oo bä. 20 ta tu n'aa tsyym k'ããts tëg hahiin do s'ëëb. Ta tu n'aa nu gad'oo hẽnh madadäg ta hadë pããn tyng k'ããts tëg hawak do s'ëëb. Ta tyng hã madadäg kaneké k'ããts tëg hawak do s'ëëb ta hadë kagaah do tyw n'aa. 11 Ti hadoo né hẽ ta karawaa see me man'oo bä. 12 Papỹỹj hahyng hẽnh 22 meet man'oo bä ta hadë pããn s'ëëb. 10 ta tu n'aa ta hadë tyng, 10 ta tu n'aa tsyym man'oo bä. 13 Ti gahejéj man'oo bä ta hadë papỹỹj hana hẽnh, ta noo tabanäng hẽnh. 14 Ta hadë noo hub hẽnh hadäk hẽnh man'oo ta hadë pããn 6 meet, 60 cm ta jó. Tamawoob hẽ ta tu n'aa ta hadë tyng, tamawoob hẽ ta tu n'aa tsyym man'oo bä. 15 Ti pénh man'oo bä ta hadë ta noo s'ỹỹh tabanäng hẽnh. Ti hawób ta tu n'aa, ta tu n'aa tsyym.

—Mamejõ ta syyj olibo häd näng do s'ëëb Isaraéw buuj ramanaa hyb n'aa a wë. Ta bag waa tabahõõ hed'yyt hẽ hyb n'aa tii bä. 21 Tób ỹ kahesé doo gó, t'õp gadäk do noo gatsë ji bajëng do pooj jé, Arãw, ta taah na-ããj hẽ rahag'ããs da hed'yyt hẽ ta bag, tii bä hahäng doo. Taw'ããts hẽ tabahõõ had'yyt hẽ matym ỹỹ gó ran'oo bä tug bä naa paah, bäp paa kä. Taw'ããts hẽ ta ti d’ hed'yyt hẽ bë an'oo bä, bë panaa na-ããj né hẽ.