Isaraéw buuj sa ky n'aa ród P'op Hagä Doo wë sa saroor ky n'aa hahỹỹh
28
Ti m' Jaweh ky hadoo ẽnh:—Manaëëj a wë a hỹỹj Arãw, ta taah Nadab, Abihu, Ereasar, Itamah tsyt hẽ rakasëëw däk hyb n'aa Isaraéw buuj sa mahang, wë ỹỹ ramoo bok hyb n'aa, sa ky n'aa ród rabahadoo hyb n'aa. 2 Mamoo wäd a hỹỹj Arãw saroor tak'ëp hanäm doo, tsyt hẽ kasëëw däk doo, tahyb n'aa jawyg däk hyb n'aa. 3 Mamaher'ood a pariir n'aa sa hã, ỹ h'yy gan'yyh doo, Arãw saroor ramoo bok hyb n'aa, tsyt hẽ wë ỹỹ Arãw kasëëw däk do hyb n'aa, wë ỹỹ tamoo wät hyb n'aa, sa ky n'aa ród wë ỹỹ tabahadoo hyb n'aa na-ããj hẽ. 4 Taw'ããts hẽ hahỹỹh ramoo bok a hỹỹj Arãw häd näng do hã ta taah hã rapadadëëk do pan'aa: ta hood sa h'yyb gó rasëët doo, sa hub hã hadäk doo, saaj dawëët hadoo doo moo tamah doo, saaj dawëët hadoo doo moo näng doo tak'ëp hanäm doo me kepëk doo ta pan'aa, pããn sa soog, pããn sa baa wyd. Ta tii sa saroor radadäk wë ỹỹ ramoo bok do hyb n'aa, sa rod n'aa wë ỹỹ rabahadoo do hyb n'aa. 5 Hahỹỹ ta ti hedoo doo ta pan'aa: K'ããts tëg gabarëëh do s'ëëb sa saroor mahang kepëk do pan'aa, kaseb'aat doo jabaruut péh, hãd hahiin péh, ta seeh tak'ëp hahiin doo; pããn lĩno häd näng do s'ëëb tak'ëp baad hadoo doo.
Ta hub hã Arãw dadäk do ky n'aa hahỹỹh
6 —Hahỹỹ da ta hub hã Arãw dadäk doo ta pan'aa man'oo bä: k'ããts tëg gabarëëh doo ta mahang kepëk do pan'aa, kaseb'aat doo jabaruut doo, hãd hahiin doo, ta seeh tak'ëp hahiin doo, pããn lĩno häd näng do s'ëëb tak'ëp baad hadoo doo kepëk do na-ããj hẽ. Tak'ëp hajaa doo mo haj'aa da. 7 Pawóp hẽ ta pan'aa: Ji h'yyb hã hadäk doo, ji jó hadäk doo. Ji janoo bä pawóp hẽ ta tyd gatëë n'aa hãd goéh doo, séd hã taketëë hyb n'aa. 8 Taw'ããts hẽ ta bód hã mepëg däk hanäm doo ta baa wyd. K'ããts tëg gabarëëh do s'ëëb ta mahang takepëk, kaseb'aat doo jabaruut doo, hãd hahiin doo, ta seeh tak'ëp hahiin doo, pããn lĩno häd näng do s'ëëb tak'ëp baad hadoo doo kepëk doo man'oo bä. 9 Tii bä mado däk pawóp hẽ pä tak'ëp hanäm doo onis häd näng doo. Ta hã Isaraéw taah sa häd kerih man'oo bä. 10 Wah'ëëh hadoo do häd pooj jé, ta jawén näh häd ta jawén. Ti hado hed'yyt hẽ. Tagad'oo hadoo do häd tagadëëg up. Ji ma poo oow seeh péh sa häd sét pä hã, ji ma poo oow seeh péh pä seeh hã takerih man'oo bä. 11 Mamejõ baad hajaa doo herih ji moo heen n'aa hã ky n'aa jawyk doo heen n'aa kametsaa do mo n'aa me. Tii bä pä nabyy me madadäg k'ääts tëg gabarëëh do s'ëëb ta mesoo n'aa. 12 Tii bä mapadadëëk pawóp hadoo do pä sa ród n'aa wë ỹỹ wahë n'aa ta hub hã hadäk doo tyd hã ta janoo bä hadäk doo, Isaraéw taah panaa tahyb n'aa esee hyb n'aa. Tii bä kä ta janoo bä Isaraéw taah sa häd Arãw asëët hed'yyỹ hẽ, matym ỹỹ me sa panaa tahyb n'aa esee hyb n'aa. 13-14 K'ããts tëg gabarëëh do s'ëëb me mamoo wäd ta tyd. Katsäp doo man'oo bä. Tii bä k'ããts tëg gabarëëh do s'ëëb me mamoo wäd pawóp hẽ ta tyd mesoo n'aa. Mapadadëëk ta hub hã hadäk doo tyd hã ta janoo bä hadäk doo. Ta tii hã madadäg kän ta tyd —näng mä Jaweh kyyh.
Ta hood ta h'yyb gó sa ród n'aa wahëh tasëët do ky n'aa hahỹỹh
15 Ti m' Jaweh ky hadoo ẽnh:
—Mamoo wäd ta hood sa ród n'aa wahëh h'yyb gó hadäk doo, P'op Hagä Doo karẽn doo ta hã tabahapäh hyb n'aa. Tak'ëp hajaa doo mo haj'aa da. Ta pan'aa sa hub hã hadäk doo pan'aa pé né da man'oo bä: k'ããts tëg gabarëëh do s'ëëb ta mahang kepëk do pan'aa, kaseb'aat doo jabaruut doo, hãd hahiin doo, ta seeh tak'ëp hahiin doo, pããn lĩno häd näng do s'ëëb tak'ëp baad hadoo doo kepëk doo. 16 Ji matëh däk pããn, ta hood tabahado däk hyb n'aa. Sét nuu me ji mooh ji etyy do pénh ta madawëët, ti pénh ta gagod. 17 Tii bä magadabëh ta hã ji meheet péh noo gabah hẽ pä hatsooh doo gabarëëh doo. Tamawoob hẽ pä sét noo gabäh ken'yyh. Pong hẽnh gabëëh doo hã pä gabarëëh doo rubi häd näng doo, topasijo häd näng do ta seeh, beriwo häd näng do ta seeh. 18 Ta yt gabëëh do pan'aa pä gabarëëh doo tur-kes häd näng doo, sapir häd näng do ta seeh, emerad häd näng do ta seeh. 19 Ti jawén gabëëh doo pä gabarëëh doo jasĩn-to häd näng doo, agata häd näng do ta seeh, ametis häd näng do ta seeh. 20 Tagadëëg up gabëëh do hã kä, yd hẽnh, pä gabarëëh doo kirisorit häd näng doo, onis häd näng do ta seeh, jas-peh häd näng do ta seeh. K'ããts tëg gabarëëh do s'ëëb me mamoo wäd pä gabarëëh do mesoo n'aa ta hood hã ji kesyyp hyb n'aa. 21 Sét uuh hed'yyt nado pä. 12 hadoo doo péh ta ti pä ta hã gabëëh doo. Pä hã bë erii däk Isaraéw taah sa häd, sét pä hã sét t'aah häd. Mamejõ baad hajaa doo herih ji moo heen n'aa hã ky n'aa jawyk doo heen n'aa kametsaa do ji berih do mo n'aa me.
22 —K'ããts tëg gabarëëh do s'ëëb me mamoo wäd pawóp hẽ ta tyd. Katsäp doo man'oo bä. 23 K'ããts tëg gabarëëh do s'ëëb me mamoo wäd gararem doo ta hood noo bä, ta sasu me mapadadëëk hyb n'aa. 24 Ta tyd tyw n'aa tii. 25 Tii bä ta tyd poo gad'oo seeh masakong ta tyd mesoo n'aa hã ji janoo bä padëëk doo hã. 26 Tii bä k'ããts tëg gabarëë do s'ëëb me mamoo wäd gararem doo, ta hood sasu yd hẽnh hadäk doo hã mapadadëëk hyb n'aa. 27 Pawóp nä mamoo wät gararem doo k'ããts tëg gabarëëh do s'ëëb. Ta tii mapadadäg ta tyd hã ta janoo bä hahyng doo hã, ta hub hã hadäk do masoo n'aa hã. Ta masoo n'aa poo däk hẽnh madadäk gararem doo, ta h'yyb gó hadäk doo hadäk hẽnh. Ta baa wyd pong jé kanahën doo hẽ, kesyyp do tyw n'aa hã mapadadäg. 28 Gararem doo ta hood hã hadäk doo ji sakooh gararem doo ta tyd hadäk doo hã ta tyd jabaruut doo me. Tii b’ naa ji sakooh ta hub hã hadäk doo baa wyd n'aa hã, ta h'yyb gó hadäk doo papyk hyb n'aa —näng mä Jaweh kyyh.
29 —Arãw bajëë suun bä tób tsyt hẽ wë ỹỹ kasëëw däk doo gó, tamahũũm da ta h'yyb gó Isaraéw taah sa häd ta hood hã padëëk doo, Isaraéw panaa tahyb n'aa esee hed'yyt hyb n'aa matym ỹỹ gó. 30 Ta hood gó madasuun Urĩm, Tumim häd enäh doo, ta h'yyb hã tamahũũm hed'yyt hyb n'aa matym ỹỹ gó tabajëë suun bä. Ta h'yyb gó tamahũũm hed'yyt hẽ tii bä matym ỹỹ gó Urĩm, Tumim, ta nahëëh ta hã tabahapäh hyb n'aa ny hadoo doo ỹ karẽn Isaraéw buuj hã —näng mä Jaweh kyyh Moisés hã.
Saaj dawëët hadoo moo tamah do ky n'aa hahỹỹh
31 Ti m' Jaweh ky hadoo ẽnh:
—Pããn jabaruut doo me mamoo wäd saaj dawëët hadoo moo tamah doo. 32 Ta hoo gad'oo bä mamoo wät ta nooh, ji nuuh tyw n'aa. Ji nuu tyw n'aa noo bä bë gasyyp ta noo hejoj n'aa takanas'ẽẽd hõm mahä̃nh. 33 - 34 Ta nabyy me magas'yyb romã ag häd näng do heen n'aa. Kawõõt man'oo bä. Kaseb'aat doo jabaruut doo, hãd hahiin doo, ta seeh tak'ëp hahiin doo ta ag heed n'aa pan'aa. Ta ag heen n'aa mahang mapadadëëk ta naëj n'aa its k'ããts tëg gabarëëh do s'ëëb ketẽng is doo. Kawõõt man'oo bä. 35 Arãw dadäk hed'yyt hẽ da ta ti saaj hadoo doo tób tsyt hẽ wë ỹỹ kasëëw däk doo gó tabajëë suun bä, wë ỹỹ tamoo wät hyb n'aa. Matym ỹỹ gó tabajëë suun bä, tabanyyh bä na-ããj hẽ ma en'äs da ketẽng is doo tanadajëp hyb n'aa —näng mä Jaweh kyyh.
Pããn sa soog, saaj dawëët hadoo moo näng do daheeh ky n'aa hahaỹỹ
36 Ti m' Jaweh ky hadoo ẽnh:
—Mado däk k'ããts tëg gabarëëh do s'ëëb bäh gatsabak doo. Tii bä ta hã merii däk sa ky n'aa ród wahë n'aa ky n'aa. Hahỹỹ da merii däk: “Tsyt hẽ Jaweh wë kasëëw däk doo”. Ji moo heen n'aa hã ky n'aa jawyk doo heen n'aa kametsaa do mo n'aa me merii däk. 37 Ta tyd jabaruut doo me masakong däk ta soog pããn s'ëëb hã. Ji ty gadäk hẽnh madadäg. 38 Arãw maboor hã takadadäk ta tii. Ta hã ỹ ky n'aa tapaa da tsyt hẽ hã ỹỹ Isaraéw buuj ranoo péh hã resõõts hõm bä. Ta maboor hã kadadäg däk hed'yyt hẽ kerih doo, Isaraéw buuj tsyt hẽ hã ỹỹ ranoo doo ỹ gadoo hyb n'aa.
39 —Pããn lĩno häd näng doo baad hadoo doo me mamoo wäd saaj dawëët hadoo doo moo näng doo. Tii s'ëëb né mamoo wäd ta soog. Ta baa wyd baad hepëk doo hajaa doo mo haj'aa da.
40 —Mamoo wäd tak'ëp hanäm doo Arãw taah sa saaj dawëët hadoo doo, moo näng doo, pããn sa soog na-ããj hẽ, rahyb n'aa jewyg däk hyb n'aa. 41 Tii bä madadäg a hỹỹj Arãw häd näng doo hã, Arãw taah hã na-ããj hẽ sa saroor. Tii bä mahawug sa hã ta syyj buu benyym doo. Man'oo sa hã wë ỹỹ ramoo bok hyb n'aa. Tii da, tsyt hẽ masëëw däk wë ỹỹ ramoo bok hyb n'aa, sa rod n'aa wë ỹỹ rabahadoo hyb n'aa na-ããj hẽ.
42 —Pããn lĩno häd näng doo me mamoo wäd sa kawäj sa saroor yt rapadedëëk doo sa hã hanäng doo kajesu däk hyb n'aa. Sa baa b’ naa tadu doo, sa kóm hã takajaa. 43 Taw'ããts hẽ Arãw, ta taah na-ããj hẽ rapadedëëk ta tii hed'yyt hẽ, bë hã ỹ kahesé do tób n'aa gó rabajëë suun do pooj jé, hã ỹỹ bë ma ejuu do tyng wë rana bä wë ỹỹ ramoo bok hyb n'aa, tsyt hẽ wë ỹỹ kasëëw däk doo bä. Taw'ããts hẽ rapadedëëk ranadejëp hyb n'aa sa hã hanäng doo takametä bä paawä. Taw'ããts hẽ Arãw, ta panaa hed'yyt hẽ raky daheeh da ta ti kamejũũ doo —näng mä Jaweh kyyh.