Moisés Jaweh mejũũ doo nyy da Arãw hã, Arãw taah hã tabanoo ta wë ramoo bok hyb n'aa
29
Ti m' Jaweh ky hadoo:—Hahỹỹ da mabad'oo tsyt hẽ, wë ỹỹ Arãw, ta taah ramoo bok hyb n'aa —näng mäh: —Mado däk booj yb aj'yy papuj nä doo, pawóp hẽ b'éé ajyy baad had'o up doo. 2 Ti m' mado da baad had'o up do triig s'ëëb. Makuj n'aa tamah doo me mamaj'õõs. Pãw mesëëm ta uuh. Ta uuh me né hẽ mamekuuj ta syyj olibo häd näng do s'ëëb me, ti mabesëëm. Ta uuh seeh mamoo wäd pãw hadoo gatsabag is doo. Ta syyj me mabahep'ees. 3 Tii bä kawaju gó madasooh tamawoob hẽ hadoo péh pãw mamoo wät do paah. Tii bä hã ỹỹ bë anoo booj yb, b'éé daheeh. 4 Tii bä mamanaa Arãw, ta taah bë hã ỹ kahesé do tób n'aa noo bä. Naëng me rabehop man'oo bä. 5 Tii bä madadäg Arãw hã saaj dawëët hadoo doo moo näng doo, saaj dawëët hadoo moo tamah doo, ta hub hã kadadäk doo, ta hood sa ród n'aa wahëh h'yyb gó hadäk doo. Tii bä mamaw'yy däk ta hub hã hadäk doo ta baa wyd. 6 Mahabën däk ta hã ta soog pããn. Ta hã madadäg k'ããts tëg gabarëëh do s'ëëb bäh gatsabak doo ta hã takerih doo, tsyt hẽ kasëëw däk doo. 7 Tii bä mado da ta syyj buu benyym doo. Mahahoog ta uuh ta nuu gó, tsyt hẽ wë ỹỹ tamoo wät do heen n'aa. 8 Tii bä mamanaa Arãw taah. Madadäg sa hã sa saaj dewëët hadoo doo, moo näng doo. 9 Madadäg sa hã sa baa wyd. Tii bä mahabën däk sa hã, Arãw hã na-ããj hẽ pããn sa soog. Tii da né hẽ mabad'oo sa hã, wë ỹỹ ramoo bok hyb n'aa, sa ky n'aa ród wë ỹỹ rabahadoo hyb n'aa na-ããj hẽ. Tii, sa panaa na-ããj hẽ, wë ỹỹ ramoo bok da had'yyt hẽ.
10 —Tii bä booj yb aj'yy papuj nä doo mamanaa bë hã ỹ kahesé do tób n'aa noo bä. Ta nuu jó Arãw ta taah daheeh radatoonh sa mooh man'oo bä. 11 Tii bä manaboh jät booj yb matym ỹỹ gó, bë hã ỹ kahesé do tób n'aa noo bä. 12 Tii bä a moo poo taah me ta majyyw uuh me mahawug poo gasõõm doo hã, ma ejuu do tyng sasu me hanäng doo. Mad'aak doo mahahoog tũũ, ma ejuu do tyng hã. 13 Tii bä madó hõm booj yb syyj ta gó hanäng doo ta gajeej hã, ta hooh uuh baad hadoo doo, ta karap'iir, ta syyj ta karap'iir hã hadäk do na-ããj hẽ. Maju da hã ỹỹ bë ma ejuu do tyng jó. 14 Dawëë da mabajuu ta dab, ta byyh, ta j'aa tyd, bë baj'eenh do bahä̃nh. Ta tii booj yb kan'oo däk sa h'yyb tabanäw däk hyb n'aa P'op Hagä Do matym gó.
15 —Tii bä mado da b'éé ajyy hedoo do seeh. Ta nuu jó Arãw ta taah daheeh radatoonh sa mooh man'oo bä. 16 Tii bä manaboh jät. Mado da ta majyyw, maseew hã ỹỹ bë ma ejuu do tyng hã. 17 Mehõg hõm da b'éé. Tii bä mahetsyyd ta wog gó hanäng doo ta gajeej, ta styym, ta mooh na-ããj hẽ. Tii bä madatooj ta tii ta nuu pa, mehõg hõm do pa. 18 Tii bä maju sahõnh hẽ ta tyng jó. Hã ỹỹ, Jaweh hã ma kejuu do tii. Buu benyym do tii.
19 —Tii bä mamana b'éé ajyy hedoo do seeh. Ta nuu jó Arãw ta taah daheeh radatoonh sa mooh man'oo bä. 20 Manaboh jät tii bä. Mahawug ta majyyw uuh Arãw, Arãw taah sa hã hub hẽnh, sa nabuuj hã, sa ma poo oow hã, sa tsyym poo oow hã. Tii bä maseew hã ỹỹ bë ma ejuu do tyng hã. 21 Tii bä mado da ma ejuu do tyng jó hanäng do majyyw uuh. Mamekuuj ta syyj buu benyym do uuh mahang. Tii bä maseew Arãw hã, ta saroor hã na-ããj hẽ. Tii da ẽnh mabad'oo Arãw taah sa hã, sa saroor hã na-ããj hẽ. Ta tii d’ mamoo wät do hyb n'aa kä, tsyt hẽ kasëëw däk da wë ỹỹ Arãw, Arãw taah, sa saroor na-ããj hẽ.
22 —Tii bä mado hõm sahõnh hẽ ta syyj, ta syyj b'éé dõm hã hanäng doo, b'éé syyj ta gó hanäng doo ta gajeej hã, ta hooh uuh baad hadoo doo, ta karap'iir, ta syyj ta karap'iir hã hadäk doo na-ããj hẽ. Sa hã kan'oo däk wë ỹỹ ramoo bok hyb n'aa b'éé n'aa hahỹỹh. Ti hyb n'aa tsyt hẽ mado däk na-ããj hẽ ta kóm hub hẽnh hadäk doo. 23 Tii bä pãw makuj n'aa tamah doo me kesëëm doo, kawaju gó matym ỹỹ gó madasooh doo gó naa mado nyyh sét hẽ pãw ta syyj olibo häd näng do s'ëëb tamah doo, sét hẽ ta syyj olibo häd näng do s'ëëb me kesëëm doo, sét hẽ pãw gatsabag is doo ta syyj me mahep'ees doo. 24 Tii bä Arãw, Arãw taah rapatsëë man'oo bä pãw hadoo doo, b'éé kóm, ta syyj hedoo do na-ããj hẽ p'op ragadabëëh hyb n'aa, hã ỹỹ kan'oo däk rametëëh hyb n'aa ta tii hã. 25 Ti jawén madó hõm sa moo gó madasooh do paah majuu hyb n'aa ma ejuu do tyng jó, b'éé pooj jé mama ejuu do jó. Hã ỹỹ, Jaweh hã ma kejuu do tii. Buu benyym do tii. 26 Tii bä mado da b'éé karasid, Arãw hã kan'oo däk wë ỹỹ tamoo wät heed n'aa b'éé n'aa karasid da. P'op magadahëë hã ỹỹ kan'oo däk mametëëh hyb n'aa. Tii bä kä a tä däg da tii.
27 —Tsyt hẽ masëëw däk b'éé dab uuh p'op wë ỹỹ ragadabëëh do paah Arãw, Arãw taah hã kan'oo däk noo gó wë ỹỹ ramoo bok hyb n'aa. Tsyt hẽ masëëw däk ta karasid, ta kóm hub hẽnh hadäk doo. 28 Hỹ jawén, ti né hẽ hed'yyt hẽ Arãw, Arãw panaa sa tä. Ti né hẽ ta uuh Isaraéw buuj ranoo da hã ỹỹ, sa masããh seeh Isaraéw buuj ranaboh bä sa da hadoo doo rah'yyb en'yym do tä n'aa. Hã ỹỹ ranoo doo, Arãw, Arãw panaa sa tä däk.
29 —Arãw saroor tsyt hẽ kasëëw däk doo, ta taah hã, ta panaa hã katab'ëës da tadajëp jawén paa bä, ta jawén buuj dadäk hyb n'aa. Ta jawén buuj dadäk da Arãw saroor paah tadu doo noo gó tamoo wät doo, ta jawén buuj hã kahawug däk noo gó ta syyj buu benyym doo, wë ỹỹ tamoo wät do heen n'aa. 30 Bë hã ỹ kahesé do tób n'aa hẽnh Arãw t'aah ta jawén buuj kajaa bä, wë ỹỹ tamoo wät hyb n'aa, setsi da ta ä̃h noo gó tadadäk dó Arãw saroor paah.
31 —Mado da b'éé dab, wë ỹỹ ramoo bok manoo do hyb n'aa manaboh jät do dab. Tii bä mew'oop tsyt hẽ wë ỹỹ kasëëw däk doo bä. 32 Tii bä taw'ããts hẽ bë hã ỹ kahesé do tób n'aa noo bä Arãw, ta taah rabawëh ta dab, rabawa pãw hadoo doo kawaju gó hanäng doo. 33 Hã ỹỹ takan'oo däk ta ti b'éé dab, pãw na-ããj hẽ, nesaa doo sa h'yyb gó hanäng doo ỹ badó hõm hyb n'aa tsyt hẽ Arãw, ta taah wë ỹỹ kasëëw däk noo gó, wë ỹỹ ramoo bok sa hã kan'oo däk noo gó. Ti hyb n'aa taw'ããts hẽ rabawëh, rabawa tii. Dooh ta wób rawëë bä, rawa bä tii, tsyt hẽ wë ỹỹ kasëëw däk do hyb n'aa ta tii sa waa, sa tä. 34 Taw'ããts hẽ maju toonh sa tä, sa waa pãw mad'aag doo rawa rawëh do jawén paa bä. Jeti péh dooh ji awa bä, dooh ji awëë bä, wë ỹỹ kasëëw däk do paa hyb n'aa.
35 —Õm ỹ mejõ däk doo da né hẽ mamoo wät Arãw hã, ta taah hã sahõnh hẽ ỹ mejõ wät doo. Setsi ta ä̃h noo gó mamoo wäd ta tii, wë ỹỹ ramoo bok mabanoo hyb n'aa. 36 Taw'ããts hẽ sét ta ä̃h ken'yyh manaboh jät booj yb papuj nä doo, sa h'yyb tabenyyw däk hyb n'aa P'op Hagä Do matym gó. Manaboh na-ããj hẽ bë mas'ããh seeh, hã ỹỹ bë ma ejuu do tyng takenyyw däk hyb n'aa, nesaa doo kado hõm hyb n'aa. Tii bä mahahoog ta jó ta syyj buu benyym doo, tsyt hẽ wë ỹỹ takasëëw däk hyb n'aa. 37 Setsi ta ä̃h noo gó mamoo wäd ta tii da ma ejuu do tyng hã. Baad up wë ỹỹ takasëëw däk tii bä. Tsyt hẽ wë ỹỹ kasëëw däk da sahõnh hẽ ta hã moo däng doo, sahõnh hẽ ta jó kadasooh doo —näng mä Jaweh kyyh.
Sét ta ä̃h ken'yyh rama ejuu do ky n'aa hahỹỹh
38 Ti m' Jaweh ky hadoo ẽnh:
—Pawóp hẽ b'éé ajyy sét ta baab hado däk doo bë ma ejuu da ta ä̃h hed'yyt hẽ. 39 Bäp paah bë ma ejuu da ta seeh, papỹỹj badëë hyng bä ta seeh. 40-41 Bäp paah bë ma ejuu do sii, papỹỹj badëë hyng bä bë ma ejuu do sii na-ããj hẽ, bë ma ejuu da pawóp liit triig s'ëëb, sét liit ta syyj olibo häd näng do s'ëëb tamahang kamekuuj däk doo. Ta hã bë anoo sét liit uwa bëëh matsii däk doo, ji ahoog däk do pan'aa. Hã ỹỹ, Jaweh hã ma kejuu do tii. Buu benyym do tii.
42 —Bëëh, bë panaa na-ããj hẽ tii d’ had'yyt da bë ma ejuu ta ä̃h hã, matym ỹỹ me bë hã ỹ kahesé do tób n'aa noo bä. Ta tii bä bë hã da ỹ kasee, a sii da ỹ ber'oot. 43 Ta tii bä ỹ kasee da Isaraéw buuj sa hã. Tsyt hẽ wë ỹỹ kasëëw däg da ta tii bä bak ỹỹ tak'ëp gabarëëh do an'oo bä. 44 Tsyt hẽ ỹ asëëw hõm da bë hã ỹ kahesé do tób n'aa, ma ejuu do tyng na-ããj hẽ. Tsyt hẽ ỹ asëëw hõm da Arãw, ta taah daheeh, wë ỹỹ ramoo bok hyb n'aa, sa ky n'aa ród wë ỹỹ rabahadoo hyb n'aa na-ããj hẽ. 45 Tii bä da Isaraéw buuj mahang ỹ bawäd kän. Ỹ da sa hagã n'aa ta hã rah'yy kaha'eeh doo. 46 Tii bä da ỹỹh, Jaweh, P'op Hagä Doo Isaraéw buuj hag'ããs doo rabahapäh da. Ỹ né hẽ Isaraéw buuj Esito häj n'aa bä naa manyyh doo sa mahang ỹ bawät hyb n'aa. Ỹ né hẽ Jaweh, P'op Hagä Doo sa hagã n'aa —näng mä Jaweh kyyh.