Buu benyym doo rama ejuu do tyng ky n'aa hahỹỹh
30
Ti m' Jaweh ky hadoo ẽnh Moisés hã:—Mamoo wäd hã ỹỹ bë ma ejuu do tyng b'aah akasija häd näng do s'ëëb me, jewii yb buu benyym doo insiẽẽn häd näng doo bë ma ejuu hyb n'aa. 2 Hahỹỹ da da rabad'oo man'oo bä: 90cm tanu däk, 45cm ta madawëët doo, ti pénh ta gagod. Sét né ta pan'aa me bë moo bok insiẽẽn ma ejuu do tyng, ta poo gasõõm doo na-ããj hẽ ta sasu me hanäng doo. 3 Ta jó, ta pa, poo gasõõm doo hã na-ããj hẽ k'ããts tëg gabarëëh do kamanekuunh do s'ëëb bë an'oo bä. Tii bä, ta hã madadäg ta baa hetso n'aa k'ããts tëg gabarëëh doo s'ëëb me. 4 Bë moo boo gararem doo k'ããts tëg gabarëëh do s'ëëb. Tii bä ta baa hetso n'aa yd jé bë padadäg. Ta karawaa me pawóp hẽ, ta karawaa see me pawóp hẽ, ta tyng ji hatook do pan'aa tii gó ji das'ũũd jëng hyb n'aa. 5 Tii bä bë moo bok ta tyng b'aah akasija häd näng do s'ëëb. K'ããts tëg gabarëëh do s'ëëb ta hã bë an'oo bä. 6 Tii bä t'õp gadäk doo noo gatsë ji bajëng do pooj jé madahäng buu benyym doo ma ejuu do tyng n'aa. Ta baa besuu n'aa bahä̃nh ta hood ỹ ky n'aa enooh do bë hyb n'aa esee do hood n'aa bahäng. Ta tii jó ta ty gatsë basooh, a hã ỹ kasee doo bä.
7 —Bäp paah, ta bag Arãw tabenäm bä, tama ejuu da buu benyym doo insiẽẽn häd näng doo buu benyym do ma ejuu do tyng n'aa jó. 8 P'aa hẽnh da tama ejuu da buu benyym doo papỹỹj badëë hyng bä kä, ta bag tagatang bä. Tii da hed'yyt hẽ matym ỹỹ me rama ejuu da buu benyym doo, sa panaa na-ããj hẽ. 9 Bë ma eju manäh ta jó buu benyym do seeh, bë mas'ããh, triig hedoo do s'ëëb. Bë ahoog manäh ta jó hã ỹỹ bë anoo doo ji eëëk doo. Jããm hẽ bë ma ejuu buu benyym péh bë hã ỹ maher'oot doo. 10 Taw'ããts hẽ sét nuu me sét ta baab ken'yyh Arãw bado däk da majyyw uuh, poo gasõõm doo hã tabahawuug da, buu benyym doo ma ejuu do tyng tabenyyw däk hyb n'aa. Bë mas'ããh majyyw uuh nesaa doo bë h'yyb gó hanäng doo kado hõm hyb n'aa bë naboh jät doo ti tahawuug ta hã. Tii da bë bad'oo hed'yyt hẽ, bë panaa na-ããj hẽ. Baad wë ỹỹ, Jaweh wë, takasëëw däk buu benyym do ma ejuu do tyng —näng mä Jaweh kyyh.
Jaweh sa hã kahesé do tób n'aa dinheer n'aa ky n'aa hahỹỹh
11 Ti m' Jaweh ky hadoo Moisés hã. Hahỹỹ d’ mä ta kyyh:
12 —Isaraéw buuj ajyy metsén bä, taw'ããts hẽ sahõnh hẽ ajyy ranoo hã ỹỹ ta säm rabedëp hyb n'aa, nesaa doo sa hã tanadäng hyb n'aa metsén noo gó. 13 Sét ken'yyh ketsén doo anoo da ta jawyyg ta nu etyy n'aa sekel häd näng do bód k'ããts tëg hawak doo s'ëëba. Matym ỹỹ n'aa hã kan'oo däk do tii. (Ta nu etyy n'aa heh'äät doo bód né tii, bë hã ỹ kahesé do tób n'aa yt hã ji nu mehety doo). 14 Sahõnh hẽ ajyy 20 sa ãn n'aa, 20 sa ãn n'aa bahä̃nh hadoo doo ranoo da ta tii matym ỹ n'aa. 15 Ti pénh né hẽ sahõnh hẽ rabanoo hã ỹỹ rabedëp do säm, tak'ëp ma näng doo tado bä, ma tamah do na-ããj hẽ. 16 Magadoo ta tii k'ããts tëg hawak doo, rabedëp do säm, Isaraéw buuj ranoo doo. Bë hã ỹ kahesé do tób ma däg ta tii k'ããts tëg hawak doo. K'ããts tëg hawak do s'ëëb hã ỹỹ ranoo doo, repaag hõm rabedëp do säm rahyb n'aa esee tan'oo bä matym ỹỹ gó —näng mä Jaweh kyyh.
Naëng hood ky n'aa hahỹỹh
17 Ti m' Jaweh ky hadoo Moisés hã:
18 —K'ããts tëg hahiin do s'ëëb me mamoo wäd naëng hood sa moo sa tsyym rahets'yyt hyb n'aa. K'ããts tëg hahiin do s'ëëb me mamoo wäd na-ããj hẽ naëng hood tyng. Madasoh bë hã ỹ kahesé do tób n'aa, hã ỹỹ bë ma ejuu do tyng ganahaang bä. Naëng mageduuh ta gó. 19 Arãw, Arãw taah ramoo kahetsyyt da, sa tsyym rahetsyyt da ta ti naëng uuh me. 20-21 Taw'ããts hẽ sa moo sa tsyym rahets'yyt bë hã ỹ kahesé do tób n'aa gó rabajëë pëë do pooj jé, ranadajëp hyb n'aa. Ti hadoo ẽnh rabad'oo da hã ỹỹ rama ejuu do tyng wë rana bä, wë ỹỹ rama ejuu hyb n'aa. Taw'ããts hẽ Arãw, ta panaa na-ããj hẽ raky daheeh hed'yyt hẽ ta tii kamejũũ doo —näng mä Jaweh kyyh.
Ta syyj buu benyym doo ji hawuuk do pan'aa ky n'aa hahỹỹh
22 Ti m' Jaweh ky hadoo Moisés hã:
23 —Mado da hahỹỹ péh baad had'o up doo buu benyym doo: 6 kilo buu benyym doo mira häd näng doo, 3 kilo buu benyym doo kanela häd näng doo, 3 kilo jawii yb buu benyym doo, 24 6 kilo buu benyym doo kasia häd näng do daheeh. Ta nu etyy n'aa heh'äät doo me bë nu etyy da, bë hã ỹ kahesé do tób n'aa yt hã ji nu mehety doo me. Mado däk da na-ããj hẽ 4 liit ta syyj olibo häd näng do s'ëëb. 25 Mamekuuj däg da ta tii, tsyt hẽ masëëw däk, ji ah'ook doo, ji hawuuk do pan'aa. Mamekuuj buu benyym doo baad mekuunh doo hajaa doo da. Tsyt hẽ, wë ỹỹ takasëëw däk da. 26-28 Tii bä mahawug ta uuh bë hã ỹ kahesé do tób n'aa hã, ta hood bë hã ỹ ky n'aa enooh doo bë hyb n'aa esee do hood n'aa hã, pãw tyng n'aa hã, sahõnh hẽ ta tyng jó hatoonh doo ta nahëëh hã, ta bag tyng hã, ta bag tyng nahëëh hã, buu benyym doo ma ejuu do tyng n'aa hã, bë masããh bë ma ejuu do tyng n'aa hã, ta nahëëh hã, naëng hood hã, naëng hood tyng n'aa hã na-ããj hẽ. 29 Tsyt hẽ wë ỹỹ takasëëw däk sahõnh hẽ ta tii buu benyym doo me mahawuuk doo. Baad wë ỹỹ takasëëw däk tii bä. Tsyt hẽ wë ỹỹ kasëëw däk da sahõnh hẽ ta hã moo däng doo, sahõnh hẽ ta jó kadasooh doo.
30 —Buu benyym doo me mahawug Arãw hã, Arãw taah hã, tsyt hẽ wë ỹỹ rakasëëw däk hyb n'aa, wë ỹỹ ramoo bok hyb n'aa, sa ky n'aa ród wë ỹỹ rabahadoo hyb n'aa. 31 Hahỹỹ da da a kyyh kyh ỹỹ Isaraéw buuj sa hã: “Hahỹỹh buu benyym doo, tsyt hẽ wë ỹỹ takasëëw däk. Wë ỹỹ kasëëw däk doo ji hawuuk da ta me. Tii me bëëh, bë panaa na-ããj hẽ, bë hawug hed'yyt hẽ tsyt hẽ wë ỹỹ kasëëw däk doo. 32 Bë ahoog manäh ajyy wób hã. Jããm hẽ wë ỹỹ moo bok doo hã ji hawuuk da ta me. Bë mekuuj manäh ta tii péh bë h'ëëd buu benyym doo. Tsyt hẽ wë ỹỹ takasëëw däk tii. Taw'ããts hẽ baad bë asëëw tii tsyt hẽ wë ỹỹ. 33 Ti hadoo péh buu benyym doo moo wät doo, wë ỹỹ moo nawät doo hã hawuuk doo, bë ah'eed hõm, Isaraéw buuj mahãng tanawäd wät hyb n'aa, ta taah daheeh ragawatsig hõm hyb n'aa” —näng mä Jaweh kyyh.
Buu benyym doo rama ejuu doo pan'aa ky n'aa hahỹỹh
34 Ti m' Jaweh ky hadoo ẽnh Moisés hã:
—Sét pénh ken'yyh mado da buu benyym doo b'aah täg s'ëëb, buu benyym do seeh õnika häd näng doo, buu benyym do seeh b'aah täg s'ëëb gar-bãno häd näng doo, buu benyym do seeh b'aah täg s'ëëb baad hadoo doo insiẽẽn häd näng doo. 35 Mamekuuj ta tii buu benyym do pan'aa. Baad buu benyym doo hajaa moo wät doo mo haj'aa da. Madó hõm sahõnh hẽ hasus doo tamahang hanäng doo. Baad had'o up doo man'oo bä, tsyt hẽ wë ỹỹ kasëëw däk do hyb n'aa. 36 Baad metog buu benyym doo mamekuuj däk do uuh. Tii bä madasooh metog däk doo kä bë hã ỹ kahesé do tób n'aa yt hã, ta hood bë hã ỹ ky n'aa enooh doo bë hyb n'aa esee do hood n'aa pooj jé. Taw'ããts hẽ baad up tsyt hẽ wë ỹỹ bë asëëw ta tii buu benyym doo. 37 Bë mekuuj manäh ta ti hedoo péh buu benyym doo bë h'ëëd. Taw'ããts hẽ tak'ëp bë asëëw tsyt hẽ wë ỹỹ. 38 Ta ti hadoo péh moo wät doo, buu benyym do tagen'aak do hyb n'aa, bë ah'eed hõm, bë mahãng tanawäd wät hyb n'aa, ta taah daheeh ragawatsig hõm hyb n'aa—näng mä Jaweh kyyh.