P'op Hagä Doo asëëw hõm doo sa pariir n'aa, sahõnh hẽ tamejũũ doo ramoo bok hyb n'aa panyyg n'aa hahỹỹh
31
Ti m' Jaweh ky hadoo Moisés hã:2 —Mahegãã —näng mäh —Ỹ asëëw hõm aj'yy Besarew häd näng doo, Uri häd näng do t'aah, Hur ta t'aah, Judah panaa seeh. 3 Baad up ỹ banoo däk ta hã Sahé ỹỹ. Ỹ an'oo däk ta hã a pariir n'aa da. Ỹ h'yy gonä däk hajõng ji moo wät do hã. 4 Ta tii da ỹ wén d'oo, baad tabahajaa tamoo wät hyb n'aa k'ããts tëg gabarëëh do s'ëëb me, k'ããts tëg hawak do s'ëëb me, k'ããts tëg hahiin do s'ëëb me. 5 Baad tabahajaa hyb n'aa tamoo wät pä gabarëëh doo me, b'aah s'ëëb me, hajõng hedoo do ji moo wät doo tamoo wät hyb n'aa. 6 ỹ asëëw däk aj'yy Ohorijab häd näng doo, Ahisamak t'aah, Dãn panaa seeh, Besarew tamasa hyb n'aa. Ỹ an'oo däk a pariir n'aa da, ta wób moo bok do sa hã, sahõnh hẽ ỹ mejõ däk doo ratema hyb n'aa: 7 bë hã ỹ kahesé do tób n'aa, ta hood bë hã ỹ ky n'aa enooh doo bë hyb n'aa esee do hood n'aa, ta ty gatsë, sahõnh hẽ tób yt hã hanäng doo na-ããj hẽ: 8 pãw tyng, ta nahëëh ta jó hasooh doo sii hẽ, ta bag tyng k'ããts tëg gabarëëh doo baad hadoo doo s'ëëb, ta nahëëh sii hẽ, buu benyym doo bë ma ejuu do tyng, 9 bë masããh hã ỹỹ bë ma ejuu do tyng, sahõnh hẽ ta nahëëh sii hẽ, naëng hood rabehop do pan'aa, ta tyng sii hẽ, 10 sa saroor kepëk doo; Arãw, wë ỹ moo wät do saroor, tsyt hẽ kasëëw däk doo; Arãw taah wë ỹỹ ramoo bok noo gó saroor n'aa; 11 ta syyj buu benyym doo ji hawuuk, ji ahook hyb n'aa; buu benyym doo insiẽẽn häd näng doo, tób wë ỹỹ kasëëw däk doo buu benäw n'aa na-ããj hẽ. Ỹ mejõ däk doo da né hẽ da ramoo bok da sahõnh hẽ ta tii —näng mä Jaweh kyyh Moisés hã.
Saab ky n'aa hahỹỹh
12 Ti m' Jaweh ky hadoo Moisés hã:
13 —Hahỹỹ da da mamaher'ood Isaraéw buuj: “Bë tab'ëës da Saab, wë ỹỹ ỹ asëëw däk doo. Bë hã ỹ ky n'aa enooh do heen n'aa, kyh ỹỹ bë gadoo do heen n'aa hed'yyt hẽ ta tii Saab, ỹ né hẽ Jawheh tsyt hẽ wë ỹỹ bë ỹ asëëw hõm doo, bë bahapäh hyb n'aa. 14 Ti hyb n'aa bë tabëëj hed'yyt hẽ Saab. Tsyt hẽ wë ỹỹ bë asëëw, bë weh'ëëh. Ji daj'ëëp da jé Saab natab'ëës doo, waneh'ëëh doo. Jé Saab noo gó moo wät doo, gawatsig hõm da Isaraéw buuj mahang ji an'oo bä. 15 Mamoo wät do pan'aa kä ta ä̃h, ji ma poo oow see péh. Setsi tahadoo do ta ä̃h, Saab, ji kameh'ããk do pan'aa tii. Tsyt hẽ, wë ỹỹ takasëëw däk. Ji daj'ëëp da Saab noo gó moo wät doo. 16 Taw'ããts hẽ Isaraéw buuj, sa panaa na-ããj hẽ, ratab'ëës hed'yyt hẽ. 17 Isaraéw buuj hã ỹ ky n'aa enooh doo heen n'aa, kyh ỹỹ ragadoo doo heen n'aa hed'yyt hẽ ta tii Saab. Ji ma poo oow see pé ta ä̃h noo gó, wë, badäk hahỹỹh, ỹỹh, Jaweh pahuuj wät paah. Setsi kä m' ta ä̃h kä, ỹ kamehããg kän ỹ pahuunh do hyb n'aa”, noo da kyh ỹỹ sa hã —näng mä Jaweh kyyh Moisés hã.
18 Jaweh bahajaa bä kä Moisés hã tamaher'oot doo waëë Sĩnaih häd näng doo jó, tabanoo däg kän ta hã pawóp hadoo do pä gatsabak doo, ta hã ta ky n'aa jaw'yyk doo P'op Hagä Doo erii wät doo.