Sa kabarii n'aa Isaraéw buuj ramoo bok do panyyg n'aa hahỹỹh
32
Ti m' Moisés Isaraéw buuj rabahapäh bä ti tyw n'aa badoo hõm waëë jó, rakata däk Arãw wë, ti m' raky hadoo ta hã:—Ti bä hãã —näk mäh —mamoo wäd ër h'yy kaha'eeh do pan'aa, ër pooj tabawät hyb n'aa. Dooh ji hapëë bä h'ëëd hado ta ti aj'yy Moisés hã, Esito häj n'aa bä naa ër tamanyyh doo —näk mä sa kyyh.
2 Ti m' Arãw ky hadoo sa hã:
—Bë adó hõm bë ä̃j, bë taah, bë toog sa nabuuj gawow k'ããts tëg gabarëëh do s'ëëb, bë manaa wë ỹỹ —näng mäh.
3 Ti m' sahõnh hẽ Isaraéw buuj rado hõm sa nabuuj gawow, Arãw wë m' ramanaa. 4 Ti m' Arãw gadoo ramanaa doo, ti m' tadẽẽ jät mäh, ta nahëë me tamoo wäd kän kabarii booj yb heen n'aa. Ti m' hajõk doo raky hadoo:
—Isaraéw buuj, hahỹ né hẽ ër hagã n'aa, ër h'yy kaha'eeh do pan'aa, Esito häj n'aa bä naa ër manyyh doo —näk mä sa kyyh kabarii ky n'aa hã.
5 Ti m', tak'ëp ratsebé Arãw bahapäh bä, tatamaa sooh rama ejuu do tyng kabarii pooj jé. Ti m' taky hadoo:
—Jati da ër ajäm, Jaweh ër weh'ëëh hyb n'aa —näng mäh.
6 Ti m' jat'ip hadoo bäp paah m' rama ejuu mäh. Sa masããh wób ranaboh jät na-ããj hẽ, sa da hadoo doo rah'yyb enyym do tä n'aa. Ti m' ehyy t'oonh mä rabawa, rabeëëk hyb n'aa. Tii bä m' rabajäm, ramas'uunha.
7 Ti m' Jaweh ky hadoo Moisés hã:
—Ahyy waëë jó naa. Baad nado wät a karapee hã, Esito häj n'aa bä naa mamanyyh do hã. 8 Nayyw hẽ raberéd hõm sa hã ỹ mejũũ doo. Ramoo boo däk sa kabarii booj yb heen n'aa. Ta pooj jé rabehyy bëëh. Ta hã rama eju däk sa masããh wób. Hahỹỹ da sa kyyh kabarii ky n'aa hã: “Isaraéw buuj, hahỹ né hẽ ër hagã n'aa, ër h'yy kaha'eeh do pan'aa, Esito häj n'aa bä naa ër manyyh doo”, näk mä sa kyyh —näng mä Jaweh Moisés hã.
9 Ti m' Jaweh ky hadoo ẽnh:
—Ỹ hapäh né hẽ hahỹỹh Isaraéw buuj —näng mäh. —Nabuj keh'ũũm né hẽ —näng mäh. 10 —Hỹỹ kä, ỹ mahewad manäh kawajãn ỹỹ gó ỹ gawats'iik hyb n'aa Isaraéw buuj. Tii bä kä, a hã naa da hajõk doo ganyyh a panaa ỹ an'oo bä sa jawén buuj rabahadoo hyb n'aa —näng mä Jaweh kyyh Moisés hã.
11 Ti m' tak'ëp Moisés ky n'aa etsẽẽ kän Jaweh, tah'yy kaha'eeh doo, takawanajããn hyb n'aa. Hahỹỹ d’ mä ta kyyh:
—Jaweh —näng mäh —h'ëëd hyb n'aa tak'ëp makawajããn a karapee wë, tak'ëp a hejój me, a mo haj'aa doo me, Esito häj n'aa bä naa mamanyyh doo? 12 A karapee magawatsiig bä, hahỹỹ da da Esito buuj raky hadoo da a ky n'aa hã: “Baad nadoo doo tamoo wät sa hã tahyb n'aa newë däk, Esito häj n'aa hẽnh naa tawén manyyh. Waëë hẽnh tadej'ëëp tahyb n'aa newë däk. Tagawats'iik Isaraéw buuj badäk hahỹỹ bä, tahyb n'aa newë däk”, näk da sa kyyh. Ti hyb n'aa, mah'yy kawareem makawanaj'ããn wät hyb n'aa. Magawatsiig manäh a karapee —näng mäh. 13 —Mahyb n'aa esee a karom Abraãm, Isaki, Jakóh. Mahyb n'aa esee a häd gó maky n'aa enoo do sa hã. “Tak'ëp da rakanekan bë panaa. Ỹ anoo da bë panaa sakõõ hawób. Ỹ anoo da bë panaa hã sahõnh hẽ hahỹỹh hëëj, bë hã ỹ ky n'aa enooh doo sa häj n'aa pan'aa tabahadoo hyb n'aa hed'yyt hẽ”, näng paa a kyyh maky n'aa enooh doo —näng mä Moisés Jaweh hã.
14 Ti m' Jaweh t'yyd kamehĩĩn kän tahyb n'aa newëë doo hã. Dooh tagawatsiig wäd bä ta karapee taky däng do paa da.
15-16 Ti m' Moisés katahã wät Jaweh hã. Ti m' tabahyy kän waëë jó naa. Ta moo gó tapatsä hyng pawóp hadoo do pä gatsabak doo P'op Hagä Doo mo haj'aa. Ta hã, ta nu masee me na-ããj hẽ P'op Hagä Doo erii wät ta ky n'aa jaw'yyk doo.
17 Ti m' dawëë naa Josuéh, Moisés hata, maa napäh bä Isaraéw buuj rabaräp doo, taky hadoo Moisés hã:
—Rakaneb'ooh do ky n'aa ỹ maa napäh rabaj'eenh bä —näng mäh.
18 Ti m' Moisés ky gadoo:
—J'aa ketsë do ky n'aa nado tii. J'aa kanetsë do ky n'aa nado na-ããj hẽ. Rejäm doo tii ỹ maa napäh —näng mäh.
19 Ti m' Moisés kajaa bä kä Isaraéw buuj rabaj'eenh doo bä, sa kabarii booj yb, rabasãm do na-ããj hẽ tabahapäh bä, tak'ëp mä takawaj'ããn wät. Tak'ëp tadawäts bëëh mä tũũ pä gatsabak doo. Ganebä bong tan'oo bä waëë w'oo hãb. 20 Ti m' tabado däk kabarii booj yb heen n'aa ramoo bok do paah, ti m' tabaju sooh. Ti m' tetog däk hadẽẽ jät doo, ta ooj tabahado däk hyb n'aa. Ti m' tapararaah naëng pong jé, ti m' tamejũũ ta tii Isaraéw buuj rabeëëk hyb n'aa.
21 Ti m' Moisés ky hadoo Arãw hã:
—H'ëëd rad'oo péh a hã, mah'yyb mahũũm hyb n'aa tak'ëp nesaa doo ramoo bok hyb n'aa? —näng mäh.
22 Ti m' Arãw ky hadoo:
—Kawaj'ããn manäh, wahëh ỹ n'aa —näng mäh. —Mahapäh né hẽ nyy da nayyw hẽ nesaa doo hã hahỹỹ buuj rahyyb padëëk —näng mäh. 23 —Hahỹỹ d’ paa sa kyyh hã ỹỹ: “Mamoo wäd ër h'yy kaha'eeh do pan'aa, ër pooj tabawät hyb n'aa. Dooh ji hapëë bä hëëd hado ta ti aj'yy Moisés hã, Esito häj n'aa bä naa ër tamanyyh doo”, näk sa kyyh hã ỹỹ. 24 Ti ỹ ky hadoo sa hã: “Taw'ããts hẽ jé k'ããts tëg gabarëëh do s'ëëb näng doo rado hõm”, näng ỹỹh. Ti m' ramanaa wë ỹỹ k'ããts tëg gabarëëh do s'ëëb. Ti m' tëëg hõõ gó ỹ dawäts hõm, ti m' ganyyh hahỹỹh booj yb heen n'aa —näng mä Arãw kyyh Moisés hã.
25 Arãw maneduuk do hyb n'aa, kamanejũũ doo, rah'yyb karẽn doo da baad nadoo doo Isaraéw buuj ramoo boo däk Moisés bahapäh. Tahapëë kän mä sa hã wawaw n'aa nyy däk doo sa majĩĩ sa ky n'aa hã. 26 Ti hyb n'aa tabag'ëë däk rabaj'eenh do tyw n'aa noo bä, ti m' taky hadoo:
—Bë kata wë ỹỹ sahõnh hẽ Jaweh hã h'yyb kanerét doo —näng mäh.
—Hahỹỹ da Jaweh, P'op Hagä Doo Isaraéw buuj rah'yy kaha'eeh do kyyh: “Bë ado däk bë sen-dieer ta hood gó hagëë doo, bë dadäg bë s'ỹỹ hẽnh. Tii bä bë ahõm bë baj'eenh do haw'ããts hẽ, bë wakããn, bë najiis, bë pa haj'eenh doo bë neboh jëë ajyy”, näng mä Jaweh —näng mä Moisés kyyh.
28 Ti m' Moisés mejũũ doo da né hẽ Lewi panaa rabad'oo. 3 miw tahyb n'aa péh dejëp ti noo gó. 29 Ti m' Moisés ky hadoo Lewi panaa sa hã:
—Jaweh wë bë moo bok hyb n'aa bë kasëëw däk naga hẽ. Baad bë ky dahé wät tamejũũ doo. Bë taah, bë wakããn sii hẽ dooh bë t'yyd mehĩĩn bä. Bë bad'oo sa hã Jaweh mejũũ doo da né hẽ. Naga hẽ bë Jaweh ky n'aa edëë wät —näng mäh.
30 Ti m' jeti péh Isaraéw buuj hã Moisés ky hadoo:
—Tak'ëp baad nadoo doo bë moo boo däk né paawä ỹ asëëk da waëë hã Jaweh wë. Nepä ỹ haja bä ỹ maher'ood bä, Jaweh hyb n'aa mabaan hõm bä bë hã nesaa bë moo boo däk doo —näng mäh.
31 Ti hyb n'aa m' Moisés matëh sëëk Jaweh wë, ti m' taky hadoo:
—Ỹ karẽn paawä mamaa newë ỹ ky n'aa etsẽẽ doo —näng mäh —Tak'ëp baad nado do né hẽ Isaraéw buuj ramoo boo däk. Ramoo boo däk kabarii k'ããts tëg gabarëëh do s'ëëb ta hã rah'yy kaha'eeh hyb n'aa. 32 Mahyb n'aa mabaan ỹ karẽn paawä nesaa doo ramoo bok doo. Mahyb n'aa manabaan bä, mawug hõm tii bä hät ỹỹ a karapee sa häd a h'ëëd merih doo hã naa —näng mäh.
33 Ti m' Jaweh ky hadoo Moisés hã:
—Wë ỹỹ nesaa doo moo bok doo sa häd né tii ỹ awug hõm da kerih do ma ỹỹ hã naa —näng mäh. 34 Ahyyh —näng mäh. —Mamahũũm Isaraéw buuj õm ỹ maher'ood wät doo hẽnh. Tii d’ hado né paawä, sa hã ỹ rejãã noo gó kajaa bä kä, ỹ rejãã né da sa hã nesaa doo ramoo bok do säm —näng mäh Jaweh kyyh.
35 Ti m' Jaweh mejũũ sa nahëëh sa mahang, kabarii booj yb heen n'aa Arãw moo wät doo hã raj'aa etsëë däk do paa hyb n'aa.