33
Ti m' Jaweh ky hadoo Moisés hã:—Bë beréd däg hahỹỹ panang, õm, a karapee Esito häj n'aa bä naa mamanyyh doo sii hẽ. Bë ahõm häj n'aa hẽnh Abraãm, Isaki, Jakóh hät ỹỹ gó sa hã sa panaa hã ỹ ky n'aa enooh doo hẽnh. 2 ããs ỹ mejũũ da a pooj jé. Kanaãh buuj, Amor buuj, Hiit buuj, Peris buuj, Hiw buuj, Jebus buuj ỹ ah'eed n'yyh da häj n'aa bä naa, 3 sahõnh hẽ ji karẽn doo tabanäng bä naa. Ããs ỹ mejõ bä né paawä bë pooj jé, ỹ dooh bë sii ỹ ahõm bä. Bë sii ỹ ahõm bä paawä, bë ỹ gawats'iik da ta baa bä bë nabuuj kah'ũũm do hyb n'aa —näng mä Jaweh kyyh Moisés hã.
4 Ti m' tak'ëp mä Isaraéw buuj rah'yy ketón ta tii raky n'aa napäh bä. Dooh m' rapadedäg booh wäd bä sa hatso n'aa. 5 Ta tii da rawén d'oo, hahỹỹ da Moisés hã Jaweh her'ood wät do paah hyb n'aa:
—Hahỹỹ da da mamaher'ood Isaraéw buuj kyh ỹỹ: “Bë nabuuj keh'ũũm! Banadawëët né paawä bë mahang ỹ awäd bä, nayyw hẽ paawä bë ỹ gawats'iik. Bë adó hõm bë hã padëëk doo bë hatso n'aa hedoo doo, tii bä da ỹ hyb n'aa newëë nä da nyy d’ ỹ bad'oo bë hã”, noo da sa hã kyh ỹỹ —näng mä Jaweh kyyh.
6 Ti hyb n'aa kä, waëë Sĩnaih häd näng doo bä, Isaraéw buuj radó hõm sa hatso n'aa hedoo doo sa hã rapadedëëk do paah.
Tób seeh Jaweh sii ramamuun do hyb n'aa ky n'aa hahỹỹh
7 Ti m' tabehed'oo doo da, Moisés badoo däk tób hadoo ji asëët doo. Ti m' dawëë, rabaj'eenh do bahä̃nh tadahäng. Ta ti tób ta häd n'oo däk “Jaweh ji mamuun do tób n'aa”. Jé karẽn péh Jaweh hã heaanh doo, ahõm ta ti tób hẽnh, rabaj'eenh do bahä̃nh hasooh doo. 8 Ta ti tób hẽnh Moisés beheh'ũũm bä, p'op mä Isaraéw buuj rababë padëëk sa tób noo bä. Raheg'ããs mä Moisés hã tób gó tabajëë suun bä kä. Tii d’ hed'yyt hẽ rabed'oo ta ti tób hẽnh Moisés bahõm bä kä. 9 Tób gó Moisés bajëë suun bä kä, wë puh p'op nu däk doo ehyng, ta tób noo bä tabaym, Moisés sii Jaweh er'ood nuu jé. 10 Tób noo bä wë puh hadoo doo bahäng bä kä Isaraéw buuj rabahapäh bä, sa tób noo bä rabehyy bëëh tũũ sa taron nuu paa me Jaweh raj'aa etsë hyb n'aa. Tii d’ hed'yyt hẽ rabed'oo. 11 Baad up mä Jaweh ber'oot Moisés sii, ji najiis sii ji ber'oot doo da. Ta sii taher'oot do jawén paa bä kä Moisés hej'ëëh rabaj'eenh hẽnh. Ta hataa, pahëëw Josuéh häd näng doo, aj'yy Nun häd näng do t'aah ta tii tób yt hã tabayyw hed'yyt hẽ.
Tak'ëp hatsooh doo ta bag gabarëëh doo Moisés hapäh da P'op Hagä Doo ky n'aa enooh do ky n'aa hahỹỹh
12 Ti m' Moisés ky hadoo Jaweh hã:
—Mahegãã —näng mäh. —“Mah'yyb mahũũm hahỹỹh Isaraéw buuj”, näng a kyyh hã ỹỹ. Tii d’ né paawä a kyyh, dooh ỹ mamaher'ood bä jaa si ỹỹ mamejũũ doo ỹ tahada hyb n'aa. “Baad õm ỹ bahapäh. Õm ỹ hyb n'aa gadoo, a hã ỹ wén h'yyb däng”, näng na-ããj hẽ a kyyh hã ỹỹ. 13 Ti hyb n'aa, tii d’ tado bä, ỹ mametäh mah'yyb däng doo mamoo wät do pan'aa Isaraéw buuj sa hã, baad õm ỹ bahapäh hyb n'aa, hã ỹỹ mahyb n'aa gadoo hed'yyt hẽ hyb n'aa. Mahyb n'aa esee, a karapee né hẽ hahỹỹh Isaraéw buuj —näng mä Moisés kyyh Jaweh hã.
14 Ti m' Jaweh ky gadoo:
—Ỹ né hẽ da tii, õm hada doo —näng mäh. —Mahyb n'aa tón manä kä ta ti hadoo doo —näng mäh.
15 Ti m' Moisés ky hadoo:
—ãã mamejõ hõm manäh babä naa ãã tsyym kasok hyb n'aa, ãã sii manahõm bä —näng mäh. 16 ãã sii manahõm bä, nyy da ji bahapäh, sa hã, hã ỹỹ mahyb n'aa gadoo? Jããm hẽ ãã sii mahõm bä ta seeh hadoo ãã sahõnh hẽ badäk hahỹỹ hã habong doo mahang ji bahapäh da —näng mä Moisés Jaweh hã.
17 Ti m' Jaweh ky hadoo:
—Baad õm ỹ bahapäh, õm ỹ hyb n'aa gadoo do hyb n'aa, metsẽẽ doo d’ né da ỹ bad'oo da —näng mä Jaweh.
18 Ti m' Moisés betsẽẽ:
—Ỹ karẽn paawä mametäh hã ỹỹ a bag tak'ëp gabarëëh doo —näng mäh.
19 Ti m' Jaweh ky hadoo:
—Sahõnh hẽ baad hadoo doo hã ỹỹ hanäng doo a pooj jé da tatabës ỹ an'oo bä da. Hät ỹỹ, Jaweh, ỹ esok da a matym gó. Ỹ ky enyym da jé ỹ h'yyb däng do wë. Ỹ t'yyd mehĩĩn da jé ỹ h'yyb däng do hã. 20 Ta tii a pooj jé tatabës ỹ an'oo bä né paawä, dooh ỹ an'oo bä mamets ỹỹ mahapëë bä, hã ỹỹ hapäh doo, dajëp do hyb n'aa —näng mä Jaweh kyyh.
21 Ti m' ahõm nä Jaweh kyyh Moisés hã:
—Ti anäng, pa ỹỹ mabaym do hood. Ta tii bä mabagëët da pä yb jó. 22 Bak ỹỹ tak'ëp gabarëëh doo mabagëët bä tatabëëj bä, pä gabahó doo bä mabagëët ỹ an'oo bä. Õm ỹ jasuu da móh ỹỹ me ỹ tabëëj bä kä. 23 ỹ tabëëj hõm jawén paa bä, ỹ ado hõm da móh ỹỹ. Tii bä jó ỹỹ mabahapäh. Mamets ỹỹ hã, dooh ỹ an'oo bä ji hapëë bä —näng mä Jaweh kyyh Moisés hã.