Pä gatsabak do papuuj Moisés moo wät do ky n'aa hahỹỹh
34
Ti m' Jaweh ky hadoo Moisés hã:—Mamoo wäd pawóp hẽ pä gatsabak doo pooj jé a hã ỹ anoo doo hadoo doo. Ta hã ỹ erih da pooj jé maganebäh bong doo hã kerii däk do paah. 2 Kenyyw a hã hẽ, jat'iip bäp paah waëë Sĩnaih häd näng doo hẽnh mabasëëk hyb n'aa. Waëë nu gad'oo hẽnh magadaa g'ëëd däg da matym ỹỹ me. 3 A maab hẽ mabana. Dooh da a sii hasëëg péh man'oo bä. Dooh waëë hã rabok bä ỹ an'oo bä. Bë masããh sii hẽ man'oo manäh waëë w'oo hã jawii rabawa —näng mä Jaweh.
4 Ti m' Moisés moo wäd kän pawóp hẽ pä gatsabak doo pooj tagadoo doo hadoo. Ti m' jat'ip hadoo bäp paah kä tabasëëk waëë Sĩnaih häd näng doo hã, Jaweh mejũũ do hadoo da. Ta moo gó tapatsä sëëk pä gatsabak doo. 5 Ti m' wë puh gó Jaweh bahyng, Moisés pa tabag'ëëd däk, ti m' ta häd “Jaweh” Jaweh esok. 6 Ti m' Moisés pooj jé tatabës. Tatabës bä taky hadoo:
—Ỹ né hẽ Jaweh, ỹ né hẽ Jaweh! P'op Hagä Doo, ky enyym doo, sa hã t'yyd mehĩĩn do ỹỹh. Nayyw hẽ kawajããn do nado ỹỹh. Tak'ëp ỹ kamahä̃n hed'yyt hẽ sa hã. Dooh ỹ h'yy kehỹỹd bä sa hã. Dooh ỹ ky kehỹỹd bä. Ỹ moo wät hed'yyt hẽ sa hã ỹ ky däng doo. 7 Sa panaa wë, miw hadoo do wë, sa jawén hana doo, dooh ỹ h'yy kah'ỹỹd bä. Ỹ da kamahä̃n had'yyt hẽ. Ỹ hyb n'aa mabaan nesaa doo ramoo bong doo, ỹ mejũũ do wë h'yy kawareem doo, ỹ mejũũ doo hã res'õõs doo. Ti hadoo né hẽ, ỹ rejãã né da nesaa do moo wät doo. Nesaa doo moo wät do taah, ta ta taah, sa ta ta taah taah ỹ rejãã da, nesaa doo sa wahëh makũũh ramoo boo bok do hyb n'aa —näng mä Jaweh.
—Tak'ëp Hyb N'aa Jawyk Doo —näng mäh —Ỹ mahyb n'aa gado bä, tii bä ãã sii mabahõm. Nabuuj keh'ũũm né hẽ hahỹỹh Isaraéw buuj. Ti hadoo né hẽ, mahyb n'aa mabaan nesaa doo ãã moo bok doo, mamejũũ doo hã ãã esõõts hõm doo na-ããj hẽ. Ãã magadoo a karapee ãã bahadoo hyb n'aa —näng mä Moisés taky n'aa etsẽẽ bä.
10 Ti m' Jaweh ky hadoo:
—Mahyb n'aa matakä —näng mäh. —Ër er'oot hỹỹ kä a daheeh. Kyh ỹỹ magadoo da. Maky gedak doo ỹ gadoo da. Tak'ëp meuj n'aa näng doo ỹ moo wät da sahõnh hẽ a karapee sa matym gó. Meuj n'aa näng doo, dooh noo gó badäk hahỹỹ hã habong doo sa mahang kapahuuj wät doo, ỹ pahuunh da. Sahõnh hẽ sa mahang mabawät doo rahapäh da tak'ëp hadoo doo a hyb n'aaa ỹỹh Jaweh, ỹ moo wät doo. 11 Maky daheeh da naga hẽ a hã ỹ mejũũ doo. Tii bä ỹ ah'eed n'yyh da bë pooj jé Amor buuj, Kanaãh buuj, Hiit buuj, Peris buuj, Hiw buuj, Jebus buuj. 12 Maky n'aa gedag manäh da baad ta tii bä häj n'aa bä habong do sa sii bë kaner'oot doo heen n'aa hã. Bë anoo bä bë mahang raboo bä, bë da karejã däk hadoo ran'oo bä. Bë da gawatsik tii bä. 13 Bë gawatsig jëh ta ti buuj rah'yy kaha'eeh doo hã rama ejuu do tyng. Bë kanebä boo pä yb rah'yy kaha'eeh doo hyb n'aa p'op radahäng doo. Bë agëëw hyyh b'aah rah'yy kaha'eeh do seeh Asera häd näng doo hyb n'aa p'op retu häng doo. 14 Bë ahyy hëë manäh bë tarón nu paa me rah'yy kaha'eeh do seeh pooj jé. Bë wehëë manäh. Bë wehëë manäh ỹ wén näng, ỹỹh, Jaweh, P'op Hagä Doo a hagã n'aa, dooh ỹ an'oo bä ỹ nahado doo raweh'ëë bä, sa bahä̃nh do hyb n'aa ỹỹh.
15 —Bë sii rer'ood bä rababong hyb n'aa bë mahang, bë ky n'aa gedag manäh da sa hã. Bë anoo bä bë mahang raboo bä, rah'yy kaha'eeh doo raweh'ëëh bä, sa hã rama ejuu bä, bë da rats'yyt sa sii bë bawëh hyb n'aa. Tii bä da bë awëh da rah'yy kaha'eeh doo raweh'ëëh do hyb n'aa ranabooh do dab. Nesaa tii matym ỹỹ gó. Ỹ da reréd tii bä aj'yy seeh hyb n'aa ỹỹnh ta patug reréd hõm doo da. 16 Bë an'oo bä bë mahang raboo bä, bë taah ragatëë da sa toog. Tii bä rah'yy kaha'eeh doo hã sa toog raweh'ëëh bä da, rah'yyb mahũũm da bë taah ỹ raberéd hõm hyb n'aa, sa h'yyb hata rabahadoo hyb n'aa.
17 —Bë moo boo manä bë kabarii.
18 —Taw'ããts hẽ bë tab'ëës Pãw Makuj N'aa Tamah Doo heen n'aa. Setsi ta ä̃h noo gó bë awa pãw makuj n'aa tamah doo, bë ỹ mejũũ do paa da. Taw'ããts hẽ bë tab'ëës, kamarab ỹ ky däng doo hã da. Kamarab Abib häd näng do yt hẽ né hẽ, ti noo gó né hẽ bë banyyh do hyb n'aa Esito häj n'aa hẽnh naa.
19 —Ma ỹỹ sahõnh hẽ bë taah wah'ëëh hedoo doo, sahõnh hẽ bë masããh taah ajyy pooj jé henäng doo na-ããj hẽ. 20 Taw'ããts hẽ jumeto t'aah pooj jé henäng doo bë wareem däk, b'éé t'aah da ta jawén buuj. Bë kanarẽn bä bë wareem bä, taw'ããts hẽ bë nu tsaduus hõm. Taw'ããts hẽ sahõnh hẽ bë taah ajyy wah'ëëh hedoo doo mabaj hado däk b'éé t'aah.
—Dooh bag hẽnh hana péh wë ỹỹ. Taw'ããts hẽ bë manaa bë anoo péh.
21 —Bë moo b'ook do pan'aa kä ta ä̃h, ji ma poo oow seeh péh. Setsi tahadoo do ta ä̃h, bë kameh'ããk da. Bë ejoom do hood bë mekuunh doo hã bë ty kanewaat né paawä, bë joom ag bë bataa doo hã bë ty kanewaat né paawä, ji meheet péh me ta ä̃h bë kameh'ããk da.
22 —Taw'ããts hẽ bë tab'ëës trig ag bë ataa doo heen n'aa. Ti noo gó bë anoo tsyt hẽ hã ỹỹ, pooj jé bë gakãã doo trig ag. Tii bä, sahõnh hẽ bë joom hedoo doo bë ataa doo bahëëj jëng bä, bë tab'ëës ta heen n'aa. 23 Tamawoob nuu me né da ỹ karẽn sahõnh hẽ ajyy rakataa wë ỹỹ, Jaweh, Tak'ëp Hyb N'aa Jawyk Do wë. Sét ta baab ken'yyh da tii. 24 ỹ ah'eed n'yyh da bë pooj jé bë hã ỹ ky n'aa enooh do häj n'aa bä haj'eenh doo. Baéh bë häj n'aa ỹ an'oo bä da. Tii bä da dooh rah'yyb däg bä bë häj n'aa hã, radó hõm hyb n'aa, wë ỹỹ tamawoob nuu me bë kataa bä bë ỹ mejũũ doo bë tabëëj hõm nuuj jé.
25 —Bë masããh seeh bë nabóh bä ỹ bë weh'ëëh hyb n'aa, ta majyyw wë ỹỹ bë manaa bä, bë manaa manäh ta sii paw makuj n'aa näng do mahang wät doo. Bë an'oo manäh Paskowa bë tab'ëës do tä n'aa uuh madaak hyb n'aa jati péh tä n'aa. Taw'ããts hẽ bë ajuu madaak doo.
26 —Jããm pooj jé bë joom ag, baad hadoo doo, kasëëw däk doo, bë manaa tóp ỹỹ hẽnh, Jaweh, P'op Hagä Doo bë hagã n'aa tób hẽnh.
—Bë ewoob manäh kabara t'aah dab ta ỹỹn bii gamyyj me —näng mä Jaweh kyyh Moisés hã.
27 Ti m' Jaweh ky hadoo ẽnh Moisés hã:
—Merii däg ta tii kyh ỹỹ. Ta ti né tii kyh ỹỹ a hã, Isaraéw buuj hã na-ããj hẽ ỹ anoo doo. Ta ti kyh ỹỹ bë gado bä, bë ỹ gadoo karapee ỹỹ bë bahadoo hyb n'aa —näng mäh.
28 Ti m' 40 m' adëë bä, 40 m' atsëm Moisés baym Jaweh pa. Dooh m' tawa bä, dooh m' teëëg bä ti nuu jé. Ti m' pä gatsabak doo hã terii wät Jaweh kyyh Isaraéw buuj hã tanoo doo rakaner'ood bong noo gó, ji moo sahõnh hẽ hadoo doo ta ky n'aa jaw'yyk doo.
Tak'ëp Moisés maméts gabar'ëëng däk do ky n'aa hahỹỹh
29 Ti m' waëë Sĩnaih häd näng do jó naa Moisés bahyng bä kä, P'op Hagä Doo ky n'aa jaw'yyk doo pawóp hadoo do pä gatsabak doo hã kerih doo tapatsä hyng bä kä, dooh tahapëë bä ta mamets gabar'ëëng bä Jaweh sii taher'ood wät do hyb n'aa. 30 Ti m' Arãw, sahõnh hẽ Isaraéw buuj daheeh Moisés rabahapäh bä, gabarëëh ta maméts rahapäh mäh. Ti hyb n'aa dawë hã rakatahã bong. E'ỹỹm mä p'eets hẽ ta wë rana bä. 31 Ti m' Moisés naëënh, ta wë rabana hyb n'aa. Ti m' Arãw, sahõnh hẽ Isaraéw buuj sa wahë n'aa hedoo doo rabana kän ta wë. Ti m' sa sii Moisés ber'ood kän. 32 Ti jawén mäh, sahõnh hẽ Isaraéw buuj rabana ta wë. Ti m' tatabëëj kän sa hã sahõnh hẽ Jaweh mejũũ doo, waëë Sĩnaih häd näng doo bä ta hã tamaher'ood däk do paah.
33 Ti m' sa hã Moisés maher'oot jawén paa bä, ta maméts tajesuu pããn sawas'aap doo me. 34 Ti m', Jaweh matym gó tabahej'ëë bä, ta sii taber'oot hyb n'aa, tado nyyh mä ta maméts jasuu n'aa. Jaweh ji mamuun do tób n'aa bä naa tabahen'yyh bä, Isaraéw buuj tamaher'oot bä kä ta hã Jaweh mejõ däk doo, 35 gabarëëh mä ta maméts sa matym gó. Sa sii tabaher'oot jawén paa bä kä, p'aa hẽnh mä ta maméts tajasuu. P'aa hẽnh Jaweh wë tabajëë suun bä kä, tado nyyh ta maméts jasuu n'aa.