Saab ky n'aa hahỹỹh
35
Ti m' Moisés mejũũ sahõnh hẽ Isaraéw buuj rakataa hyb n'aa ta wë, ti m' taky hadoo sa hã:—Hahỹỹ tii Jaweh mejũũ doo bë bad'oo hyb n'aa: 2 “Bë moo bok do pan'aa kä ta ä̃h, ji ma poo oow see péh. Ji meheet péh hadoo do ta ä̃h, Saab, bë kameh'ããk do pan'aa tii. Tsyt hẽ, wë ỹỹ takasëëw däk. Ji daj'ëëp da Saab noo gó moo wät doo. 3 Sahõnh hẽ bë tób yt hẽ bë gehõ manäh tëëg Saab noo gó” —näng mä Moisés Jaweh mejũũ doo hã.
P'op Hagä Do matym n'aa Isaraéw buuj ranoo doo ta tób n'aa ramoo bok do pan'aa ky n'aa hahỹỹh
4 Ti m' sahõnh hẽ Isaraéw buuj hã Moisés ky hadoo ẽnh:
—Hahỹỹh ti Jaweh kyyh, tamejũũ doo: 5 “Bë ataa bë wë hanäng do uuh Jaweh matym n'aa. Taw'ããts hẽ sahõnh hẽ h'yyb noo doo ramanaa da Jaweh matym n'aa k'ããts tëg gabarëëh do s'ëëb, k'ããts tëg hawak do s'ëëb, k'ããts tëg hahiin do s'ëëb; 6 pããn jabaruut péh, hãd hahiin péh, ta seeh tak'ëp hahiin doo; pããn lĩno häd näng do s'ëëb tak'ëp baad hadoo doo; kabara wii; 7 b'éé ajyy byyh hahiin doo me rahewyk doo; wajats byyh s'ëëb; b'aah akasija häd näng doo s'ëëb. 8 Taw'ããts hẽ bë manaa na-ããj hẽ ta syyj olibo häd näng do s'ëëb ta bag waa; bag'aad buu benyym doo ta syyj ji hawuuk do makuj n'aa, jewii yb buu benyym do seeh péh insiẽẽn häd näng doo, ji ejuu do hyb n'aa. 9 Taw'ããts hẽ bë manaa na-ããj hẽ pä tak'ëp hanäm doo onis häd näng doo, pä wób tak'ëp gabarëëh do sii hẽ. Ji dadäk da ta tii sa ród n'aa wë ỹỹ wahë n'aa hub hã hadäk doo hã, ta hood hã ta h'yyb gó tasëët doo hã na-ããj hẽ.
10 “Taw'ããts hẽ rabana sahõnh hẽ a pariir n'aa, sahõnh hẽ ỹỹh Jaweh mejũũ doo ramoo bok hyb n'aa: 11 bë hã ỹ kahesé do tób n'aa, ta jasuu n'aa, kamaag sëëg do jó kä ta tób n'aa, kasekooh do tsadäb n'aa, kamaag sëëk do tyng, ta tyng hejoj n'aa ta karawaa me habong doo, ta tu n'aa, ta tsyym; 12 ta hood Jaweh ky n'aa enooh doo rahyb n'aa esee do hood n'aa, ta tyng ji hatook do pan'aa, ta ti ty gatsë; t'õp gadäk doo noo gatsë ta baa besuu n'aa; 13 pãw tyng, ta tyng ji hatook do pan'aa sii hẽ, ta tyng jó hatoonh doo ta nahëëh, Jaweh matym gó kametëëh do pãw; 14 tób bag n'aa tyng, ta nahëëh, ta bag ta tyng jó hahõm doo, ta bag waa; 15 buu benyym doo bë ma ejuu do tyng, ta tyng ji hatook do pan'aa, ta syyj buu benyym doo ji hawuuk do pan'aa, buu benyym doo insiẽẽn häd näng doo; bë hã ỹ kahesé tób n'aa noo gatsë; 16 ji ma ejuu do tyng, tëëg hõõ tyng n'aa k'ããts tëg hahiin do s'ëëb ma ejuu do tyng baa bä ji dadäk doo sii hẽ, ta tyng ji hatook do pan'aa sii hẽ, sahõnh hẽ ta nahëëh sii hẽ; naëng hood k'ããts tëg hahiin do s'ëëb, ta tyng sii hẽ; 17 Jaweh bë hã kahesé do tób n'aa wahoo hadë n'aa, ta tu n'aa ta hadë tyng, ta tu n'aa tsyym, ta hadë nooh sii hẽ; 18 tób tsyym, ta hadë tu n'aa mesoo doo k'ããts gó hejëh doo, ta tyd tu n'aa mesoo doo sii hẽ; 19 saroor kepëk doo, wë ỹỹ kasëëw däk doo bä ramoo bok noo gó saroor n'aa: Arãw, wë ỹ moo wät do saroor, tsyt hẽ kasëëw däk doo; Arãw taah wë ỹỹ ramoo bok noo gó saroor”, näng Jaweh —näng mä Moisés Jaweh mejũũ do ky n'aa hã.
20 Ti m' Moisés bahajaa bä kä tamaher'oot doo, sahõnh hẽ rabahõm kän. 21 Ti m' sahõnh hẽ h'yyb noo doo ramanaa Jaweh matym n'aa, sa hã Jaweh kahesé do tób n'aa katama do pan'aa. Ramanaa mä sahõnh hẽ tób yt hã hanäng doo ji moo wät do pan'aa, ta ti yt hã moo bok do sa saroor n'aa pan'aa, tsyt hẽ kasëëw däk doo. 22 Sahõnh hẽ h'yyb noo doo, ajyy, ỹỹj na-ããj hẽ ramanaa Jaweh matym n'aa sahõnh hẽ hedoo péh sa hatso n'aa k'ããts tëg gabarëëh do s'ëëb: sa saroor hã ratsed'ëëp doo, sa nabuuj gamewow, gararem doo sa mo poo taah hã rapadedëëk doo, sa nuu hã hatoonh doo. 23 Sahõnh hẽ wë näng doo pããn jabaruut péh, hãd hahiin péh, ta seeh tak'ëp hahiin doo, pããn lĩno häd näng do sëëb tak'ëp baad hadoo doo, kabara wii, b'éé ajyy byyh hahiin doo me rahewyk doo, wajats byyh s'ëëb, ramanaa mäh. 24 Ta wób ramanaa Jaweh matym n'aa k'ããts tëg hawak do s'ëëb, k'ããts tëg hahiin do s'ëëb. Sahõnh hẽ sa wë hanäng doo b'aah akasija häd näng doo ramanaa, tii me takatama hyb n'aa Jaweh mejũũ doo. 25 Sahõnh hẽ ỹỹj tsab'aat doo haj'aa doo, ramanaa kaseb'aat doo sa mo haj'aa jabaruut doo, hãd hahiin doo, ta seeh tak'ëp hahiin doo, pããn lĩno häd näng do s'ëëb tak'ëp baad hadoo doo na-ããj hẽ. 26 Sahõnh hẽ ỹỹj kar'ẽẽn doo, a pariir n'aa, ratseb'aat mä kabara wii. 27 Isaraéw buuj sa wahë n'aa hedoo doo ramanaa mä pä onis häd näng doo sa ród n'aa Jaweh wë wahë n'aa ta hub hã hadäk doo hã takapadadëëk hyb n'aa. Sa wahë n'aa hedoo doo ramanaa na-ããj hẽ pä tak'ëp gabarëëh péh ta hood ta h'yyb gó sa ród n'aa wahëh tasëët doo hã tagadabëëh hyb n'aa. 28 Ta tii ramenaa na-ããj hẽ buu benyym doo péh, ta syyj olibo häd näng do s'ëëb ta bag waa pan'aa, ta syyj buu benyym doo ji hawuuk do pan'aa, buu benyym doo ji ma ejuu doo pan'aa na-ããj hẽ. 29 Tii da né hẽ sahõnh hẽ Isaraéw buuj, ajyy, ỹỹj h'yyb noo doo, sa daaj hẽ ramanaa Jaweh matym n'aa, sahõnh hẽ Moisés hã Jaweh mejõ däk doo ramoo bok hyb n'aa.
30 Ti m' Moisés ky hadoo Isaraéw buuj sa hã:
—Bë hyb n'aa matakä —näng mäh —Jaweh asëëw däk aj'yy Besarew häd näng doo, Uri häd näng do t'aah, Hur ta t'aah, Judah panaa seeh. 31 Baad taban'oo däk ta hã ta Saheeh. Taban'oo däk ta hã ër pariir n'aa tabadoo hyb n'aa. Tah'yy gonä däk hajõng ji moo wät doo hã. 32 Ta tii da tawén d'oo, baad tabahajaa tamoo wät hyb n'aa k'ããts tëg gabarëëh do s'ëëb me, k'ããts tëg hawak do s'ëëb me, k'ããts tëg hahiin do s'ëëb me. 33 Baad tabahajaa hyb n'aa tamoo wät pä gabarëëh doo me, b'aah s'ëëb me, hajõng hedoo do ji moo wät doo tamoo wät hyb n'aa. 34 Ta hã, Ohorijab häd näng do hã na-ããj hẽ tabanoo baad rabahajaa hyb n'aa ramametëëk ramoo bok doo hã. Aj'yy Ohorijab häd näng doo, Ahisamak t'aah, Dãn panaa seeh. 35 Besarew hã, Ohorijab hã na-ããj hẽ baad Jaweh h'yy gon'yyh hajõng hedoo do ji moo wät doo hã, nyy d’ rabad'oo baad rahyb n'aa newëë hyb n'aa, kaseb'aat doo jabaruut doo, hãd hahiin doo, tak'ëp hahiin doo, pããn lĩno häd näng do s'ëëb baad hadoo doo kesyyp doo rahajaa hyb n'aa, kepëk doo rahajaa hyb n'aa na-ããj hẽ. Sahõnh hẽ ji moo wät péh hã rahajaa. Baad rabahajaa rahyb n'aa newëë nyy da rabad'oo ramoo bok doo hã.