2 Ti m' Moisés naëënh ta wë Besarew, Ohorijab, ta wób na-ããj hẽ sa pariir n'aa Jaweh an'oo däk doo, ramoo bok doo hã h'yyb hedoo doo. 3 Ti m' Moisés ban'oo däk sa hã sahõnh hẽ Isaraéw buuj ramanaa doo Jaweh kahesé do tób n'aa katama do pan'aa. Ti m' dooh tahëëj nä bä Jaweh matym n'aa Isaraéw buuj ramenaa doo. Bäp paah had'yyt hẽ m' ramenaa. 4 Ti m' Jaweh kahesé do tób n'aa hã moo b'ook doo ramoo yyw kän, 5 Moisés wë rabahõm hyb n'aa. Ti m' raky hadoo ta hã:

6 Ti hyb n'aa kä Moisés mejũũ sahõnh hã rapanäk, ramaher'oot, ramanena bong hyb n'aa Jaweh kahesé do tób n'aa matym n'aa. Ti m' dooh ramena boo bä. 7 Ramenaa doo baad tabahajaa sahõnh hẽ ramoo bok doo. Rahapäh mä ti mad'aak.

8 Ti m' moo b'ook do sa mahang sahõnh hẽ pariir n'aa sa hã ramoo boo kän Jaweh kahesé do tób n'aa. Ji moo sahõnh hẽ pããn lĩno häd näng do s'ëëb tak'ëp baad hadoo doo kaseb'aat do ta pan'aa. Ta mahang kaseb'aat doo jabaruut péh, hãd hahiin péh, ta seeh tak'ëp hahiin doo. Ta hã tak'ëp hajaa doo gas'yyb däk kerubĩm heen n'aa ta hatsó n'aa. 9 Séd gahejéj had'yyt hẽ m' ran'oo bä ji moo sahõnh hẽ hedoo do pããn. 12 meet 60 cm ta jó ta madawëët doo m'. Sét meet 80 cm ta jó ta gagod. 10 Ji moo seeh ken'yyh mä rata däk sét pan'aa. 11-12 Tii bä, hahỹỹ da rabad'oo pawóp hadoo doo séd hã ji bataa hyb n'aa kä: ta ty ketëë bä, ramoo boo däk mä 50 ji sekooh do tyw n'aa ta seeh hã, ta seeh hã na-ããj hẽ m'. Ta seeh nemuun hed'yyt hẽ m' ta tyw n'aa ran'oo bä taketëë bä. Pããn jabaruut doo me ramoo boo kän mä ta tii ji sekooh do tyw n'aa. 13 Tii bä m' ramoo bong k'ããts tëg gabarëëh do s'ëëb me 50 kasekooh do tsadäb n'aa. Ta tii me séd hã rabata däk pããn.

14 Ti m' ramoo bok mä 11 kabara wii s'ëëb ta jasuu n'aa pan'aa. 15 Séd gahejéj had'yyt hẽ m' ran'oo bä ta ti 11 hadoo doo: 13 meet 50 cm ta jó ta madawëët doo m', sét meet 80 cm ta jó ta gagod. 16 Ti m' ragat'ëë däk mä 5 ta see me, 6 ta see me. 17 Ti m' ramoo boo däg tii bä, pawóp hadoo doo ta ty ketëë bä, 50 ji sekooh do tyw n'aa ta seeh hã, ta seeh hã na-ããj hẽ. 18 Tii bä m' ramoo bok mä k'ããts tëg hahiin do s'ëëb me 50 kasekooh do tsadäb n'aa, ta tii me séd hã ji bata däk hyb n'aa ta jasuu n'aa. 19 Ti m' ramoo bok mä ta ti jó ji dasooh do pan'aa b'éé ajyy byyh hahiin doo me rahewyk doo. Ratama do jó kä ta tób n'aa ramoo boo kän mä wajats byyh s'ëëb.

20 Ti m' ramoo bok ramaag sëëg do tyng, b'aah akasija häd näng do s'ëëb, Jaweh kahesé do tób n'aa pan'aa. Pawóp hẽ b'aah ta tu n'aa hadoo doo p'op nu däk doo sét hã ran'oo bä, baa gadabo n'aa näng ran'oo bä m'. 21 Séd gahejéj had'yyt hẽ ran'oo bä. Ji meheet péh meet, sét ta bód ta jó ta nu däk mäh, 60 cm ta gagod, 22 Ta tyng hã ramoo boo kän mä pawóp hẽ ta tu n'aa tyw n'aa sét hã ken'yyh. Ti da né rabad'oo sahõnh hã. 23-26 20 ran'oo bä ta ti hedoo doo ta karawaa me hahõm doo, 20 ta karawaa see me hahõm doo. Tii m' ramoo boo kän 80 ta tyng n'aa hedoo do tsyym k'ããts tëg hawak do s'ëëb me. Ta hã ramoo boo kän mä ta tyw n'aa ta gó tadu këë hyb n'aa ta tu n'aa tyw n'aa. Pawóp hẽ ta tsyym sét tyng ken'yyh ran'oo bä m', séd pa ta tyng bahõm hyb n'aa, sét ta seeh pa, ta seeh ta seeh pa, ta seeh ta seeh pa. Ti hadoo hed'yyt hẽ ran'oo bä. 27 Tób duu hẽnh, papỹỹj hahyng hẽnh, ramoo boo bok mä ji mapoo oow seeh péh ta ti hedoo do tyng. 28-29 Ta tii bä, ta sasu hẽnh, hub hẽnh, s'ỹỹ me na-ããj hẽ, ramoo boo bok nä ta tyng seeh ta sasu me hahõm do kanatëë, ta mesoo n'aa. Ta sasu hẽnh hahäng doo hã radadäk mäh. Ranu gat'ëë däk mä séd hã ta nu gad'oo bä gararem doo me. 30 8 däg duu hẽnh habëëh doo ta tyng n'aa hedoo doo ta ti an'oo bä m'. 16 ta tsyym. Pawóp ta tsyym sét tyng hã.

31-32 Ti m' ramoo boo kän ji mooh seeh ta tyng hejoj n'aa ta karawaa me habong doo, b'aah akasija häd näng do s'ëëb me. Ji moo séd me ken'yyh ran'oo bä m'. Ti hawób ta karawaa see me, ti hawób né hẽ ta karawaa s'eeh hẽnh. Ti hawób né hẽ tób duu hẽnh hahõm doo. 33 Dawëët ramoo bok ta baa bä hagëë doo ta karawaa me hahõm doo, sahõnh hẽ ta madawëët doo me tabahajaa hyb n'aa. 34 Ta tyng hã, ta karawaa me habong doo hã na-ããj hẽ, k'ããts tëg gabarëëh doo ran'oo bä m'. Ta tyng hã radadäk mä k'ããts tëg gabarëëh do s'ëëb gararem doo, tii gó ji mooh seeh hedoo doo ta hejoj n'aa ji das'ũũd jëng hyb n'aa.

35 Ti m' ramoo boo kän mä t'õp ta noo gatsë. Kaseb'aat doo jabaruut doo, hãd hahiin doo, ta seeh tak'ëp hahiin doo, lĩno häd näng do s'ëëb tak'ëp baad hadoo doo kaseb'aat doo tapan'aa ran'oo bä. Ta hã tak'ëp hajaa doo gasyyp mä kerubĩm heen n'aa ta hatsó n'aa. 36 Ji meheet péh ta tu n'aa b'aah akasija häd näng doo s'ëëb t'õp ta noo gatsë tyng ramoo bok mäh. K'ããts tëg gabarëëh do s'ëëb ta hã. K'ããts tëg hawak do s'ëëb ta tu n'aa tsyym. Kaneké k'ããts tëg gabarëëh do s'ëëb ta tu n'aa hã t'õp ta noo gatsë kagaah do tyw n'aa ran'oo bä m'. 37 Ti m' ramoo bok mä tób noo gatsë. Kaseb'aat doo jabaruut doo, hãd hahiin doo, ta seeh tak'ëp hahiin doo, lĩno häd näng do s'ëëb tak'ëp baad hadoo doo kaseb'aat doo me m' ramoo bok tii. Baad hajaa doo hepëg wät mäh. 38 Ti m' ramoo boo kän mä ji moo seeh ta tu n'aa b'aah akasija häd näng do s'ëëb, ta noo gatsë tyng, ta tu n'aa pénh né hẽ m' ta tsyym, k'ããts tëg hahiin do s'ëëb. K'ããts tëg gabarëëh do ran'oo bä m' ta tu n'aa poo hã. Ti m' ramoo bok mä kaneké ta tu n'aa hã, ta noo gatsë ta hã ji dadäk hyb n'aa. Pããn tyng ramoo bok k'ããts tëg gabarëëh do s'ëëb.