6 Ti m' k'ããts tëg gabarëëh do kamanekuunh do s'ëëb me m' tamoo wät mä ta hood ty gatsë. 110 cm ta madawëët doo, 70 cm ta gagod. 7 Ti m' pawóp hẽ kabaj'aa doo këg enäh do heen n'aa, kerubĩm ramaneëënh doo, tamoo wäd kän mä ta ty gatsë uuh, ta jó. Sét ta pan'aa tamoo wät doo ta ty gatsë hã, ta tii kabaj'aa doo na-ããj hẽ. 8 Ta ty gatsë poo seeh hẽnh kerubĩm ramaneëënh doo seeh, ta pooh seeh hẽnh mä ta seeh tan'oo bä. Sét s'ëëb né tii tan'oo bä m' kerubĩm ta ty gatsë na-ããj hẽ. 9 P'op mä kerubĩm këg ragadabëëh, p'op naa sa këg me rajasuu hyb n'aa ta ty gatsë. Ty keg'ããs mä kerubĩm ramaneëënh do heen n'aa.

10 Ti m' tamoo wät mä pãw tyng n'aa b'aah akasija häd näng do s'ëëb. 90 cm ta madawëët doo, 50 cm ta gagod, 70 cm ta nu däk. 11 Ta hã k'ããts tëg gabarëëh do kamanekuunh do s'ëëb tan'oo bä m'. Ta hã tamoo wät mä ta baa hetso n'aa k'ããts tëg gabarëëh do s'ëëb. 12 Ta jó, ta nabyy me, tamoo wäd mä ta hadë. Ji moo sét pénh tanu däk mäh. Ta tii hã na-ããj hẽ tamoo wät mä ta baa hetso n'aa k'ããts tëg gabarëëh do s'ëëb. 13 Ti m' tamoo wät mä ji meheet péh gararem doo k'ããts tëg gabarëëh do s'ëëb. Ta tyng n'aa sasu me tapadadëëk mäh, ta tsyym gabëëh bä. 14 Ta hadë yd jé kanahën d'oos hẽ tapadadëëk mä gararem doo, ta tyng ji hatook do pan'aa tii gó ji das'ũũd jëng hyb n'aa. 15 B'aah akasija häd näng do s'ëëb me tamoo wät mä ji matook do tyng n'aa. K'ããts tëg gabarëëh do s'ëëb ta hã tan'oo bä m'. 16 Ti m' k'ããts tëg gabarëëh do kamanekuunh do s'ëëb me tamoo wät mä ta tyng jó hatoonh do pan'aa, ta hood hedoo doo, ta nahëëh. Tamoo wät mä na-ããj hẽ ji eëëk do hood aéh doo, koop sii hẽ m', uwa bëëh Jaweh hã kan'oo däk do hood.

17 Ti m' tamoo wät mä ta bag tyng k'ããts tëg gabarëëh do kamanekuunh do s'ëëb me. Ta nahëë me m' tatsajä̃g däk. Sét né ta pan'aa me m' tamoo wät mä ta patuuh, ta tëëg, ta bag jatoonh doo, ta ts'ooh heen n'aa. 18 Ta tëëg hã gabëëh ji ma poo oow see péh ta mooh tan'oo bä m'. Tamawoob hẽ hub hẽnh mäh, tamawoob hẽ m' s'ỹỹ me. [Séd pej ranu padëëk tan'oo bä m'.] 19 Ta mooh uuh me né hẽ m' tamoo wät mä tamawoob hẽ b'aah amen-doa ts'ooh heen n'aa sét ta mooh hã ken'yyh. 20 Ta tëëg hã, ta uuh me né hẽ m', tamoo wät mä ji meheet péh amen-doa ts'ooh heen n'aa. 21 Sahõnh hẽ ta mooh gabëëh yd jé m' tamoo wät ta tii. [Sét hẽ m' ta tëëg nu gad'oo bä.] 22 Sét s'ëëb né hẽ m' tamoo wät mä ta ts'ooh, ta mooh, ta tëëg. Sét s'ëëb me né hẽ m', k'ããts tëg gabarëëh do kamanekuunh do s'ëëb me m', tatsajä̃g häng mä sahõnh hẽ. 23 Ti m' tamoo wät mä setsi ta bag. K'ããts tëg gabarëëh do kamanekuunh do s'ëëb me tamoo wät mä ta ty ehõõ n'aa nahëëh, ta nahëëh hood na-ããj hẽ. 24 35 kil ta pan'aa k'ããts tëg gabarëëh do kamanekuunh do s'ëëb me m' tamoo wät mä ta bag tyng, ta nahëëh hedoo doo na-ããj hẽ.

25 Ti m' b'aah akasija häd näng do s'ëëb me m' tamoo wät kän mä insiẽẽn häd näng doo Jaweh hã rama ejuu do tyng. 90cm tanu däk mäh, 45cm ta madawëët doo, ti pénh mä ta gagod. Sét né ta pan'aa me tamoo wät mä insiẽẽn ma ejuu do tyng, ta poo gasõõm doo na-ããj hẽ, ta sasu me hanäng doo. 26 Ta jó, ta pa, poo gasõõm doo hã na-ããj hẽ m', k'ããts tëg gabarëëh do kamanekuunh do s'ëëb tan'oo bä m'. Ti m' ta hã tadadäk mä ta baa hetso n'aa k'ããts tëg gabarëëh doo s'ëëb. 27 Ti m' tamoo wät mä gararem doo k'ããts tëg gabarëëh do s'ëëb. Ta baa hetso n'aa yd jé tapadadëëk mäh tii. Ta karawaa me pawóp hẽ m', ta karawaa see me pawóp hẽ, ta tyng ji hatook do pan'aa tii gó ji das'ũũd jëng hyb n'aa. 28 Ti m' tamoo wät mä ji hatook tyng b'aah akasija häd näng do s'ëëb. K'ããts tëg gabarëëh do s'ëëb ta hã tan'oo bä m'.

29 Ti m' tamekuuj däk mä ta syyj buu benyym doo, tsyt hẽ Jaweh wë kasëëw däk doo, ji hawuuk do pan'aa. Ti m' tamekuuj däk mä na-ããj hẽ baad had'op up doo buu benyym insiẽẽn häd näng doo, [ji ma ejuu do hyb n'aa]. Baad buu benyym doo hajaa tamoo wät doo da tamekuuj kän mäh.