Rama ejuu do tyng Besarew moo wät do ky n'aa hahỹỹh
38
Ti m' Jaweh hã rama ejuu do tyng tamoo wät mä b'aah akasija häd näng do s'ëëb me. Sét meet 25cm ta jó tanu däk, pawóp hẽ meet 25cm ta jó ta madawëët doo, pawóp hẽ meet 25cm ta jó ta gagod tan'oo bä m'. 2 Ta pooh gasõõm doo tamoo wät mä ta sasu me, p'op pej tatabës hyb n'aa. Sét né ta pan'aa me tamoo wät mä ma ejuu do tyng, poo gasõõm doo na-ããj hẽ. Ta gó, ta jó na-ããj hẽ k'ããts tëg hahiin do s'ëëb tan'oo bä m'. 3 K'ããts tëg hahiin do s'ëëb me tamoo wät mä sahõnh hẽ Jaweh hã rama ejuu do tyng nahëëh: tëëg ooj hood, ta sëh ta ooj nahëëh, ji eseem do hood, ji ajuu do ji wareem do nahëëh, ta ooj haju do hood. 4 Ti m' tamoo wät mä tëëg hõõ tyng n'aa k'ããts tëg hahiin do s'ëëb me. Kaguun mä tan'oo bä. Ti m' rama ejuu do tyng baa bä tadadäg kän, ta tii bä hanäng do tyng yd jé. 5 Ta sasu me tamoo wät mä gararem doo rama ejuu do tyng ji hatook do pan'aa. 6 Ti m' tamoo wät mä pawóp hẽ ta tyng, ma ejuu do tyng ji hatook do pan'aa, b'aah akasija häd näng do s'ëëb. K'ããts tëg hahiin do s'ëëb tan'oo bä m' ta hã. 7 Ti m' ta tyng tadas'ũũd jëng gararem doo gó rama ejuu do tyng ji hatook do pan'aa. Ta karawaa me ta seeh, ta karawaa see me ta seeh. Gabaho tan'oo bä m' rama ejuu do tyng, b'aah s'ëëb me.Naëng hood Besarew moo wät do ky n'aa hahỹỹh
8 Ti m' Jaweh ramamuun do tób n'aa noo bä moo bok do ỹỹj sa japoow pan'aa me m', k'ããts tëg hahiin do s'ëëb, Besarew moo wät mä naëng hood, naëng hood tyng sii hẽ.
Ta hadë Besarew moo wät do ky n'aa hahỹỹh
9 Ti m' tamoo wät mä ta hadë, sa hã Jaweh kahesé do tób n'aa wahoo hadë n'aa. 45 meet ta madawëët doo ta karawaa me tan'oo bä ta kahadë. Baad hadoo do pããn lĩno häd näng do s'ëëb kaseb'aat do ta pan'aa m' tan'oo bä. 10 20 ta tu n'aa ta hadë tyng tan'oo bä m', 20 m' ta tu n'aa tsyym k'ããts tëg hahiin do s'ëëb. Ta tu n'aa nu gad'oo hẽnh tadadäk mä ta hadë pããn tyng k'ããts tëg hawak do s'ëëb. Ta tyng hã tadadäk mä kaneké doo k'ããts tëg hawak do s'ëëb ta hadë kagaah do tyw n'aa. 11 Ti hadoo né hẽ m' ta karawaa see me tan'oo bä. 12 Papỹỹj hahyng hẽnh mäh, 22 meet, sét ta bód ta jó tan'oo bä m' ta hadë pããn s'ëëb, 10 mä ta tu n'aa ta hadë tyng, ti pénh mä ta tsyym. Ta tyng hã tadadäk mä kaneké doo k'ããts tëg hawak do s'ëëb, ta hadë kagaah do tyw n'aa. 13 Ti gahejéj tan'oo bä m' ta hadë papỹỹj hana hẽnh, ta noo tabanäng hẽnh. 14 Ta hadë noo hub hẽnh hadäk hẽnh mä tan'oo bä ta hadë pããn 6 meet, 60 cm ta jó. Tamawoob hẽ ta tu n'aa ta hadë tyng, ta pénh mä ta tsyym. 15 Ti pénh tan'oo bä m' ta hadë ta noo s'ỹỹh tabanäng hẽnh. Ti hawób mä ta tu n'aa, ta tu n'aa tsyym. 16 Baad hadoo do pããn lĩno häd näng do s'ëëb kaseb'aat do ta pan'aa m' tan'oo bä. 17 K'ããts tëg hahiin doo s'ëëb me m' tamoo wät mä sahõnh hẽ ta tu n'aa tsyym. Sahõnh hẽ ta tu n'aa nu gad'oo hẽnh kadadäk do pan'aa, ta hadë pããn tyng, k'ããts tëg hawak do s'ëëb me m' tan'oo bä. Ta tii hã takadabëëh mä kaneké doo k'ããts tëg hawak do s'ëëb.
18 Hahỹỹ ta hadë nooh pan'aa ran'oo bä m': kaseb'aat doo jabaruut doo, hãd hahiin doo, ta seeh tak'ëp hahiin doo, baad hadoo do pããn lĩno häd näng do s'ëëb kaseb'aat do ta pan'aa m' ran'oo bä. Baad hepëk doo mo haj'aa hadoo rabepëk mäh. 9 meet mä ta hadë nooh ran'oo bä. Pawóp meet 25cm ta jó m' tanu däk, wahoo hadëë n'aa nu däk do pénh né hé hẽ m'. 19 Ti m' ji meheet péh ta tu n'aa ta noo tyng ramoo bok mä, ji meheet péh ta tu n'aa tsyym sii hẽ m', k'ããts tëg hahiin doo s'ëëb me m'. Ta tu n'aa nu gad'oo hẽnh kadadäk do pan'aa, ta hadë nooh pããn tyng, k'ããts tëg hawak do s'ëëb ran'oo bä. Ti s'ëëb né hẽ m' ta tii hã radadäk kaneké doo pããn tyw n'aa. K'ããts tëg hawak do s'ëëb né hẽ m' ran'oo bä, ta tu n'aa poo hã tabehũũm. 20 K'ããts tëg hahiin doo s'ëëb me ramoo bok mä tób tu n'aa mesoo n'aa k'ããts gó hejëh doo, ta hadë tu n'aa mesoo doo na-ããj hẽ m'.
Hahỹỹh tób pan'aa ramoo mabok doo sii hẽ sahõnh hẽ ta yt hanäng doo
21 Ti m' Moisés mejũũ mä Arãw t'aah Itamah häd näng doo h'yyb mahũũm Levi buuj retsén doo hã ramoo bok do pan'aa hã, Isaraéw buuj hã Jaweh kahesé do tób n'aa, Jaweh ky n'aa jaw'yyk do hood tób n'aa katamaa sooh hyb n'aa. 22 (Besarew, Uri häd näng do t'aah, Hur ta t'aah, Judah panaa seeh, tamoo wäd wät mä sahõnh hẽ Moisés hã Jaweh mejũũ doo. 23 Besarew masa n'aa, Ohorijab häd näng doo, Ahisamak t'aah, Dãn panaa seeh. Ti na-ããj hẽ h'yy gonäng hajõng hedoo do ji moo wät doo hã. Tahajaa baad tahyb n'aa newë bä nyy d’ tabad'oo. Kaseb'aat doo jabaruut doo, hãd hahiin doo, tak'ëp hahiin doo, pããn lĩno häd näng do s'ëëb baad hadoo doo gesyyp doo tahajaa mäh). 24 Sahõnh hẽ k'ããts tëg gabarëëh doo Jaweh matym n'aa ramanaa doo, Isaraéw buuj hã Jaweh kahesé do tób n'aa, ta yt hanäng doo na-ããj hẽ ramoo bok doo ta pan'aa, miw kil ta jawyg. Ta nu etyy n'aa heh'äät doo, Jaweh kahesé do tób n'aa yt hã ji nu mehety doo me ranu etyy mäh.
25 Sahõnh hẽ k'ããts tëg hawak do s'ëëb Isaraéw buuj ajyy ketsén doo hanoo doo, 3500 kil bahä̃nh péj. Ta nu etyy n'aa heh'äät doo, Jaweh kahesé do tób n'aa yt hã ji nu mehety doo me ranu etyy mäh. 26 Sét ken'yyh ketsén doo anoo mä ta jawyyg ta nu etyy n'aa sekel häd näng do bód k'ããts tëg hawak doo s'ëëba. (Ta nu etyy n'aa heh'äät doo bód né tii, sa hã Jaweh kahesé do tób n'aa yt hã ji nu mehety doo.) Sahõnh hẽ ajyy 20 sa ãn n'aa, 20 sa ãn n'aa bahä̃nh hedoo doo hanoo. Sahõnh hẽ m' ajyy ketsén doo 603,550. 27 Ta ti 3500 kil k'ããts tëg hawak do s'ëëb me ramoo bok mä 100 Jaweh kahesé do tób n'aa tyng n'aa tsyym, t'õp ta noo gatsë tyng tsyym sii hẽ. 35 kil k'ããts tëg hawak do s'ëëb radẽ däk sét tsyym pan'aa ken'yyh. 28 20 kil mä k'ããts tëg hawak do s'ëëb me tamoo wäd kän ta hadë tu n'aa nu gad'oo hẽnh kadadäk do pan'aa ta hadë pããn tyng, kaneké doo ta hã gabëëh doo, ta hadë tu n'aa poo hã hahõm doo na-ããj hẽ.
29 Sahõnh hẽ k'ããts tëg hahiin doo tsyt hẽ Jaweh wë ramanaa doo, 2400 kil. 30 Ta tii me Besarew moo wät mä tób noo gatsë tyng tsyym, rama ejuu do tyng, tëëg hõõ tyng n'aa [rama ejuu do tyng baa bä hadäk doo], rama ejuu do tyng nahëëh, 31 tób hadë tu n'aa tsyym, ta tu n'aa ta hadë noo tyng tsyym, sahõnh hẽ tób tu n'aa mesoo n'aa k'ããts gó hejëh doo, ta hadë tu n'aa mesoo doo na-ããj hẽ m'.