2 Ti m' k'ããts tëg gabarëëh ta mahang kepëk do ta pan'aa, kaseb'aat doo jabaruut doo me m', hãd hahiin doo me m', ta seeh tak'ëp hahiin doo me m', tak'ëp baad hadoo doo lĩno häd näng do s'ëëb kaseb'aat doo me m' Besarew ramoo bok mä ta hub hã Arãw dadäk doo. 3 Ta nahëë me ratsajä̃g däk k'ããts tëg gabarëëh do s'ëëb tak'ëp tasawasaab däk hyb n'aa, ti m' ragekãã kaseb'aat doo jabaruut doo mahang, hãd hahiin doo mahang, ta seeh tak'ëp hahiin doo mahang, baad hadoo doo lĩno häd näng do s'ëëb kaseb'aat doo mahang takepëk hyb n'aa. Tak'ëp hajaa doo moo wät doo da ramoo bok tii. 4 Ti m' ramoo boo kän ji janoo bä pawóp hẽ ta tyd gatëë n'aa hãd goéh doo. Arãw h'yyb hã hadäk do sasu me, ta jó hadäk do sasu me ragas'yyb däk, séd hã taket'ëë hõm hyb n'aa. 5 Ta bód hã repëg däk mä hanäm doo ta baa wyd. K'ããts tëg gabarëëh do s'ëëb ta mahang takepëk, kaseb'aat doo jabaruut doo, hãd hahiin doo, ta seeh tak'ëp hahiin doo, tak'ëp baad hadoo doo lĩno häd näng do s'ëëb kaseb'aat doo m' ran'oo bä m', Moisés hã Jaweh mejũũ doo da.

6 Ti m' pawóp hadoo do pä onis häd näng do nabyy me radadäk mä k'ããts tëg gabarëëh do s'ëëb ta mesoo n'aa. Ti m' pä hã raberii däk mä Isaraéw taah sa häd, ji moo heen n'aa hã ky n'aa jawyk do heen n'aa ji erih doo da. 7 Ti m' Besarew rapadadëëk pawóp hadoo do pä sa ród n'aa Jaweh wë wahë n'aa ta hub hã hadäk doo tyd hã ta janoo bä hadäk doo, Isaraéw taah panaa tahyb n'aa esee hyb n'aa. Moisés hã Jaweh mejũũ doo da né m' rabad'oo.

8 Ti m' ramoo bok mä ta hood sa ród n'aa wahëh h'yyb gó hadäk doo. Tak'ëp hajaa doo moo wät doo da ramoo bok mäh. Ta pan'aa sa hub hã hadäk doo pan'aa péh né m' ran'oo bä: k'ããts tëg gabarëëh do s'ëëb ta mahang kepëk do pan'aa, kaseb'aat doo jabaruut doo, hãd hahiin doo, ta seeh tak'ëp hahiin doo, tak'ëp baad hadoo doo lĩno häd näng do s'ëëb kaseb'aat doo kepëk doo. 9 Ti m' ramatëh däk mä pããn, ta hood tabahado däk hyb n'aa. Sét nuu me ji mooh ji etyy do pénh ta madawëët doo, ti pénh ta gagod ran'oo bä. 10 Ti m' ragadabëëh mä ta hã ji meheet péh noo gabah hẽ pä hats'ooh doo gabarëëh doo. Tamawoob hẽ pä sét noo gabäh hẽ ken'yyh mäh. Pong hẽnh gabëëh doo hã pä gabarëëh doo rubi häd näng doo, topasijo häd näng do m' ta seeh, beriwo häd näng doo m' ta seeh. 11 Ta yt gabëëh doo mä pä gabarëëh doo tur-kes häd näng doo, sapir häd näng doo m' ta seeh, emerad häd näng doo m' ta seeh. 12 Ti jawén gabëëh doo pä gabarëëh doo jasĩn-to häd näng doo, agata häd näng doo m' ta seeh, ametis häd näng doo m' ta seeh. 13 Tagadëëg up gabëëh do hã kä m', yd hẽnh, pä gabarëëh doo kirisorit häd näng doo, onis häd näng doo m' ta seeh, jas-peh häd näng doo m' ta seeh. K'ããts tëg gabarëëh do s'ëëb me ramoo bok mä pä gabarëëh do mesoo n'aa, ta hood hã ragasyyp hyb n'aa m'. 14 Sét uuh hed'yyt nado m' pä. 12 hadoo doo péh ta ti pä ta hã gabëëh doo. Rerii däk mä pä hã Isaraéw taah panaa sa häd, sét pä hã sét panaa häd mäh. Pä hã raberih mä ji moo heen n'aa hã ky n'aa jaw'yyk doo heen n'aa kametsaa doo ji berih do mo n'aa me.

15 Ti m' k'ããts tëg gabarëëh do s'ëëb me ramoo bok mä pawóp hẽ ta tyd. Katsäp doo ran'oo bä m'. 16 K'ããts tëg gabarëëh do s'ëëb me m' ramoo bok mä pawóp hẽ ta tyd mesoo n'aa. Ti m' k'ããts tëg gabarëëh do s'ëëb me m' ramoo bok mä pawóp hẽ gararem doo. Ta hood noo bä m', ta sasu me rapadadëëk mä tii bä gararem doo, ta tyd tyw n'aa. 17 Gararem doo hã m' rasakooh mä ta tyd. 18 Tii bä m', ta tyd poo gad'oo seeh rasakooh mä ta tyd masoo n'aa hã, ji janoo bä padëëk doo hã. 19 Ti m' k'ããts tëg gabarëëh do s'ëëb me ramoo bok mä gararem doo, ti m' ta hood sasu yd hẽnh hadäk doo hã m' rapadadëëk mäh. 20 Ti m' pawóp nä m' ramoo bok mä gararem doo k'ããts tëg gabarëëh do s'ëëb. Ti m' ta tii rapadadëëk mä ta tyd hã ta janoo bä hahyng doo hã m', ta hub hã hadäk do masoo n'aa hã. Ta masoo n'aa poo däk hẽnh radadäk mä gararem doo, ta h'yyb gó hadäk doo hadäk hẽnh mäh. Ta baa wyd pong jé kanahën doo hẽ m', kesyyp do tyw n'aa hã m' rapadadëëk mäh. 21 Ti m' gararem doo ta hood hã hadäk doo rasakong däk mä gararem doo ta tyd hadäk doo hã ta tyd jabaruut doo me. Tii b’ naa m' rasakong däk mä ta hub hã hadäk doo baa wyd n'aa hã, ta h'yyb gó hadäk doo papyk hyb n'aa m'. Moisés hã Jaweh mejũũ doo da né hẽ m' rabad'oo sahõnh hẽ.

22 Ti m' ta pan'aa jabaruut doo me m' repëk mä saaj dawëët hadoo, moo tamah doo. 23 Ta hoo gad'oo bä m' ramoo bok mä ta nooh, ji nuuh tyw n'aa. Ji nuu tyw n'aa noo bä ragasyyp mä ta noo hejoj n'aa, takanas'ẽẽd hõm mahä̃nh mäh. 24 Ta nabyy me m' ragasyyp mä romã ag häd näng do heen n'aa. Kawõõt mä ran'oo bä. Kaseb'aat doo jabaruut doo, hãd hahiin doo, ta seeh tak'ëp hahiin doo, tak'ëp baad hadoo doo lĩno häd näng do s'ëëb kaseb'aat doo ta ag heed n'aa ran'oo bä. 25-26 Ti m' k'ããts tëg gabarëëh do kamanekuunh do s'ëëb me m' ramoo bok mä ta naëj n'aa ketẽng is doo, ti m' ta ag heen n'aa mahang rapadadëëk mä. Kawõõt mä ran'oo bä. Jaweh wë ramoo bok do saaj n'aa nabyy me m' tii rapadadëëk mäh. Moisés hã Jaweh mejũũ doo da né hẽ m' rabad'oo sahõnh hẽ.

27 Ti m' lĩno häd näng do s'ëëb baad hadoo doo me m' repëk mä saaj dewëët hadoo doo moo näng doo, Arãw, Arãw taah rapadedëëk do pan'aa. 28 Ti s'ëëb né hẽ m' ramoo bok mä Arãw soog, pããn Arãw taah sa soog, sa kawäj sa saroor yt rapadedëëk doo. 29 Ti m' Arãw baa wyd hã m' baad ragasyyp kaseb'aat doo jabaruut doo me, hãd hahiin doo me, ta seeh tak'ëp hahiin doo me, tak'ëp baad hadoo doo lĩno häd näng do s'ëëb kaseb'aat doo me m'. Moisés hã Jaweh mejũũ doo da né hẽ m' rabad'oo sahõnh hẽ.

30 Tii bä kä m' ramoo boo kän mä k'ããts tëg gabarëëh do kamanekuunh do s'ëëb bäh gatsabak doo, Jaweh wë kasëëw däk doo. Ta hã m' raberii däk sa ky n'aa ród wahë n'aa ky n'aa: “Tsyt hẽ Jaweh wë kasëëw däk doo’’, näng mä kerih doo. Ji moo heen n'aa hã ky n'aa jaw'yyk doo heen n'aa kametsaa do mo n'aa me ji berih doo da m' takerii däk. 31 Ti m' ta tyd jabaruut doo rasakong däk ta hã, Arãw soog hã takamawyyt hyb n'aa. Moisés hã Jaweh mejũũ doo da né hẽ m' rabad'oo.

32 Tii kä m' rahaja däk mä ta ti tób, Isaraéw buuj hã Jaweh kahesé do tób n'aa, Jaweh ramamuun do tób n'aa^a. Moisés hã Jaweh mejũũ doo da né hẽ Isaraéw buuj ramoo bok mä sahõnh hẽ. 33-34 Ti m' tób hadoo doo ramana kän mä Moisés wë: ta jasuu n'aa yd hẽnh hasooh doo, ta ti jó hasooh do pan'aa b'éé ajyy byyh hahiin doo me rahewyk doo, ramaag sëëg do jó kä ta tób n'aa wajats byyh s'ëëb, sahõnh hẽ tób nahëëh, kasekooh do tsadäb n'aa, ramaag sëëg do tyng, ta tyng hejoj n'aa ta karawaa me habong doo, ta tu n'aa, ta tsyym, t'õp gadäk do noo gatsë; 35 ta hood Jaweh ky n'aa enooh do rahyb n'aa esee do hood n'aa, ta tyng ji hatook do pan'aa, ta hood ty gatsë; 36 pãw tyng, ta tyng jó hatoonh do pan'aa ta nahëëh, Jaweh matym gó kametëëh do pãw; 37 ta bag tyng k'ããts tëg gabarëëh do kamanekuunh do s'ëëb, ta bag ta jó gabëëh doo, ta nahëëh, ta syyj ta bag waa; 38 buu benyym doo rama ejuu do tyng k'ããts tëg gabarëëh do s'ëëb, ta syyj buu benyym doo ji hawuuk do pan'aa, buu benyym doo insiẽẽn häd näng doo; sa wë Jaweh kahesé tób n'aa noo gatsë; 39 rama ejuu do tyng, tëëg hõõ tyng n'aa k'ããts tëg hahiin do s'ëëb [ma ejuu do tyng baa bä ji dadäk doo], ta tyng ji hatook do pan'aa, sahõnh hẽ ta nahëëh; naëng hood, ta tyng n'aa sii hẽ m'; 40 sa hã Jaweh kahesé do tób n'aa wahoo hadë n'aa, ta tu n'aa ta hadë tyng, ta tu n'aa tsyym, pããn ta hadë noo; ta hadë tu n'aa mesoo doo k'ããts gó hejëh doo, ta tu n'aa mesoo do tyd n'aa; sahõnh hẽ sa hã Jaweh kahesé tób n'aa nahëëh; 41 saroor kepëk doo, Jaweh wë kasëëw däk doo bä ramoo bok noo gó saroor n'aa—Arãw, Jaweh wë moo wät do saroor n'aa, tsyt hẽ kasëëw däk doo; Arãw taah Jaweh wë ramoo bok noo gó saroor n'aa kä.

42 Moisés hã Jaweh mejũũ doo da né Isaraéw buuj ramoo bok mä sahõnh hẽ. 43 Ti m' Moisés hegãã kän mä sahõnh hẽ ramoo bok doo. Jaweh mejũũ doo da né hẽ ramoo bok doo kä. Ti m' taky n'aa edëng mäh sa hã kä.