Sa hã Jaweh kahesé do tób n'aa ratamaa sooh do ky n'aa hahỹỹh
40
Ti m' Jaweh ky hadoo Moisés hã:2 —Matamaa soh bë hã ỹ kahesé do tób n'aa, hã ỹỹ bë mamuun do tób n'aa, pooj jé bë kamarab n'aa du doo noo gó kä. 3 Tii bä tób gó madahëëh ta hood ỹ ky n'aa enooh do bë hyb n'aa esee do hood n'aa. Tii bä madadäg ta pooj jé ta noo gatsë t'õp gadäk doo tabesuu n'aa. 4 Tii bä tób gó madahëëh pãw tyng, madasoh ta jó ta jó hatoonh do pan'aa. Tii bä magadahëëh ta bag tyng. Madatooj ta jó ta bag. 5 Tii bä t'õp gadäk doo noo gatsë ji bajëng do pooj jé, ta hood ỹ ky n'aa enooh do bë hyb n'aa esee do hood n'aa pooj jé, madahëëh buu benyym doo ma ejuu do tyng n'aa. Tii bä madadäg tób nooh.
6 —Tii bä madahëëh ma ejuu do tyng bë hã ỹ kahesé do tób n'aa nooh pooj jé, hã ỹỹ bë mamuun do tób n'aa noo bä. 7 Tii bä madasoh naëng hood bë hã ỹ kahesé do tób n'aa, hã ỹỹ bë ma ejuu do tyng ganahaang gó. Naëng magedu jät ta gó. 8 Mahadë tii bä bë hã ỹ kahesé do tób n'aa wahoo n'aa hadë. Madadäg da ta hadë nooh.
9 —Tii bä ta syyj buu benyym doo ji hawuuk do pan'aa me mahawug bë hã ỹ kahesé do tób n'aa hã, sahõnh hẽ ta gó hanäng doo hã, tób, sahõnh hẽ ta gó hanäng doo tsyt hẽ wë ỹỹ takasëëw däk hyb n'aa. Wë ỹỹ takasëëw däk tii bä. 10 Mahawug tii bä bë masããh bë ma ejuu do tyng n'aa hã, ta nahëëh hã, wë ỹỹ takasëëw däk hyb n'aa. Baad wë ỹỹ takasëëw däk tii bä. 11 Mahawug tii bä naëng hood hã, ta tyng n'aa hã na-ããj hẽ, tsyt hẽ wë ỹỹ takasëëw däk hyb n'aa.
12 —Tii bä mamanaa Arãw, ta taah bë hã ỹ kahesé do tób n'aa noo bä. Naëng me rabehop man'oo bä. 13 Madadäg da Arãw hã ta saroor tsyt hẽ wë ỹỹ kasëëw däk doo. Mahahoog kanahën d'oos hẽ ta syyj buu benyym doo ta nuu gó, tsyt hẽ wë ỹỹ takasëëw däk hyb n'aa, wë ỹỹ tamoo wät do heen n'aa, sa ród n'aa wë ỹỹ tabahadoo hyb n'aa na-ããj hẽ. 14 Tii bä mamanaa Arãw taah. Madadäg sa hã sa saroor. 15 Tii bä ta syyj buu benyym doo mahahoog sa nuu gó, sa yb hã mabad'oo doo da, wë ỹỹ ramoo bok hyb n'aa, sa ky n'aa ród wë ỹỹ rabahadoo hyb n'aa na-ããj hẽ. Ta syyj buu benyym doo sa nuu gó kahahoog wät do hyb n'aa, tsyt hẽ tii, sa panaa na-ããj hẽ, wë ỹỹ ramoo bok da hed'yyt hẽ —näng mä Jaweh kyyh Moisés hã.
16 Ti m' sahõnh hẽ ta hã Jaweh mejũũ doo da né hẽ Moisés moo wäd kän mäh. 17 Tii da né hẽ, pooj jé ta kamarab n'aa du doo noo gó kä, pawóp hadoo do ta baab du doo bä kä, katamaa so däg kän Jaweh kahesé do tób n'aa. 18 Moisés rat'ëëg hõm mä ta tyng n'aa hedoo do tsyym. Ti m' ta jó ragadabëëh mä kamaag sëëg do tyng n'aa. Ti m' radas'ũũd jëng ta tyng hejoj n'aa. Ti m' ragadabëëh mä ta tu n'aa hedoo doo. 19 Ti m' ta jasu n'aa jó ramaag sëëk mä ta jó hahõm doo. Moisés hã Jaweh mejũũ doo da né hẽ m' rabad'oo.
20 Tii bä kä m' ta hood Isaraéw buuj hã Jaweh ky n'aa enooh do rahyb n'aa esee do hood n'aa gó Moisés dasuun mä pä gatsabak doo ta hã Jaweh ky n'aa jaw'yyk doo kaherih doo. Ti m' gararem doo gó ta hood hã hadäk doo hã tadas'ũũd jëng ta tyng ji hatook do pan'aa. Ti m' tadasooh mä ta jó ta ty gatsë. 21 Ti m' tób gó tadahäng mä ta hood. Ti m' tadadäk mä ta pooj jé ta noo gatsë t'õp gadäk doo besuu n'aa, ta hã Jaweh mejũũ doo da né hẽ m'.
22 Tii bä Jaweh kahesé do tób n'aa gó, t'õp gadäk doo noo gatsë ji bajëng do pooj jé, hub hẽnh tadahäng mä pãw tyng n'aa. 23 Ti m' ta jó, Jaweh matym gó, tadasooh mä pãw, ta hã Jaweh mejũũ doo da né hẽ m'.
24 Ti m', ta nu masee me, s'ỹỹ tabanäng hẽnh mä tadahäng mä ta bag tyng. 25 Ta bag tyng jó tagadabë kän mä ta bag Jaweh matym gó, ta hã Jaweh mejũũ doo da né hẽ m'.
26 Ti m' t'õp gadäk doo noo gatsë ji bajëng do pooj jé tadahäng mä buu benyym doo ma ejuu do tyng n'aa, k'ããts tëg gabarëëh do s'ëëb. 27 Ti m' tama ejuu mä ta jó buu benyym doo insiẽẽn häd näng doo, ta hã Jaweh mejũũ doo da né hẽ m'. 28 Ti m' tób noo bä tadahäng mä pããn tób noo gatsë. 29 Jaweh kahesé do tób n'aa noo pooj jé tadahäng mä ma ejuu do tyng. Ti m' sa mas'ããh seeh, triig na-ããj hẽ m' tama ejuu mä ta jó, ta hã Jaweh mejũũ do hadoo doo da né hẽ m'.
30 Ti m' tadasooh mä naëng hood sa hã Jaweh kahesé do tób n'aa, Jaweh hã rama ejuu do tyng ganahaang gó. Tagedu jät mä naëng ta gó. 31 Ti m' ta gó majat do uuh me m' Moisés, Arãw, Arãw taah ramoo kets'yyt, sa tsyym rahets'yyt. 32 Sa moo sa tsyym rahetsyyd hed'yyt hẽ m' Jaweh kahesé do tób n'aa gó rabajëë pëë do pooj jé, rama ejuu do tyng wë rahõm do pooj jé na-ããj hẽ m'. Moisés hã Jaweh mejũũ doo da né hẽ m' rabad'oo mäh.
33 Ti m' Moisés hadëë däk mä Jaweh kahesé do tób n'aa, rama ejuu do tyng. Tii kä m', tagadëëg up kä m', tadadäk mä ta hadë nooh. Tahaja däg kän mä sahõnh hẽ.
Jaweh bag tak'ëp gabarëëh doo tób gó hawät do ky n'aa hahỹỹh
34 Ti m' wë puh p'op nu däk doo ahyng mä Jaweh kahesé do tób n'aa jó, ti m' jé pad'yyt däg mä Jaweh kahesé do tób n'aa gó Jaweh bag tak'ëp gabarëëh doo bawäd däk. 35 Dooh m' Moisés haja bä Jaweh kahesé do tób n'aa gó tajëë suun bä, wë puh ta jó ahyng do hyb n'aa, jé pad'yyt däg mä Jaweh kahesé do tób n'aaa gó Jaweh bag tak'ëp gabarëëh doo bawäd däk do hyb n'aa.