— Ahõm nä panang baeh do Niniwé häd näng doo hẽnh. Maher'ood ta babuj n'aa sa hã, ỹ ky n'aa napëë däk nesaa do ramoo bong doo. Ti hyb n'aa, ỹ gawats'iik da sa panang —näng mä Tak'ëp Hyb N'aa Jawyk Do Jonas hã. 3 Ti m' dooh m' Jonas ky dahé bä Tak'ëp Hyb N'aa Jawyk Do mejũũ do ta hã. Dooh tahõm bä panang Niniwé hẽnh. Ta s'eeh hẽnh mä tabahõm. Hëëj Tasis häd näng doo hẽnh mä takejën hõm paawä Tak'ëp Hyb N'aa Jawyk Do mahä̃nh. Ti m' tabawëënh akajar hẽnh, panang Jope häd näng doo hẽnh. T'ĩĩh hẽnh mä tabaw'yyt marakate hëëj Tasis häd näng doo hẽnh hahõm doo. Ti m' tepaag hõm mä tabahõm do säm, ti tagatsëg sooh, ahõm kän mä sa sii. Tii d’ tawén d'oo mäh, takejën hõm hyb n'aa paawä dawëë Tak'ëp Hyb N'aa Jawyk Do mahä̃nh.

4 Ti m' tak'ëp bah'ood bana akajar me Tak'ëp Hyb N'aa Jawyk Do an'oo bä. Ti m' ketaam do hyb n'aa maadaka marakate hã, ä̃m n'aa näng mä marakate taganebäh hõm bä. 5 Tak'ëp mä rabeỹỹm bong marakate gó moo b'ook doo. Sahõnh hẽ m' rabetsẽẽ rah'yy kaha'eeh doo hã, sa kabarii masa hyb n'aa, rabedëp hyb n'aa. Ti m' tagasakok däk hyb n'aa raw'oong bëënh mä ta gabuuj akajar mé. Bah'ood bana do pooj jé m', Jonas bajëë suun t'õp gadäk doo gó marakate gó, t'ĩĩh hẽnh tabaỹỹh hyb n'aa. Tak'ëp mä tabaä̃h sooh t'ĩĩh hẽnh. 6 Ti m' marakate gó moo b'ook do sa wahëh bahõm ta wë. Ti m' taky hadoo ta hã:

— Ä̃ ti mahasooh! Ty gawëëj däg! Maky n'aa ets'ẽẽ mah'yy kaha'eeh doo hã. Ji hapäh mä ti mah'yy kaha'eeh do ër tat'ĩĩd mehĩĩn, ër nadejëp hyb n'aa —näng mä sa wahëh kyy Jonas hã. 7 Ti m' marakate gó moo b'ook do raky hadoo sa da hadoo sa hã hẽ:

— Taw'ããts hẽ ër moo bok ër häd kerih doo, ji bahapäh hyb n'aa jaa hyb n'aa tak'ëp hadoo do bah'ood bana —näk mä sa kyyh.Ti m', tii d’ né m ramoo bok. Ti m' ta ti ramoo bok doo, Jonas häd hã tabadëë kän. 8 Ti m' rabeaanh ta hã:

— Hỹỹ kä maher'ood! Jaa mejũũ hahỹ ër wë? —näk mäh. —H'ëëd ti mamoo wät babä? N'yyh hẽnh mahana? Nyy d’ a häj n'aa häd? —näk mä sa kyyh. 9 Ti m' Jonas ky hadoo:

— Eber buuj ỹỹh —näng mäh. —Jawéh, P'op Hagä Doo, hỹ pong jé hawät doo, sahõnh hẽ badäk hahỹỹh, akajar na-ããj hẽ mo haj'aa näng doo hã ỹ h'yy ka'eeh —näng mäh. 10 Ti m ' Jonas baher'ood däg kän takejën hõm do Tak'ëp Hyb N'aa Jawyk Do mahä̃nh. Ti hyb n'aa kä m', tak'ëp mä rabeỹỹm bong. Ti m' raky hadoo ta hã:

— Mahegãã, h'ëd n'aa tii da mabad'oo? —näk mäh. 11 Ti m' rabahapäh tak'ëp bah'ood, maadaka bana magyys hẽ, rabeaanh Jonas hã:

—Nyy da ãã bad'oo a hã, akajar batatih däk hyb n'aa? —näk mäh. 12 Ti m' Jonas ky gadoo:

—Ỹ bë dawäts tuu akajar me, tii bä da tabatatih däk. Ỹ hapäh ti hëp ỹ n'aa né hẽ ti tak'ëp bah'ood wén na bë wë —näng mä Jonas kyy sa hã. 13 Ti m' dooh m' rakarẽn bä Jonas radawäts tuu bä. Ti hyb n'aa tak'ëp mä rabahëë. Tanab'yyh hẽnh rakarẽn paawä rabah'ëëh hõm marakate. Dooh m' rahaja bä, tak'ëp mä bah'ood, maadaka bana magyys hẽ do hyb n'aa. 14 Ti m' tak'ëp mä raky n'aa etsẽẽ Jawéh hã. Hahỹỹ d’ mä sa kyyh:

—Jawéh, ãã madejëëb manäh hahỹ aj'yy ãã dajëëb bä —näk mäh. —Makarẽn do hyb n'aa sahõnh hẽ hahỹ tabawäd wät ãã wë, ti hyb n'aa, ãã maky n'aa ety manäh hahỹ aj'yy mo haj'aa kanad'oo do ãã dajëëb bä —näk mä sa kyyh. 15 Ti m' radawäts tuu kän mä Jonas akajar me. Ti m' nayyw mä akajar batatih däk. 16 Ti hyb n'aa m' rabeỹỹm bok Jawéh hã. Ti m' rama ejuu mä Jawéh, takawanajããn hyb n'aa sa wë. Ti m' ta hã raky kajäk, ta wë ramoo bok doo ted'ëëp do hyb n'aa. 17 Ti m' Jawéh mejũũ tah'ỹỹb karëëb jëng hyb n'aa Jonas. Tamawoob adëb, tamawoob atsëm mä, tabasuun tah'ỹỹb yb wog gó.