— B'ëëp ana, najis ỹỹ. Ahyy soh pa ỹỹ —näng mäh. Ti m' aj'yy bahõm Boas wë. Ti m' tabahyy sooh ta pa. 2 Ti m' Boas bats'yyt ji moo sahõnh pé sa wahë n'aa hedoo doo, rabahyy t'oonh hyb n'aa sa pa, ramaa newëë hyb n'aa Boas ta wak'ããn daheeh raher'oot doo. 3 Ti m' rabatoonh padëëk bä m' Boas ky hadoo ta wak'ããn hã:

— Hỹỹ kä Naõmi abaaj nä wawẽẽ hẽ Moab häj n'aa hẽnh naa, takarẽn tabesëëm hõm ta patug makũũh, ër wakããn makũũh, joom banäng doo, Erimerek makũũh joom banäng doo —näng mäh.

4 — Ti hyb n'aa õm ỹ maher'oot ta ky n'aa ỹ h'yyb däng, mabetsẽẽ hyb n'aa makarẽn bä. Makarẽn bä, ti mabetsẽẽ t'oonh hahyh ër wahëh n'aa hedoo do sa matym gó. Makanarẽn bä, nayyw hẽ ỹ mamaher'ood ỹ betsẽẽ hyb n'aa tii bä. Ër ky n'aa jaw'yyk do mejũũ do hyb n'aa, tahajaa mets'ẽẽ bä poj ỹỹ ta ti ër wak'ããn makũũh joom banäng do paah. Makanarẽn bä, ỹ etsẽẽ —näng mä Boas kyyh. Ti m' Boas wak'ããn ky hadoo:

— Éj. Taw'ããts hẽ. Ỹ karẽn né hẽ. Ỹ etsẽẽ da —näng mäh. 5 Tii kä m' Boas ky hado kän ta hã:

— Hỹỹ kä, Naõmi sa hã mets'ẽẽ bä joom banäng doo, magado na-ããj hẽ Rut, Moab buuj, ër wakããn makũũh ỹỹm paah, ta hã makat'ëë däk hyb n'aa. Tii bä da a hã naa ër wakããn makũũh panaa näng. Tii bä da ër wakããn makũũh joom banäng do paah, ta panaa sa ma had'yyt hẽ da tajawén —näng mä Boas kyyh. 6 Ti m' Boas wak'ããn ky hadoo:

— Tii d’ tado bä, dooh tahaja bä ỹ ets'ẽẽ bä. Ỹ ets'ẽẽ bä paawä, joom banäng do ma ỹ ahëëj jëës apäh, ỹ eỹỹm. Õm né hẽ ti hetsẽẽ. Dooh tahaja bä ỹ ets'ẽẽ bä —näng mäh. 7 ( Hahỹỹ da p'ooj ub rabahed'oo Israéw buuj sa mahang sa wakããn kas'uut do joom banäng do rets'ẽẽ bä, sa ma rakameb'aanh bä na-ããj hẽ: rabahajaa bä rakaner'oot doo, ta seeh ado hõm ta tsyym suun seeh, ti taban'oo däk ta seeh hã. Dooh raky kehỹỹd boo bä tajawén, dooh na-ããj hẽ rap'ãã ky kedag tajawén metëë n'aa tii) 8 Ti m' Boas wak'ããn ky hadoo ta hã:

— Õm né hẽ hetsẽẽ —näng mäh. Ti m' tabado hõm ta tsyym suun seeh, Boas hã taban'oo däg kän. 9 Ti m' Boas ky hadoo sa wahë n'aa hedoo do ta tii bä hat'oonh do sa hã, ta wób sa na-ããj hẽ:

— Naga hẽ bë matym me bë bahapäh, ỹ ets'ẽẽ hõm Naõmi hã Erimerek makũũh, Kirõn makũũh, Marõn makũũh sa joom banäng do paa sahõnh hẽ —näng mäh. 10 Ỹ gat'ëë däk na-ããj da Rut, Marõn makũũh ỹỹm paah. Tii d’ ỹ wén d'oo, ta patug makũũh panaa näng hyb n'aa. Erimerek makũũh, ta taah makũũh sa joom banäng do paa né tii, ji hyb n'aa es'ee had'yyt hyb n'aa, sa häd gawanatsik hyb n'aa ër wakããn sa mahang. Panang buuj sa häd kerii däk doo hã sa häd ji manabaan mahä̃nh —näng mäh.

— Bë hapäh né ỹ ets'ẽẽ hõm doo. Baad ub ỹ betsẽẽ bë hapäh —näng mä Boas kyy sahõnh hẽ sa hã. 11 Ti m' sa wahëh n'aa hedoo doo, ta wób kata t'oonh do na-ããj hẽ raky hadoo, raky n'aa edëng mä Boas:

— Taw'ããts hẽ. Ãã hapäh né hẽ, ãã matym gó mabets'ẽẽ wät. Taw'ããts hẽ Tak'ëp Hyb N'aa Jawyk Do anoo ỹỹnh magadoo do hã ta panaa, Rakew makũũh, Reja makũũh sa hã tabad'oo doo da, Israéw buuj radu na do paah —näk mäh. — Taw'ããts hẽ tak'ëp mawekãb däk da Eparata panang bä. Taw'ããts hẽ maky n'aa etsëëh da panang Berẽnh bä. 12 Taw'ããts hẽ da tak’;ëp takanekan a panaa Rut sii, Tak'ëp Hyb N'aa Do an'oo bä. Taw'ããts hẽ Peres, Judah t'aah Tamar daheeh, panaa hawób da a panaa —näk mä sa kyy Boas hã. 13 Ti m' Boas kat'ëë däk Rut hã. Ta pa m' Rut bag'ëëd däk. Ti m' Rut beta däg kän Boas sii, Tak'ëp Hyb N'aa Jawyk Do an'oo bä. Ti m' ta t'aah benyy däg kän. 14 Ti m' ỹỹj, panang buuj, raky hadoo Naõmi hã:

— Taw'ããts hẽ Tak'ëp Hyb N'aa Jawyk Doo hã ji j'aa etsë. Tan'oo däk naga hẽ tajawén õm masa doo, õm hag'ããs doo. Taw'ããts hẽ da taky n'aa etsëëh sahõnh hẽ Israéw buuj sa mahang —näk mäh. 15 — P'aah hẽnh da matsebé tan'oo bä hahỹ a ta t'aah hã. Õm da tahag'ããs, õm da tamasa mawah'ëë däk bä. Baad ub né hẽ a takaanh a hã. 7 tanyy bä paawä a taah, ti sa bahä̃nh baad ub a hã ti hahỹh Rut. Tak'ëp õm takamahä̃n. Ti né hẽ han'oo däk a hã a ta t'aah —näk mä sa kyy Naõmi hã. 16 Ti m' Naõmi bado däk ta t'aah ta moo gó. Baad mä Naõmi baw'ëëh. 17 Ti m' ỹỹj, panang buuj, raky hadoo:

— T'aah nyy däk Naõmi —näk mä sa kyyh. Ti m' rahäd n'oo däk Obed. Ti m' Obed t'aah kä Jeséh. Dawi yb mä ta ti Jeséh. 18 Hahỹỹ da Peres makũũh panaa sa häd: Peres makũũh t'aah häd Es-Roõn. 19 Es-Rõn makũũh t'aah häd Rãm. Rãm makũũh t'aah häd Aminadab. 20 Aminadab makũũh t'aah häd Nasõn. Nasõn makũũh t'aah häd Saramon. 21 Saramon makũũh t'aah häd Boas. Boas t'aah häd Obed. 22 Obed t'aah häd Jeséh. Jeséh t'aah häd Dawi kä.