Ti m' tah'ỹỹb yb wog gó naa Jonas ky n'aa etsẽẽ Jawéh, P'op Hagä Do tah'yy kaha'eeh do hã. Hahỹỹ d’ mä ta kyyh: 2 —Baad tanado bä hã ỹỹ, t'õp ỹ pahãs ỹ ed'oo noo gó, a hã tak'ëp ỹ ky n'aa ets'ẽẽ wät. Tii bä magadoo ỹ ky n'aa etsẽẽ doo, ỹ medëëb wät. T'õp dejëp do rababong bä naa ỹ ky n'aa etsẽẽ ỹ mamasa hyb n'aa. Tii bä mamaa napäh ỹ ky n'aa etsẽẽ doo. 3 —Gadajong doo gó ỹ madawäts tu. Tagasakuunh doo gó ỹ bawäd däk. A mo haj'aa maadaka nuh ỹ gad'oo bä kep'ëët do hadoo ratebës. 4 —Tii b’ hëp ỹỹ gó, ỹ ky hadoo: “Dawëë né paawä a mahä̃nh ỹ kadawäts hõm, p'aah da a tób n'aa, tsyt a wë kasëëw däk doo, ỹ baheg'ããs”, näng ỹỹh, hëp ỹỹ gó. 5 —Tamabëë yt hẽ ỹ bawäd hõm is. Ỹ h'yyb ts'uu däk. T'õp né hẽ ỹ akajar bejën wät. Jewii akajar me gabëëh doo, nuh ỹỹ hã rakajäg padëëk. 6 —T'õp ỹ bewäd jëng waëë du bëëh hẽnh. T'õp madäk doo hẽnh, dejëp do rababong ỹ bewäd jëng. Ji nanä wät hẽnh ỹ kadawäts gëët. Ti hadoo né hẽ ỹ medëëb wät dejëp do rababong hẽnh do mahä̃nh. Õm Jawéh, P'op Hagä Do ỹ h'yy kaha'eeh do ỹ medëëb wät. 7 —Ỹ h'yyb ts'uu däk bä, ỹ nahaja wät bä õm ỹ hyb n'aa newë däk Jawéh, õm hyb n'aa es'ee däk. Tii bä mamaa napäh né hẽ ỹ ky n'aa ets'ẽẽ wät doo. A tób n'aa, tsyt a wë kasëëw däk do yt hẽ, ỹ ky n'aa etsẽẽ do mamaa napäh. 8 Kabarii hã h'yy ka'eeh doo, daap hadoo do hã h'yy ka'eeh doo, rasog hõm baad hadoo do sa hã manoo do paawä, sa hã mat'ĩĩd mehĩĩn do paawä. 9 —Ỹỹ kä, õm da ỹ ma ejäm, õm ỹ ma ejuu bä. Ỹ moo wät né da a hã ỹ ky däng doo. Jawéh, õm né hẽ ti nesaa do mahä̃nh ji hed'ëëp doo —näng mä Jonas kyyh. 10 Ti m' Jawéh mejũũ tah'ỹỹb yb behëën jat hyb n'aa Jonas hood jó.