—40 ta ä̃h tabado däk bä, gawatsik da Niniwéh! —näng mäh. 5 Ti m', panang bä haj'eenh do ramaa napäh bä m', raky dahé kän Tak'ëp Hyb N'aa Jawyk Do kyyh, Jonas maher'oot doo. Tii kä m', sahõnh hẽ rah'yy kajäk ranawa hyb n'aa, rat'ĩĩd kamehĩĩn do hyb n'aa. Ti sahõnh hẽ m', hyb n'aa jewyk do sii hẽ m', hyb n'aa sekog is do na-ããj hẽ m' rapadedëëk mä pããn hebaan do s'ëëb, rat'ĩĩd kamehĩĩn do heen n'aa. 6 Tii kä m', Niniwéh buuj sa wahë n'aa ky n'aa napäh bä m' Tak'ëp Hyb N'aa Do kyyh Jonas maher'oot doo, as'ëëg gëët mä sa wahëh tyng n'aa jó hasooh do paah, takabo nyyh mä sa wahë saroor n'aa tadadäk do paah. Ti m' tadadäg jëng mä pããn hebaan do s'ëëb. Ti tabahyy häng tëëg ooj jó, ta t'ĩĩd kamehĩĩn do heen n'aa. 7 Ti m' tamejũũ ta ky n'aa jaw'yyk do panang Niniwéh bä rapanäk hyb n'aa. Hahỹỹ d’ mä ta kyyh:

—Hahỹ bë wahë n'aa, ta sii bag'ããs do hyb n'aa jewyk do na-ããj hẽ, ramejũũ doo: Dooh ër an'oo bä ji awëë bä, ji eëg bä. Ji masããh, booj yb hedoo doo, b'éé hedoo do na-ããj hẽ, dooh ji an'oo bä rawa bä, reëg bä. 8 Sahõnh hẽ da ër padedëëk pããn s'ëëb hebaan doo, ji t'yyd kamaehĩĩn do heen n'aa. Tii d’ ẽnh ji bad'oo ji masããh sa hã. Taw'ããts hẽ ër sahõnh hẽ tak'ëp ër ky n'aa etsẽẽ P'op Hagä Do hã. Taw'ããts hẽ ji eréd hõm baad ji nawät do paah, ji eréd hõm nesaa do ji moo wät do paah. 9 —Tii da ër adoo bä, ji hapäh mä P'op Hagä Do h'yyb tahỹỹd däg bä. Ër apäh da ta t'yyd mehĩĩn. Dooh apäh da takawaj'ããn wäd bä ër wë. Tii bä da, dooh apäh da ër tagawatsiig wäd bä —näng mä sa wahëh mejũũ doo. 10 Ti m' P'op Hagä Do bahapäh bä nyy da rabad'oo, nyy da raberéd hõm baad ranabok do paah, ta t'yyd mehĩĩn mä panang buuj. H'yy kahỹỹd wät mäh. Dooh m' tagawatsiig wäd bä panang, taky däng do paa da.