4
Ti m', dooh Jonas genaag bä, P'op Hagä Do t'yyd mehĩĩn do hyb n'aa Niniwéh buuj sa hã. Tak'ëp mä ta p'ãã kawajããn. 2 Ti m' taky n'aa etsẽẽ Jawéh hã:—Jawéh, tii d’ nado këh ỹỹ, ỹ tsyym kadoo do pooj jé häj ỹ n'aa bä naa? Õm da h'yy keh'ỹỹt, näng paa ỹ hëp ỹỹ gó. Ti hyb n'aa né hẽ paa nayyw hẽ ỹ waj'aa hõm, hëëj Tasis hẽnh ỹ kejën hõm hyb n'aa. P'op Hagä Doo, ky enyym doo, ji t'yyd mehĩĩn do õm. Nayyw hẽ kawajããn do nado õm. Tak'ëp makamahä̃n had'yyt hẽ ji hã. Mah'yy keh'ỹỹt magawats'iik mahanäng doo hã, mat'yyd mehĩĩn do hyb n'aa —näng mäh. 3 —Hỹỹ kä —näng mäh, —na madajëëb ỹỹh, Jawéh. Baad tanyy ỹ dajëp ỹ edëp do mahä̃nh —näng Jonas Jawéh hã. 4 Ti m' Jawéh ky hadoo ta hã:
—Baad g'eeh ti a hã makawajããn doo? —näng mäh. 5 Ti m' Jonas banä kän panang bä naa. Papỹỹj ty ganyyh hẽnh mä tabahõm. Panang nedaa bä m' Jonas tama ta tób, ta yd ketób sooh hyb n'aa tabadahẽẽm bä. Ti m' tagadaa sooh mäh, tabaheg'ããs hyb n'aa nyy da panang hã Jawéh bad'oo. 6 Ti m' nayyw hẽ m' taganä sooh, joom tyd g'aad näng do Jawéh an'oo bä, tabadahẽẽm hyb n'aa, Jonas nahatëë däk hyb n'aa. Ti m' tak'ëp mä Jonas h'yy gadajang joom tyd hyb n'aa. 7 Ti m' tapaj'ëë bä m', Tak'ëp Hyb N'aa Jawyk Do mejũũ mä bet'ëë bawa jëng hyb n'aa tyd kóm. Ti m' tatsawyy sooh. 8 Ti m' papỹỹj ty ganä këë bä, papỹỹj ty ganyyh hẽnh naa m', Jawéh mejũũ bah'ood tabahëm do tak'ëp hahanh doo. Ti m' tak'ëp mä Jonas nu gatëë däk, papỹỹj bag haj'aa. H'yyb nahejooj däk do hyb n'aa, tsamem sooh mäh, takarẽn mä tadajëp. Ti m' taky hadoo:
—Baad ub g'eeh ti a hã makawajããn do ta ti tyd hyb n'aa? —näng mäh. Ti m' Jonas ky hadoo:
—Ỹỹ. Baad ub né ti kawajããn doo. Ỹ h'yyb dajëp, tak'ëp ỹ kawajããn do hyb n'aa —näng mäh. 10 Ti m' Jawéh ky hado kän:
—Tyd hã mah'yyb däk. Dooh mejoom bä, dooh manu hedu bä naëng me. Naga hẽ hadoo do atsëm ganyyh doo. Jeti péh tadajëp. Ti hadoo né hẽ paawä, mat'yyd mehĩĩn tadajëp do hyb n'aa. 11 Ti bahä̃nh baad tanyy ỹ t'yyd mehĩĩn hahỹ panang baeh do buuj. 120 mĩw bahä̃nh ti panang Niniwéh buuj. Dooh rahapëë bä ny hadoo do baad hadoo doo, baad nadoo doo. Hajõng na-ããj ti abëëh sa masããh. Ti hyb n'aa, dooh g'eeh baad tado bä a hã, ỹ t'yyd mehĩĩn panang buuj sa hã? —näng mä Jawéh Jonas hã.