A mac taj cu camsic u tꞌʌn Cꞌuj, a maqueꞌ mʌꞌ taj cu camsic u tꞌʌn Cꞌuj
4
In bʌjobechex,
in jach yajechex,
mʌꞌ a yʌn quibiquechex tu cotor mac.
Mʌꞌ a yʌn quibic a baꞌ cu camsic tiꞌ u tꞌʌn Cꞌujoꞌ.
Tumt a wirej wa yʌn u Tajꞌor u Pixam Cꞌuj wa mʌnaꞌ u Tajꞌor u Pixam Cꞌuj.
Mʌꞌ ja wirej,
tan u pimtar u tus aricob ich yocꞌocab a cu tus camsicob u tꞌʌn Cꞌujoꞌ.
2 Wa baxuc cu yaꞌaric:
“A jeꞌraꞌ u parar Cꞌuj,
Jesucristo,
tarij ich yocꞌocab.
Caj u chꞌaj u winiquirir baxuc toꞌonex”,
aroꞌ taj cu camsic,
quireꞌ yamtaꞌb ten u Tajꞌor u Pixam Cꞌuj.
3 Wa mac cu tar tu yʌnechex mʌꞌ ju cꞌʌꞌotaj tarij Jesús ,
rajiꞌ cu tus aꞌaric:
“Mʌꞌ ju chꞌaj u winquirir baxuc toꞌonex”,
aroꞌ mʌꞌ tuchiꞌtaꞌb ten Cꞌujiꞌ.
A mac mʌꞌ taj cu camsic,
cu pꞌactic Cristo.
A ta toc uꞌyex uch:
“Bin u caꞌ tar u camsic a mʌꞌ tajoꞌ.”
Bajeꞌreraꞌ rajiꞌ tarij yocꞌocab a mʌꞌ taj cu camsicoꞌonexoꞌ.
4 Cꞌuj yʌninechex in chan pararechex.
Mʌꞌ ja wirej,
u pararechex Cꞌuj.
Rajen mʌꞌ cꞌuchaꞌan yorob u tus camsiquechex a cu tusoꞌ.
Mʌꞌ ja wirej,
a mac a acaꞌan techexoꞌ,
jach chich u mucꞌ,
quireꞌ rajiꞌ u Tajꞌor u Pixam Cꞌuj.
A mac mʌꞌ taj cu camsicoꞌonexoꞌ mʌꞌ chich u muqꞌuiꞌ,
quireꞌ toc acaꞌan a tiꞌoboꞌ a quisinoꞌ,
a mac tiꞌ yʌnob ich yocꞌocabiꞌ.
5 Rajiꞌob yʌninob ich yocꞌocab rajen cꞌas.
Rajen cu yaꞌaricob baꞌ.
Rajen tsoy yubicob yet cꞌasirob ich yocꞌocab.
6 Chen rajiꞌ yʌninoꞌonex Cꞌuj quireꞌ u pararoꞌonex Cꞌuj.
A mac cu cꞌʌꞌotic Cꞌujoꞌ cu yubicoꞌonex.
A mac a mʌꞌ ju cꞌʌꞌotej Cꞌujoꞌ mʌꞌ ju yuboꞌonex.
Rajen cꞌuchaꞌan ij corex ij cꞌʌꞌotex a mac taj cu camsicoꞌonexeꞌ.
Rajen cꞌuchaꞌan ij corex ij cꞌʌꞌotex a mac cu tus camsicob u tꞌʌn Cꞌujoꞌ.
A Cꞌujoꞌ u yajoꞌonex
7 In bʌjobechex in jach yajechex caꞌ ic pacran yajquintex ic bʌjex,
quireꞌ Cꞌuj cu yajquinticoꞌonex.
A mac cu yajquintic yet acsʌꞌorir,
rajiꞌ u parar Cꞌuj.
Rajiꞌ yet man Cꞌuj.
8 A mac mʌꞌ ju yajquint u yet acsʌꞌorir mʌꞌ yer Cꞌujiꞌ quireꞌ Cꞌuj cu yajquinticoꞌonex.
9 Baxuc a jeꞌraꞌ,
Cꞌuj cu yajquinticoꞌonex caj u tuchiꞌtaj u parar tuririꞌ ich yocꞌocab,
soc yʌn ij cuxtarex munt qꞌuin tiꞌ Jesús.
10 Caj u yesaj techex bic u yajquintiquechex Cꞌuj.
Rajen caj u tuchiꞌt u parar Cꞌuj,
quir u quimin,
quir u jawsic ic siꞌpirex.
Cax mʌꞌ tic yajquintex Cꞌuj a toꞌonexoꞌ.
Chen Cꞌuj caj u yajquin toꞌonex.
11 Baxuc aroꞌ in chan pararechex,
wa Cꞌuj,
cu yajquinticoꞌonex rajen xan caꞌ ic pacran yajquintex ic bʌjex.
12 Mʌnaꞌ mac u jach yirmʌn Cꞌuj tu wich.
Wa quic pacran yajquintiquex ic bʌjex.
Ij quet manex Cꞌuj,
tiꞌ yʌn Cꞌuj tij corex.
A baywoꞌ,
taj caj ij quibex u tꞌʌn,
wa quic yajquintiquex ij quet acsʌꞌorirex.
13 Bic a jach etiquex wa a wet man Cꞌuj?
Ic jach erex quireꞌ,
caj u tsꞌaj toꞌonex u Tajꞌor u Pixam Cꞌuj,
soc tiꞌ yʌn tic pixamex.
14 Tij quirex tij quich caj u tuchiꞌtaj u parar Cꞌuj,
Jesucristo,
quir u taquic tu cotor mac.
Raꞌ quic tsecꞌtiquex tiꞌ tu cotor mac xan.
15 Wa mac cu yaꞌaric tiꞌ tu cotor mac:
“U parar Cꞌuj,
a Jesúsoꞌ”,
rajiꞌ xan yet man Cꞌuj.
Bayiriꞌ xan,
a Cꞌujoꞌ,
ij quet manex Cꞌuj xan.
16 A Cꞌujoꞌ tij cꞌʌꞌotex caj u yajquintoꞌonex.
Tij cacsex tij corex caj u yajquintoꞌonex Cꞌuj.
A Cꞌujoꞌ,
u yajoꞌonex.
A mac cu yajquintic Cꞌujoꞌ yet man Cꞌuj xan.
17 Baxuc arayoꞌ jeꞌ u cꞌuchur tu qꞌuinin taj quic yajquintiquex Cꞌuj.
Soc tꞌajoꞌonex caꞌ bin xicoꞌonex ʌcʌtan Cꞌuj caꞌ bin xuruc tꞌʌn.
Mʌꞌ ja wirej,
tiꞌ yʌnoꞌonex ich yocꞌocab bajenob Jesucristo quireꞌ quic pacran yajquintiquex ic bʌjex.
Quireꞌ ij quet manex Cꞌuj.
18 A mac cu yajquintic Cꞌuj mʌꞌ sajʌquiꞌ.
Baꞌwir cu sʌjtic Cꞌuj?
Mʌꞌ ja wirej,
taj cu yajquintic mac Cꞌuj.
Cu chꞌic sajquir tiꞌ Cꞌuj quireꞌ cu tucric cu tsꞌiquintaꞌr ten Cꞌuj.
Rajen cu chꞌic sajquir tiꞌ,
quireꞌ mʌꞌ cꞌuchuc tu qꞌuinin taj cu yajquintic Cꞌuj.
A taj cu yajquintic Cꞌujoꞌ,
cu jawsic u sajquirir.
19 Rajen a toꞌonexoꞌ tic yajquintex Cꞌuj quireꞌ a Cꞌujoꞌ rajiꞌ tu yʌn batꞌan yajquintaj toꞌonex.
20 Wa tiꞌ yʌn mac cu tus aric u yajquintej Cꞌuj,
chen tiꞌ toy cu pꞌactic u yet acsʌꞌorir.
Cu jach tus aroꞌ.
A mac mʌꞌ ju yajquintob u bʌjob,
a cu yiriqueꞌ,
bic tabar u yajquintic Cꞌuj,
a mʌꞌ toy yiraj Cꞌujoꞌ.
21 A Cristojoꞌ a caj u tsꞌaj toꞌonex u tꞌʌn Cꞌuj,
rajiꞌ caj u yaꞌaraj:
“A mac cu yajquintic Cꞌuj caꞌ u yajquin tu bʌjob xan.”