A JEꞌ JUꞌUNAꞌ, PACHIR CAJ U CAꞌ TSꞌIBTA PEDRO
2 PEDRO
Rajiꞌ tu tsꞌibtaj Pedro tiꞌ a yacsmʌnob tu yorob
1
A tenoꞌ Simón Pedrojen.
Caj in tsꞌibta techex a jeꞌ juꞌunaꞌ.
A tenoꞌ u cꞌurewen Jesucristo.
Rajiꞌ Jesucristo caj u tuchiꞌten.
A tenoꞌ caj in tsꞌibt a jeꞌ juꞌunaꞌ techexaꞌ quireꞌ caj a wacsex ta worex tiꞌ Jesucristo.
Rajen taj ij corex cu yiricoꞌonex Cꞌuj yejer ic Jaj Tsꞌurex Jesucristo a mac caj u tacajoꞌonexeꞌ.
2 Quireꞌ a werex Cꞌuj,
baxuc a werex Jesús ic Jaj Tsꞌurirex.
Rajen in cꞌat jach manan u yamtiquechex Cꞌuj,
quireꞌ u yajechex Cꞌuj.
In cꞌat jach manan u quiꞌtar a worex tiꞌ Cꞌuj soc mʌnaꞌ baꞌ ca tucrex.
Caꞌ ij quirex mac bic tabar a caj u yacsaj tu yor tiꞌ Cꞌuj
3 Mʌꞌ ja wirej,
a Cꞌujoꞌ caj u tsꞌaja toꞌonex u mucꞌ.
Jach manan u tsoyir Cꞌuj caj u tsꞌaja toꞌonex soc ic manex tu tsoyir.
A Cꞌujoꞌ caj u tsꞌaja toꞌonex u mucꞌ soc chʌcaꞌan tan ic sʌjtiquex Cꞌuj.
Mʌꞌ ja wirej,
caj u tsꞌaja toꞌonex u mucꞌ quireꞌ ij querex Cristo.
Rajen a Cꞌujoꞌ caj u tetajoꞌonex soc ij querex rajiꞌ jach carem.
Soc ij querex raꞌ u tsoyir Cꞌuj.
4 Rajen a Cꞌujoꞌ caj u toc araj:
“Jeꞌ u tsꞌic toꞌonex u mucꞌ quir ic manex tu tsoyir.
Quir ic rʌc pꞌʌtiquex,
a cꞌasoꞌ a baꞌ cu pachiticob tu yorob a mac a mʌꞌ yerob Cꞌuj.”
Caj u toc tsꞌaja toꞌonex a baꞌ caj u toc araj toꞌonex Cꞌuj soc ij cʌniquex Cꞌuj.
Mʌꞌ ja wirej,
caj u tsꞌaja toꞌonex u tꞌʌn a baꞌ jach tsoyoꞌ bayiriꞌ a jach manan coꞌojoꞌ.
5 Rajen caꞌ a quiꞌ pꞌisex a bʌjex soc mʌꞌ chen ca wacsiquex ta worex.
Caꞌ a pꞌisex a bʌjex soc a manex ich u tsoyir xan.
Mʌꞌ chen caꞌ a pꞌisex a bʌj soc a manex ich u tsoyir,
caꞌ a pꞌisex a bʌj soc a werex a baꞌ u cꞌat Cꞌuj techex.
6 Mʌꞌ a chen pꞌisiquex a bʌjex soc a werex a baꞌ u cꞌat Cꞌuj techex.
Caꞌ a pꞌisex a bʌjex a suꞌsiquex a bʌjex soc mʌꞌ a pachtiquex a cꞌasoꞌ.
Mʌꞌ a chen pꞌisiquex a bʌjex a suꞌsiquex a bʌjex soc mʌꞌ a pachtiquex a cꞌasoꞌ.
Caꞌ a pꞌisex a bʌjex soc pacachbirechex.
Mʌꞌ a chen pꞌisiquex a bʌjex soc pacachbirechexiꞌ.
Caꞌ a pꞌisex a bʌjex soc a cʌniquex Cꞌuj xan.
7 Mʌꞌ a chen cʌniquex Cꞌuj.
Caꞌ a pꞌisex a bʌjex soc a yajquintiquex a wet acsʌꞌorir.
Mʌꞌ a chen pꞌisiquex a bʌj a yajquintex a wet acsʌꞌorir.
Caꞌ a pꞌisiquex a bʌj soc a yajquintiquex tu cotor mac.
8 Wa caj a quiꞌ pꞌisex a bʌjex,
a quiꞌ cʌniquex a jeꞌ tꞌʌnaꞌ.
Jeꞌ a bin manex tu tsoyir.
Jeꞌ a quiꞌ cʌniquex a Cꞌujoꞌ.
Mʌꞌ ja bin a pꞌʌtex Jesucristo ic Jaj Tsꞌurirex quireꞌ chʌcaꞌan yiric tu cotor mac a werex Jesucristo.
9 A jeꞌ tꞌʌnaꞌ wa mʌꞌ ta quiꞌ cʌnex irechex a mac a chꞌop u wichoꞌ.
Wa irechex a mac a acꞌbirchʌj u wichoꞌ,
chen bʌytʌc cu yiric.
Mʌꞌ ja wirej,
tub tiꞌ bic jawsaꞌb tiꞌ u siꞌpir uch.
10 Rajen in wet acsʌꞌorirechex,
mʌꞌ u yʌn tubu techex tu pʌyechex Cꞌuj tu beyaj.
Mʌꞌ u yʌn tubu techex quireꞌ caj u tetechex Cꞌuj.
Wa ca pꞌisiquex a bʌjex soc mʌꞌ u tubu techex a baꞌ caj in waꞌaraj techex sam.
Mʌꞌ ja bin a pꞌʌtex u tꞌʌn Cꞌuj mʌꞌ biqꞌuin ca pꞌʌtiquechiꞌ.
11 Wa baxuc ca cʌniquexoꞌ,
jeꞌ u quiꞌ quiꞌ acsiquechex ic Jaj Tsꞌurirex raꞌiriꞌ ij cʌjtaquirex Jesucristo tu cu bin u reyintej munt qꞌuin.
12 Rajen suꞌsuꞌ quin bin in cꞌase techex tiꞌ u tꞌʌn Cꞌuj,
a quin camsiquechex.
Cax ta chen toc uꞌyajex,
cax ta toc acsex ta worex tiꞌ Cristo.
13 A tenoꞌ quin tucric raꞌ in jach beyaj quir in cꞌasic techex tiꞌ a baꞌ caj in camsechex uch,
soc mʌꞌ ju tubur techex hasta quin quimin.
14 Baxuc caj yaꞌar ic Jaj Tsꞌurirex uch.
Bin in caꞌ quinsbir a tenoꞌ bajeꞌrer,
tabar in quinsaꞌ.
15 Baxuc bajeꞌrer quin cꞌasic techex soc pachir a toc cꞌʌꞌotiquex.
Wa jaj ix tʌcoj tabar u cꞌuchur tu qꞌuinin in quimin.
Rajen tsꞌajan in wor caꞌ in pꞌʌtechex a baꞌ jeꞌ u cꞌasiquechex tiꞌ in tꞌʌn.
A mac caj u yira u waysaꞌb Jesús
16 A tenoꞌ caj in toc araj techex u mucꞌ ic Jaj Tsꞌurirex Jesucristo,
soc a werex biquiraꞌ.
Mʌꞌ ja wirej,
bin u caꞌ ur ich u sasirir.
Aroꞌ mʌꞌ raꞌ u bʌjiriꞌ u tꞌʌn xib quir u tusaric tiꞌ u racꞌob.
Mʌꞌ rajiꞌ a baꞌ tenob quin chen acsicob tin worob a cu bin tar.
Mʌꞌ ja wirej,
caj in wirob tin wich caj waysaꞌb Jesús jach tu sasir uch.
17 A tenoboꞌ caj in wirob caj sʌjtaꞌb Jesús ten u Tet Cꞌuj wa ber caj waysaꞌb Jesús ich u joꞌr wits.
Mʌꞌ ja wirej,
tar u tar u sasirir Cꞌuj ich u muyarir a caj u bobʌst tenob u muyarir caj in wuꞌyob yaꞌaric Cꞌuj:
“A jeꞌraꞌ in parar,
in jach yaj.
Raꞌ cu quiꞌquintic in wor.”
Baxuc caj araꞌb ten Cꞌuj ich u joꞌr wits.
18 A tenoboꞌ caj in wuꞌyob u tꞌʌn caꞌanan.
Tar u tar u tꞌʌn caꞌanan a tenoboꞌ tiꞌ yʌnenob ich u joꞌr wits yejer ic Jaj Tsꞌurirex.
A rayoꞌ u witsir Cꞌuj.
19 Rajen in toc erob,
raꞌ jach taj a baꞌ tsecꞌtaꞌb ten yʌjtseqꞌuirob u tꞌʌn Cꞌuj ich u juꞌunin uch,
quireꞌ caj u tsecꞌob caꞌ bin tac Cristo.
Mʌꞌ ja wirej,
a tsꞌibaꞌan u tꞌʌn Cꞌuj a tsꞌibtaꞌb ten yʌjtseqꞌuirob Cꞌuj uch,
irob quib,
a cu yercꞌacꞌtic ic berex raꞌ quir u yamticoꞌonex soc chʌcaꞌan ic berex hasta cu tar u sastareꞌ cu tar coꞌcoch ich.
Rajen ij querex tabar u sastar.
Baxuc u tꞌʌn yʌjtseqꞌuirob u tꞌʌn Cꞌuj uch.
Rajiꞌ quir u yamticoꞌonex soc u pʌyicob ic berex hasta caꞌ bin uruc ic Jaj Tsꞌurirex.
Rajen caꞌ a quibex u tꞌʌn yʌjtseqꞌuirob u tꞌʌn Cꞌuj uch quir u yamtic techex.
20 Caꞌ a quiꞌ sar a xiquinex soc a najtiquex a baꞌ quin waꞌaric.
Mʌnaꞌ mac,
tuririꞌ cꞌuchaꞌan yor u najtej tu tsꞌibaꞌan u tꞌʌn Cꞌuj wa mʌꞌ yamtaꞌ ten u Tajꞌor u Pixam Cꞌuj.
21 Cꞌaj techex a baꞌ caj u tsecꞌtob u yʌjtseqꞌuirob u tꞌʌn Cꞌuj uch,
u bʌjirirob mʌꞌ ju tsecꞌtobiꞌ.
Tu chen tsecꞌtob u tꞌʌn Cꞌuj,
quireꞌ araꞌb ten u Tajꞌor u Pixam Cꞌuj tiꞌob.
Rajen caj u tsecꞌtob a baꞌ araꞌb ten Cꞌuj.