U tꞌʌn Pedro tiꞌ a yacsmʌnob tu yorob
5
Quin toc aric a wuꞌyex bajeꞌrer soc a chich ariquex in tꞌʌn,
tiꞌ a mac a tsꞌurintiquex tu ca cꞌayex,
quireꞌ baxuc a tenoꞌ rajiꞌ u tsꞌurirenob a yacsmʌnob tu yorob.
A tenoꞌ in wirmʌn u mucꞌyaj Cristo ich cruz.
A Cꞌujoꞌ,
quij Pedro,
bin u caꞌ tsꞌa ten u mucꞌ an ten bic cu bin u tsꞌabir tiꞌ Jesús ten Cꞌuj caꞌ bin uruc caꞌanan.
2 Caꞌ in waꞌarex techex caꞌ a quiꞌ cʌnantex a yacsmʌnob tu yorob tu ca cꞌayex.
Cʌnantex a tiꞌoboꞌ irej u cʌnanticob u yʌrʌcꞌ tʌmʌn yucob ten yʌjcʌnʌnyʌjirob tʌmʌn yuc.
Caꞌ a cʌnantex a tiꞌoboꞌ quireꞌ raꞌ a beyajex.
Caꞌ a cʌnantex tiꞌob quireꞌ a bʌjiriꞌex a jach cꞌatex a cʌnantiquex a tiꞌoboꞌ quireꞌ mʌꞌ tsꞌʌrbir a pachexiꞌ.
Baxuc u cꞌat Cꞌuj.
Caꞌ in chich arej techex caꞌ a cʌnantex a tiꞌoboꞌ mʌꞌ quir a jaric a taqꞌuinexiꞌ.
Quin chich aric techex caꞌ a cʌnantex a tiꞌoboꞌ quireꞌ a cꞌatex a jach beyajex tiꞌ Cꞌuj.
3 Mʌꞌ quir a qꞌueyiquex a tsꞌurirexiꞌ irej wa techex yʌnin a cꞌurewex a wet acsʌꞌorir.
Mʌꞌ a yʌn cʌniquex aroꞌ quireꞌ baxuc gente.
Caꞌ a pꞌis a bʌjex soc a manex tu tsoyir soc u cʌniquechex a wet acsʌꞌorirex.
4 Caꞌ in chich are techex caꞌ a quiꞌ cʌnantex a wet acsʌꞌorirex soc caꞌ bin tac Jesús.
Rajiꞌ u Jach Tsꞌurirob yʌjcʌnanyʌjirob tʌmʌn yucob quireꞌ a yacsmʌnob tu yorob irob yʌrʌcꞌ tʌmʌn yuc.
Robob cu bin boꞌotbirob ten u Jach Tsꞌurirob yʌjcʌnanyʌjirob tʌmʌn yuc tu ju cʌnant u yet acsʌꞌorirob.
Robob bin u caꞌob cꞌʌmbir soc u sʌjtaꞌr ten tu cotor mac.
Soc u cuxtarob munt qꞌuin.
5 Bayiriꞌ tiꞌ a chichanoꞌ,
Caꞌ yub a tꞌʌniquex a mac cu tsꞌurintiquechex tu ca cꞌayex.
Tu cotor caꞌ a pacran yamt a bʌjex irechex u cꞌurewechex a wet acsʌꞌorirex.
Mʌꞌ ja wirej.
Baxuc tiꞌ tsꞌibaꞌan ich u tꞌʌn Cꞌuj:
A mac a cu yaꞌaric jach tsoy u bʌj.
Cu pꞌactaꞌr ten Cꞌuj.
Chen a Cꞌujoꞌ cu yamtic tiꞌ a mac a mʌꞌ u tucrej yaꞌarej nojir u bʌj.
Quireꞌ a Cꞌujoꞌ cu yajquintic aroꞌ.
6 A mac a cu yaꞌaric:
“Tsoyir u bʌj”,
a Cꞌujoꞌ mʌꞌ u cꞌat yubej.
Arej caꞌ u pꞌʌtej yaꞌaric:
“Tsoyir u bʌj.”
Soc u cꞌanan ten Cꞌuj quir u beyaj quireꞌ a Cꞌujoꞌ,
jach yʌn u mucꞌ.
Bin u caꞌ quiꞌ acsaꞌbir ten Cꞌuj caꞌ bin cꞌuchuc tu qꞌuinin.
7 A baꞌ ca tucriquex,
pꞌʌtex,
quireꞌ Cꞌuj cu cʌnantiquechex.
8 Quiꞌ cʌnant a bʌjex,
quiꞌ quiꞌ irex soc mʌꞌ u man u pʌyex a berex a quisinoꞌ.
Quireꞌ rajiꞌ cu man u cʌxtechex quir a wacsiquex a siꞌpirex.
Mʌꞌ ja wirej,
cu pꞌactiquechex quisinoꞌ rajiꞌ irej barum jach wiꞌij.
Cu yacan quir u chiꞌbir mac.
9 Taj a wacsiquex ta worex ti Cristo soc cꞌuchaꞌan a worex tiꞌ a quisinoꞌ.
Quiꞌ cꞌʌꞌotex a wet acsʌꞌorirex ich yocꞌocab.
Mʌꞌ ja wirej,
cu man tumtaꞌbir yorob ten quisin irechex caj man tumtaꞌbir a worex ten quisin.
10 Mʌꞌ yaꞌab u qꞌuinin cu bin tsꞌocar u tumtic a worex a quisinoꞌ.
Tabar u tsꞌocar u tumtic a worex.
Quireꞌ a Cꞌujoꞌ a mac a cu quiꞌ yajquintiquechex.
Caj u tetechex soc a wacsiquex ta worex tiꞌ Cristo,
quir a cuxtarex munt qꞌuin caꞌanan.
U bʌjiriꞌ Cꞌuj jeꞌ u quiꞌ tajquintic a worexeꞌ.
Caj tsꞌoc u tajquintic a worex Cꞌuj,
mʌꞌ ju pec a worex.
Cax a baꞌ cu tar techex,
jach chich ij corex.
11 Caꞌ ij carex tiꞌ Cꞌuj:
“Jach caremech Cꞌuj.
Jariꞌ a techoꞌ,
bin a caꞌ a reyintej munt qꞌuin.
Jeroj tsꞌoquij,
quij.”
Tsꞌoc u tꞌʌn Pedro
12 A jeꞌ juꞌunaꞌ,
quin tsꞌibtic techex.
Bin u caꞌ tar u pure techex Silvano.
Chichin u juꞌunin quin bin in tsꞌibte techex.
A Silvanojoꞌ taj caj u yacsaj tu yor.
Rajen ic sucuꞌunex.
Cu quiꞌ quibic u beyaj.
A jeꞌ juꞌunaꞌ in cꞌat in tsꞌibtic techex soc a werex cu yajquinticoꞌonex Cꞌuj,
tan u yamticoꞌon.
A tenoꞌ caj in tumtaj caj in wiraj jach taj a jeꞌraꞌ.
Quiꞌ cʌnantex u tꞌʌn Cꞌuj.
Mʌꞌ a pꞌʌtiquex u tꞌʌn Cꞌuj.
13 Tu cu cꞌayob ich u cajar Babilonia,
a mac tetaꞌb ten Cꞌuj irechex caj u tetechex ten Cꞌuj.
Caj yaꞌarob techex:
“Tiꞌ wa yʌnechex?”
In chan camsʌwinic Marcos ar in tꞌʌnechex.
14 Quiꞌ tꞌʌnex tu ca bin a wirex a wet acsʌꞌorirex.
Caꞌ quiꞌ quiꞌac a worex,
quireꞌ techex yʌnin Jesucristo.
Jeroj tsꞌoquij,
quij.