Caꞌ beyanʌcoꞌonex yejer Cꞌuj, cax a baꞌ yʌn toꞌonex
4
Baxuc caj mucꞌyajnʌjij Cristo u winquirir uchoꞌ.
A techexoꞌ xan,
chichquin ta worex quir a mucꞌyajex tiꞌ Cristo.
Mʌꞌ ja wirej,
a mac caj mucꞌyajnʌjij u winquirir,
mʌꞌ rajraꞌ u yacsic u siꞌpir quireꞌ rajiꞌ quimij irej Jesús quimin.
2 Aroꞌ cax wa mun u yaxqꞌuinin tiꞌ yʌn ich yocꞌocab,
bin u caꞌ u quib a baꞌ u cꞌat Cꞌuj a tiꞌoꞌ.
Mʌꞌ ja wirej,
rajiꞌ mʌꞌ ju pachte cꞌas mʌꞌ irob a mac a tiꞌ yʌn ich yocꞌocab cu pachticob tu yorob.
3 Jeroj,
tiꞌtiꞌ a baꞌ caj a betex a uchoꞌ,
a raꞌ u qꞌuinin mʌꞌ toy a wacsex ta worex tiꞌ Cristo,
quireꞌ caj a betex a baꞌ tsoy tu tꞌʌn a mac a mʌꞌ yacsmʌnob tu yorob tiꞌ Cristo.
Quireꞌ robob cu pachticob cꞌas.
Ca manex uch quir a pʌyiquex xquic.
Baxuc a xquicoꞌ,
cu man uch quir u pʌyic xib.
Caj carchʌjechex uch tu ca wuqꞌuiquex a woch trago uch.
Ca manex a betex cꞌas uch.
Tu ca quiꞌ quiꞌ janʌnex uch,
mʌꞌ ju tsꞌocar a quiꞌ quiꞌ jen janʌnex uch.
Caj a cꞌujintex tus cꞌuj uch caj araꞌb ten Cꞌuj mʌꞌ tsoyiꞌ.
4 A bajeꞌreroꞌ,
a mac mʌꞌ yacsmʌnob tu yorob cu jacꞌʌr yorob,
caj yirob mʌꞌ a binex yejerob.
Cu jacꞌʌr yorob yiricob mʌꞌ a binex ich cꞌas yejerob rajen cu pꞌastiquechexob a techexoꞌ.
5 Chen a mʌꞌ yacsmʌnob tu yorob,
a cu pꞌasticob a yacsmʌnob tu yorob.
Bin u caꞌob ʌcʌtan Jesucristo quireꞌ rajiꞌ tetaꞌb quir u beyaj quir u yaꞌaricob tiꞌ Jesús biquinin caj u pꞌastob a yacsmʌnob tu yorob uch.
Tu cotor mac bin u caꞌ ʌcʌtan Jesucristo,
baxuc a cuxaꞌanob,
baxuc a quiminoboꞌ.
Rʌc bin u caꞌob ʌcʌtan Jesucristo.
6 Rajen caj tsecꞌtaꞌb u jach tsoyir u tꞌʌn Cꞌuj ten mac tiꞌ a mac,
a mʌꞌ yerob Cꞌuj quireꞌ irob a mac a quimeneꞌ.
Tsecꞌtaꞌb soc yubicob u tꞌʌn Cꞌuj quireꞌ tiꞌ toy cuxaꞌanob soc u yacsicob tu yorob quir u cuxtarob munt qꞌuin ich caꞌanan an ten bic Cꞌuj cu cuxtar.
Cax robob toꞌcob ten Cristo soc mʌꞌ ju bin erar munt qꞌuin.
Caꞌ bin cꞌuchuc tu qꞌuinin u quimin u winquirirob cu bin quiminob an ten bic tu cotor mac cu quimin ich yocꞌocab.
7 Tabar u xuꞌr u tꞌʌn ich yocꞌocab.
Rajen quiꞌ cʌnantex a bʌjex soc mʌꞌ a wacsiquex a siꞌpirex.
Quiꞌ cʌnantex a bʌjex soc cꞌuchaꞌan a worex a quiꞌ tꞌʌniquex Cꞌuj.
8 A werex a baꞌ jach manʌn aroꞌ wa caꞌ a pacran yajquintex a bʌjex ich yocꞌocab.
Mʌꞌ ja wirej,
cu jawsicob u siꞌpirob tu cu pacran yajquinticob u bʌjob.
Cu jawsic yaꞌab u siꞌpirob.
9 Mʌꞌ a waꞌariquex:
“Biquinin cu tar aroꞌ?”
Quireꞌ a mac a cu tar ta watochexoꞌ,
caꞌ a quiꞌ acsex.
10 Caꞌ ij quiꞌ yamtex ij quet acsʌꞌorirex wa cꞌuchaꞌan ij corex ic yamtex.
Cꞌuj caj u tsꞌaj u tꞌʌn toꞌonex quir ic yamtiquex ij quet acsʌꞌorirex.
Rajen caꞌ ij cꞌʌnex a baꞌ caj u tsꞌaj toꞌonex Cꞌuj.
Mʌꞌ ja wirej,
tu tsꞌaja toꞌonex Cꞌuj quir ic yamtiquex ij quet acsʌꞌorirex.
11 A mac a tsꞌaꞌb u beyaj quir u tsecꞌtic u tꞌʌn Cꞌuj.
Arej caꞌ u tsecꞌtej quireꞌ rajiꞌ yer jach u tꞌʌn Cꞌuj a cu tsecꞌticoꞌ.
A mac a tsꞌaꞌb u beyaj soc u yamtic u yet acsʌꞌorirob.
Arex caꞌ beyanʌc yejer u mucꞌ a tsꞌaꞌb tiꞌ ten Cꞌuj.
Quireꞌ caj ij cacs tij corex tiꞌ Jesucristo rajen ich tu cotor baꞌ quic betiquex.
Rajiꞌ jach tsoy caꞌ ij carex:
“Jach caremech Cꞌuj.”
Baxuc,
caꞌ ij carex tiꞌ ic Jaj Tsꞌurirex.
“Jach yʌn a mucꞌ munt qꞌuin,
a tiꞌ yʌnech ich caꞌananoꞌ.
Jach manan caꞌ ic sʌjtech munt qꞌuin.”
Bayoꞌ,
tsꞌoquij,
quij.
Jeꞌ u cꞌuchur tu qꞌuinin ic mucꞌyajex quireꞌ tij cacsex tij corex
12 Mʌꞌ u jacꞌʌr a worex,
in bʌjobex quireꞌ in jach yajechex.
Wa cu tar tu yʌnechex a cu tar u tumtex a worex.
Yaj caꞌ bin a wuꞌyex wa cu tumtic a worex,
irej cꞌacꞌ wa cu chujiquechex.
Mʌꞌ a tucriquex biquin baꞌ a berex a techexoꞌ.
13 Chen mʌꞌ u jacꞌʌr a worex.
Quiꞌquint a worex quireꞌ a wet mucꞌyajex Cristo.
Wa baxucoꞌ,
ca betiquex jach manan u quiꞌtar a worex caꞌ bin a wirex Cristo ich caꞌanan.
14 Wa cu pꞌastiquechex a racꞌobex quireꞌ caj yirob a wacsex ta worex tiꞌ Cristo.
Toc quiꞌquint ta worex.
Mʌꞌ ja wirej,
chʌcaꞌan a wet manex u Tajꞌor u Pixam Cꞌuj,
a mac jach manan tsoyiroꞌ.
Quireꞌ a techexoꞌ ca sʌjtiquex u Tajꞌor u Pixam Cꞌuj.
15 Chen wa tiꞌ yʌn mac cu mucꞌyaj quireꞌ caj u quinsaj mac.
Baxuc quireꞌ caj u yaꞌcraj baꞌ.
Baxuc quireꞌ rajiꞌ cꞌacꞌas mac.
Baxuc caj mucꞌyajnʌjij quireꞌ caj u pʌcꞌaj u pach u racꞌob,
rajiꞌ u boꞌorir u siꞌpir.
Rajen a toꞌonexoꞌ a tij cacsex tij corex caꞌ chen mucꞌyajnʌcoꞌonex tiꞌ u tꞌʌn Cꞌuj.
16 Chen wa mac caj mucꞌyajnʌjij quireꞌ caj u yacsaj tu yor tiꞌ Cristo.
Arej mʌꞌ u chꞌic suraquir.
Chen caꞌ u quiꞌ acsej tu yor tiꞌ Cristo soc u sʌjticob Cristo tu cotor mac.
17 Jeroj cꞌuchij tu qꞌuinin u jʌsicoꞌonex cax a mac a tu yacsaj tu yor tiꞌ Cristo.
Quireꞌ wa cu yʌnxchun Cꞌuj quir u jʌsicoꞌonex a mac a tu yacsaj tu yor.
A baꞌ u ber tiꞌob,
a mʌꞌ ju yacsob tu yorob tiꞌ Cristo uch?
Jach manan cu bin u mucꞌyajob cꞌacꞌ.
Baxuc cu yaꞌaric ich tu tsꞌibaꞌan u tꞌʌn Cꞌuj uch.
Baxuc caj yaꞌaroꞌ:
18 “Orac mʌꞌ ju tocarob ten Cꞌuj a mac a yacsmʌnob tu yorob.
Baꞌ u ber tiꞌ a mac mʌꞌ yacsmʌnob tu yorob?
Baxuc tiꞌ a mac a yʌn u siꞌpirob?
Robob cu bin ich cꞌacꞌ munt qꞌuin.”
19 Rajen a mac a tan u mucꞌyaj quireꞌ tan u man tu tsoyob an ten bic u cꞌat Cꞌuj.
Arej caꞌ manac tu tsoyir rajraꞌ cu cꞌubic tu cotor baꞌ tiꞌ Cꞌuj.
Quireꞌ a Cꞌujoꞌ a tu betaj yocꞌocab,
cꞌuchaꞌan yor u betic a baꞌ caj u toc araj tiꞌ uch.