Raꞌ u tꞌʌn tiꞌ a mac u chꞌamʌn u mamoꞌ. Raꞌ u tꞌʌn Cꞌuj xan tiꞌ a mac u chꞌamʌn u racꞌoꞌ
3
Baxuc a cu beyaj tiꞌ u tsꞌurirob cu quibic u tꞌʌn xan.
Baxuc a xquic xanoꞌ,
caꞌ u quib u tꞌʌn u mam.
Wa ju mamoꞌ mʌꞌ yacsmʌnoꞌ tu yor,
jaj ix tʌcoj cu yiric u racꞌ tan u quibic a baꞌ quireꞌ tiꞌ cu betic.
Jaj ix tʌcoj,
bin u caꞌ cꞌaxej tu yor u mam soc u yacsic tu yor u tꞌʌn Cristo xan.
Cax mʌꞌ u tsicbʌtaꞌr ten u racꞌ.
2 Jeꞌ u yacsic tu yor tiꞌ Jesús u mameꞌ.
Mʌꞌ ja wirej,
cu yiric u sʌjtaꞌr ten u racꞌ.
Quireꞌ cu yiric cu quibir u tꞌʌn.
3 A xquicoꞌ,
quij,
mʌꞌ u chen tucric wa tsoy yirir ten u racꞌob,
u chen buquintic a jach manan tsoy u nocꞌob.
Baxuc u joꞌr,
mʌꞌ u chen tucric wa tsoy yirir u chomcꞌʌxtic u joꞌr ten u racꞌob.
Baxuc u yuj,
mʌꞌ u chen tucric tsoy yirir u yujintic ten u racꞌob.
4 A werex baꞌ caꞌ a tucrex jach tsoy?
Caꞌ a cʌxtex u tsoyir a pixamanex tiꞌ Cꞌuj an ten bic nemʌꞌ biquechex ta worex,
aroꞌ ʌcʌtan tu wich Cꞌuj jach manan tsoy yiric Cꞌuj.
5 Baxucoꞌ caj u yesob tiꞌ u racꞌob a xquic,
a uchoꞌ.
Baxuc caj u yajquintob Cꞌuj uch.
Caj u yesob taj caj u cꞌʌmob u tꞌʌn Cꞌuj.
Mʌꞌ ja wirej,
caj u tsꞌurint u mam,
quiꞌ yorob a xquicoꞌ.
6 Bayiriꞌ a Sarajoꞌ,
caj u yaꞌaraj tiꞌ u mam Abraham:
“In jach tsꞌurirech”,
quij bin uch Sara.
Mʌꞌ ja wirej,
caj u quib u tꞌʌn u mam uch.
Baxuc caꞌ a cʌnex Sara tsꞌurintex a mamex xan,
quij.
Quireꞌ caj a wacsex ta worex ti Cristo soc bajenechex u pararechex Sara bajeꞌrer.
Jaj ix tiꞌoꞌ,
ca manaquechex tu tsoyir,
bayiriꞌ mʌꞌ a yʌn chꞌic sajquirex tiꞌ mac quireꞌ ta wacsex ta worex tiꞌ Cristo.
7 A yacsmʌnob tu yorob a caj u chꞌaꞌob u raqꞌueꞌ.
Cꞌʌꞌotex tu cʌjaꞌanechex yejer a raqꞌuex.
Caꞌ a sʌjtex a raqꞌuex xan,
quireꞌ mʌꞌ cꞌuchaꞌan yorob techexiꞌ a raqꞌuiꞌ.
Cꞌʌꞌotex,
tsꞌaꞌb a cuxtarex ten Cꞌuj tiꞌ a xiquicoꞌ,
baxuc techex xan,
quireꞌ caj a cꞌʌmex Cꞌuj.
Wa ca cꞌʌꞌotiquex aroꞌ,
Cꞌuj cu bin yub a tꞌʌn wa ber ca tꞌʌniquex a tiꞌoꞌ.
Cu jach mucꞌtic u qꞌueyaꞌ quireꞌ tu cꞌʌm u tꞌʌn Cꞌuj
8 Uꞌyex baꞌ quin waꞌaric techex.
Tsꞌocar u caꞌ in tsicbar techex.
Pacran pꞌeriꞌquint a worex.
Pacran yajquintex a bʌjex irej wa a jach bʌjex ca yajquintiquex.
Caꞌ a tucrex tsoyob a bʌjobex.
Mʌꞌ a wʌcꞌʌs tucric a bʌj wa jach tsoyechex soc nemʌꞌ bic a worex tiꞌ a racꞌobex.
9 Mʌꞌ a pʌquiquex a bʌjex wa tu cꞌasquintiquechex mac.
Cax a wuꞌyex u cʌrʌx tꞌʌntiquechex.
Mʌꞌ a pʌquic a bʌjex.
Tꞌʌnex Cꞌuj tiꞌob,
soc u yamtaꞌr ten Cꞌuj.
Mʌꞌ ja wirej,
Cꞌuj caj tetechex uch,
soc u yamtiquechex.
10 Cꞌʌꞌotex a baꞌ cu yaꞌaric u tꞌʌn Cꞌuj uch.
A cu yaꞌaric:
A mac u cꞌat u cuxtar yocꞌocab quiꞌ yorob.
Arex tiꞌ,
caꞌ u quiꞌ cʌnant u bʌj,
soc mʌꞌ yaꞌaric cꞌas,
soc mʌꞌ tus.
11 Arex tiꞌ,
caꞌ u pꞌʌtej cꞌas soc mʌꞌ ju bin tu cꞌasir.
Arex caꞌ manac tu tsoyir.
Caꞌ u cʌxt a baꞌ jach tsoy tiꞌ u pixam.
Arex tiꞌ caꞌ u quiꞌ cʌxt u tsoyir u pixam.
12 Cʌnex aroꞌ,
quireꞌ a Jaj Tsꞌuroꞌ,
cu quiꞌ cʌnantic a mac a taj yor ʌctan tu wich Cꞌuj.
Aroꞌ rajraꞌ cu yubaꞌr u tꞌʌn ten Cꞌuj tu cu tꞌʌnic Cꞌuj.
Barej a Jaj Tsꞌuroꞌ,
pꞌec u yiric a mac a cu man tu cꞌasiroꞌ.
13 Mʌnaꞌ mac cꞌuchaꞌan yor u cꞌasquintiquech wa rajraꞌ ca man tu tsoyir.
14 Cax cu chuquicob a pachex quireꞌ yiricob ca manex tu tsoyir.
Quiꞌquint a worex tiꞌ quireꞌ Cꞌuj cu bin yamtiquechex.
Mʌꞌ a chꞌic sajaquirex tiꞌ mac.
Mʌꞌ u jacꞌʌr a worex tiꞌ mac xan.
15 Chen caꞌ a sʌjtex ta worex Cristo.
Chaꞌ a tsꞌurintiquex Jaj Tsꞌur Jesucristo.
Sepquint a quiꞌ nunquexiꞌ tu cotor mac,
bic tabar caj a wacsex tiꞌ Cristo ta worex wa cu cꞌatic techex.
Mʌꞌ a soꞌsoc nunquex tiꞌ soc quiꞌ yubic a tsicbarex tiꞌ.
Chan ber a tꞌʌniquex a tiꞌoꞌ quir yubic a tꞌʌnex.
16 Mʌꞌ a wacsiquex a baꞌ cu cꞌasquintic a pixamex.
Baxuc cax cu pʌqꞌuicob a pachex soc caꞌ bin pꞌastiquechex ten a mac a mʌꞌ yacsmʌnob tu yorob.
Mʌꞌ ja wirej,
jeꞌ u chꞌic suraquirob tu tꞌʌnob u bʌjiriꞌeꞌ quireꞌ tu yirob taj ta wacsex ta worex tiꞌ Cristo.
17 Mʌꞌ ja wirej,
jach tsoy wa quic mucꞌyajex quireꞌ tan ic manex tu tsoyir.
Aroꞌ tsoy yaꞌaric Cꞌuj ic mucꞌyajex wa raꞌ u cꞌat Cꞌuj.
Chen wa cu mucꞌyaj mac,
quireꞌ caj u yacs u siꞌpir.
Caj mucꞌyajnʌjij quireꞌ raꞌ u boꞌorir u siꞌpir.
18 Mʌꞌ ja wirej,
u bʌjiriꞌ Cristo caj u cꞌub u winquirir caꞌ quinsaꞌc u boꞌorirex ic siꞌpir.
Caj u toc rucꞌs ic siꞌpirex.
A Jesúsoꞌ mʌnaꞌ u siꞌpir a tiꞌoꞌ,
caj quinsaꞌb quireꞌ jach cꞌasoꞌonex a toꞌonexoꞌ.
Caj quim u winquirir,
chen ricꞌsaꞌb u jach pixamoꞌ quir u pʌyic ic berex caꞌanan.
19 Caj tsꞌoc u quimin Jesús,
caj ricꞌsaꞌb u pixam.
Chen mʌꞌ toy ocac u winquirir caj bin u tsecꞌtaj u tꞌʌn.
Tiꞌ bin u tsecꞌtej u tꞌʌn tu cu yerar a mac a tiꞌ yʌnob ich cꞌacꞌ.
20 Caj bin u pixam Jesús caj u tsecꞌt u tꞌʌn tu cu yerar winic.
A jeꞌ winicaꞌ mʌꞌ ju quibob u tꞌʌn Cꞌuj uchiꞌ.
Robob cuxaꞌanob tu qꞌuinin tiꞌ yʌn Noé uch.
Cꞌaj techex,
a Cꞌujoꞌ,
caj u paj u betic u chem Noé uch.
Cax chan ber u betic Noé uch,
caj u quiꞌ pajaꞌb u caꞌ cꞌaxic yorob quir u pꞌʌticob u siꞌpirob.
Chen mʌꞌ yaꞌab caj oc ich chemiꞌ.
Chen ocho caj ocob ich chem.
Ocob putsꞌurob ich chem,
soc mʌꞌ u quimin soc mʌꞌ u jururob.
21 Tij quirex bic tabar caj u tac u bʌj Noé uch.
Aroꞌ,
quir u camsicoꞌonex biquinin cu yacsic jaꞌ tu joꞌr mac.
Mʌꞌ ja wirej,
rajiꞌ cu taquicoꞌonex xan,
a cu yacsaꞌr jaꞌ tic joꞌrexoꞌ.
Mʌꞌ quir a wichirexiꞌ quir a waꞌariquex tiꞌ Cꞌuj ta cꞌaxex ta worex quir a wacsex ta worex tiꞌ Cristo.
A mac toc acsaꞌb jaꞌ tu joꞌr rajiꞌ irej Jesús caj riqꞌuij caj tsꞌoc u quimin.
Rajen tu tac toꞌonex Jesús.
22 Mʌꞌ ja wirej,
caj riqꞌuij Jesús ich u quimirir,
caj bin caꞌanan.
Tar cu bin cutar tu noj Cꞌuj,
soc ic tsꞌurintiquex ich caꞌanan yejer tu cotor mac.
Rajiꞌ tsꞌurintaꞌb Jesús ten yʌjmasirob u tꞌʌn Cꞌuj.
Rajiꞌ tsꞌurintaꞌb Jesús ten yʌjtꞌʌninob a tiꞌ yʌnob ich yocꞌocab.