A JEꞌ JUꞌUNAꞌ, RAJIꞌ TIꞌ U YET WINIQUIROB JUDÍO A TANTANXER CɅJAꞌANOB. RAJIꞌ TU TSꞌIBTA SANTIAGO
1
A tenoꞌ Santiagojen.
U cꞌurewen Cꞌuj.
U cꞌurewen Jaj Tsꞌur Jesucristo xan.
Tantanxer ich yocꞌocab quin rʌc tꞌʌnic a rajiꞌob u yoꞌnen Israel,
a doce yoꞌnenoꞌ,
rajen tan in tsꞌibtic techex a jeꞌ juꞌunaꞌ soc a xaquic a wirex.
Caꞌ ic najtej a baꞌ cu tar ich Cꞌujeꞌ
2 Quiꞌquint a worex in bʌjobechex caꞌ bin a wuꞌyex u tumtic a worex.
Cax wa baꞌ quir u tumtic a worex.
3 Mʌꞌ ja wirej,
raꞌ u qꞌuinin caꞌ bin a wuꞌyex u tumtic a worex yirej wa taj ta wacsa ta worex.
Chichquint a worex soc a quiꞌ cʌniquex soc nemʌꞌ biquechexiꞌ.
4 Rajen caꞌ a mucꞌtex a baꞌ cu tar u tumtiquex a worex soc raꞌ cu bin u chichquintiquex a worex soc abaywoꞌ cꞌuchaꞌan a worex a mucꞌtex tu cotor baꞌ.
A baxucoꞌ wa ta cʌneꞌex aroꞌ taj ta wacsex ta worex.
5 Rajen wa mʌꞌ a werex bic tabar a mʌnex tu tsoyir an ten bic Cꞌuj u cꞌat,
jeꞌ u tsꞌic techex Cꞌuj quir a najtiquex bic tabar a mʌnex tu tsoyir wa ca cꞌatiquex tiꞌ Cꞌuj.
Quireꞌ a Cꞌujoꞌ jeꞌ u tsꞌic techex,
cax wa mun a cꞌatex,
quireꞌ quiꞌ yor u tsꞌic techex.
Mʌꞌ ju yaꞌarej mʌꞌ u tsꞌa techex a Cꞌujoꞌ.
6 Wa ber ca cꞌatiquex tiꞌ Cꞌuj,
toc acsex ta wor u tꞌʌn caꞌ bin u tsꞌaje techex Cꞌuj.
Mʌꞌ a tucriquex ta worex chichin,
mʌꞌ ju tsꞌaꞌbʌr techex.
Wa ca tucriquex ta worex chichin,
a baxucoꞌ mʌꞌ tan a wacsiquex ta wor,
rajen irechex u yamin petjaꞌ cu tar yicꞌar cu wʌcꞌʌs bin u yamin tu pach.
7 Wa baxuc tu cʌn u yamin petjaꞌ.
Mʌꞌ u chen tucric wa jeꞌ u tsꞌaꞌbʌr tiꞌ ten Cꞌuj a baꞌ u cꞌatoꞌ
8 quireꞌ rajiꞌ ir u yaꞌamin petjaꞌ quireꞌ mʌꞌ ju tucraj wa jeꞌ u yamtaꞌr ten Cꞌujeꞌ.
A baywoꞌ mʌꞌ u yer bic tabar u man tu tsoyiriꞌ.
9 Wa otsirchʌjechex in bʌjobechex quiꞌquint a worex caꞌ a wuꞌy u yamtiquechex Cꞌuj,
tsoy caꞌ a wuꞌyex jach caremechex ten Cꞌuj.
10 Baxuc a neyʌn a taqꞌuinex in bʌjobechex quiꞌquint a worex quireꞌ Cꞌuj tu chaꞌ u choquint a worex u jer.
Mʌꞌ ja wirej,
a mac neyʌn u taqꞌuin mʌꞌ u yuchtar teꞌ ich yocꞌocab bayiririꞌ u taqꞌuin mʌꞌ u yuchtar.
Irej u topcheꞌ,
quij,
mʌꞌ u chich pꞌatʌr cu rʌc jutur.
11 Wa cu nacar ic yum cu jach chʌcʌchʌjʌr,
cu tijir a suꞌucoꞌ,
cu jutur u topꞌ,
cax tsoy u topꞌ caꞌch,
cu tsꞌutsꞌur cu cꞌastar.
Baxuc a neyʌn u taqꞌuin xan,
mʌꞌ u chich pꞌatʌr,
cu quimin tu cu nejaric u taqꞌuin.
A baꞌ cu tar u tumtic ij corex
12 Quiꞌ ij corex wa quic mucꞌtiquex a baꞌ cu tar toꞌon.
Caꞌ bin tsꞌocac u tumtic ij corex wa mʌꞌ tic pꞌuspachtex Cꞌuj,
jeꞌ u tsꞌic toꞌonex Cꞌuj quir ij cuxtarex munt qꞌuin.
Jeꞌ u tsꞌic toꞌonex Cꞌuj quireꞌ quic yajquintiquex Cꞌuj,
quireꞌ baxuc caj u toc ara toꞌonex Cꞌuj.
13 A Cꞌujoꞌ,
mʌnaꞌ mac tumtic yor a Cꞌujoꞌ quireꞌ u pʌyic u siꞌpir.
Baxuc xan,
a Cꞌujoꞌ,
mʌꞌ u tumtej yor mac quir u pʌyic u siꞌpir.
14 Mʌꞌ ja wirej,
rajiꞌ cu pʌyic ic siꞌpirex a baꞌ quic jach pachtiquex tij corex,
a cꞌasoꞌ.
Bayiriꞌ xan raꞌ cu pʌyic ic siꞌpirex a cꞌas quic tucriquexoꞌ.
15 Wa quic chaꞌic u pʌyic ic siꞌpirex aroꞌ quireꞌ cꞌas quic pachtiquex,
quireꞌ cꞌas quic tucriquex.
Rajiꞌ cu bin u jach pʌyic ic berex soc jach yʌn ic siꞌpirex.
Rajiꞌ cu bin sʌticoꞌonex.
16 Rajen mʌꞌ a wʌcꞌʌs tus aric a bʌjiriꞌexeꞌ in bʌjobechex,
quij,
quireꞌ in jach yajechex quireꞌ a Cꞌujoꞌ mʌꞌ u tumtic yor mac quir u pʌyic a siꞌpir.
Chen a Cꞌujoꞌ cu pʌyiquechex tu tsoyir.
17 Tu cotor a baꞌ tsoyir cu tar toꞌonex quij cꞌʌmiquex tiꞌ Cꞌuj.
Quireꞌ mʌꞌ cꞌas a cu tar ich Cꞌujoꞌ.
Mʌꞌ ja wirej,
Cꞌuj tu bet u sasirir caꞌanan.
Yʌn qꞌuineꞌ cu baꞌar u sasirir caꞌanan.
Mʌꞌ baxuc a Cꞌujoꞌ,
chen u jach tsoyir a Cꞌuj mʌꞌ ju baꞌarʌr.
Mʌꞌ ju cꞌaxic u tucur rajen a Cꞌujoꞌ mʌꞌ u tumte yor mac quir u pʌyir u siꞌpir.
18 Rajen caj ic yʌn batꞌan acsaj tij corex tiꞌ u tajir u tꞌʌn Cꞌuj quireꞌ a baywoꞌ u cꞌat Cꞌuj,
rajen jach nojechex a techexoꞌ.
Rajen tu chꞌaj u pararintoꞌonex Cꞌuj.
Bic tabar jach taj caꞌ ij cꞌujintiquex Cꞌuj
19 Uꞌyex in bʌjobechex in jach yajechex wa mac cu tsicbʌtechex.
Toc quiꞌ uꞌyex soc mʌꞌ seb a nunquiquex a baꞌ ca tucriquex,
soc mʌꞌ seb cu pꞌujurex a worex.
20 Mʌꞌ ja wirej,
wa tic tsꞌiquenta mac.
Mʌꞌ tsoy caꞌ ic tus tucrej wa tij quiꞌquintex yor Cꞌuj.
21 Rajen caꞌ ic pꞌʌtex a baꞌ cꞌasir cu pʌyic ic siꞌpirex,
caꞌ ic pꞌʌtex ic tsicbʌtiquex a tiꞌ yʌn jach manan cꞌasoꞌ.
Seb a quiꞌ cꞌʌmiquex u tꞌʌn Cꞌuj a tu tsꞌa techex Cꞌuj quireꞌ rajiꞌ cꞌuchaꞌan yor u taquicoꞌonex u tꞌʌn Cꞌuj.
22 Quibex a baꞌ cu yaꞌaric techex Cꞌuj.
Mʌꞌ chen jariꞌ a wuꞌyiquex a baꞌ cu yaꞌaric Cꞌuj.
Quireꞌ caꞌ manacoꞌonex tu tsoyir xan.
Wa mʌꞌ jic manex tu tsoyir,
ic wʌcꞌʌs bʌjiriꞌex tan ic tusiquex.
23 Wa quic chen uꞌyiquex u tꞌʌn Cꞌuj chen mʌꞌ tan ij quibiquex,
cu tubur toꞌonex iroꞌonex a mac a cu yiric u wich yejer nen.
24 Caꞌ bin tsꞌocac ij quiriquex ij quichex yejer nen quic binex.
Jeroj seb cu tubur toꞌon wa ecꞌ ij quichex.
25 Mʌꞌ ja wirej,
a baꞌ tu toc araj toꞌonex Cꞌuj jach tsoy.
Quireꞌ raꞌ cu rucꞌsic toꞌonex ic siꞌpirex.
Quireꞌ bajeꞌrer tij cuꞌyex rajen tic acsex tij corex.
Wa mʌꞌ ju tubur toꞌonex a baꞌ tij cuꞌyex yaꞌaric Cꞌuj.
Caꞌ ic quibiquex a Cꞌujoꞌ bin u caꞌ u quiꞌ yamtoꞌonex.
Jeroj quiꞌ ij corex a baꞌ quic betiquex.
26 Wa quic tus tucriquex tij corex tij cacsex tij corex.
Chen quic pꞌastiquex ic racꞌobex.
Ic wʌcꞌʌs bʌjiriꞌex quic tusariquex quireꞌ mʌꞌ tan ic jach cꞌujintiquex Cꞌuj.
27 Wa taj caj ij quibex u tꞌʌn Cꞌuj tiꞌ ic Tetex.
Caꞌ ic yajquintex mac caꞌ ic yamtex.
Bayiriꞌ xquic caꞌ ic yamtex a quimen u mamoꞌ.
Bayiriꞌ caꞌ ic yamtex a quimij u nʌꞌ,
a quimij u tet xan.
Baxuc xan mʌꞌ ic chaꞌic ij cacsiquex ic siꞌpirex.
Quireꞌ a baywoꞌ tan ic quiꞌquintiquex yor Cꞌuj.